السلام عليكم ورحمة الله وبركاته ~
اشحالكن ؟؟
انا فموضوعي هذا حابة اذكركن بشي بسيط*
اللي بتطبقه ... باذن الله رب العالمين ما بيخذلها وما بيقصر ويايها ...
كل بنت خاطرها رب العالمين يرزقها بالذرية الصالحة ..
ولو اتاخرت فحملها اتسير وما اتخلي دكتورة ما اتراجع عندها .. طبعا هالشي
مب غلط ... بالعكس شي طيب انه الوحده اتروح وتطمن ع جسمها اذا فيه شي صاير*
وياها لا سمح الله او كل شي تمام
المشكله .. في بنات يقولولهن الدكاتره انه ما فيهن الا العافية وبعد يتمن يوسوسن
وما يخلن شي الا وجربنه ... الا شي واااحد وهو الاساس اصلا !!!
انعرفه كلنا .. لكن للاسف نسهى عنه .. التوكل على الله والثقة به والتفاؤل خير به ..
اغلبية البنات يقولنها بلسانهن .. لكن هل هن صدقنها فقلبهن ؟؟؟
هل صدق احسنن النية والضن بخالقنا العظيم واتفائلن به خير !!
الدكاترة والابر والحبوب .. اغلب البنات يتكلن على هالاشيا ويتكلن عليها للاسف اكثر من اتكالهن على الله
مع ان الرزق اولا وآخرا هو من الرحيم الكريم ..
كل هالاشيا مجرد طرق مساعده .. ييسر بها رب العالمين الحمل ..
لكن الامر فالنهاية يرجع لله سبحانه وتعالى .. ان شاء اعطى .. وان شاء منع !!!
البنت اللي اتروح وتاخذ اي شي من هالاشيا واتقول خلاص هالشهر انا بحمل ..
ويمر هالشهر ورب العالمين ما امر بنزول رزقها... تفقد الامل واتخلي ابليس يلعب بعقلها ...
اتضيج واتضيج ريلها وياها ليش !!!
ليش ما قلتي انا بحمل باذن الله واتوكلتي عليه من قلبج وامنتي ابهالشي اولا ثم لجأتي للحبوب وغيره ،،،
واللي اتروح للدكاتره ويقولولها لا والله انتي مطوله .. واتصدقهم واتم متحطمة ..
ليش !!! الرزق بيد الدكاتره ولا بيد الرحمن ..؟
اتوقع مافي ولا بنيه من اللي افهالقسم ما قرت القصص اللي اتبين عظمة الرحمن
وكرمه مع عباده في النت ،، متروسه صفحات النت ابهالسوالف لكن للاسف هل من متعظ؟ ... ناس قالولهم الدكاتره عندكم العله لفلانيه وما يأسوا بالعكس
تمو يذكرون الله ويدعونه بقلب صادق .. ما مر عليهم الشهر الا ورب العالمين كرمهم
ع قد نيتهم وزود ~
الله هو اللي خالق اجسامنا وهو اعلم بها ...
لا دكاتره ولا غيرهم يوصلون لذرة وادناها من علمه سبحانه وتعالى !!
رزق العقيم .. يت عليج انتي او غيرج اللي ما فيكن الا العافيه باذنه ..
هو ان شاء هيأ رحمج ورقج فغمضة عين ،، سبحانه ان اراد شيئا فانما يقول له كن فيكون !!!
لا تيأسن يا خواتي من رحمة الله عز وجل ..
اغتنمن الفرصة والوقت .. والجأن للرحمن الرحيم !!
بالدعاء .. الاستغفار*
(( ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا*
وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) ))
قيام الليل ،،، قراءة القرآن والاذكار !!
هذه كلها ادوية جعلها الله بين ايدينا ،،
اتطهر نفوسنا وتشرح صدورنا واتقوي علاقتنا بالخالق عز وجل ...
ومالها اي تاثيرات جانبيه مثل الحبوب والابر
وغيرها ...*
الدوا جدام عينا ونحن غافلين عنه !!
اللي اتراكض للدكاتره واللي تاخذ الادوية بانتظام وتحسب الوقت عشان ايي موعد الحبه الثانيه وحالتها حاله !!
لو انها بس يلست بينها وبين نفسها واستغفرت ربها بقلب صادق ومتوكله عليه
وواثقه انه ما بيخذلها !!
جان شفتن العجايب من ورا قدرة الرحمن وكرمه ..
قيمن الليل لو بركعتين !!
مجرد ركعتين واتطلعن فيهن كل اللي فخاطركن ..*
صدقوني رب العالمين قادر ومستحيل يخذل عبد رجاه بقلب صادق*
خلق هالكون كله .. ع بالج ما بيقدر يخلق هالنطفه ويجعلها بشر !! حاشاه رب العباد
هو القادر على كل شي ..
السموحة ع الاطاله ..*
الموضوع كله لجل مصلحتكن ..
ومن واقع تجربه الصراحة .. اتمنى انه يفيدكن ..*
(لو أنكم تتوكلون على الله حق توكله لرزقكم كما يرزق الطير ، تغدو خماصا و تروح بطانا)
هذا مقطع صغير اللي بتسمعه صدقوني ما بتندم ...
https://f.cl.ly/items/3I130O2K372Q3P3...%20YouTube.mp4
(ربي لا تذرني فردا وانت خير الوارثين)
ربي يحفظكن*
،،،~
