فطاير الخبز الايراني من ايد العيوز من مطبخ الامارات
عنوان الموضوع : فطاير الخبز الايراني من ايد العيوز من مطبخ الامارات
مقدم من طرف منتديات الضمير العربي
السلام عليكم
اشحالكم عساكم بخير خواتي
اليوم طبخت لكم اكله أنما ايه على قولت اخوانا المصريين هههههههههه
بتاكلون اصابيعكم وراها
المقادير سهله وفي كل بيت وسهل انكم تيبونها
وسمحولي عاد يقول لكم الطريقه بالغتنا المحليه
ببتدي بالمقادير
خبز ايراني
دجاج صدور طبعا بدون عظم
جزر
قشطه
جبن بوك او المراعي او اي نوع بس يكون سائل
بصل
كزبره خضرا مفرومه
وثوم
ملح
كركم
زيت لقلي البصل
وزيت الزيتون لدهن الفطاير
بهارات افضل نوع الكاري لانه اطيب يطلع في الطعم
وانا ماحطيت مقادير للكميه حطوا حسب افراد العائله
بنبتدي بطريقه
اول شي نحط الدجاج على النار ويوم يغلي نزيل عنه الرغوه
يوم نشوفه قرب النضج نحط الملح والكركم عليه
ونخليه شويه لين ياخذ الدجاج لون اصفر من الكركم
تقريبا ربع ساعه
بعدين نطفي النار عنه ونخليه يبرد و نفتته قطه صغار
ناخذ الجزر ونبشره في المبشره نخليه ناعم مانقطعه مبشور
احسن شي بمبشرة الجبن
نقطع البصل سرايح ونحمره في الزين يوم يحمر البصل نحط الجزر عليه
ونحركه على نار هاديه لين نشوف الجزر نضج ناخز الدجاج المفتت وثوم
ونحطه على الجزر والبصل ونحط عليه الكاري وشويه ملح لاتنسون انه الدجاج مالحينه من قبل ونخليه
على نار هاديه نغطيه وبين فتره وفتره نحركه لانه كل شي ناضح بس نبغي الخلطه تاخذ من لون الجزر وطعم الكاري ومانطول في طبخه تقريبا ربع ساعه نحط عليه الكزبره المفرومه ونطفي النار عنه ونخليه يبرد
ويوم نتأكد انه بارد مب حار بيخترب الاكل تراه
نحط القشطه والجبن عليه ونحلطه
وهذي صورة الخلطه وهي جاهزه
https://uae-up.com/uploads/77bdb568b1.gif
ونجهز صينيه للفرن
وناخذ الخبز الايراني ونحط عليه خلطة الدجاج ونسكرها نسويها نفس السندويش نسكرها من كل الجهات على شان ماتطلع الخلطه وتخرب علينا الفطاير ويطلع طعمها محروق
وهذي صوره الخبز وانا محطيه عليه خلطة الدجاج
https://uae-up.com/uploads/6d10c1e4af.gif
بعد مانخلص من لف الكميه الفطاير الي عندنا
ونسخن الفرن وندهن الفطاير بزيت الزيتون ونحطها في الفرن
وهذي صورة الفطاير وانا محطيتنه في الصينية الفرن
https://uae-up.com/uploads/effc71e33f.gif
وهذي صورة الفطاير بعد ماطلعته من الفرن ماخذه لون ذهبي
https://uae-up.com/uploads/e972f3f255.gif
نطلعها من الفرن ونقدمها
وهذا شكلها النهائي بعد ماجهزت وقدمتها في الصحن
https://uae-up.com/uploads/9db772c530.gif
وألف صحه وعافيه على قلبكم
وللي عنده اي سؤال انا خاضره
قولولي عاد شو رايكم في طبخي وبغيكم تجربونه ان شاء الله يعجبكم
:22 (22): وهني مقدما :22 (22):
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
الله يعطيج العافية عيوزتي
__________________________________________________ __________
>>>> الرد الثاني :
تسلمين فديتج مشكوره على مرورج الغاليه
__________________________________________________ __________
>>>> الرد الثالث :
مشكوره و تسلم ايديج انشالله بسويها حق العشا اليوم
__________________________________________________ __________
>>>> الرد الرابع :
الله يسلمج الغاليه وعساه هني وعافيه ان شاء الله ردي علي خبر عاد شو يكون طعمها وشو راي الاهل فيها
بتوفيج لج ان شاء الله
__________________________________________________ __________
>>>> الرد الخامس :