السلام عليكم ورحمة الله وبركاته
اول شرط مابي اي عيااااااازاااااااااات نبي همه ونشاط واهتمام ومتابعه
هذا جدول شامل للوجه فقط تمشين عليه تحفظينه عندج ع السبورة , او تطبعينه وتعلقينه او حتى تكتبينه في ورقة
قبل كل شي أبيج تكونين بنفسيه معزمة على انها توصل للنتيجة الي هي تبيهـأأأ
وتحط صورتها جدامها لما كانت بشرتها تمام
وتكتب في غرفتها عبارات ايجابيه
مثلـأ : بشرتي بترجع مثل قبل واحسن
كل وحده ادرى بالجملة الي تناسبها تكتبها بخط عريييض وتعلقها
صدقوني ان المعنويات تفييييد فالعلاج بنسبة 50% وباجي العلاج ماديات
نبتدي بالامور الاهم
الشي ان زاد عن حده ينجلب ضده حتى لو طبيعي نراعي استخدام الجدول اقصد الماسكات كذا مرة فالاسبوع مب يومياً اما الباجي فـ لاباس
الزيت زيتون ثجيل ع الويه ولو ينحط ينحط نص ساعه بالكثير ويكون اصلي
مكعبات ثلج ماي ورد
تكثرين شرب ماي يوميا بالمعدل الطبيعي 7-8 أكواب
ونتجنب الامساك
تبدلين مخدتج اذ جديمه واذ لها لبسة تغسلينها بـ داوني او اي ملطف للملابس و من ثم ديتول للتعقيم
وتحاول تختار الملمس الناعم مب الخشن
الغرفة تكون نظيفة ومب مغبره وتهتم في نظافتها
المكيف تغسل الي داخله وترد تركبه ( ماعرف شو يسمونه ) المهم يكون شكثر فيه تراب ووصخ يكون جي مستطيل او مربع في المركزي والعادي
نحن اوريدي نغسل ويهنا للصلوات الـ 5 ولما انش من رقادنا , حاولي تغسلينه كل ماغسلتي يدج او دشيتي الحمام ربي يعز الجميع وكثري من غسيله بالماي البارد ( ماي صحة )
وبليز نراعي اجسامنا فالاكل الصحي ونودر الفاست فوود والدهنيات والمقليات ونمارس الرياضه لو نص ساعه يوميا
إذ تطلع او اداوم تحط صن لوشن اذ تحط كريمات تحطه قبل
بس انا بقولكم ع شي ها يطولي بعماركم تايلندي عبارة عن ماي البودرة ماي ورد واعشاب وفنفس الوقت واقي للشمس
الي يباه يروح هدايا العين ع 10 درهم اتوقع ويعطيج لوك فررش جنه كريم اساس بالاول تخضينه وتدهنين ويهج فيه مدة اسبوع بيغنيج عن اي كريم اساس وبودره ويفتح الويه بعد
اسمه فلوريدا وهذي صورته
https://www4.0zz0.com/2016/02/20/06/727431530.png
نبتدي بالجدول لأول اسبوع بس قبلها
تشربين خلال هالاسبوع كله عصير فواكه فرررش ارجع اقول فرررش يفضل كل من ( فراولة - عنب - توت - برتقال - جزر - ليمون نعناع )
وعصير خضروات
يب عصير خضروات عبارة عن عصير برتقال فرش وجزر لو عندكم العصارة وتضيفون اي خضروات ( خضراااا ) بقدونس - جرجير - رويد ها اهم 3 بدون اي اضافات سكرية
لو تدرون شو فوااايده نضارة وشباب وصحة 7 ايام ورا بعض يكفونج تجوفين نتيجة حلوة
بس ونكثر سلطات بدون ملح =)
ملاحظة : مافي شي بيتغير غير الماسكات يعني خلج ماشية ع الجدول ماعدا فترة العصر بغيرلج الماسك
وفي ايام راحة يعني يوم هي ويوم لـآآ
https://4arab.xplainer.net/images/smilies/bb/32.png
يلا وبسم الله ونعزم النية
اليوم الـ 1
تشربين حليب فرش مغلي الصبح
سكر وزيت زيتون ع شكل سكراب ونفرك الويه بشكل دائري تغسلين ويهج بصابونة غار بماي بارد ومن ثم تحطين فلوريدا
( اذا اداومين امسحي ويهج عدل من المكياج وامسحيه بالاسكينول عقب الغسل )
العصر تشربين عصير فرش اي نوع تحبين
تحطين عسل لويهج وشفاتج ودواير الخيار ع العين لمدة نص ساعه - 20 د وتغسلينه وتمسحين ويهج بماي فاتر
تسوين مساج لويهج بحركات دائرية لمدة 5-7 د
وتمسحين بمكعب ماي الورد المثلج واشملي شفاتج
تاكلين سلط
فليل وقبل النوم تشربين عصير خضار
ملح أو ملح الحليب نفرك به الويه بشكل خفيف ودائري
تخففين نقط الجلسرين بالليمون وتدهنين به ويهج ولتحت عيونج فازلين مخلوط بـ كركم ولشفاتج فازلين مع بودرة دم الغزال لو موجود فازلين لرموشج او زيت خروع ع شكل خفييييييييف
وترقدين
اليوم الـ 2
( فترة العصر )
نقط ليمون خفيفة لشفاتج
اليوم الـ 3
( فترة العصر )
بخار للويه طبعا الطريقة التقليدية للي ماعندها جهاز البخار
جدر نسخن فيه ماي حار ونحط ويهنا بعيد شوي ونتغطى بفوطة كذا مرة بس نصك المكيف ونكون في مكان نظيف
ويكون حذالنا حليب بارد منتهي
وعلى طول نغسل ويهنا فيه ونخليه ربع ساعه وكالعادة نغسله ونمشي مكعب ماي الورد المثلج
اليوم الـ 4
( فترة العصر )
نقط ليمون خفيفة لشفاتج
اليوم الـ 5
( فترة العصر )
خل التفاح مع روب منتهي لمدة نص ساعه
خخخخخ ريحته استغفر الله مب شي بس له فوايد يلا تحملن
وكالعادة نمسح بمكعب الثلج
اليوم الـ 6
( فترة العصر )
نقط ليمون خفيفة لشفاتج
اليوم الـ 7
( فترة العصر )
طين مغربي + نشا + ماي ورد
لمدة 20 د
وبجذي بنكون خلصنـا 7 ايام بنجاح
وان شاء الله بنبتدي الاسبوع الثاني عقب مانجوف النتايج الحلوة
كل يوم يمشي واطبقين فيه تعالي هنيه واكتبي تم التطبيق لليوم الـ 1 بأكمله .. وجي
الي بتنقل الموضوع ماااااااعندي اي مانع نرتجي الاجر والله ومانبي سواه
وبالتوفيق يــــــــــــــــــــــــــــأرب
مودتي / حرمة سيـف ~
