عروستنا محتاجة فزعتكم جمال و اناقة

عنوان الموضوع : عروستنا محتاجة فزعتكم جمال و اناقة
مقدم من طرف منتديات الضمير العربي

السلام عليكم
خواتي بنات وسيدات الامارات
شخباركم ان شاء الله بخير

حبيباتي ما عليكم امر ابي جدول الزهاب حق ربيعتي عروس مب عارفة شو تشتري وشو تاخذ وشو الاساسيات وللاسف ماعندها وقت جدامها بس شهرين عشان تخلص كل شي

اللي عندها جدول كااامل وشامل كل شي بالتفصيل ياريت تطرش لي عالخاص
وجزاكم الله كل خير والله ينولكم اللي في خاطركم ان شاء الله ^_^

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم والرحمه


مرحبااا عرااايسناا الحلواااات


طبعن موضوووعي هوو عباااره عن لسته مفصله للزهبه مع نصااايح بسييطه لكم عشان تستفيدوون منها وعشاان لا تتوتريين وتجمعيين افكااارج وماتحسيين رووحج ضااايعه تحت الضغط


اول شي يا بنووته يا اموووره لازم يكون عندج نووتز يكون وياج فكل مكان تكتبيين كل شي تاخذييينه وتكوون عندج لستتج جااهزه وكل ماخذتي شي شطبتي منهاا طبعن كل شي فلستتج تكتبيين حذاله العدد حسب ميزانيتج وحسب رايج ..

الفواتير يا بناات كلها خلوها عندكم حتى فواتير الجمعيه عشاان تعرفين وين صرفتي بيزاج ..

وبنات ركزوو عن نقطة الحمل .. يعني عادي تحملون بسرعه وملابسكم ماتيى ع سايزكم عشان جيه لاتكثروون وايد بالملابس وترااج بتروحيين السوق من فتره لثاانيه ..
ونقطه ثانيه عشان تعرفيين ذوووق ريلج من خلال شهر العسل والفتره الاولى من زواجكم وبعدين خذي اكثرر ..

نصيحه يا بنات .. لو سكنتي فبيت أهل ريلج بعد الزواج .. لا تغيرين من ستايلج وتقولين اهل ريلي مايلبسون جيه .. انتي عروس ولازم يكون لج ستايلج الخاص .. واهم شي تفكرين فيه كيف تطلعين حلوه واموره .. ولا تفكرين ان ممكن يقولون شكلي متكلف ولا ولا ......


نبدأ بسم الله ..
أول شي طبعن نيى للملابس ..

[ قمصان النوم ] وكثروو منها يا بناات خبركم الرياايل كله يسمعوون بقصاان النوم وقمصاان النووم عااد خل يشوووف كل شي عليج فنوعي بالاستاايلاات وباللواان .. وطبعن لاتنسين قميص اول يوم .. واذا انتي قصيره .. مش لازم تلبسين قميص وايد طويل عشان لا ياخذ كل قامتج ..


[ الاندر وير ] خذو لكم منها نوعين .. نوع اللي هو المغري لغرفة النوم وخذي منه كل الدزاينات واللواان الدنتيل وغيره .. والنوع الثاني لي هو الستايل القطني العملي لبرع البيت وللشغل .. بتحصلين منهم فنعومي قطني وشكله حلو ومرتب بس هب تلبسيينهم يدام ريلج .. بس لبرع البيت وطبعن بتنفعكم لاياام الدوره .. وطبعن الستيان الشفاف للمناسبات ..وبنات ركز ع نقطة انكم تاخذون الاندر وير بعد ماتاخذون ملابسكم .. عشان تتناسب الالواان وما يصير تضارب باللوان ..


[ هليهوبات & دلاغات ] الهليهوبات الشفافه والشبك والدلاغات الشبك لي تنلبس ويا بعض قمصان النوم ..


[ مخاوير ] طبعن .. نوعي بالدزايناات .. وبالالوان وطبعن المخاوير تعتمد بالاسااس على القطعه فخذو الوان متنوعه لا تاخذين لون واحد .. وابتعدوو عن اللواان الترابيه والباهتيه لانها تعطيج شكل باهت وتصلح اكثر للحريم الكبار .. سوو لكم بعد من دزاين المغربيات الخفيفه ..




