عنوان الموضوع : تجربتي وتجاربكم مع الليسن 2015
مقدم من طرف منتديات الضمير العربي
https://www.pamsclipart.com/clipart_...0-1451_SMU.jpg
السلام عليكم ورحمة الله وبركاته
بما اني قدمت على الليسن حبيت افتح هذا الموضوع نتناقش مع الصبايا اللي مقدمات مثلي
ونستفيد من تجارب بعض صحيح لقيت مواضيع مشابه وفتحت بالسابق
لكن الحين القوانين تغيرت ووايد اشياء متغيره واباه هالموضوع يكون مرجع للي ناويه تقدم
على الليسن في مدينة العين وابوظبي بشكل خاص والامارات بشكل عام
انا بديت بشهر 1 من سنة 2015 كمبتدئه ماعرف اي شي بالسواقه
طبعا اول شي بخبركم عن خطوات التقدم لطلب رخصة القياده
في مدينة العين #
الخطوه الاولى:
https://www.adpolice.gov.ae/_resourc...ommon/Logo.png
الذهاب الى ادارة الترخيص ترخيص السائقين في منطقة فلج هزاع لفتح ملف لاستخراج رخصة القياده
طبعا في قسم خاص للنساء الحمدلله يخلصون معاملاتكم بكل يسر باذن الله
ساعات العمل:
من 7:30 صباحا حتى 8:00 مساء
الاوراق المطلوبه:
صورة جواز السفر
صورة الهويه
صورة خلاصة القيد
صوره شخصيه
مب متاكده اذا خذو مني بس اللي اعرفه انهم صوروني من كاميرتهم الخاصه بتكون للملف
لليسن بياخذون الصوره من عندج اطمني
طبعا لازم يكون معاج ولي الامر سواء الاب او الزوج
وفي حال وفاة الاب يروح المسؤول عنج الام او الاخ وطبعا هني بتحتاجون لـ اوارق اضافيه مثل حصر الارث والتوكيل الخ
بعد ماتخلصون بيعطونكم ورقه تاخذونها وتودنها لفصح النظر الفحص مكتبه عند الباب
وتدفعون له 25 درهم ويعطيكم ورقه تردونها لنفس الموظف او الموظفه وتخلص لكم باقي الاجراءات
وتدفعون لها 100 وبتعطيكم الايصال وورقة عنوانها موعد واستمارة فحص السائقين
الخطوه الثانيه :
Emirates Driving Company
الذهاب الى شركة الامارات لتعليم قيادة السيارات في مزيد معسكر الشركات بتلقون لوح ارشاديه
اول ماتوصلون تروحون لخدمة العملاء في قسم للنساء مخصوص اول شي تسونه طباعه تطبعن الاوراق يسون لكم معامله وتدفعون مبلغ 20 درهم وتعطونهم صوركم
وجواز السفر او الهويه مع استمارة فحص السائقين توقعون ع المعامله وتذكرون مستواكم التعليمي ثانوي جامعي الخ
ثم تختارون موعد الحصص النظريه صباحي او مسائي حسب اللي يناسبكم
عباره عن اربع حصص كل حصه مدتها ساعتين لدرسين يتخللها استراحه
الحصص نوعين في مكثف عشان تخلصون بسرعه بيوم واحد هاي سعرها بيوصل الف وشي او الفين درهم حسب اختياركم
الحصص العاديه الغير مكثفه بتكون اربع ايام ورا بعض او يومين في الاسبوع الاول ويومين بالاسبوع الثاني حسب المتوفر الوقت اللي تبونه تدفعون لها 830 درهم شامل سعر الامتحان
يعني قولي سعر الحصص 780 والامتحان 50 المجموع 830 درهم
#ملاحظة الحصص المكثفه صح انتي تدفعين مبلغ كبير لكنج مابتحضرين كل الدروس بيعطونج تقريبا اربع دروس والباقي درسيهن بروحج في البيت بعكس اللي تختار الحصص العاديه تاخذ 8 دروس
وبتطبع لكم الجدول ومواعيدها ومكانها مع كتاب طبعا الكلاسات بتكون بالطابق الاول
الخطوه الثالثه:
الحضور لجميع الحصص النظريه في حال ماحضرتي بتكون في غرامات الخ المكان مرتب الكلاسات النسائيه منفصله حرمه ادرسنا وقسم خاص للنساء في غرفة انتظار وحمامات الدروس موجوده بالكتاب في حال حبيتي تدرسين منه. مثل ماذكرت الحصه ساعتين بالتالي تاخذون درسين و ماتكون مرتبه ممكن اول حصه لج يكون الدرس السادس فهالشي ماحبيته الافضل تكون مرتبه لان انا اول درس لي كان عن السلوك والاخطاء والحوادث جي بخاف ومابتشجع لوول
الحصه الاولى: سلوك القياده والاداب الانسانيه على الطريق +بعض المواقف الحرجه
الحصه الثانيه:قواعد المرور والشواخص المروريه وعلامات الطريق+ القياده داخل حدود المدينه
الحصه الثالثه: معلومات عن السيارات +القياده في الظروف الصعبه
الحصه الرابعه: قاعة السلامه +القياده خارج حدود المدينه
بعد الحصه سيري خدمة العملاء واحجزي للامتحان
الامتحان النظري عباره عن 45 سؤال اختياري تخلصينه في ربع ساعه او اقل عشان تنجحين لازم عدد الاخطاء ماتتجاوز تسع اخطاء علامة النجاح 36
انصحكم تقرون الكتاب قبل الامتحان بيوم حلن الاسئله اللي في اخر الجابتر بتكونون في السليم
ولا تستهينون في الامتحان صحيح هو سهل بس بعد يفضل تحضرين له لان بالفعل في بنات يرسبن وان رسبتي بتردين تاخذين كلاسات نظريه مره ثانيه وتدفيعن فلوس
نتيجة الامتحان تظهر بعد نص ساعه اذا نجحتي تسيرين خدمة العملاء تقولين لهم انج نجحتي في الامتحان النظري بيسألونج اذا عندج خبره بالسواقه ولا لا؟؟ في حال ماعندج اي خلفيه عن السواقه تحجزين لدروس العملي تدفعين 2690 درهم في حال بغيتي كلاسات مكثفه بتدفعين 200 درهم زياده المجموع بيكون 2890 درهم
واذا تعرفين وعندج خلفيه بتدفعين 50 درهم ويسون لج امتحان تحديد مستوى مادري وماعرف الاجراءات الاخرى
المهم بخبركن شي ممكن يفيدكن ويوفر فلوسكن #
دوري لج مدربين سواقه يعطون دروس سواقه خارج المدرسه حتى لو ماكنتي فاتحه ملف خذي دروس عمليه سواء قبل فتح الملف او بعد فتح ملف جي بتكون عندج خلفيه عن السواقه ومابتضطرين تدفعين 2690 درهم لكلاسات العملي في المدرسه بيدفعونج اقل المدربين دامج ماعندج بطاقة تدريب في الشارع يمكن يقولون لج لو وقفتنا الشرطه انتي بتدفعين المخالفه عباره عن 200 او 300 درهم ماذكر بالضبط بس عادي
الخطوه الرابعه
الحصص العمليه في المدرسه
خذت مكثف وكان عباره عن ثمان ايام عمليه لمدة ساعتين تقريبا
اربع كلاسات مع مدربين كل ساعه عملي درس يديد يسمونه
Area 1-6
كل ساعه تاخذين
Area
مثلا
اليوم
Area 3
و
Area 5
في هالمنطقة المدربين يعلمونج ع الباركن والريوس والجسور والدوارات والمنعطفات
ويومين دروس ع الكمبيوتر يسمونها اجهزة محاكاه
Simulator
وهو عباره عن كرسي مثل كرسي السياره ويحتوي على قير وبريك وسكان الخ وجابلتنج شاشه تعيشج جو السواقه
فائدته يشوفون دقتج وتركيزج في تفادي الاخطار مثل اللعبه تسوقين في شارع واشارات وناس وسيارات
كيف تتفادين الاخطار وامطار وضباب كيف تسوقين في هالاجواء الخ
وباقي الكلاسات تتدربين بروحج يخلونج اطبقين الدروس اللي خذتيها مع المدربين يسمونه
