عنوان الموضوع : رواية وفاء لقلبه
مقدم من طرف منتديات الضمير العربي
## وفاء لقلبه ##
للكاتبة : دموع السحاب
الجزء الاول ...
وفاء لقلبه ..وحبه ..وعطاءه ..
وفاء لوفاءه ..وفاء لأحساسه .
وفاء .لسهره ..لتعبه..لأنجازه ..
وفاء لتفاني ..وفاء لبياض قلبه..
وفاء لحظوره ..وفاء للوفاء اكتب
مااصعب الحياة عندما تكون قسوتها من اقرب الناس اليك ..مؤلمه حد الموت عندما يكون الطعن بالظهر ..قاسيه عندما تكون الجراح من يد من يملك الدواء ..
احمد هو من قال هذه الكلمات بحزن والم وجراح احمد هو من عبر عن هذا الانين
احمد..أه يافارس اخر شئ توقعته ان قسوتك تكون علي ..اخر شئ توقعته انك تمد يدك علي ..خساره يافارس
غمض احمد عيونه وانعاد المشهد كامل قدامه
دخل البيت مصعب وبكل سرعه توجه لغرفة فارس وماهي اي غرفه غرفة المكتب الي مافيه احد يتجرأ يدخلها بدون اذن وفتح الباب والتفت فارس والشرر واضح بعيونه
فارس وهو واقف ..خير ان شاء الله من متى ندخل بدون استأذان
احمد..من اليوم ليه يافارس تعمل كذا بعمك ليه
فارس..ماعندي عم انت عن مين تتكلم
احمد بغضب..والي زرته من هو
فارس بسخريه..اها هذا كان عمي وزيارتي كانت راحه لي
احمد ..رحت تتشمت فيه
فاري ..بااستهتار ..زياره عاديه
احمد..يااخي ماراح تزيدك فلوسه انت فلوسك مغرقتك ماانت محتاج تذل رجال كبير الشيب مالي راسه والمرض هده
فارس ..لوسمحت بكمل شغلي
احمد..انت حقير
فارس ..ماسمعت
احمد ويقرب له ..انت انسان خالي من المشاعر انت حقير
فارس وبغضب امتدت يده بكف على احمد
احمد..تضربني
فارس..واطردك
احمد بضحكه من غير نفس..كنت متوقع انك بتطردني من بيتك يافارس لكن ماتوقعت بهالسرعه
فارس يحاول يتمالك نفسه ..احمد اطلع غرفتك
احمد وبحزن..بطلع بس مو لغرفتي لا بطلع من املاكك من بيتك بس قبل مااطلع بقول لك كلمتين انت عندك لي مبلغ ياريت تعتبرني متنازل عنه مقابل صرفك علي كل السنوات الي راحت يااخوي
فارس وبصوت اعلى ..احمد احترم نفسك وثمن كلامك مو فارس الي يبخل على اخوانه بدمه وشلون حلاله
احمد..الي يدمر عمه
يقاطعه فارس بصوت غاضب..ماعندي عم
طلع احمد من المكتب بغضب وبسرعه اخذ ملابسه وصادفته امه الي كانت تصيح من الي سمعته بين عيالها
احمد يحب راس امه..سامحيني
ام فارس ودموعها على خدها ..خساره ياعيالي خساره
طلع احمد وترك امه بحالة انكسار والم وحزن وراح هو بحالة خوف والم وجرح كبير
ببيت فارس ماتغير شئ فارس مازال بمكتبه وامه من الحزن دخلت غرفتها والبنات كل وحده طلعت غرفتها تفرغ حزنها بطريقتها
نوره تكلم دانا بنت خالتها..مليت من هالبيت كرهته
دانا..خلاص يانوره انتم المفروض تعودتوا على فارس
نوره بحزن..بس احمد طلع من البيت
دانا..احمد رجال والي صار كان متوقع بيجي يوم يطلع
نوره..دانا فارس كل يوم يمحي صفحه حلوه بحياتنا
دانا..نوره لاتكونين متشائمه وروحي لخالتي ووسعي صدرها واحمد تعرفون جواله باي وقت تقدرون تكلمونه
نوره..أه بس الله يعينا على هالهموم وين دلال
دانا..دلال كالعاده عند التيلفزيون
نوره..اختك هذي مضيعه وقتها عالفاضي
دانا ..وشتبينها تسوي دراسه وخلصت ووظيفه وماحصلت وعرس مااعرست
نوره..هههههه المهم بروح لريم اشوف شتسوي
دانا ..اوكي سلمي عليها
نوره..يوصل فمان الله
في نفس الحاره كان فيه غرفتين بداخلها شخصين شايب كبير هده المرض طايح على الفراش ماهو قارد يعمل اي شئ ..