[ جلابيات ] فصليلج جلابيات حلوه وبدزاينات عصريه هب الساده شرات الحريم لكبار وفيها بس شي بسيط .. وهاي بعض الدزاينات ..




[ دريسات كم طويل ] اذا بتسكنين عند هل ريلج . لا تلبسين كل يوم مخورات لان شكلج بيكون ممل .. فنوعي بالافكار .. يعني مثلن دريسان نااعمه وايدها طويله وتعطيج شكل كيووت وشبابي اكثر عن المخاوير .. وهذي بعض الدزاينات لي حبيتها .. بس انتو خلو ايدها طويله وبدال لاتكون بلوزز خولها دريس طويل ..







[ ماكسي دريسس ] خذوو يا بنات الماكسي دريسس شكله وايد حلوو وناعم وحتى لو كنتي بروحج فبيت ولا عند هل ريلج البسي عليها الجاكيت لي نص الظهر .. وع فكرة بتفيدج وايد فترة الحمل ..




[ بجايم ] طبعن مايمنع انج تلبسين بجايم وانتي عروس .. بالعكس تعطي انطباع انج بعدج بنوته وصغيرونه وفيج روح الشباب طبعن نوعي بالبجايم .. الطويل ساتان وقطن .. وبعد الشورتات القصيره حلوه لمن تنشين الصبح وقاعده فالحجره تكحلين بس عينج وتلسين هالبجايم .. وبتفيدج بعد أيام الدورة الشهرية .. بتحصلون منها في لاسينزاا ولا اطلبو من فكتوريا سيكريت والحين ما شا الله كثرت هالمحلات فالمولات ..




[ فساتين قصيرة ] خذوو يا بنات من الفساتين القصيره وخذو من الدزاينات لي تطلع انوثتكم ومن اللي يطلع دلعكم .. يعني نوعي .. خذي من الستايل المغري .. ومن الستايل البنوتي .. وفصلو لكم بعد فساتين ستايل فيناج لي هو شرات مال ايام الخمسينات .. بحط لكم صور منهم بعد ..





[ ميني سكيرت وشورتات ] يا بنات التنانير القصيره الجنز وغيرها .. واللي تكون قصيره زياده احسن لانها تعطي قامه وما تقصر .. وبعد الشورتات الجنز خذي لج كم واحد .. عشان يوم تسوين شغل البيت ولا تبين تطبخين شي البسيهم مع توب حمالي .. عشان يبين شكلج حلوو وناعم وانتي تشتغلين .. خبركم الريايل حاطين فبالهم ان الوحده يوم تشتغل فالبيت شكلها يكووون حده مش مرررتب فأنتي غيري هالصوره عند ريلج ..




[ جاكيت ] جاكيت لشهر العسل ع حسب البلاد لي بتروحينها لو بارده ولا شرات جونا ..


[ بناطيل جنز & ليقنقات & كولونات & برمودات ] طبعن نوعي وخذي لج كميه منهم .. لان وايد بتفيدج تختارين بس لها التوب اللي يناسبها وطلعتي مرتبه واموره .. واللي مش طويله تلبس كولونات اكثر لانه يعطي طول وينسق جسمج ..





[ التوبات والبلايز ] خذوو لكم توبات انوااع لي بايد واللي بدون ايد .. بس السبووري خذو لكم منه قطعه ولا قطعتين بس .. والباقي كله انثوي .. وخذوو من كل اللواان لا تنحكرين عاللون اللي يعيبج وبس ..والبلايز تقدرون تفصلون لكم عند خياط شاطر كم قميص شيفون وبتحصلون دزاينات وايد فالنت .. وهاذي بعد الدزاينات ..




[ تنورة جنز طويله ] خذو لكم تنوره ولا تنورتين جنز .. حلوات مرتبات .. والبسي وياهم اي قميص فيه شغل وحلو ولا من البلايز لي فصليتهم الشيفون .. بتستفيدين منها وقت الزنأه ع قولتهم ..


--------------------------------------------------------------------------------
[ روب الحمام والفوط ] خذو لكم روبين وفوطتين للشعر عشان يووم تغسلينهم يكون عندج الثاني .. وكم فوطه للويه ..