Tower Auto
واخيرا يوم تخلصين تسوين الـ
Refresh park
مراجعه للباركن ويفضل ع طول بعده تقدمين للباركين والريوس بحيث تتعلمين الصبح وعقب الكلاس تروحين تمتحنين او اليوم اللي عقبه
من الدروس اللي تعلمتها مع المدربين اول يوم
محتويات السياره الداخليه والخارجيه و اماكنهم مثل البطاريه والزيت والماي الخاص فيه كيف تحركين الكرسي وتعدلين المرايا تشو تسوين قبل ماتركبين السياره تلفين حولها واتجيكين ع التواير واذا في ضربات ع جسم السياره او شي
والساعه الثانيه كيف ارجع ريوس وكيف امشي سيده اشكل الرقم 8 بالانجليزي ومربع
اليوم الثاني خذت الباركن الجانبي وباركن تسعين درجه اظن وامشي السياره زقزاق لين ما ادخلها الباركن سيده وريوس
اليوم الثالث جسر والمنحيات واللفات كيف ادخل لشارع عام وشو اسوي يوم ادخل لشارع فرعي
واليوم الرابع باركنات ودوار والسواقه بشكل عام
الحلو بالموضوع ان المدرسه فيها كل شي تقريبا موجود بالشارع الحقيقي بس مصغر عندهم اشارات ضوئيه ولوحات ارشاديه
دوار وجسر الخ بس اللي مب حلو رياييل وحريم بمكان واحد واغلبهم اسيويين بحكم المواطنين يهال قوم بـ 18 وغالبا يعرفون السواقه فـ مانشوفهم بكثرة
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
# امتحان الباركن والريوس
الامتحان يكون ع سيارتين والاثنين تبركنينهم ع الريوس
هذه اشكالهم
1 الباركنن الجانبي
https://www.indusladies.com/forums/a...ing_page_2.jpg
2 وهذا
https://www.gedandclaire.com/wp-cont...parking-90.png
سهل جدا احفظي المقاسات الصحيحه واضمن لكن النجاح من اول مره وايد عضوات حطن الطريقه يزاهن الله خير
عقب ماتخلصون بيعطونكم ورقه النجاح تسيرون تستخرجون شهادة اتمام الكلاسات من المدرسه نفسها
عقب تاخذين الشهاده وتسيرين قسم التراخيص للسائقين تابع للمرور موجود في المدرسه نفسها
بيعطونكم بطاقة عشان تتدربون فيها خارج المدرسه مع ورقة موعد امتحان الشارع
# التدريب لامتحان الشارع
طبعا اول خطوه هي البحث عن المدرب الجيد والأمين سواء حرمه او ريال بكيفكم
المهم رسوم الحصه 150 درهم ساعه ونص ايونج للبيت ويشلونج
والبعض ممكن ياخذ اقل اذا رحتي لهم انتي 100 درهم للساعه
النقاط المهمه اثناء التدريب في الشارع اذا ماعندج اي خلفيه غير تعليمج البسيط في مدرسة الامارات:
طبعا في المدرسه معلمينا بعض الاشياء بس ع سرعات صغيره اظن 10 و 20
بتطبقينه ع سرعات اكبر في الشارع الشاطره بتستوعب بسرعه ويمكن ماتحتاج لكلاسات كثيره للشارع واللي شراتي سمعن مني :
-اختاري مدربه تفهمين عليها حلو لو كانت من النوع اللي يسولف عشان تتعودين ع الكلام بس لاتتكلمين عن أي شي خاص وشخصي سوالف عاديه فقط لان المدربه شغلتها من بنت لبنت ومن هني قصه ومن هالبنت سالفه فـ مب زين
تنقل الكلام حتى لو مب قصدها بس سالفه تجر سالفه وتعرفون نحن الحريم كيف طباعنا
-جربي كذا مدربه وشوفي الاحسن فيهن
وانتي تسوقين شغلي المسجل اسمعي مثثلا استديو واحد اذا الصبح واذا المساء حطي اذاعة الشارجه وسولفي وانتي ادربين اسألي اذا عندج اسئله .