وبغرفه ثانيه بنت بعمر الورد دمرها حقد الناس وكرههم بدأ هالاحساس يمحي الطيبه بداخلها بدت تحس انها عايشه بغابه القوي يأكل الضعيف
غاليه بنت غاليه لان لها قلب ايبض صعب تحصله بوقتنا
غاليه وقفت عند الشباك تتفرج على بيت فارس ..او قصر فارس وبنفسها تقول معقوله يافارس عندك كل هالحلال وتطالب ابوي خمسين الف ليه طيب ..غريب هالانسان حضوره مخيف وبروده مخيف كلامه هادي ومعانيه جارحه ..ابتسامته سكين وغضبه دمار اغرب انسان شافته بحياتها كل القسوه تجمعت فيه وشافتها هي ومع هذا هو الشخص الوحيد الي ابوها يقول لازم تثقين فيه ..
تنهدت غاليه لانها كل يوم تفكر من اشهر من بعد ماخسر ابوها كل فلوسه وهي تفكر وتفكر ليه ابوها رجعها للماضي ليه رجع لعيال عمها ليه الحين رجع لفارس الي اسمه مثل الذهب بالرياض ليه الحين يايبه فهمني ..تعبت غاليه وطلعت تتطمن على ابوها وقالت لنفسها بيحي يوم وكل شئ يبان
وبغرفه من الغرف بهالقصر كانت ريم انسانه عايش بعالمها وسيلتها الوحيده لتعبير عن احزانها الكتابه عندها حلم ولازم يتحقق بينها وبين القلم الف حكايه وهالحكايات مافي احد يعرفها الا شخص واحد مايعرف الا توقيع الحكايه وهو فارس اخوها
ريم كانت تكتب وعايشه بعالم اخر
مااجمل الصحراء عندما تكون امان ..ومااروع رمالها عندما تكون ذهب..مااجمل الحياة عندما تملك جوهر الاخلاق ..ومااروع الامنيات عندما تحقق ..
لااعلم من اين اكتب فلك أكتب نعم لم اكن يوم انسانه مثقفه ولم اكن يوم عالمه بل انا انسانه عاديه احببتك وافتخرتك بك..ابكاني فراقك ..وعذبني قلمي للوفاء لك فكان هذا النزف
وفاء لقلبه..
مااجمل ابتسامتك ..ومااروع اخوتك..ومااحن من ابوتك..تحضن الصغير..وتحترم الكبير..تقدر الاختصاص..وتراعي العادات..لاشئ قبل الدين ..
