تجربتي في تعليم بنتي ترك البامبرز لعشاق السياحة
عنوان الموضوع : تجربتي في تعليم بنتي ترك البامبرز لعشاق السياحة
مقدم من طرف منتديات الضمير العربي
السلام عليكم. شحالكم خواتي؟ انا ما اكتب وايد مواضيع بس اليوم بحط هذا الموضوع لانه ادري شي وايد امهات مثل وضعي ويمكن موضوعي يفيدهم. بنتي فديتها عمرها سنتين ونص وكان لازم ابدا اعلمها كيف تترك البامبرز بس كنت كله ااجل لاني اشتغل وارد البيت قريب العصر واكون تعبانه وكل يوم اقول باجر. وكل اليهال اللي فعمرها فالعايلة تعلموا بس انا كنت ااجل بحكم شغلي وهالشي كان مسولي ارق اقول كيف بعلمها وانا اشتغل وما كنت ابغي الخدامة تعلمها لاني مقتنعة انه مافي مثل الام بتتحمل الطفل وانه هالشي شغل الام بس. المهم من 3 اسابيع تقريبا نويت ابدا وكان يوم الاربعاء داومت عادي ويوم رديت البيت الساعة 4 عقيت عنها البامبرز ووديتها الحمام وكلمتها قلتلها ماما اذا تبين تسوين بيبي او كاكا سوي هني بس اوكي؟ خلاص مافي بامبرز اوكي؟ قولي ماما وديني الحمام؟ اوكي؟ تمت اطالعني وحسيت انها ما فهمت عدل بس ماشا الله الاطفال اذكياء ويفهمون بسرعة. من الاشياء اللي ساعدتني:
1. خدتلها كرسي للحمام على قياسها عشان ماطيح.
2. خذتلها يلاسة للككا عليها رسوم ميكي ماوس اللي تحبه وهالشي ساعدني وايد.
3. كنت اوديها الحمام كل ربع ساعة او 20 دقيقه ايلسها واقوللها ياللي سوي بيبي.
4. كنت وايد اذكرها اقولها عوشة وين يسوون بيبي؟ وين يسوون كاكا؟ تقولي فالحمام ههههه.
5. في هاي الفترة وايد كنت وياها يعني ماكنت اطلع من البيت وطول الوقت هي معايا حتى لو نزلت تحت انزل وياها واتم قاعدة المهم فنفس المكان اللي هي فيه وحتى لو كانت تلعب كنت اوديها الحمام كل ربع ساعة او بالكثير نص ساعة.
6. كنت وايد صبورة معاها لاني اعرف انه الموظوع يباله صبر وطولة بال لين ما يتعود الطفل.
اول 3 ايام كانت تستوي حوادث يعني لو تأخرت عليها ما وديتها كانت تسوي على عمرها. وانا ما اخفي عليكم وايد كنت شالة هم الموضوع وياني احباط وكنت اقول فخاطري ماعليه بتتعلم ان شا الله. والحمد لله من رابع يوم كنت فالدوام واتصلت فيني الخدامة قالتلي انه بنتي طلبت بروحها تروح الحمام. الحمد لله. والحين تحسنت اكثر الحمدلله. بس بعدني البسها بامبرز فليل بس لكن ببتدي اوديها الحمام فليل يعني ببتدي اوعيها عشان تسوي بيبي وبرد ارقدها.
وبس هاي تجربتي وبغيت افيدكم فيها. والله يسهل على كل ام فتربية عيالها.
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
__________________________________________________ __________
>>>> الرد الثاني :
صدقج هذا الموضوع يسوي قلق وارق للأم وحتى الفطام .... الحمدلله لك يارب على نعمة الذرية والحمدلله لك يارب على نعمة الصبر والتحمل اللي في قلب الأم.... ان شاء الله نجني ثمار ها التعب عند كبر سننا ويكونون قرة عين لنا يارررب...
__________________________________________________ __________
>>>> الرد الثالث :
ما شا الله عليكي اختي الله يوفقك
حاولي قبل النوم بساعتين لا تشربينها سوائل , وقبل النوم مباشرة تسير الحمام , ويوم تصحين لصلاة الفجر وعيها تروح الحمام , لا تقلقي بترجع تنام بسرررررعة
وفي كلوتات مبطنه وتنغسل ممكن تلبسينها بالليل بدل الحفاظه
والله يخليها لك
__________________________________________________ __________
>>>> الرد الرابع :
مشكورة على التجربة
ربي يحفظها
__________________________________________________ __________
>>>> الرد الخامس :
يزاج الله خير على التجربه
بالفعل هي صعبه وايد في البدايه
بس عقب بتستغربين كيف كبروا...