-المدربه لازم تخليج تسوقين من البيت يعني من توصل بيتج تنزل وتخليج تسوقين السياره وتردين بها وتعطيج الثقه وتشجعج بحيث وين ماتسيرون تكونين انتي اللي تسوقين وهي بس تعطيج الارشادات .
-اول يومين ثلاث تدربج في منطقه بعيده شوي او شعبيه هاديه عشان يظهر الخوف منج وتتمكنين شوي
مثلا يوم تركز ع اللفات والمنحنيات والمنعطفات ويوم ع الدوارات ويوم للمطبات وكيف تعطين بريك بشكل سليم وخفيف.
-وأيام توديج المناطق اللي يمتحون فيها المرور وادربج فيها كل مره منطقه .
-تعلمي كيف نلف السكان ونمسكه بالشكل الصحيح و ع اليوتيرن واللفات والبريكات
والدوارات وكم السرعات المطلوبه للشارع ولدخول الدوار في السوق بالزحمه خليها تعلمج السواقه بالمناطق الضيقه مثل الحارات وكيف تبركنين بين السيارات لان في المدرسه ييعلمونا ع الاقماع غير يوم يكون في سيارات.
- تعلمي كيف اتمين في مسارج وماتطلعين برع المسار وبرع الخط
-لازم تركيزها يكون على اللفات واليوتيرن والدورات وطريقة امساك السكان ولفه بالطريقه الصحيحه
اختاري منطقه معينه يمتحنون فيها مثلا في العين عندج وين شارع مكتب الخدم وسوق سناء سابقا حاليا رد تاج
خلي الحصه اليوم لهذه المنطقه وتمي طول اليوم تتعلمين في هالمنطقه تسوين اليوتيرن وتوقفين الاشارات وغيرها
تعيدين وتزيدين فيها طول الساعه المخصصه لج جي بيثبت بعقلج التكرار يعلم الشطار
مب تظهرج من البيت وتوديج تحوطج العين كلها وانتي مستانسه على اساس تتعلمين وتسوقين ترا هذا مب تعليم تقص عليج استوت لي كنت اسوق من البيت واسير وياها وانا مستانسه سيده سيده ع بالي اعرف
وعند الدورات هي تلف عني واللفات ترا هالصعب بالسواقه السواقه سيده سهله لكن المنعطفات وغيرها يبالها
مع الايام والاسابيع شفت عمري ما قمت اتحسن واكتشفت ان عندي خلل
-طبعا هني يعتمد ع المده اللي تبين تتعلمين فيها كم يوم في بنات يستوعبن ويتعلمن بسرعه وفي يبالهن اكثر
مثل ماتعرفون الناس قدرات بس افضل الوحده تتعلم اقل شي 20 ساعه موزعه على الايام مره ساعتين مره ساعه ونص
واذا الوحده فيكن حست انها مافهمت شي معين او طريقة اللفه تتعلم اكثر وتطلب باليوم الثاني تركز لج عليه وتفهمج اكثر اهم شي نفهم ونتعلم صح عشان ننجح وندخل الامتحان واثقين مثل الباركن .
-نقطه ثالثه لايقصن عليكن المدربات في منهن مايخافن الله يقولن لج دفعي مخالفة الرادار تقص عليج تخليج تدفعينها
هذا مب غلطج انتي متدربه وماتعرفين المفروض هي تخبرج اذا شي رادار وكم السرعه واصلا الدفع عليهم .