[ روبات ناعمه ] خذو لكم روبات ناعمه من الساتان والويل ولا فصلولها انتو .. ويفضل تكون قصيره اقصر عن الركب لانها انعم .. عشان لو ماكان لج بارض تلبسين شي وتبين تحطين ميكب ولا تسوين شعرج .. تلبسين الاندر وير وعليهم هالروب .. ويكون شكلج حلو فنفس الوقت .. وهاذي صورة عشان توضح لكم الفكرة ..




[ شلح ] شلح عشان تلبسينهم ويا الكنادير والدريسات والتنانير .. وخذو لكم من الشلح الكامله عشان المخاوير الشيفون ..


[ فساتين نعومه ] خذو لكم كم من فستان ناعم .. واحد عشان اول ماتبطلين فستان العرس تلبسينه وتطلعين ويا ريلج ويكون حده ناعم وسمبل ومش متكلف يعني استرتش ساده مثلن .. وبعد فستان عشان لو كانت عندكم مناسبه ولا حفله تلبسينه ..


[ شيلة صلاة وسيادتها ] شوفي لج اي دزاين حلو ومرتب .. وخذي لج قطعه حلوه ورديه ولا اي لون حلو .. وحطي عليه دانتيل مرتب ومن نفس القطعه خل يسوي لج الخياط سياده وياها .. عشان يوم تتصلين يكون شكلج مرتب بعد ..


[ سويترات ] سويترات يا بنات لو كان الجو بارد تلبسينه عالبجامه .. ولا بعد بتفيدج لو كنتي تبين تلبسين الماكي دريسس .. وبعد لو بتلبسين جنز .. وتبين بس تلبسين تيوب ساده البسي عليه السويتر ..




[ شال ] شاال نعومي عشاان تحطينه عليج لو كنتبي لابسه شي حفر وحسيتي ببرد ويعطييج فنفس الوقت شكل دلع ..


[ العبي & كعوبها وشنطها ] وبنات قبل لاتفصلون العبي اول خذي الكعب والشنطه مناسبات لعبض وبعدين فصلي عليهم العبااه المناسبه لهم .. خذي لج كم طقم وخذي لج عالاقل شنطه ولا ثنين براند .. عشان يوم تطلعين يكون شكلج مرتب مب كل شي فصوب .. وفصلو لكم عالاقل عباه وحده عمليه بس مش ساده تماما عالاقل شغل اسود بسيط .. ولا ننسى عباة الاعراس .. عباه وحده للاعراس وتاخذين لها شنطة صغيرة مالت المناسبات قريى ولا قولد والعباه شراتها .. ولا تنسين تاخذين لج بوك لمن تاخذين الشنط ..




[ الفلاتات & السليبرات & نعال الحمام ] خذوو لكم نعوم سطاحي فلات عشان لمن تكونين فالبيت لو لبستي شورت ولا ميني سكيرت تلسين وياهم فلات وخلخال يطلع شكلج حده كيوت .. والسليبرات طبعن للبجايم .. ولا تنسيين نعال الحمام ..


[ دلغه ] خذي لج كم من دلاغ حلوين ومن النوع القصير لي اشكالهم حلوه والوانهم بعد حلوه .. والبسيهم ساعات ويا البجايم لو ماكان لج خاطر عالسليبر ..

--------------------------------------------------------------------------------
[ لوازم الشعر ]
1.سشوار مجفف للشعر ..
2.عصي الشعر ..
3.سشوار الشعر المشط العادي ..
4.سشوار السيراميك ..
5.جهاز رولات الشعر .. ويفضل العود عشان يسوي رولات عوده .. وايد بيفيدج ويسرح شعرج بطريقة حلوه وبوقت قصير ..
6.موس الشعر أو جل .. الجل بيفيدج اذا كان شعرج امبونه ويفي عقب ماتغسلين شعرج حطي ع شعرج شوي جل أو موس ولمن يجف بيطلع بشكل حلو ..
7.مشط .. خذي البروش لي تمشطين فيه شعرج دوم .. وخي ابو سنان عريضه عشان عقب السبوح ..
8.سبراي الشعر .. عشان لو بسوين تسريحه وتبين تثبتينها ..
9.مقابض الشعر السودا .. البنس ..
10.توكات وفيونكات للشعر .. بتحصلين وايد فالمحلات العاديه .. وبتحصلين بعد فكليرز واكسسوارز .. انا خذت من مدينة زايد فيونكات واايد حلوه للشعر وسعرهاا حده رخيص مش شرات اكسسوارز وكليرز ..
11.ربطات شعر .. الستيك .. عشان لو سويتي ذيل حصان ..
12.تيجان نعومه للشعر .. لو فليتي شعرج البسيهم ..




