شو تضيفين ضيوفج فالعيد ؟ المطبخ اماراتي
عنوان الموضوع : شو تضيفين ضيوفج فالعيد ؟ المطبخ اماراتي
مقدم من طرف منتديات الضمير العربي
السلام عليكم والرحمة ..
جيف حالكن اخواتي ...
مباركن عليكن الشهر الفضيل .. جعلنا في ربنا من العتقاء يا رب...
انزين العيد جرب.. و ابي افكار و تجارب الحريم الحلويين شو يسوون للعيد و شو يحبون يضيفون الضيوف يعني شو الاكلات و السوالف السبيشل اللي يسوونها ...
و كيف تقضونه ويا الاهل ... يعني في حركات تسوونها مثل لعب و تنافس ولا شي...
ابي اغير هالسنة و ابي الكل يحب العيد و يتحمس له و طول اليوم نكون مستانسين فيه ..
و حتى نشارك الضيوف بعد هههههههه يعني حمااااااااااس
لوووول
ان شاء الله فهمتو المطلوب ^.^
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
وعليكم السلام ورحمة الله وبركاته
والله يبارك فيج والله يتقبل منا ان شاء الله
بالنسبه لنا يعني قوم اميه يحبون يسون شي اساسي في العيد وهو العرسيه والبلاليط و الفواكه نشتري من الجمعيه فواكه ونوديهم عند راعي الورد اللي في الجمعيه ينسقهم في سله مع الورود
وساعات اسوي كيكات مختلفه وسويتات اسويهم من النت
والعاصائر نطلبهم من المطعم ايبون لنا غراش كبار كوكتيل ورمان وافوكادو
وبعد مايخلا الامر من صياني الحلويات من باتشي وهالسوالف
__________________________________________________ __________
>>>> الرد الثاني :
حنا اهني في بيت عمتي انسوي البسكويت ( عين الجمل وغريبة وناريل ومعمول) كل من شغل البيت
واكيد المكسرات والموالح والاهم شيء هو خبز واللحم المشواي ساعات انسوي مجبوس لحم اعرف بتستغربين لانه هو ريوق وهو غداء تعرفين العيد وبذات اول يوم كضة الضيوف ما يوقفون وغير العصاير نيبهن من الكفتريا
على فكرة انا الي اسوي البسكويتات تخصصي في العيد ولله الحمد الكل يعيبه
__________________________________________________ __________
>>>> الرد الثالث :
شوفي موضوع البسكوت الي عندي فالرااابط
شي يديد و كيوووووووووت و الانظاااااااااار بطيييح عليه (( شي يديد ))
__________________________________________________ __________
>>>> الرد الرابع :
يزاكن الله خير اخواتي..
عطيتوني افكار حلوة ...
نبي افكار بعد خواتي ؟؟؟
يلا لازم فيه تفاعل ^.^
__________________________________________________ __________
>>>> الرد الخامس :
طبعا تتنوع عندنا الأطباق يعني مب كل عيد نفس الأكل فنطبخ في مطبخ شعبي عيش ولح ومرات دياي و الوالدة تسوي الهريس و ممكن الثريد و الفواكة أخوي ما شا الله عليه خبير في تنسيق الفواكة ساعات يخليها في وسط الفواله فتكون يايه على شكل طولي تقريبا متر وساعات على شكل رائري تكون على جوانب الفواله والمكسرات المتنوعة من فستق وكازو والحب وغيرة وشكولاته الفوالة والباتشي والبستاش والكيك والبسكويت ودلة الجاي والقهوة لازم
ومهرجانات مانسوي غير في الليل هالسنة أخوي مسوي مفاجأة يايب ألعاب نارية وايدة وبسسسسسسسسسسسسس هذا الي عندي