وهاا ماوصيكن يابنات هاللله هالله فيهن في بنات مايدفعن الرسوم من يخلصن التدريب يشردن ويتهربن خافن الله فيهن
اللي ماتروم تدفع المبلغ كامل تدفع رسوم الحصه الوحده يعني من تردين البيت او تركبين السياره ادفعي لها وبعد من باب الحرص في حال كنتي خايفه انها تخون فيج بعد ماتاخذ المبلغ كله
او كل اسبوع دفعه ويفضل انج تعرفين المدربه تابعه لأي مدرسه واسمها الحقيقي منهن يتشتهرن بنكات واصلا اساميهن غير
مثلا ام فلان وهي بنتها اسمها غير
عشان باجر لاسمح الله صار شي ولا شي ترومين تشتكين في المرور وتاخذين حقج.
وبعد الكلاسات اذا حسيتي انج خلاص عرفتي تسوقين والمدربه قالت لج سيري توكلي على الله وسيري
اما اذا حسيتي ان سواقتج مش ولا بد وهي قالت لج لاتسيرين فـ لاتسيرين سيري احجزي موعد ثاني
انا جي رسبت اول مره كنت مب لين هناك وعندي اخطاء خذت 14 ساعه ومع ذلك سرت ضيعت عليه فرصه اوني بجرب حظي يمكن انجح ع الحظ بس لا الحين وايد مشددين ماينجحون بالساهل والحظ قليل
لان المره الثالثه اذا رسبتي يردونج المدرسه تدرسين من اول ويديد فـ الاحسن اذا ماتعرفين ويبالج بعد لاتسيرين
التقيت مع وحده تدربت وخسرت مبلغ كبير ع التدريب وماسارت تمتحن بالموعد المحدد اجلت لين ما قالت لها المدربه انتي جاهزه توكلي سيري امتحني
لكن للاسف مانجحت
والعجيب بالموضوع صادفت وحده من الخوات الوافدات بنفس الامتحان ويوم سالتها كم المده اللي ادربتي فيها
قالت اقل من ست حصص مع المدربه وباقي الفتره بروحها بسيارة البيت كانت تطلع يوم الشوارع فاضيه
وتتعلم وتتعلم لين ماتمكنت
وماشاءالله عليها هي كانت الاولى اللي نجحت بعد الاكتئاب اللي صابنا من الرسوبات المتتاليه اللي نجحن اقل من 5 بنات
اقل من ربع العدد
كان يوم كارثه الصراحه عدد كبير من الحريم
فالاحسن الوحده ع الاقل تدرب 20 ساعه او ثلاث اسابيع اقل شي
#يوم امتحان الشارع
تكونين هناك قبل الموعد بنص ساعه احسن
بنفس المكان اللي حجزتي فيه موعد الامتحان
وتعطين للموظفه ورقة الموعد وبطاقتج
وبترد تطبع الورقه نفسها مره ثانيه وتعطيها للشرطيه وفيها موعد امتحان الاعاده في حال رسبتي
واذا بطاقتج منتهية تدفعين 50 درهم
وعقب تييكن الشرطيه وتخبركن أي باص تركبن
وسون حسابكن شلن خرده وياكن
لان سواق الباص ياخذ 40 درهم اجره
واحتياط خذن الهويه وشهادة النجاح
ويتحرك الباص الساعه 8
هو المفروض الحريم ينزلن لسياره الامتحان بالارقام
بس للاسف ماكان فيه اظاهر نسوا
بالتالي تستوي ضرابه وحسساسيات بالباص
كل وحده تبا تنزل قبل مب شي
اذا نجحتي بيحطون علامه ع ورقة الموعد نفسه
اللي مكتوب عليها ناجح او راسب
وفي حال رسبتي الموعد اليديد بتلقينه مكتوب بالورقه
مع الاخطاء اللي مسوتنها
مايحتاي ترجعين المدرسه تحجزين
ردي البيت ارقدي ههههههههههه
__________________________________________________ __________
>>>> الرد الثاني :
