ساصبر حتى يمل الصبر من صبري (2) رعاية الاطفال

عنوان الموضوع : ساصبر حتى يمل الصبر من صبري (2) رعاية الاطفال
مقدم من طرف منتديات الضمير العربي

السلام عليكم ورحمة الله وبركاته
هلا بنات شخباركم ان شالله طيبين
ألي ماتعرف سالفتي هذا الرابط
https://forum.uaewomen.net/showthread...517&highlight=
(ياليت البنات ألي يلومني بزواجي لايعلقون أنا لما تزوجت كان عمري 16سنة وأنتي بعمرج ألي طاف العشرين ياايه تلوميني في وقت أنا كنت فيه جاهل ؟؟ومالي أحد بالدنيا ولا كنت أعرف أدبر نفسي وزوج أمي كان بالورق بس مسلم وهو بالحقيقة عنده ديانة ثانية ويكرهني ويضايقني بصلاتي كنت أجمع الصلوات بسبته ..وزواجي كان خلاص لي فرجاءاً يكفي تجريح الزمن كفى ووفى )

وألي تقولي زوريها وحاولي فيها ذكرتوني بموضوع قبل سنتين ونص يوم أني ولدت بولدي رحت لها لين البيت وأنا كنت توني طالعه من الأربعين وفي أيدي ولدي عشان تشوفه يمكن يحن قلبها وأستسمح منها وتسامحني ...تعرفون انها دزتني على اليدار وكان ولدي بيطيح من أيدي على الأرض لو مب بناتها مسكن ولدي من أيدي وتم يصارخ من الخوف وأنا أشوفها وأقولها أمي فلانه ترى هذا ولدج وأنتي أمي حرام ألي تسوينه تمت تصارخ بشكل هستيري وتقول أنتي ماتعرفين الحرام ..الحرام أنج مايجوز تتزوجين واحد مربنج وتمت تسبني وتبا تمد أيدها وتفر وأنتوا بكرامه النعال وأنا وقتها كنت خايفه على ولدي ضميته لصدري وثنيت راسي عليه وتميت أزحف للباب وطلعت أركض أصيح لسياره بدون شيله وهي وراي وبناتها يهدونها وريلي كان في السياره وتم يصارخ عليها وأنا أقوله خلاص دخيلك أركب خلنا نروح .... صدق من بعدها فقدت الأمل بأنها تسامحني ..ويالله يارب تلين قلبها علي وتسامحني إذا أنا جرحتها مره بزواجي من ريلها ..أنا كل يوم أنجرح


المهم في مستجدات بحياتي حبيت تشاركوني فيها....
الحمدلله تعرفت على أختي عن طريق بنتي طرشت ورقه مع بنتي لبنت أختي ألي بصفها كتبت عليه أم فلان ورقم تلفوني كلميني ظروري وفعلا أتصلت بنفس اليوم العصر الساعه4 وكانت خايفه ان يكون الموضوع مشكله عن بنتها وطمنتها وسلمت عليها وصدمتها لما قتلها أن انا أختج وفرحتني لما رحبت فيني بحراره وأصرت أن نشوف بعض وفعلا تواعدنا في حديقة عامه.. من الفرحه كنت من العصر في الحديقة في عز الحر ماكان فيني صبر متشوقه لشوف أختي ألي ماعرف شكلها وبعد ساعه ونص من الانتظار وصلت بنت حنطاويه أكثر من كلمة جميلة ماشالله عليها ومعاها حرمه كبيرة بالسن بعد ماسلمت عليها أكتشفت انها حرمة أبوي ماتوقعتها بهذه الطيبه والحنيه سألتني عن امي وقتلها أن أمي تزوجت وصارت لها أسره خاصة فيها وأني تزوجت و و و و كنا ندخل بسالفه ونطلع من سالفه لين ماطاحت عيني على بنتي وهي تلعب مع بنت أختي ويساعدن بعض في تسلق الألعاب دمعت عيني من الفرحه وصيحتهم معاي كان مشهد مؤثر أقرب للخيال وكأني عايشه بقصة من قصص الأفلام تخيلوا المنظر بنتي فوق اللعبه وماده أيدها تحت لبنت أختي عشان تصعدها اللعبه يمكن تشوفنه موقف عادي بس صدقوني حسيت بحساس غريب.. ودعنا بعض ورجعت البيت وأحس الدنيا مب واسعتني من الفرحه وفي هذيج الليله نمت بغرفت عيالي على سرير بنتي الصغير وأنا حاضنتها وخليت أبو العيال ينام بروحه هههههه
مرت الأيام وأنا وأختي دوم بتواصل الحمدلله إذا مب أتصال لازم نقرق على الوتسب ساعه ..
من سبوعين رحت أنا وبنيتي السوق عشان ناخذ خام وأفصلي حق العيد دخلت محل كان مزحوم شوي بالحريم وكانت بنتي معاي وخليت ولدي مع الخدامه في السياره ولدي عمره سنتين ونص ..وأنا كنت قاعده أشوف الخام سمعت حرمه بصوت عالي تقول بنات الحرام ماخلوا لبنات الحلال شي حسبي الله عليكن يابنات (ذكرت جنسية أمي)!! ألتفت لقيتها أمي فلانه زوجة ريلي وكانت أطالعني بشكل مباشر حتى الحريم ألي ألتفتوا عليها ردوا يطالعوني لأنهم عرفوا أن الكلام موجهلي يوم شافوها تطالعني.. مسكت أيد بنتي وطلعت من المحل وركبت السيارة وكنت ماسكه نفسي عن الصياح قدام عيالي .. وطبعا أنا ألي أسوق ونحن في الشارع قربت بنتي راسها من أذني عشان ماتسمعنا الخدامه تقولي ماما ليش الحرمه ألي في المحل كانت تصارخ علينا؟ ضحكت عشان ماتحس بشي قلتلها مادريبها يمكن كانت تبا تشتري القطعه ألي بيدي.. ردت بنتي ماماه ترى الحرمه ماتستحي والله عيب عليها فشلتنا .. قلتلها حبيبتي الحرمه كبيره ماتعرف مسكينه ...على فكره بنتي ماشالله عقلها يوزن بلد ياما أحاول أرقع مواضيع عندها أحسها عندها إجابه لأي نقاش ..قمت وشغلت المسجل وحطيت اغنية الاطفال (بنيتي الحبوبه مالت حلا ترك)وقامت بنتي ادندن مع الأغنية وولدي يحرك راسه ويرقص مستانس فيها فديتهم كل ما أشوفهم أحس اني أسعد إنسانه بالدنيا ينسوني همومي.