اعطيتنا الكثير والكثير لااعلم من اين ابدأ لذلك سأكتب قصة ابنه مع ..لا اعلم ماذا اسميك
كل مااعلمه انني ولدت واعطيت اسم وهو ريم وانت اعطيت اسم ربية معك عندما تضحك تضحك امي واخوتي فااضحك معهم لانهم يضحكون وةعندما تحزن اراهم يحزنون فااحزن معهم لااعلم لماذا اراك بكل مكان امامي كبرت ودخلت المدارس وانت معي لااعلم غيرك انت االانسان المميز الذي يستحق ان تكون اول كتاباتي الحقيقيه هي وفاء لقلبه
ظل احمد محتار ويفكر وين ممكن يروح بالاخير قرر خلاص انه يعتمد على نفسه اخذ له شقه ونزل فيه لكن فيه صوره ماهي راضيه تريحه صور تمر بباله تنهد وجلس وهو يدقق بهالصوره
فارس باابتسامه..مبروك احمد واخيرا يااخوي
احمد ..الله يبارك فيك كان حلمي اكون مهندس واخيرا تحقق
فارس ..واطردك
احمد يتنهد ويحاول ينسى هالكلمه لانه متاكد انها مو من قلب فارس
احمد..خليني اتصل على الريم
ريم تبتسم وترد..هلا والله
احمد..هلا الريم كيفك
ريم..تمام انت وشصار عليك
احمد ..اخذت شقه
ريم بحزن..بتتركنا
احمد..خلاص ريم انا وفارس لنا فتره مو قادرين نتفق
ريم..طيب وامي
احمد..امي بعيوني بجي وبزورها ولاراح اقطعها ابدا
ريم..خساره يااخواني
احمد ..ريم خلاص
ريم وتضحك..مادامك قلت ريم ماقلت الريم يعني عصبت خلاص الي يريحكم اعملوه
احمد..وين نوره
ريم ..بغرفتها تكلم دانا
احمد..مايملون من بعض
ريم..عادي سوالف تضيع وقت
احمد..طيب انا بنام ولاتنسون اتصلوا علي صحوني لصلاة الفجر
ريم..طيب
احمد..انا بكلم امي على خطها
ريم..طيب خلاص فمان الله
احمد ..مع السلامه
وفي بيت مثل كل بيوت الرياض كانت دانا ودلال وامهم واختهم الصغير جود جالسين يسولفون
ام فهد..الله يعين اخيتي على الي هي فيه
دلال ..بعد يمه عندك ولد اخت يرفع الضغط
ام فهد..الله يهديه
دانا..بس احمد غلطان المفروض مايطلع
دلال..لا لازم يطلع خلاص فارس كل يوم ينسى نفسه ويغلط مو كفايه ممشي كلمته حتى على امه
ام فهد وهي طالع..الله يعين هالفارس
دانا ..بعرف انا ليه امي تقدر فارس
دلال وهي تضحك..لانه شيطاني مثل ولدها
دانا ..فهد صح يشبه فارس كثير واغلب وقته معه بس فهد يضحك ويسولف معنا مو مثل فارس
دلال ..انا ودي افهم هالانسان كيف بيتزوج
دانا..بصراحه اشك انه بيتزوج عمره الحين 32 سنه ماااعتقد يتزوج هو لاهي بااعماله يحسب الدنيا شغل وفلوس وبس
دلا ل..بس ماننكر ان فارس بفلوسه سوى شئ كثير
دانا ..اوكي عنده فلل ومزارع واسطبل كامل للخيول بس هذا مو كفايه
دلال ..لاتنسين ان فارس معروف انه كريم ومايقصر بفعل الخير
دانا وهي بتطلع..الله يستر عليه بسلامته
دلال ..على قولك
دلال وتلتفت على جود..ليه تناظريني كذا
جود..ليه ماتحبون فارس
دلال وتضحك..وانتي ساكته من اليوم تفكرين بالاجابه
جود ..صدق دلال فارس عادي مو شيطاني
دلال..جود روحي دوري موضوع تقرينه بالاذاعه بكرا
جود وهي معصبه..خلاص اذا شفته سألته
دلال وبعصبيه..عشان يذبحك فهد
جود..اف
دلال..والله ماينقال عندها شئ تسويها وتقول له