# دروس مفيده:
كيف انشغل ونحرك سيارة التعليم واللي بنمتحن فيها:
اول شي تركبين وتحطين حزام الامان وتعدلين الكرسي وتشغلين السياره عن طريق تحريك المفتاح لليمين وايد صعب ههههههه عقب تعدلين المرايات سواء الاماميه او الجانبيه بحيث تشوفين السيارات اللي وراج بالبقعه العمياء هاي ضروريه جدا لان اغلب الحوادث تستوي بسبته عند تغير المسار لانج ماتشوفين السيارات الجانبيه ماتظهر في المرايا
هذا فيديو توضيحي واقرن عنه وسون بحث عشان تتعلمن كيف تضبطونه بشكل صحيح لان مابتتعلمونه اذا كانت تدريبج بوقت قصير مابتلحقين
https://www.almuraba.net/news_view_6807.html
https://www.youtube.com/watch?v=61DHl8SGFmc
المهم بعد ماعدلنا المرايات نروح للارجل والدواسات اللي تحت بتلقين عند ريلج اليمين
شي ادوسينه هذا بترول واللي عداله مره بريك
الحين لازم تعرفين كيف ناويه تحركين السياره بترجعين على ورا ولا بتنطلقين الى الامام ؟؟
مثلا خلونا نقول السياره في الباركن هني لازم ترجعين على ورا ريوس فـ شو نسوي
نضغط على البريك
بعد ما اندوس على البريك طبعا اتمين دايسه عليه ماتخوزين ريلج نحرك ناقل الحركه
مثل الصوره فيه حروف
P باركن
R ريوس
D درايف سواقه
https://media1.arabia.msn.com/medial.../0_5750238.jpg
بنحطه على R
وانزل الهاند بريك بالضغط على الزر في مقدمته( بالاحمر بس مب كل السيارات ملونه) مع تحريكه للاسفل
اذا بنقف السياره ترفعينه بدون ماتضغطين ع الزر
https://images.sodahead.com/polls/00...ke_xlarge.jpeg
https://www.dnamotoring.com/dsg/list...ANDB-T1-RD.jpg
ونخوز ريلنا بشويش عن البريك بتلاحظين السياره قامت ترد على ورا كل ماخوزتي ريلج بشكل اسرع كل ماردت بشكل سريع (كل ماخوزتي ريلج عن البريك السياره بتتحرك دامه على الـ
R او D
نحن مانباها ترد بسرعه بالراحات اذا حركتي السكان السياره بترد على ورا بشكل يمين او يسار حسب اتجاه السكان
واذا حبتي اتظهرينها بشكل سيده لاتحركين السكان من ترجعين ورا وخلاص حسيتي انج ظهرتي من الباركن الحين تبين تسيرين يمين ضربي بريك وغيري ناقل الحركه خليها على
D
وابدي حركي السكان لليسار بتشوفين السياره قامت تلف لليمين
الحين دوسي ع البترول عشان السياره تعطيج سرعه وشوفي السرعه المناسبه والمطلوبه وابدي روحي وين ماتبين
اذا بنيي لوقف السياره مثلا الشرطي بيقولج وقفي عند طرف الطريق ترفعين الهاند بريك وتحطين ناقل الحركه على
P
وبجي بتوقف السياره ومايحتاي اتمين ضاغطه ع البريك
/////
كيف نتحكم ونستخدم مقود (السكان ) السياره
https://www.youtube.com/watch?v=Lxa6lF-l13c
# الباركن والريوس
خطوات الباركنج الجانبي ( شرح ام رشودي)
https://i.imgur.com/KCruy.jpg
https://i.imgur.com/wSDak.jpg
https://i.imgur.com/WxUdj.jpg
https://i.imgur.com/zcmSX.jpg
https://i.imgur.com/w3xDI.jpg
https://i.imgur.com/bsWxl.jpg
https://i.imgur.com/Hiwt2.jpg
