عيالي ودوامي لعشاق السياحة

عنوان الموضوع : عيالي ودوامي لعشاق السياحة
مقدم من طرف منتديات الضمير العربي

هلا خواتي

انا موظفة واطلع لدوامي 7 ونص ما ارد الا 2 ونص ومرات 3 ونص على حسب الظروف عندي بنوته وبشكارتين وشقتي صغيرة يوميا اخلي بشكارة بالبيت تنظف وتخلص شغل والثانية اوديها بيت امي مع بنتي وقت الدوام ، اتغيرت ظروفي ويبت بيبي من 6 شهور ربي يحفظه، وما عرفت اتصرف كنت حابة اودي بنتي حضانة بس اقرب حضانة بينها وبين بيتي 45 دقيقه وما اريد ابهدل بنتي بالباص خصوصا ان عمرها 3 سنوات ، فاضطريت اودي الشغالتين مع الطفلين بيت امي طول هالفترة ، بس احس امي تعبت من العيال والبشاكير خصوصا ان خواتي الهنتين بعد ايبون عيالهم فالبيت مستوي مهرجان والبشاكير تارسين الدنيا واحس امي متضايجة الله يعينها ، بشاكيري من زمان عندي ومرتاحتلهم بس مب مرتاحة اودر عيالي بالبيت واسير الدوام عنهم ، بنفس الوقت مضايجة على امي اللي تعبانه من حشرة اليهال ، ياتني فكرة اركب كميرات بحيث اقدر اشيك عليهم بالموبايل من دوامي وفي ناس خبروني ان كميرة اتصالات ممتازة لهالغرض ..
ابغي تجاربكم بنات اللي يودرون عيالهم بالبيت مع الشغالات
لا تقولولي استقيل لاني محتاجة الشغل نوعا ما وباجيلي 4 سنوات على التقاعد فافكر اني انتظر التقاعد بس احاتي عيالي

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اااااه قلبي عند عيالج
ياختي ماعرف شو انصحج انا وحده تركت الشغل ومحتاجه اساعد زوجي لكن قلبي مايتحمل اترك فلذات كبدي عند خادمات ماعرف بكرة شو ربي كاتب يصير .... الحمدلله
الله يهون عليج يارب
لو تقدري تتركي العمل ياقرب وقت كان افضل لمصلحه اطفالج
انا ربة بيت

__________________________________________________ __________

>>>> الرد الثاني :

ممكن تطلبين مربية عربيه او جليسه اطفال خلال الوقت الي تروجين فيه للدوام ... دوري وابحثي اكيد بتلاقين
لن الخدم شر سواء انتي مع عيالج او مو معاهم

__________________________________________________ __________

>>>> الرد الثالث :

انزين ليش تاخذين خدامتين
خدامه تكفي حق الثنين
ماشالله بنتج 3 سنين حتى الاكل تر تاكل بروحها الحينا اكيد
يعني مشي الحال هالسنه لين الكاجي ا
و عادي كل الامهات يضايجون من الحشره بس يتونسون ترى
وانتي ما تغصبين امج ع اليلسه بالبيت لانها اكيد تطلع مثل ما تبى
ومب بس انتي الي تيبين عيالج يعني حتى خواتج لو انتي ما وديتي عيالج ترى استل خواتج يودون ليش تحطين كميرا و تمين من الدوام تجيكين

اتريي السنه بتخلص و بنتج اوردي بتكون في تسجيل الكيجي فليش متلعوزه
انا رايي حبيبتي انج تكملين عادي
بس ايام وديهم بيت امج و ايام بيت عمج اذا بنفس الاماره
يعني اسبوع اهني و اسبوع اهناكي
و عطي امج شهريا مبلغ مجاملتا انا جي اسوي

ابا اودي بنتي الحضانه بس احس حرام تلتزم وهي بعدها مال سنتين
تراها بدرس 15 سنه و كل سنه يزيد دوامهم ساعه الله يعين يوم بتروح المدرسه متى بترد 5 العصر يمكن ههههههههه

__________________________________________________ __________

>>>> الرد الرابع :

انا ما الومج محتاجة خدامتين اقل شي


انا بصراحة بخبرج شو اسوي ...
اودي بنتي الحضانة و عمرها سنة و نص و الحضانة قريب من بيت ابوي و امي و مرات امي ولا خواتي ولا ريلي يرجعونها من الحضانة لو تأخرت و الحضانة فيها كيمرات
النونو اخليه عند الخدامة في بيت اهلي و عندي غرفة خاصة فيني و فيها كيمرة ع تلفوني و اجيك ع النونو و اوصي الخدامة ما تلعوز امي و تزقرها كل فترة

و حاليا انا ادور لي مكان ثاني اشتغل فيه و يكون فيه حضانة خاصة عسب اودي بنتي وياي
و عقب سنة بنتقل للسكن حذال بيت اهلي و بكون مرتاحة


الحل انج ترتبين امورج يا ادورين لج شغل فيه حضانة
او تغيرين مكان سكنج و تسكنين حذال اهلج و المفروض ريلج يقدر الوضع الصعب اللي انتي فيه
دامج متضايقة ايلسي ويا امج قوليلها امي حبيبتي بس اصبري علي جمن شهر و تدخل البنت الكي جي و سامحيني تعبتج بس شو اسوي مالي غيرج
صدقيني الام مهما كانت قلبها وسيع و كبير و تحب عيالها و لوو تحرطمت فهي بشر
انا اتحرطم ع عيالي و ما بلوم امي لو تتحرطم عليهم احسن من البشاكير و مشاكلهم

__________________________________________________ __________

>>>> الرد الخامس :

عزيزتي مهما كانت ظروفج عويصة لا تخلين بناتج عند الخدم ابدا ابدا
الخدم للتنظيف و الغسيل و الكوي و المطبخ و مش مؤهلين ابدا انهم يجابلون العيال فترة دوامج
الحل :
اما تودين عيالج حضانة ثقة و تكون قريبة من دوامج او تخلبنهم عند الوالدة و الكبيرة ما باقي لها شي و تدخل كي جي الله يحفظها لكم ، يعني بس هالفترة الوالدة بتتحمل مسؤولية اثنين عقب كم شهر بس بتكون الصغيرة عندها و طبعا هذا الافضل
و في النهاية ارجع اقول لا للخدم لمجابلة العيال
ربي يحفظهم لج