وبحزن كانت غاليه تناظر ابوها قربت من عنده تصحيه
غاليه..يبه يبيه قم اخذ علاجك
ابوغاليه ..يابنتي ماله داعي العلاج مابيسوي شئ
غاليه وعلى طول نزلت دموعها..يبه وانا من بتخليني له ارجوك ساعدني عشان تخف وترجع مثل اول
ابو غاليه يبتسم..لاتصيحين يابنتي كلنا بنموت وانتي ان شاء لله لك رب مابيتركك
غاليه..يبه ارجوك لاتقول كذا لاتعذبني
ابو غاليه ..اتصلي على فارس يجيني ضروري بكرا
غاليه..يبه ليه فارس ليه كفايه اسلوبه وكلامه معك
ابو غاليه..كلميه ولاعليك انتي
غاليه..يبه ابي افهم ليه فارس يعاملك كذا وليه احمد عكسه ليه البيت قبال البيت ولااحد يجي يزورك فهمني
ابو غاليه بتعب ..يابنتي هذي سالفه قديمه انسيها ولاتعبيني كلمي على فارس
غاليه بحزن ..ان شاء الله بس انت خذ الدواء وارتاح
ابوغاليه..برتاح اذا شفت فارس
غاليه الحين بكلمه
طلعت نوره من غرفتها وهي حاسه بملل ودخلت لاختها وحصلتها كالعاده ماسكه الملف الاخضر وتكتب ..دخلت بهدوء وسحبت الملف
ريم ..وجع ان شاء الله خوفتيني
نوره..ههههههههههههههههه والله شكلك نكته مامليتي من الكتابه
ريم..لا طبعا كيف امل من لكتابه عنننن
نوره وتبتسم..عن مين
ريم ..عطيني الملف
نوره وتقرأ العنوان..وفاء لقلبه
ريم تقوم بهدوء وتمد يدها..عطيني الملف نوره
نوره ..طيب متى بيخلص بموووووت على مااقرأه
ريم ..قريب
نوره..يابختك تقدرين تعبرين عن وفاءك له
ريم باابتسامه ..وانتي تقدرين
نوره بحماس ..كيف
ريم..بالدعاء له
نوره ..الله يرحمه يارب
الجزء الثاني
بنفس المكان كان فارس جالس على المكتب وحاله من الغضب مسيطره عليه ..ظل سرحان ويفكر بهالمكتب الكبير الخالي من الحياة كل مافيه جدي.. مكتبه تضم اكثر من 400 كتاب ..نور هادي ..ضرب قلم عالطاوله ..مافيه غير صوت دقات الساعه ..هذا حال فارس الي كلام اخوه يذبحه ماهو متخيل انه جاء اليوم الي اخوه يدفع له ثمن تربيته مستحيل ماكان قادر يتخيل الكلام الي قاله احمد اخوه ..ماتوقع بعد التعب والصبر اخوه يقول هالكلام ولسبب بنظر فارس قاسي حد الموت اخوي يهيني لخاطر من ...قطع عليه تفكيره رنة التيلفون من غير نفس رفع التيلفون
فارس بصوت جهوري..نعم
غاليه بخوف..السلام عليكم
فاري بااستغراب..وعليكم السلام
غاليه..من معي فارس
فارس زاد استغرابه..نعم من معي
غاليه تبلع ريقها..انا غاليه بنت عمك منصور
فارس وقف وكأن الفرج جاه..نعم شتبين بعد مو كفايه الي عمله ابوك
غاليه بخوف..ماسوينا شئ والله
فارس بغضب ..اف شتبين الحين
غاليه وهي تصيح..ابوي يبيك ضروري
فارس بعصبيه..ماني فاضي
غاليه بترجي..الله يخليك ابوي يبيك مايأخذ علاجه الا اذا شافك ارجوك تعال
فارس ويأخذ نفس ..بشوف
غاليه ..اترجاك يااخوي
فارس..طيب نجي نشوف المصايب
غاليه..لاتقول كذا عن ابوي
فارس ..نعم ماسمعت
غاليه..مع السلامه
سكر فارس الخط وطلع معصب من غرفته صادفته نوره وسكتت لان واضح عليه معصب
فارس..وين امي
نوره ..بغرفتها منسدحه تريح شوي
فارس..طيب اسمعي انا بطلع مشوار وبرجع واذا صحت امي قولي لها اني ابي اكلمها
