السلام عليكم ورحمة الله وبركاته
حبيت افيد حبياتي العرايس و اعطيهم بعض الافكار لثيم العرس
الثيم الاول
عرس فكتوري "shabby chic"
لازم يكون العرس من الالف الى الياء يدل على هالثيم يعني نركز على:
- الكوشة
- ديزاين الطاولات
- زينة القاعة
- صبابات القهوة والشاي
- طاولة الاستقبال
- البنات الصغار (بنات العايلة)
- فستان العروس ودخلتها
يله بناقش كل نقطة بروحها
بس بنات حبيت اخبركم ان هذا مجهود شخصي اتمنى انه يعجبكم
الكوشة
لازم تكون بستايل يدل على الثيم الى نحنا نباه والى هو الثيم الفكتوري او الشابي شيك، وهذا الثيم يتميز باستخدامه للون الابيض مع ادخال نقشات الورود فيه وبحط لكم بعض الصور (ماحصلت صور مطابقة للي في بالي بس بحط لكم شي قريب منه)
[IMG]https://www.*****.com/get-4-2017-*****_com_i4e9u3zp.png[/IMG]
زينة القاعة
بالنسبة لزينة القاعة لازم تكون بسيطة وتكثر فيها الورود وتكون مفارش الطاولات باللون الاوف وايت مع لمسات من الوردي والاخضر الفاتح او التركواز الفاتح بعض الصور للتوضيح وممكن تنحط اقفاص الطيور بداخلها الورود بدل الفازات تعطي شكل جدا مميز
صبابات القهوة والشاي
طبعا عشان يكتمل الثيم يفضل لو تلبس الصبابات الملابس الفكتورية القديمة للخادمات و يحملون بدل الدلات (ابريق الشاي) الصيني وهذي بعض الصور
طاولة الاستقبال
طبعا هذي الطاولات تضم الحلويات والكب كيك الكيوت وتكون مرتبة حسب الثيم مالنا على طاولة بيضاء معتقة
فستان العروس ودخلتها
وطبعا هذا اهم شي في العرس كله أنه يكون فستانها سمبل و شعرها يفضل لو مفتوح بكيرلي ناعم مع وردة انيقه على جنب الشعر و الطرحة ممكن تلبسها من تحت الشعر عسب تعطي الفخامة في الفستان
أما بالنسبة للدخلة فتكون على لحن فكتوري هادىء (افضل شي اسلامي) و يكون قدامها 4 بنات صغار بالفساتين الفكتورية حاملات سلات خوص وينثرون الورد منه
كيكة العروس
بدون كلام شوفوا الصور (يمي يمي)
طبعا البعض بيشوف الموضوع وبيقول هذا تكلفته بتكون وايد كبيرة لأن يبالي كل شي اصرف عليه صرفه كبيرة عسب يكون مميز
اقولج : لا ، تقدري تسوين نفس هالثيم بس تكلفه اقل و اشياء وايد ترومين تسوينها انتي وخواتج بكل سهولة والناس تنبهر فيها
بتقولون : كيف ؟؟
بنرد لنفس التفاصيل بس هالمرة بنفكر كيف ننفذها بطريقة اقتصادية ومميزة في نفس اللحظة
شيكوا الصفحة الثانية للحل
