فلل الفلاح فيها اكثر من موديل
و عدد الغرف فيها من 3 و 4 و 5 غرف نوم
كل مازاد عدد الغرف كبرت المساحه المبنيه
الفله اللي فيها 3 غرف نوم يقولون عباره عن طابق ارضي
واللي تحتوي على 4 غرف و 5 غرف طابقين
اعتقد عباره عن مجلس واحد وغرفة طعام مفتوحه ومطبخ واحتمال غرفه نوم للضيوف وطبعا الخدامه
اما الدور العلوي عباره عن صاله وغرف نوم
الحين قامو يسون الصاله فوق شرات بيوت الكويتيين
التصاميم واايد حلوه حتى افكارهم من بلكونه وغيره جدا جميل والالوان شرحه يديده خصوصا التصميم الاندلسي
ولو شفتي الفيديو اللي عرضوه في علوم الدار مسوين ديكورات ماتكلف وايد وبنفس الوقت حلوه وبسيطه
الواحد يقدر ياخذ فكره عشان مايكلف على عمره
بس عيبهم صغر المساحه لو قياساتها مثل البيوت الشعبيه اللي في الشامخه والفلاح الجديمه بيكون ممتاز
اشوفها مناسبه للي عيالها صغار بس اذا كبار لا
من وجهة نظري غرف النوم صغيره
لكن نقدر انمشي الموضوع
اما الميلس والصاله الصراحه مش ولا بد واايد صغار طقم كنب 1 يكفي هاللي لاحظته من الصور في الاخبار
يعني بس تعزمين عائله وحده لا غير اذكر حضرت عزيمه عند وحده بمناسبة حصولها على بيت
وتقريبا قياسات بيتها وفكرته مثل هالبيوت تقريبا
ماسدنا لان ماشي الا ميلس واحد وصغير انترس والصاله بعد صغيره لو عزمت غرب شو بيستوي
وماشي ميلس للرياييل بالتالي يلسو في الحوي !
مع انه في صاله بنفس مقاس الصاله اللي تحت بالطابق العلوي لكن مابتحبين تيلسين الناس عند غرف النوم
هالصالات طالعي
https://up.tgareed.com/2012/RZa04289.jpg
https://up.tgareed.com/2012/0aI04289.jpg
بعكس لو بنبني بروحنا ع الاقل الميلس والصاله يكونون كبار ع ذوقنا يكفون للضيوف ولا نضيج عليهم
انصحج تزورين المنطقه وتحاولين تدخليين فلل النماذج او اذا تعرفين حد محصل فله هناك اطلبي منهم يخلونج تشوفينه
بعينج يمكن يناسبج
وتستخيرين رب العالمين لان فعلا طال موضوع اراضي الشامخه الواحد تعب من الانتظار
الله يرزقج ويرزق الجميع بكل خير ويحبه قلبكم