نوره..ان شاء الله
طلع فارس وهو طالع اتصل عليه فهد
فارس..هلا
فهد..اهلين وش هالعلم الي سمعت
فارس..وصلك الخبر
فهد..ماهقيتها منك تطرد اخوك
فارس..ماطردته هو طلع
فهد ..وبعدين
فارس..عادي متى ماحب يرجع البيت مفتوح له
فهد..اوكي لنا كلام بعدين
فارس..اسمع انا رايح لبيت ابو غاليه
فهد مستغرب..عمك..؟
فارس ..انا لله وانا اليه راجعون حتى انت تقول عمك ازعجتوني
فهد عصب ..يااخي هو عمك اف اقول مع السلامه
قفل فهد من فارس وكل الاثنين معصبين
ام فارس حاولت تداري الحزن بس ماقدرت خلاص قلبها ماتحمل هالالم ماتحملت تشوف عيالها قدام عينها يتفرقون ماتحملت تشوف ولدها الكبير ظالم وقاسي ماتحملت تظل ساكته وساكته وهي تشوف القسوه بدت تسيطر على كل عيالها قامت وبكل قوه لبست عباتها وطلعت تجاهلت كلام بناتها وراحت ..تمشي وهي تتذكر كلام صار له سنين من ابو فارس كان يردده وهو خلاص بأخر ايامه
ابو فارس كان يردد كلمه وحده ..الله يسامحه الله يسامحه
ام فارس تمسح دموعها وتمشي لحد ماوصلت لشقة ابو غاليه طلعت ورنت الجرس وفتحت لها بنت استقبلتها وسلمت عليها
ام فارس ..انتي غاليه
غاليه بخوف ..ايه من انتي
ام فارس باابتسامه..انا ام فارس
غاليه بفرح تضمها..هلا خالتي نورتي تفضلي
دخلت ام فارس وهي تشوف حالت الشقه غرفتين بس مع مطبخ صغير ودورة مياه عزكم الله
جلست بالغرفه..شلون ابوك يابنتي
غاليه بحزن..الله يشفيه يارب
ام فارس..الله يخليه لك يارب
غاليه ..امين
ام فارس..سامحينا يابنتي مقصرين
غاليه..يكفي انك جيتي ياخالتي
رن الجرس للمره الثانيه وفتحت غاليه بعد ماعرفت انه فارس صدت عالجنب ودخل وتفاجئ لما شاف امه
فارس مصدوم..يمه..!!
ام فارس بقوه ..ايه امك
فارس..اقدر اشوف عمي
عرفت ام فارس ان ولدها زعل وقامت..انا بدخل معك ماشفته
دخل فارس وامه وغاليه عند الباب
ام فارس..السلام عليكم ابو غاليه ماتشوف شر
ابو غاليه بفرح ..الشر مايجيك حيالله ام فارس شلونكم
ام فارس. بخير
فارس..السلام عليكم ياعم
ابو غاليه بفرح اكثر ..هلا بفارس هلا بولد اخوي
فارس بجفاء..طلبتني خير ان شاء الله
ابو غاليه ..ايه طلبتك هذا شيك فيه 120 الف لك خمسين الف والباقي عطوه بنتي ضمان له بعدي
غاليه صاحت قهر على حال ابوها
فارس..بس انا ابي 200الف مثل ماقلت لك
ام فارس..اذكر الله يافارس
فارس..ارجوك يمه
ابو غاليه ماعندي خسرت كل شئ
فارس..مو مشكلتي
ابو غاليه باانكسار ..ماعندي شئ كل شئ جمعته هو الي عطيتك بالشيك
فارس..انا ابي 200 الف كامله
ابو غاليه ...حرام عليك يافارس
فارس ..ليه حرام انا ماجيتك ولاطالبتك بشئ ولااشتكيت عليك انت تبي تعطيني هالمبلغ وانا اقول لك ياكامل او ماابيه ياعمي
ابو غاليه ..صح انت ماطالبتني ولااشتكيت بس انا بموت وابي تصفى نيتك مني عشان بنتي
غاليه..يبه لاتذل نفسك عشاني ارجوك
ابو غاليه بحزن..يابنتي انتي ماتدرين عن شئ
غاليه وهي تصيح ..فهمني يابه علمني
ابو غاليه ..هايافارس قبلت بالمبلغ
فارس بااصرار..اسف ياعمي
ام فارس..ياولدي تعوذ من الشيطان
