طريقتي الأزلية في الحمام المغربي
اشغل السخان
آخذ ثلاث ملاعق من الأعشاب واحطهم في ملّة مع ماي و شوية ماي ورد (الأعشاب: ورد، خزامى، شوية مسمار اللي هو القرنفل لاتكثرين تراه يحرق شوي اطحنهم مع بعض وحافظتنهم في علبة كبيرة)
هذا اللي انا مسوتنه كمية كبيرة بس نصها خلص، ويتم فترة طويلة مايخترب لانها اعشاب جافة وبعد هي مطهرة واحب ريحتها تجنن
https://i.imgur.com/GqXLysIl.jpg
احضر المشقر و احطه على كامل الوجه والجسم والآباط وبين الفخوذ و ورا، واتركه دقايق
اغسل بماي بارد
"اذا بتحطين حمام كريم على شعرج من الحين غسليه بشامبوه وشطفيه بالماي عدل ونشفيه بالفوطة وحطي الكريم ورفعي شعرج وحطي بونيه او لفيه بنايلون،، وآخر غسله بس بالماي بدون شامبو بعد ماتخلصين الحمام المغربي،، الزيوت غير مناسبة،، اذا مابتحطين شي لا تغسلينه الحين،، بس لفيه بفوطة صغيرة وثبتيها اذا ماعندج فوطة الشعر الخاصة
https://i.imgur.com/e17YEKol.jpg
اسكر الشفاط والمكيف
شوية فازلين على وجهي المبلل تتوزع بكل سهولة طبقة رقيقة
احط الصابون المغربي على كااااامل الجسم ماعدا الوجه (خالطه معاه الداد واتركه اقل شي اسبوع قبل الاستخدام ويفضل اكثر: كيلو صابون مغربي +علبة داد مطحون صغيرة)
الصابون جاهز من الكارفور بس في انواع ماتنفع، الاخضر زين
هذا تشوفون شكل الصابون مع الداد بس ما ينحط على الويه
وممكن تستخدمون الصابون بروحه بدون الداد، عنايتي قبل الزواج ماكنت احط الداد
https://i.imgur.com/qOhLAQTl.jpg
اشغل الشاور على الماي الساخن اول شوي قوي يطلع البخار في غرفة الحمام وبعدين على الخفيف واخليه يصب برع البانيو عشان مايحرقني
حوالي ربع ساعة ثلث ساعة اخليه واغسله بماي داااافي عدل عقب بارد
ابتدي تفريك بالطول، رايحة رادة، ضغط بسيط عشان مايتخدش الجلد، لين يطلع الجلد الميت
وحتى بين الفخوذ و ورا، بس بالخفة يعني ما أنسى اي مكان "انتبهوا يا حريم"
وبعد لا تفركين لين يحمر الجلد!!! تجنبي الاحمرار، اذا احمر اسود..
اغسل جسمي بالماي عدل عدل
واجلب راسي على جدام وتحت عشان اغسل شعري بالشامبو بدون مايجيس الشامبو جسمي، بس اذا حاطة حمام كريم يكفي بس بالماي غسليه، رفعي شعرج على فوق وثبتيه
احط خلطة الاعشاب المنقوعة على الجسم أولاً واخلي منه شوي للوجه وافرك سكراب على الخفيف وبعدين احط على الويه وأفرك سكراب (ممكن يحرق شوي بس يطهر عدل)
عقب غسلي بس بالماي ونشفي بالمنشفة تربيت خفيف
الحين احط ماسك للوجه، وللجسم بادي لوشن الصبار من جرجنز (يهدي البشرة وما يسبب سواد،، خاصة اللي يلاحظون جلدهم يسير رمادي بعد كمن يوم بعد الحمام المغربي) وممكن تستخدمين اي كريم مرطب مبرد او مهدي مثل الخيار او الصبار، بس الزيوت مثل زيت الاطفال يسود الجلد والكريمات الثقيلة تخنق البشرة بس ممكن تستخدمين زيت الزيتون اذا بشرتج حساسة
قبل الزواج كنت اسوي هذا الحمام كل خمسة أيام وكنت قشطة بمعنى الكلمة
بعد الزواج كل ثلاثة اسابع او اسبوعين ومرات شهر ( وأسويه في بيت اهلي)
اللي مب متعودة على الحمام المغربي تسويه كل شهر عقب كل ثلاثة اسابيع.. كل اسبوعين.. كل اسبوع
يعني بالتدريج لين يتعود جلدج
نعيماً
https://4arab.xplainer.net/images/smilies/bb/27.png
https://i.imgur.com/fNayQTVl.jpg