حامل واريد نصايحكم وتوجيهاتكم للصحة

عنوان الموضوع : حامل واريد نصايحكم وتوجيهاتكم للصحة
مقدم من طرف منتديات الضمير العربي

السلام عليكم ورحمه الله وبركاته ...

هذا أول مشاركه لي فالمنتدى .. ما شاء الله منتدى مفيد ومميز ...

خواتي ... أريد مساعدتكم وتوجيهاتكم ونصايحكم ..


انا الحمد الله حامل وفشهري الرابع بدايه أسبوع 14..

انا أراجع بخاص.. لأنه دوام ريلي ما يساعد أنه يوديني أيام الأسبوع .. الله يحفظه ويوفقه يارب ...

وأنا هذا حملي الأول .. وما اعرف كيف اتصرف ..

انا للحين راجعت مرتين .. بس ما احس أنهم سو لي التحاليل كلها .. احس الدكتوره مش متفيجه ..

يوم اقرى بالمنتديات وأسأل ربعي وايد ادويه و تحاليل يسون لهم ..

احس بخوف على البي بي ..

وبعد للحين فيني لوعه .. وايد اصدع .. و ما أشتهي أكل شي ..

وإذا كلت شي احس معدتي ثجيله .. واشبع بسرعه ...

وأنا وزني ما زاد احس قل .. قبل الحمل كنت 53 و اللحين 52.4

وايد احس بوخز .. جي نفس الإبر فبطني .. ومرات كأنه تشنج أو شد عضلي .. ريلي يقول من البي بي .. بس انا اخاف من الشئ ...

والدكتوره اللي أراجع عندها كنديه .. فمرات ما اعرف اوصف لها .. اصلا مرات الأشياء اللي تصير فيني حتى ريلي ما اقدر اوصف له ...

انا أن شاء الله من شهر 4 بسكن فدبي .. فناويه افتح ملف ف مستشفى دبي .. يعني بكون بشهر 7 ..

عادي أكمل مراجعاتي عندهم عقب ولا لازم افتح الملف من اللحين ...

وبعدين أكلي ابد مش مرتب .. متعوده ع نظام الجامعه .. يعني ريوقي والغدي والعيش ابد مش مرتب ...

وقبل أكل بيض اللحين يلوع بجبدي ...

يعني قبل اتريق بيض أو عل العشي بس اللحين ابد ما اقدر ...

اسمحو لي خواتي طووولت وااايد .. بس بعدي ما كتبت كل اللي بخاطري ..

احس وايد طفرت بريلي .. ويحليله فتره امتحانات .. فقلت اخف عليه .. واصدع فيكم بدل لا اصدع فيه ...


أترى ردودكم .. والسموحه ..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

حبيبتي اول شي احب ابارك لج بحملج
خوفج هذا من كل شي طبيعي لانج بجرية كلنا كنا جي لان شي يديد علينا ومانعرف شي
وبخصوص ما يسون لج تحاليل وادوية وغيرة حبيبتي اذا حملج طبيعي ومافي شي ما راح يعطوج والتحاليل مال الدم والبول تكون من الاسبوع ال ٢٠ تكون فحص الحديد والسكر مب كله مرة وحدة يسوه كل شهر يسوون لج شي
والوخز اللي تقولين عنه هاي غازات في البطن مب اكثر عادي لا تحاتين
الله يثبت حملج ويقومج بالسلامة

__________________________________________________ __________

>>>> الرد الثاني :

اذا عندج بطاقه متابعة الحمل عادي تكملين متابعتج في اي مكان
بس لابد راوينهم البطاقه
و اذا عندج تقرير عن حالتج بعد يكون افضل
بيساعد في اكمال المتابعه

الله يتمملج على خير ان شاء الله

__________________________________________________ __________

>>>> الرد الثالث :

هذا كله من أعراض الحمل لاتحاتين ،،،، شي عادي ان الوزن ينزل فالشهورالاولى بسبة الوحام. الزيادة تكون اكثر شي في الشهور الوسطى والأخيرة *

__________________________________________________ __________

>>>> الرد الرابع :

الله يسهل حملج و ولادتج ويرزق كل محروم يارب

__________________________________________________ __________

>>>> الرد الخامس :

الله يسهل عليج الالم اللي نفس نغز الابر فبطنج من نقص الحديد لازم تاخذين حديد وفيتامين عشانج وعشان البيبي الله يقومج بالسلامه