فارس..خلاص انا ماابي شئ بس اتركوني بحالي
ابو غاليه ..يافارس بنتي مالها احد بعدي
غاليه..لي الله يايبه لاتذل نفسك
فارس..خلاص هي جاوبت انا استاذن
ابو غاليه..فارس انتظر سامحيني ياغاليه يابنتي بس لازم اسوي كذا هالشقه ايجار وانا مابدوم لك عندي حلين ياولد اخوي
تزوج بنتي غاليه
شهقت غاليه وصاحت بقهر وظلم..لايايبه حرام عليك حرام
فارس بثقه ..مايرضيني هالحل
غاليه ..ليه يايبه خليتني سلعه رخيصه وانا غاليه ليه يايبه
ابو غاليه ويمسح دموعه..سامحيني ياغاليه بس ماعندي الا هالحل مهر 200 الف بيقدم لك من شخص متقدم لك لازم اوافق واعطي فارس فلوسه واضمن مستقبلك لازم اتطمن ان فيه احمد يوقف معك بعدي
غاليه بقهر..حرام يبه حرام تبيعني حرام
ضمتها ام فارس..يابو غاليه مايجوز خلاص فارس مايبي شئ وبنتك بعيونا
فارس جاه احساس غريب وقال بهدوء..من الي بيدفع لي الدين وش اسمه
ابو غاليه ويحاول يتجنب نظرات فارس..سلطان ولد خالها
غاليه وتوقف..لا يبه اكيد تمزح بتزوجني سلطان حرام عليك يبه انت بتدمرني ماراح تضمن مستقبلي حرام تزوجني سلطان وانت عارف انه بينتقم مني ليه ليه كفايه مليت من كل شئ مره تعرضني لولد عمي الي يكلمك كأنك اصغر عياله ومره لسلطان الي انت واثق انه بيعذبني كم يوم وبعدين بيطلقني
ابو غاليه يصرخ..لكذا لازم فارس يأخذ فلوسه عشان يقدر يوقف معك
غاليه بدموع..قصدك عشان ينتقم هو الثاني ليه ياخالتي فهموني انا ايش ذنبي اكون ضحية حقد من ولد عمي وولد خالي ليه انا الي ادفع ثمن غلطه لابوي الى الان مااعرفها فهموني
ابو غاليه نزلت دموعه ..غاليه انا بسوي العمليه بعد اسبوع سامحيني يابنتي
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
فارس ويلتفت لعمه ..انا طالع الحين وبنأذخ بكرا غاليه ونعمل الفحص وبعد النتيجه على طول نملك
ابو غاليه بفرح..وافقت
فارس ..وافقت كلها يومين وينتهي الموضوع
غاليه وتجلس عالارض ..وانا حرام عليكم حرام
ابو غاليه..اذا تبين رضاي وافقي
غاليه وبدموع ..يبه بعتني برخيص بعتني وتطلب موافقتي خلاص الموافقه مابتطفي النار الي احرقت كل احلامي
ام فارس ..يابنتي اذكري الله
طلع فارس من غير اي كلمه وظلت غاليه تصيح وام فارس رجعت لبيتها
ابو غاليه بحزن ..سامحيني ياغاليه
غاليه شلون اسامحك يبه فهمني ارجوك ليه سلطان يكرهك وليه فارس نفس الشئ ليه يبه انت وش الي سويته بحياتك وخلاني اكون الثمن
ابو غاليه بتعب واضح..ماودي اقول وتتشوه الصوره الحلوه الي في بالك عني بس مجبر اقول يابنتي من زمان حول 15 سنه او اكثر كان عمر فارس صغير طلع لي انا واخوي مبلغ 100 الف لي خمسين وله خمسين بس لعب علي ابليس واثر علي ابو سلطان
غاليه بصدمه..خالي
ابو غاليه ..ايه هالكلام وانتي توك صغيره انكرت فلوس اخوي رغم حاجته ومرضه وقسى قلبي ابو سلطان وابعدت عنه شغلت فلوسي وفلوسه وبيوم تفاجئت بمجلس ابو سلطان وكنت انا وياه وسلطان ولده وكان عمره حول19 سنه دخل علينا فارس ولد اخوي كان توه صغير
فارس..السلام عليكم
ابو غاليه..فارس وشتبي
