!!شو الحل ويا عمتي..!! المومة و الطفل
عنوان الموضوع : !!شو الحل ويا عمتي..!! المومة و الطفل
مقدم من طرف منتديات الضمير العربي
السلام عليكم ورحمة الله وبركاته..
شخباركن حريم..
ما ادري والله من وين ابتدي ولا شو اقول..
كثرت واايد مشاكل اهل الريل هاليومين..!! الله يعينا بس!!
انا صارلي متزوجة سنة وشوي..عايشة ويا أهل ريلي..طبعي مسالمة.. ومب اجتماعية بالمررررة.. وما احب السوالف كله ساكتة.. فبداية زواجي كنت وااايد ايلس ويا اهلي ريلي لو ما اسولف وياهم.. ويطلعوني وياهم لو يسيرون مكان.. واسير اعراس وياهم..كنا سمنة ع عسل ع قولتهم.. وعمتي هذاك الوقت كانت مسافرة مال شهرين.. وكنت بالفعل مستانسة فهالشهرين..
اول ما ردت من السفر.. سلمت عليها وجان تهب في ويهي.. امج قالت وقالت وقالت.. استوت ضرابة بين اميه وعمتي قبل العرس.. المهم بلعتها وسكت..
وعقب بفترة استوى بيني وبينها تج بسبب موضوع مالي خص فيه.. ريلي قالي سيري قوليلهم اني انا اقول جييه جييه عقب وطاحت السالفة عليه..
من عقبها والله كرهتها من كل قلبي.. وما ايلس وياهم الا وقت الغدا.. ولا اطلع وياهم مكان..
عندهم بشكارتين..
عقب بفترة سافرت وحده من البشكارتين.. جان انا اتولى تنظيف حجرتي وكوي ثيابي.. لانها قايلة للبشكارة انتي كوي ثياب ولدي بس حرمته روحها تكوي صدق انقهررررت!!
وما كنت اعرف اطبخ.. صدق اتبهدلت.. كانت مرات تسوي هيه عشا.. ومرات نطلب من برع..
بس حرمة حميي تعرف تطبخ.. وتيلس تنغزني فلانة تعرف تطبخ وتسوي حق ريلها.. سكتت وما قلت شي.. اوكي هالشي مسؤوليتي بس والله ما اعرف اطببخ شو اسوي يعني!!!! واميه قايلتلها اني ما اعرف اطبخ غير اسوي جاي.. قهوة وعيش ابيض.. واغسل وانظف واكوي..
والله حاولت اعوض عدم طباخي باني اغسل الصحون المكودة فالمطبخ..
ومرة من المرات قالتلي انتي ما تحملين.. والله والله اني اتضايجت.. لان هالشي مب باييدي.. جني انا اللي ما ابغي احمل.. يعني هالعمات ليش ما يفكرون قبل لا يفرون الرمسة..ودي بضنا اكثر منها.. تراني حرمة شراتها..
واميه ترمس عمتي.. ودووم يوم ترمس اميه تقولها.. بنتج ما تيي ترمسني ولا تتصلبي.. بنات والله والله اني استحي وانا مول مب اجتماعية.. ربيعاتي الروح بالروح ارمسهن مسجات.. ما اتصل لاني مب راعية سوالف.. تقول ما اتيي تيلس ويانا.. يوم ايلس تضاربني ولا تفر رمسة.. وتقول ما تشتغل ولا تطبخ.. وهيه تعرف اني ما اعرف اطبخ.. بس عقب حنة ورنة ومن كثر ما تذلني بديت اتعلم بعض الاشياء البسيطة واسويها لريلي وللبيت بعد.. ودووم تقول حرمة ولدي العود زينة وجييه تسوي وفنانة واحبها.. والله انقهرر.. تحبها برايها بس لا تيلس تقول جدامي دووم..
بنات ضجت.. كرهت اليوم اللي دشيت بيتها.. تمنيت لو ما تزوجت.. جان تييني هاك اليوم.. ووالله هبيت في ويهها.. ما سكت ويلست اراددها لاني تعبت من كثر ما اسكت.. تعبت من طيبتي ولا يبين بعينها..تعبت من نفاقها.. تقول جدامي رمسة وجدام ولدها رمسة.. خلاف سرت واستسمحت منها وخذتلها هدية.. مع ان والله حاز فخاطري كلامها عليه.. الود ودي ارد نفس اول بس ما اقدر..
ودي اساعدهم فالبيت واطبخ واسوي بس انا وحده استحي.. والله العظيم استحي.. وهم عندهم عادي حريم عيالهم ياكلون ويا خوان رياييلهم ع طاولة وحده.. انا لا تعودت ولا تربيت ع هالشي.. حاولت ااقلم عمري بس ما قدرت.. ورمضان هذا افطر في حجرتي.. بيزعلون برايهم بس انا ما احب اكل ويا خوان ريلي.. استحي والاهم حرااام ما يجوز..
والله عمري ما طولت لساني ولا قليت ادبي الا هالمرة.. لاني طفرت.. طفح الكيل.. والله لو غلطت عليها ولا ضربتها بقول.. بس انا ما يخصني فيها خير شر.. والله والله عقب ما ضاربتها ندمت قد شعر راسي..
وكنت اصيح جدام ريلي.. قلتله والله ما اعرف كيف راددتها.. والله مب طبعي!!