[ لوشن لليد والرجل ] خذي لوشن للريل ولوشن للايد .. للعنايه اليوميه ..


[ واقي شمس ] لاتنسون واقي الشمس عشان لايرووح اتمامكم فبشرتكم قبل العرس عالفااضي ..


[ كريم الصباح والمساء ] لاتهملين بشرتج وخاصه بفترة شهر العسل لان الجو بيكون متغير عليها ..


[ مزيل المكياج ] خذي الكريم ولا الاويل ولا خذي المناديل .. او الحليب من جونسون وايد اوكي انا استخدمه لازاله المكياج وابد مايعور العين وينظف عدل مدل ..


[ عطورفرنسية & عطور عربية & دهن العود & ودخون & عود & عطر الفراش ] وكل وحده وتاخذ ع حسب ذوقها واذا تعرف ذوق ريلها تاخذ من اللي يعيبه ..


[ كولكشنات الجسم ] خذو لكم من ذا بودي شوف .. ولا من صيدلية بوتس .. ولا من ماكس & سبنسر .. واللي ماكس اند سبنسر بتحصلون ويا عطورهم وكل شي واسعارهم حدها حلوه .. ونفس الشي بوتس اسعارهم حلوه .. بس ماتحصلون عطور وياها .. اما بالنسبة لذي بودي شوب كلكم عارفينه اكيد ..


[ ليفة الجسم ] خذوها من ذي بودي شوب اللي هي ع شكل قفاز ..


[ مكينة حلاقة ] مكينة حلاقة للظروره والاوقات الحرجه ويفضل مكينة براون ام ثلاث رؤؤس لانها تشل الشعر لي توه بيظهر الصغير ..


[ السوع والاكسسواريز ] خيلج ساعتين عالاقل حلوات براند طبعن .. وتكون مناسبه لاطقم العبي والشنط والكعوب .. وخذي لج بعد ساعه كيجوال اللي هي تلبسينها دوم فالبيت وجيه روليكس ولا دزاين مقارب لها .. وعن الاكسسوارات يفضل تكون ذهب يعني لاتاخذون الكسسواريز العادي .. خذوو ذهب ولا فضه ترا عندهم دزايناات حلوه وكشوخيه .. بس خذيلج تراجي وبتحصلين في الدوو واكسسواريز وكليرز تراجي حلوين ..





[ الأحزمه ] خذو لكم حزمة من اللي تلبس اعلى الخصر هاي ويست .. حلوه تطلع عالقمصاان الشيفون .. وبعد من الحزمه العريضة لي تكون لو ويست .. لي تلبسينها تحت شوي ..


[ شنط الزهاب ] خذو لكم كولكشن حلو ومرتب .. بتحصلون فسوق التنين دزاينات غريبه عجيبه وبكل اللوان والدزاينات .. وبعد اسعارهم حلوه ورخيصه ..


[ نظارة شمسية ] اذا كنتي تحبين تلبسين نظارة شمسه .. خذيلج وحده ..


[ عدسات ] خذي لج لون واحد هو اللي تلبسينه مش كل يوم بلون .. ولا تلبسين من اول الايام عشان لايتعود ريلج عليج بالعدسه ..


[ شنطة الميكب ] شنطة ميكب حلوه صغيره وحده للهاند باق والثانيه علبه الميكب لي بتحطينها فغرفتج ويفضل تكون ورديه ولا حمراا .. خبركم هاللواان بالنسبه للشباااب الوااان انثوووويه واللي تستخدمهم دلووعه خخخخخخ


[ شنطة أو علبة لحفظ الاكسسوارات ] شنطه حلوه مرتبه عشان تحطين فيهم اكسسواراتج ..


[ اكياس الاورجنزل للملابس ] تاخذون قطعة اورجنزا وتودينها للخياط ويخيطها لج بالدزاين لي تحبينه . وتعطرين قمصان النوم والاندر وير وتبخرينها وتحطينها داخلها .. وغيرها ..وتكون ملابسج مرتبه فالكبت ..