فارس ويترجى عمه..عمي ارجوك عطني فلوس ابوي نبي ندخله للمستشفى الله يخليك محتاجين فلوس
ابو سلطان يتدخل..ماعندنا فلوس لابوك رح لخوالك
فارس ويتجاهله..عمي انت طيب وانا ادري عطني فلوس ابوي محتاجينها
ابو سلطان بصوت عالي..انت ماتسمع
فارس بغضب..انا اكلم عمي مااكلمك
ماحس الا بضربه على وجهه والتفت الا هي من سلطان الي قال..احترم نفسك وضف وجهك عندك المسجد اجلس وطر والناس بيعطونك كم ريال
فارس خاف واستحى والتفت على عمه..عمي ابي فلوسنا
ابو غاليه..ماعندي شئ
فارس ويمسح دموعه وبصوت عالي وهو طالع..والله اذا جاء ابوي شئ مااسامحك
سلطان يضحك ويدفه..اطلع بلا بزران
فارس يبعد يده بغضب..بوريك من البزر يالحقير
وانت ياعمي الله لايسامحك يارب الله لايسامحك
سلطان وطلع معه ولارحمه من الكلام الي يجرح ويعذب ويستفز ولد بسن المراهقه
طلع فارس وبدأ خالك يحاول يشغلني عشان ماافكر وكنتي انتي كل حياتي ونورتي حياتي من عشرين سنه وانتي شمعه تضوين بيتي الله مارزقني بعدك وحرمني من امك بس كان عندي فلوس الدنيا ماهمني الحلال من الحرام ماكنت افكر الا بشي واحد وشلون ازيد فلوسي توفى خالك ومسك حلاله ولده الشري سلطان وبدت المشاكل لحد ماخسرت كل شئ والسبب ولد خالك الطماع وبالاخير بيعني حتى بيتي وطردني وجاء اليوم ينتقم مني ويبي يتزوجك
غاليه وهي تصيح..يعني انت عارف انه بيعذبني وتبيني اتزوجه
ابوغاليه ..لو اموت ماازوجك له بس تعمدت اقول كذا عشان فارس يوافق لانه يكره سلطان
غاليه وهي تصيح..ليه يبه عملت كذا
ابو غاليه وهو تعبان..لازم ياغاليه مالك الا عيال عمك عيال خوالك كلهم بيزوجونك سلطان وشتبيني اسوي سلطان ممشي خوالك على كيفه ماتشوفينه يلعب فيهم على كيفه الي يزوجه والي يطلقه انسان مايحب حتى نفسه
غاليه..حرام يبه
ابو غاليه ..يابنتي تاكدي اني مابزوجك فارس الا اني طول هالسنين وانا اسمع الناس تقدر وتحترم فارس محمد هالشاب الي مااستحى من نفسه ومن بدايته كان يشتغل بكل شئ بس اهم شئ انه حلال ويوم عن الثاني كان يكبر ويكبر اسمه معه كان مثل الذهب وياما ناس كانوا يظنون انهم يهينوني لما يقولون فرق البياض عن السواد فرق فارس عن عمه يابنتي كنت بداخلي فرحان ان هالشاب ولد اخوي رغم قسوته بس هو رجال يخاف الله وهذا اهم شئ عندي
غاليه وحست بتعب ابوها..خلاص يبه فارس او سلطان كلهم واحد اهم شئ انت ربي يشفيك ويخليك لي ولايحرمني منك
ابو غاليه باابتسامه..الله يرضى عليك ولاتقارنين فارس بسلطان فارس يخاف الله وسلطان مايهمه احد حتىالصلاة مايصلي الي مايخاف من الله خاف منه يابنتيي لاتخافين من فارس وانا متاكد انه مابيضرك وبيعاملك بالمعروف لاتخافين هذا ولد محمد محمد الي تربيته مااحد يحكي فيها علمه من صغره يحفظ القران وعلمه وشلون يكون عادل وفعلا كبر ولده ورغم صغر سنه بالسوق الا انه معروف انه رجال عادل ومنصف وهذا يكفي اني اامنه عليك
غاليه..الله يخليك لي يبه
في شقة احمد كان سهران مع ولد خالته سامي واتصلت عليه نوره
