ابرحل للدروب التي توديني ورا النسيان
أنا والليل والقلب الكسير ونفس منفيه
ابترك للزمان اللي ظلمني دفتر مليان
كتبته من بقايا دمي النازف وأنا حيه
ابترك جثة الصبر الحزين وخنجر الخذلان
ومسرح واقع يروي جريمة قتل نفسيه
تعبت اطرد ورا الحلم الكبير وعمري الميدان
تعبت استقبل اطعون الزمان بروح حوريه
فتحت لكل من حولي خفوق كنه البستان
تغني به عصافير الفرح وتعيش في فيه
و(جوا) مثل الشتا القاسي تموت بسمه الأغصان
شتاهم يعصف بروحي هبوبك يا (الشماليه)
هبوبك يترك اعماقي بلا روح وبلا وجدان
مدينه عامره صارت خراب اطلال منسيه
خرايب أصبحت يسكن بقاياها شبح إنسان
يموت الظل والحلم الصغير وخالص النيه
تصير الجثه الحيه بلا ذكرى ولا عنوان
على صوت الغراب اللي ينادي كل عصريه:
هنا كان الحنان اللي ذبحه بمخلبه شيطان
هنا كان الربيع اللي زرع بالورد (حنيه)
هنا مات الفقير اللي حصد من زرعه الحرمان
حصد قسوة زمان مالقى في قسوته زيه
ابرحل واترك الماضي يغيب بعتمته حيران
واعيش بمقبل أيامي خفوق ونفس منفيه
للشاعرة بدر البدور
