وصلت على حافة الجنون من تصرفات ريلي رعاية الاطفال

عنوان الموضوع : وصلت على حافة الجنون من تصرفات ريلي رعاية الاطفال
مقدم من طرف منتديات الضمير العربي

السلام عليكم بنات


اشحالكم

اطلب منكم الدعاء
احس عمري بتخبل من هالريل
من اول ما تزوجنا كان شوي بخيل و عنيد و ما يسوي لي سالفة مووول و تصرفاته تجلط تجلط تجلط

و انا ماخليت شي ما قريت و اتعدل و تعلمت احلى الطبخات و عيالي الحمد لله هادين بشهادة الكل و ريلي تغير وايد وايد للأحسن و ريلي من زود الوناسة يقول لربعه حرمتي مدلعتني و حرمتي معززتني و حرمتي و حرمتي
و يوصل لي الكلام من حريمهم و صرنا عائلة مثالية و ما علينا كلام


بس المصيبة اني كنت ضاغطة نفسي علشان كل شي يكون تمام
و مضحية براحتي حالي حال اي ام تبغي تحافظ ع بيتها علشان أمور البيت تمشي بسلام
ويكون بيتي هو الملجأ الآمن لريلي و عيالي



و لكن الفترة الأخيرة احس ريلي تغير و رجع لطبعه الأولي
يعني صار يعلي صوته و يبخل شوية شوية
كل يوم تحقيق و على كل شي تحقيق
حتى لو رايحة بيت اهلي ابا اشوف امي يسألني شو عندج
كيف يعني شو عندج ؟ ابا اشوف امي
ربيعتي بنفس فريجنا لو رحت لها تحقيق

كل شي بطنشه بس انه يرفع صوته عليي قدام اللي يسوى و اللي ما يسوى لاء

ف انا طفرت و لو قلت لها انا متضايجة من شي يقول لي خلاص لا تطلعين وايد عطيتج ويه
انزين شو خصه و يوم اناقشه يقول لي لا تجبريني احلف يمين
ف اسكت

يعني اللحين رجعنا لنقطة الصفر و رجع لطبايعة الكريهه ف بداية زواجنا
ما توقعت ف يوم ترجع هذيك الايام السودا

ما اقدر ارمس لانه الكل يشوفنا مثاليين و عاقلين و بالعكس يطلبون منا نصلح بين الناس و هم ما يعرفون انه حالتنا صارت حالة

دعواتكم بنات تتعدل الأمور انا نفسيتي تعبانة

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يمكن الغلط انج انتي كنتي تسايرينه عشان تتغاضين بعض الاطباع منه
بس! بها الشي انتي مسحتي شخصيتج جدامه
ويمكن يوم بغيتي تردين انتي الاوليه هو رفض تغيرج ورجع مثل ماكان
حاولي تغيرينه بس مب على حساب انج تضغطين على عمرج
وعسى الله يوفقكم

__________________________________________________ __________

>>>> الرد الثاني :

بس مسحتي الشخصيه!!!!! دلعتيه والدلع مب عيب بس الرياييل يوم يشوفون الحرمه ساكته خلاص ومب بس هم اي انسان يوم يشوف الطرف الثاني مسالم على طول يطلع عقده فيه!

عادي مااعرف شو اقول هههههههههه لو تاخذين اجازه منه هههههههههه بيعرف قيمتك

__________________________________________________ __________

>>>> الرد الثالث :

ردي القساوة بالحنان وراح يلين لو هو حجر ولا تجبري عليه يحلف يمين صدقيه وامنحيه الثقة وحبيه اكثر وهتمي فيه اكثر وحنين عليه ومافيها عيب لو دلعتيه اكثر واكثر لا تخجلين هذا زوجك حلالك سوي ال يحبه وكوني فعينه انتي إمرأه فيكي كل الصفات
وربي يوفقك ويسعدك ويقر عينه بكي يارب ويهدي سركم

__________________________________________________ __________

>>>> الرد الرابع :

حلو الرد إلى قبلي فعﻻ الكلمة الطيبه

بتخليه غصب عنه يحترمج ودووم ادعي

ربي يسخره لج ويهدى سركم

وماحد يتم على حال

__________________________________________________ __________

>>>> الرد الخامس :

الغالية يمكن محسودين , حاولي ترقين نفسك وزوجك وعيالك وبيتك وعليكي بالدعاء والصدقة