السلام عليكن خواتي
عندي طريقة حشوة وهي تصلح حق السمبوسة ..
وحق طاجن البطاطا .. وحق فتة الباذنجان ...
االمقادير :
كيس واحد لحم مفروم بقري ( تفتحينه ونحطينه في مشخلة ضيقة وتحطين المشخلة في ملة فيها ماي عسب الدم يروح منها )
بصلة واحدة متوسطة مقطعة ناعمة
قرفة
ملح
ومكعب ماجي
صنوبر محمص
خضروات مشكلة ( نغسلها بالماء خاصة اذا كان مثلجة )
الطريقة :
تحطين شوية زيت في الجدر
تضيفين البصل وعلى نار خفيفة تقلين تحمسين البصل الى ان يتغير لونه ( بس مايصير اسود )
تضيفين عليه اللحم المفروم وتخلطينه ..
طبعا اللحم بيطلع شوية ماي واقلبي المقادير كلها مع بعض
اضيفي القرفة وعادة انا احط ملقعة كبيرة ( ملعقة طعام ) بحيث ان تشوفين اللحم صار لونه بني
..
وخلي على نار هادئة واقلبي المقادير كل شوي لين تطلع الرائحة ..
ومن المهم جدا ان يوم تشمين تكون ريحة القرفة هي اللي مغطية .
..
بعدين نضيف مكعب ماجي ونفتته ونخلط المقادير مع بعض ..
نضيف الخضار المشكلة ونحط غطاء على الجدر مدة 5 الى 10 دقائق
..
خلاص نشيل الخلطة كلها ونحطها في مشخلة بحيث ان الزيت الزيادة ينزل منها
نخلط معاها الصنوبر المحمص ونتركه يبرد عقب نحشي به السمبوسة ..
وبالهناء ..
اذاحبيتوا بكتب لك طاجن البطاطا ..وفتة الباذنجان ..
ترا صدق اكلات حلوة ودوم اسويها ان كان حق الضيوف والا حق البيت ...
وسلامتكم خواتي