أحس كل الطرق مسدوده بيني وبين أمي فلانه والله يلوم ألي يلومها بس صدق أنجرحت مب لانها فشلتني قدام الحريم لا لأنها فشلتني قدام بنتي لأني دوم أمدحها قدام بنتي ماودي تعرف بنتي أنها هي نفسها ألي أمدحها أبي تكون صورتها عند عيالي مثل الصوره الي ربتني فيها ...دعواتكم لي بنات
وأخيرا (ساصبر حتى يمل الصبر من صبري ..سأصبر حتى يأذن الله في أمري)

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

أول شي حبيبتي فرحتلج لأنج تعرفتي على أختج والدور على باقي أخوانج والحمدلله ترى أنجاز انهم تقبلوج وحبوج
بخصوص أمج فلانه ماتنلام للحين مجروحه تعرفين ليش ؟ لأنج البنت ألي ربتها يعني كان بأمكانها تتقبلج لو كنتي غريبه بس أنتي بنتها ألي ربتها وترى ما ألومج لانج كنتي ضايعه وماعندج حد
كل ألي أقدر أقوله الله يخلي لج عيالج وريلج ولاتفقدين الأمل في امج فلانه خلج دوم صابره
عسى الله يوفقج أنتي جبل والجبل مايهزه ريح

__________________________________________________ __________

>>>> الرد الثاني :

الله يفرج همج
ما بعد الصبر إلا الفرج

__________________________________________________ __________

>>>> الرد الثالث :

الله يعطيج على قد نييتج ان شاءالله

__________________________________________________ __________

>>>> الرد الرابع :

الله يعطيج على قد نييتج ان شاءالله

__________________________________________________ __________

>>>> الرد الخامس :

الصراحه قصتج نفس قصص المسلسلات اللي انشوفها في التلفزون وايد مؤثره
انتي شفتي اختج وامها قلتي عنهم طيبات بس ليش الام رفضتج مب حرام ياخذون ورثج؟؟؟
الفلوس اتسير وترد حرام هالشيء لانه هذا حقج شرعا ومايحق لهم يخيرونج بين الورث والجواز لانه الاثنين هم حقوقج
انا لو كنت بدالج كنت بعاتب مرت ابوج احس هي اللي ماكانت تباج من بينهم

الله يحنن قلوبهن يارب

وعن مرت ريلج اعذريها اللي صار وياها مب شوي كانت ياتها مستقره ورحبت فيج وسوت فيج الخير وماقصرت وياج
واخر شيء اتزوجتي ريلها لا تلومينها لانه صدق قويه وانتي ماكان بيدج شيء الله يصلح من بينكم يارب وترد المياه لمجاريها