الباركن الثاني من شرحي
https://www.5zn.cc/files/upfilefile/...parking-90.jpg
الدوائر السود هي الاقماع
والدائره الحمره ايضا قمع وهي الاساس في الموضوع وشغلنا يعتمد عليه
1-اول شي تردين ريوس شوي شوي لين تشوفين القمع الاخير(خليته بالاحمر عشان تنتبهين)
وصل عند الجامه اللي ع يمينج بمستوى كتفج مب في النص عند الزاويه
من يوصل لفي السكان كامل يمين وردي ريوس وشوفي المرايا اللي ع يسارج
ويمينج ركزي ع المساحات بحيث تحسين انج وصلتي بوسط الباركن اللي بتدخلينه
وتمي ردي ريوس وبس
الحين اذا بغيتي تردين لمكانج الاولي
تحطين على D
وتمشين شوي شوي تطلعين من الباركن لين توصلين عند القمع الاحمر
خليه بوسط الجامه اللي ع يمينج
من يوصل القمع عند الوسط لفي السكان كامل يمين
وابدي ادخلي امشي لين تحسين السياره دخلت عدل
وبس جدا سهل
# درس اليوتيرن او الرجوع
https://store1.up-00.com/2014-05/1401267788111.jpg
https://store1.up-00.com/2014-05/1401267788172.jpg
مواضيع قديمه هادفه
https://forum.uaewomen.net/showthread...E1%E1%ED%D3%E4
https://forum.uaewomen.net/showthread.php?t=533563
اخر ملاحظه اذا خذتي حصص مع مدربه وبديتي تفهمين خلي حد من خوانج ولا خواتج يودونج منطقه نائيه بعيييييد عن الناس
وابدي سوقيها هناك او طبقي اللي تعلمتيه من المدربه يوميا وان شاءالله تتمكنون
المبلغ الكلي الذي كلفني
رسوم فتح الملف من ادارة الترخيص ترخيص السائقين=125
الكلاسات النظريه=830
الكلاسات العمليه =2890 درهم
تجديد بطاقة تدريب الشارع 50 درهم
رسوم باص الامتحان 40 درهم
رسوم التدريب في الشارع
للحين كلفني المبلغ قريب 6000 درهم
وطبعا بيزيد لاني بعدني بدرب لين ما اتمكن واكون جاهزه للامتحان المحاوله الثانيه
امتحاني الثاني برمضان دعواتكم
__________________________________________________ __________
>>>> الرد الثالث :
نموذج لامتحان النظري عباره عن خيارات
هذه نماذج لبعض الاسئله اللي يابوها لي واللي اتذكرهن
السائق المتمرس او الخبير :يقوم بمسح مايحيط به بشكل اوسع وبتنظيم اكبر
التعلم بعمق هو: المرور بتجارب مروريه مختلفه وتحليلها ومناقشتها مع المدرب الخ
-ماهو عمل البطاريه : تشحن السياره تخزين الطاقه الكهربائيه المنتجه بواسطة المولد
-كيف تتحرك السياره : البترول
اذا كان في لوحة قف او لوحات وشواخص متى ماتلتزمين فيهم : عند وجود شرطي المرور
-اذا كان في سياره على جانب الخط ماذا تفعل:نطلق الزمور ونخفف السرعه ونشغل الاضواء العاليه
اذا كنت ع الطريق السريع في ثلاث مسارات اين يمكنك التمركز وين اتمين ماشيه :الجانب الايمن
التمركز الاساسي للسياره عند مواصلة السير الى الامام: المسار الاوسط
وضعية المركبه عند الانعطاف الى اليمين؟المسار الايمن
وضعية السياره عند الانعطاف الى اليسار؟ المسار الايسر
كيف تبلغ الاخرين بانك ستقوم بالانعطاف لليمين.؟ باستخدام الاشاره