--------------------------------------------------------------------------------

[ اكياس التعطير ] اكياس التعطير بتحصلونها فكل المحلات .. لايف ستايل مالتهم حلوه .. وتقدرون بعد تسونها انتو .. تشترون اكياس الاورجنزا الجاهزه الصغيره .. وتحطون فيها عيش وتعطرينه .. لان العيش يمسك الريحه .. وطول مانتي حاطته يعطر حواليه .. اهم شي تعطرينه بعطر حلو .. وتحطينها فالجيسه وتصكرينها .. و وزعيهم بين الملابس .. وفالحمام اكرمكم الله .. وادراج التسريحه .. المهم تخلينها حوالين كل شي عشان تفوح فكل مكان ..


[ اكياس الاورجنزا أو التور الصغار ] فصليلج اياهم ولا خذيهم جاهزات .. للاكسسوارات قبل لا تحطينهم فعلبتهم .. وبعد لبعض اغراض الميكب .. و بعض اغراض ترتيب الشعر .. يعني المهم تستخدمينه فترتيب اغراضج ..

[ الذهب & فضة ]

كل وحده طبعن وذوقها فالذهب .. بس لاتصرفون بيزاتكم كلها عالذهب اذا بتخلونه بس فالكبت ومابتلبسونه .. وطبعا في اشياء مالنا غنى عنها :
1.اساور .. خذيلج جم من سويره نعومه ذهب وفضه .. بتحصلون وايد دزاينات حلوه فمحلات الذهب ..
2.سلسلة .. خذيلج جم من سلسلة تلبسينهم ع رقبتج .. نعومه وخفيفه عشان تقدرين تلبسينهم دوم .. وما اتم رقبتج فاضيه ..
3.شغابات .. خذيلج شغابات صغار نقط وقلوب وغيرهم .. كتاكيت صغار عشان يوم تلبسين بجايم ماتكون اذنج فاضيه وتكونين صدق بنت ..
4.خلخال .. خذي لج بعد خلخاال ناعم للريل عشان لو لبستي تنوره قصيره ولا شورت ولا تيشيرت المووهيم اي شي قصير تنبان ريلج نعومه .. يعني بمعنى .. صد الريال تحت صد فوق يحصلج بكامل انوثتج .. لان بعض الاشياء حتى ل بسيطه تعطي انطباع ..


[ المناكير ] خذيلج الوان مختلفه .. اسلامي .. وبعد عادي لايام الدوره .. وكثري من اللوان الورديه .. ولاتنسين اللون الاحمر


[ عدة الأظافر ] مبرد وغيره واللي تستخدم باقي الاشياء منظف وبروش تاخذ بعد ..


[ تشقير ] مشقر الشعر لاتنسينه بتحتايينه لو مارحتي الصوالين ..


[ زيت عطري & الستااند ] من فروت اند باشين مالهم اغلى من باقي المحلات بس زيوووتهم تفوووح والاستااند بعد قود كوليتي .. ولا تنسون الشموع الصغار لي تحطينها داخل الاستاند ..


[ Eye Drops ] قطرة مطهره للعين .. من Opther عشان لو دخل غبار ولا صابون ..


[ المكياج ]
طبعن المكباج نقسمه لقسمين .. قسم الميكب اليومي لي ينحط فالبيت .. وميكب الطلعات والسهرات ..
الميكب اليومي :

1.بودرة طبيه .. خذيلج البودرة الطبيه لي تنباع فالصيدلياات للاستعماال اليومي ..
2.بلاشر .. خذي لج بلاشر وردي فااتح من مكيااجي كولكشن صبايا لان شكله طبيعي وناعم عالويه وعشان مايكون شكلج شااحب ..
3.الكحل .. خذي الكحل لي متعوده عليه .. ونصيحتي لكم بكحل شانيل وااايد حلوو واسود غاامج وفنفس الوقت ماينزل .. اتوقع سعره بشي وثمانين درهم ..
4.ليب ستيك .. للشفااايف خذي القلوسات الملونات مش الشفافه يعني لي تيى لون اوردي واللي اتم عالشفايف لمدة طويله لان مب كل ساعه بتركضين تحطين لج .. وعن تجربتي الشخصيه انصحكم بقلوس من فوريفر 52 بتحصلون منه اتوقع عند تاجرات المنتدى .. بتحطينه وبتاكلين وبتتوضين وكل شي وهو ما انمسح ويتم لساعاات طويله وعندهم الوان حدهاااااا طبييعي كنه لون شفايفج .. انا عاد حصلته فمدينة زايد وسعره وايد رخيص ..
5.المسكراا .. مسكرة نيفياا .. فوليووم وايد حلوه الورديه و وايد خفيفه عالرمووش وماتحسين بثقلها ..