والحين لا اسير المطبخ ولا ساعدهم وقت الفطور.. استحي من عقب اللي استوى واخاف تعق عليه رمسة.. مع اني ما احب اكل ع الجاهز.. استحي.. ولا ابا حد يذلني على اللقمة..
يوم كنت حامل كنت اسير بيت هليه يوم يكون دوام ريلي ليل.. وتقول ليش دووم تسيرين بيت اهلج.. ووالله بنتها كل اسبوع تيي.. وتبات مرات بالاسابيع.. ليش كله يحطون ع حرمة الولد وعيالهم ما يقولون لهم شي.. واي شي يستوي فالبيت تسير تخبر بناتها.. ولو نحن خبرنا امهاتنا تيلس تقول تخبرون امهاتكم وما ادري شو.. وعاده يوم تخبر بناتها ييلسن يحقدون عليج.. وينافقونج ويجاملونج ومن وراج ياكلون لحمج.. ليش عيالهم كل شي يسوونه عادي وحريم عيالهم لا.. خافوا الله.. نفس ما هاييل بناتكم نحن بعد بنات ناس.. ليش اهل الزوج جييه ليش..؟؟ ليش اللي تكون طيبه وياهم يستغلونها ويمسحون بها الارض..
انا والله ما احب المشاكل ولا احب حد يحقد عليه.. بس والله الحين ما يهموني.. ولا يهمني لو زعلوا..
الود ودي اطلع اليوم قبل باجر من بيتهم.. لاني مب مرتاحة فيه..
قولولي بنات.. انا في شو غلطت..؟؟ شو لازم اسوي..؟؟ وكيف اخلي علاقتي مع اهل ريلي..
للعلم انا الحين كله يالسه فحجرتي.. ما احب اطلع وما اشوفهم الا عقب الفطور..
والله وااايد كلام ابا اقوله.. بس بكتفي بهالقدر,, بانتظار ردودكم الشرحة..
واللي ما عندها رد طيب.. تكفيني دعوة حلوة ان الله يرزقني الحمل والعمل والبيت باقرب وقت ياااا رب..
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
الله يكون في عونج الغالية
والله حاسة فيج
بس انتي كوني أحسن
تنازلي عشان ريلج
مب عشان أحد ثاني
لأنه يمكن أسلوبج مع أهله يخلي أمه تترس راسه
وتبدأ المقارنة بينج وبين حرمة أخوه من طرفه هو.. مب من أمه
وعقب تقدر تقنعه يتزوج عليج
ذاك الساع انتي شو مستفيدة؟؟
شوفي فديتج.. دامه ريلج واقف معاج أحينه..
رمسيه بالهداوة إنج تبين تطلعين وتعيشين بروحج
أكيد بيقول لج إنه أخوه ما سوى هالشي..
بس قولي له أبا أتعدل لك وأتكشخ وغيره من هالكلام..
وقولي له إنه وجودج هني مضايقج..
وانتي تبين تدلعينه وتبين يكون لج مملكتج الخاصة
وعمتج مرة كبيرة في السن
شو ما تقول.. لا تواخذينها..
يوم تقول شي.. قولي لها إن شاء الله
يعني مثال.. لو قالت لج حمارة.. (محشومة)
ابتسمي.. تعرفين ليش؟؟
لانها شو ما قالت.. فهل هذا يعتبر إنج انتي حمارة؟؟ لو تموت وهي تقول لج حمارة تراج إنسانة..
يعني الكلام لا يودي ولا اييب
وهذي آخر مرة تغلطين عليها..
لأنه الكلام الجارح يتم أثره... شو ما سويتي وشو ما تعدلتي.. بتم تذكرج بهالموقف
وأحسن شي سويتيه إنج اعتذرتي في نفس الحزة.. ما خليتي يطوف ع السالفة شهر ولا أكثر..
الله يصلح بالج ويهدي عمتج يا رب..
لا تنسين ربج.. لجئي له بالدعاء والاستغفار
ودعواتج لي حبوبة في هالأيام المباركة إنه ربي يحقق لي اللي في بالي
__________________________________________________ __________
>>>> الرد الثاني :
اول شي كل عام وانتي بخير وثاني شي والله اهل الريل لو تحبين ايديهم صبح ومسا مايشكرووون انا اختي شراتج مول مول ماارمس وياعمتي تخيلي حتى مااحب ازقرها عمتي وانا بعد مااعرف اطبخ بس بشكارتي هي اللي تسوى كل شي ____ بس نصيحه هونيها تهون واهم شي ان ريلج يكون زين معاج وفاهم امه وبيني وبينج ترى الدنيا ماتسوى ونحن كم بنعيش لزم انفر كل شي ورا ضهورنا عشان نستانس ويا ريايلنا
__________________________________________________ __________
>>>> الرد الثالث :
__________________________________________________ __________
>>>> الرد الرابع :
الله يرزقج بالحمل والعمل والبيت
تقريبا نفس حالتي بس عمتج شكلها أقوى بس تعرفين أي وحده ساكنه وياأهل ريلها لازم تصير تجات ومواقف سكني بروحج بترتاحيين من عوار الراس
__________________________________________________ __________
>>>> الرد الخامس :
الله يعييييييييييييييينج يارب