عمى السرعه:
السرعه المسموح بها في خارج المدينة:120
القياده اثناء الرياح
اذا وجدت نفسك في حالة انزلاق: ارفع قدمك عن دواسة البنزين والفرامل
من اسباب كثرة الحوادث في الليل؟ عدم وضح الرؤيه
كيف تستخدم الاضواء الاماميه عند مقابلة مركبه اخرى اثناء الليل؟ نقوم بتخفيض الضوء العالي
ماذا يتعين عليك فعله في حال وقوع حادث مرور؟
لماذا يسمح قانون الامارات لمنهم فوق الثامنه عشرة من الحصول على رخصة القياده؟ لاعتبارهم ناضجين
يسمح بالوقوف على منطقة فوهة الحريق في حالة :تنزيل البضائع –تاكسي-ممنوع في جميع الحالات
الشواخص المؤقته ذات لون: برتقالي
رقم الشرطه 999
رقم الاسعاف 998
مالمقصود بعمى السرعه:عدم الانتباه للعداد بشكل اقل مماتبدو
اقل عمق للخطوط الموجوده في الاطارات تكون 3ملم
اذا اخطأ السائق الاخر كيف تتصرف : اعامله بالمثل او الصبر او الغضب
ماذا يفعل الـ
ABS
مقاومة الانغلاق والانزلاق عند الضغط على الفرامل
كم نوع للفرامل في جميع السيارات:نوعين
منهم اكثر حكمه عند قيادة السيارات: كبار السن
في اي وقت يمنع استخدام الزمور في المناطق السكنيه.؟
من منتصف الليل حتى 6 صباحا
سألوني عن مقعد الطفل مكانه وطريقة وضعه طبعا خيارات
مثلا مقعد الطفل الرضيع كيف يكون شكل اتجاهه
ايضا عن مقعد الاطفال من عمر 9 اشهر
مرشح الحافز هو:
اقل عمق لنقوش اطارات السيارات ؟ 3 ملم
اهمية ضبط مسند الرأس؟ لحماية الرقبه حيث يجب ان يصل الى اعلى الرأس
مسافة الوقوف: هي مسافة رد الفعل مع مسافة الفرمله
اي الاجزاء في السياره تقوم بامتصاص الصدمه اثناء الحادث؟ مقدمة ومؤخرة السياره
وكذا سؤال عباره عن صور للشواخص واللوحات وتختارين المعنى الصحيح له
مواقع مفيده فيها نماذج امتحانات
هذا من موقع شرطة عجمان للرموز والشواخص
مفيد يابولي بعض منهم
https://www.ajmanpolice.gov.ae/traffic_guide.php
وهذا من موقع معهد الامارات للسياقه امتحان عام بالانجليزي
https://www.edi-uae.com/onlinequiz_main.aspx
كل شي من الكتاب مثل ماقلت لكن فوق يلسن قبل الامتحان بيوم اقرنه وحاولن تحلن الاسئله الموجوده فيهم
وباذن الله بتنجحين
__________________________________________________ __________
>>>> الرد الرابع :
ماشاءالله عليج اختيه كفيتي ووفيتي ،،الموضوع يا فوقته ،،واستفدت منه وااايد ،يزاج الله خير ،،بس عندي سؤال : بعد ما اخلص النظري اقدر ابدأ اتدرب مع مدربة خاصه وايي المدرسه بس علشان امتحن العملي ؟ .يعني هل انا مجبرة اتدرب العملي وياهم ولا اقدر اتدرب برا المدرسه بعد امتحان النظري ياريت توظحين لي هالشي
__________________________________________________ __________
>>>> الرد الخامس :
ثانكس ع الشرح المفيد
يعطيج العافيه
بس عندي سؤال بخصوص اللي امتحنت نظري ونجحت
وماحجزت للعملي لفترة 6 شهور تقريبا ! ينلغي الملف ولازم ارد من يد يديد
ولا عادي اروح احجز للعملي !!