ميكب الطلعات والسهرات :

1.كريم اساس .. ديور أو ماكس فاكتور أو بن ناي
2.بودرة مضغوطة .. كانيبو أو شيسيدوو أو ماكس فاكتور
3.اللاوز باودر .. ميك اب فور ايفر أو شنيل
4.مثبت الميكب .. ماك أو جفنشي
5.بليتت مخفي عيوب البشره [ كونسيلرمتنوع ] .. ميكب فور ايفر أو بن ناي
6.كريم عازل الميكب عن البشره .. انقلوت
7.اللمعه .. ميك اب فور ايفر
8.الكحل الكريمي & الفرشه .. ماك
9.كحل .. شنيل أو ماك أو لانكوم
10.قلم الحواجب .. ديور
11.ماسكرا .. استي لاودر أو ايف سان لوران أو ماكس فاكتور
12.الأي لاينر .. لانكوم
13.الشدو .. ماك أو انقلوت أو بن ناي
14.الارواج .. ماك أو انقلوت أو ايف سان لوران أو جفنشي
15.الفرش .. ذي بودي شوب
16.منظف الفرش .. ماك
17.رموش .. ماك أو ميك اب فور ايفر
18.بلاشر .. ماك أو شنيل




يتبع





--------------------------------------------------------------------------------
[ غريضات الجمعية ]


1.صابون الويه .. نوعج المفضل المتعوده عليه بشرتج غسول او غيره
2.الشامبو & البلسم .. لي ناسب نوع شعرج
3.أعواد تنظيف الأذن
4.قطن
5.أسيتون [ مزيل المناكير ] .. خذي من دايسو .. عندهم اشكال حلوه وكيوت
6.أظافر صناعيه احتياط .. بتحصلين فدايسو .. اللي هي لسته كامله .. مب لسته وحده بس لستاتات حذال بعض .. وسعرها بس 7 دراهم ..
7.صمغ الاظافر .. لو خذتي اظافر صناعيه .. خذي الصمغ .. بتحصلين منه فدايسو .. ولا صيدلية بوتس ..
8.فوط صحيه شهرية
9.فوط صحية يوميه
10.غسول المنطقة الحساسة & السبراي & الباودر & المناديل .. بس يفضل عدم استخدامهم في بداية الزواج .. واستخدام الملح الخشن أول الايام تفدايا لالتهابات المنطقه الحساسه ..
11.حمام زيت الشعر [ الفاشكول ]
12.تيشو [ المحارم الورقية ] الاكياس الصغار للهاند باق ..
13.تيشو معطر [ محارم ورقية معطره ] للهاند باق بعد .. بتفيدكم بعد الاكل . فالمطاعم لي مايقدمون فيها الفوط الساخنه والمناديل المعطره ..
14.تيشو ديتول ..
15.فحم سريع الاشتعال & الولاعه & مدخن صغير & ملقط الفحم عسب لاتعورين ايدج .. او تقدرون تاخذون مدخن الكهربه الصغير ..
16.مقشر للويه ..
17.لوشن مرطب للايد صغير .. للهاند باق ..
18.علوج للهاند باق ..
19.فازلين
20.لوازم الاسنان .. فرشاة الاسنان & المعجون & مقشر اللسان & خيط الاسنان & مضمضة الاسنان [ الغرغرة ]
21.معطرات للفم .. اكسترا معطر للفم .. حلاوة بولو النعناع .. تيك تاك النعناع .. اوراق معطره الفم .. بخاخ معطر الفم من عند الصيدليه ..
22.معطر رائحة الحمام .. اكرمكم الله .. عشان لاتتعرضين لموقف محجرج .. وافضل نوع Air Wick ريحته حلوه ومب شرات الملطفات الثانيه كنج تارسه البقعه ملطف .. ويقضي عالريحه الهب حلوه وتيى ريحته خفيفه .. انصحكم بـ نسيم الجبل وايد حلوو .. مكتوب عليه يقضي على الروائح الكريهه ..
23.ديودرينت .. وخذو من ليدي سبيد ستيك عالاقل بداية الزواج لان ريحة حلوه وقويه .. وبعدين خذو شي اخف منه ..
24.عدة الطواري .. لزق جروح & ديتول صغير & بندول اكسترا & بندول فلو مال الزجام ..
25.مطهر الايد .. الانتي بكتيريا وحطيه فالهاند باق بتحتاجينه وايد ..
26.موس ابو شفره .. بتحصلونه فدايسو وفالجمعيات لوقت الضروره بعد ..
27.ماي الاكسجين .. وامسحي فيه الاذن بعد السبوح لانه ينظف الاذن من داخل وبرع .. بتحصلينه فالصيدلية ..
28.تونيك للويه .. اسكينول اول غيره .. منظف للبشرة عشان لاتظهر لج حبوب فشهر العسل وانتي فغنى عنها ..
29.اوراق الواكس من فيت .. خذو باكيت من الكبير .. وباكيت مال خط البكني .. لشهر العسل احتياط ..
30.نوتس .. خذيلج نوته صغيره وقلم لان اكيد بتحتاين تكتبين شي منيه مناك ..
31.منظره صغيرة .. للهاند باق لوقت الضروره ..
32.خيط وابره احتياطي ..
33.مرطب للشفايف .. شركة بالمرز أو هيمالايا .. ويتحصل فالجمعيات ..
34.تايد صغير
35.مقص صغير & ملقط ..


[ للمنطقة الحساسة ]

1.ملح خشن .. غسول للمنطقه بس لاتستخدمينه يوميا .. مرتين او ثلاث فالاسبوع كفايه .. وحطي شوي بس فالماي مب وايد .. وبعد استخدميه بعد الدوره ..
2.مسك دم الغزال .. للتطهير بعد الدوره .. بتحصلين طريقة استخدامه .. دوري فقوقل ..
3.مسك العروس .. من عبدالصمد القرشي .. لونه ابيض وريحته حلوه وبارده .. تدهنين فيه المنطقة الحساسه من برع .. ولا تكثريين بس شي بسيط عشان يعطي ريحه حلوه ..
4.مكعبات المسك ..بعد من عبدالصمد القرشي ولا تاخذين من العطارين لانه مش مظمون .. تبشرينه وتحطينه فشوية ماي وتمسحينه بقطنه عالمنطقه .. وبتحصلين بعد طريقة بالتفصيل فقوقل ..


[ أشياء لا تنسينهاا ]
مصحف صغير .. أّذكار الصباح والمساء .. عطر صغير دوم يكون فالشنطه .. دعاء الزواج أول يوم كتبيه بورقه وشلي الورقه وياج فالشنطه .. جرج الموبايل .. لو بتشلين كام وياج لاتنسين الجرج و ممري احتياطي .. وبعد خذي وياج شي تتسلين فيه عشان لو نشيتي من وقت وريلج راقد وتمملتي روحج تحصلين شي يسليج ..




وجيه خلصتت لستتناااا .. الموضووع مجهوود شخصي .. هالله هالله بالردووود الحلوووه والله من اسبووعين وانا اشتغل ع هاللسته ...

ربي يوووفقكم عرااايسناا .. ويرزق كل بنووته بالزوج الصااالح ..

تقبلوو مني .. سوبر فــــيونكـــــــه ^^

للأمـــــــــــــــــــــــــــــــــــــــــانه والشاهد الله..منقووووووووووووووووووووووووول

__________________________________________________ __________

>>>> الرد الثاني :

إن شاء الله البنات يفيدونج ^_^

__________________________________________________ __________

>>>> الرد الثالث :

موفقه حبوبه

__________________________________________________ __________

>>>> الرد الرابع :

موفقة ان شاء الله البنات ما يقصرن

__________________________________________________ __________

>>>> الرد الخامس :

ابببببببببببببببببببببببببببب