احمد ويضحك...كملت الو
نوره..مساء الورد
احمد باابتسامه..مساء الياسمين
نوره بدلع..احمد
احمد..نوير لاتدلعين الله يخليك قولي بسرعه وش عندك
نوره عصبت..مالت عليكم من اخوان واحد وده يضربني والثاني ماله خلق يحكي
احمد..هههههههه ليه وشفيه فارس
نوره..طلع لحاله ورجع معصب بس معه امي
احمد..افا ليكون شاف امي كاشخه ورايحه عالفيصليه يابزعم بتتغدى
نوره عصبت..شقصدك يعني عادي اخوي ويمون اذا عصب
احمد..ههههههه طيب اخلصي عندي ضيوف
نوره..من عندك
احمد بملل..سامي
نوره..الحين سامي ضيف
احمد..ليه مو عاجبك
نوره..عاجبني بس لو يوافق يخلي ديما تجي عندنا
احمد التفت على سامي..ليه ماتخلي اختك تروح بيتنا
سامي..ماله داعي كل يوم مع بعض بالجامعه
احمد..عذرك ماله داعي مافيها شئ بيت خالتها
سامي..حتى ولو
احمد..نوره وين الريم
نوره..اقنعه ليه غيرت السالفه
احمد..طنشني ورجع يقرا الجريده
نوره..مالت عليه
احمد..ههههههه طيب وين الريم
نوره..بمنتجعها وين يعني بغرفتها تكتب
احمد..كفو اختي سنعه تستغل وقتها
نوره..فهمت يالله بروح اكلم احد ثاني
احمد..روحي ادرسي
نوره..يااخي بالجامعه ماندرس الا وقت الاختبار الذي يكرم به المرء او يهان
احمد..نشوف انتي تكرمين
تقاطعه نوره..من الحين اقولها بهان ماراح احد يكرمني يالله مع السلامه
احمد وهو يضحك على خبال اخته ..فمان الله
وفي بيت ثاني حلو ومرتب لكنه فيه شئ اخر مختلف فيه حب مالي قلوب ساكنيه هو بيت ام بدر اخت ام فارس وهي ارمله عندها ولدين وبنت
ام بدر ..بدر يمه كيف الشغل
بدر باابتسامه..وظيفتي تمام ومحلاتك الشغل اوكي
ام بدر..لاتقول محلاتك هذي محلاتكم
بدر ..صح بس هي من تعبك انتي
راكان يدخل بالحوار..بما اني مشروع مذيع فاانا اقول لكم من الحين اول برنامج راح اعمله راح يكون عن قوة الاراده والاصرار
ساره..مشاء الله على طول بيخلونك تعمل برنامج
راكان..لا بنقول لفارس يفتح قناة ويوظفنا انا وبندر ولد خالي
بدر..هههههههه حلوه ليته يسمعك
راكان ..تصدق ودي اعمل معه لقاء احسه انسان غامض
بدر..ماتدري يمكن
ساره..الله اكبر الحين مالقيت الا فارس
راكان ..اجل مع مين مع ممثل والا فنان
ساره..لا بس مع شخص يبتسم
بدر..الي مايعرف فارس يتوقعه مايبتسم
راكان..هو يبتسم بس لاتقرب عنده وهو معصب وانا اذا عملت معه مقابله بكون بالشرق هو بالغرب عشان مايضربني بااقرب شئ
ام بدر..والله انه شيخ فارس
بدر..صدقتي
راكان..الا صدق اسمع قريت مقال عجبني اسمعوه من جريدة الشرق الاوسط بعده بتعرفون من الشخصيه الي اتمنى اعمل معها اللقاء اسمعوا
حققت السعودية إنجازات كبيرة في مجال فصل التوائم السيامية، والتي بلغت عدد العمليات التي أجرتها بهذا الخصوص، 10 عمليات، شملت توائم من جميع قارات العالم، في حين أنها تتجهز حاليا لخوض غمار العملية الحادية عشرة، والتي قررت لتوأم سيامي مغربي.
وبدأت قصة مملكة الإنسانية، في جانب فصل التوائم السيامية، من السعودية، واتجهت إلى السودان، لتعود إلى السعودية مرة أخرى، من خلال محطتين متتاليتين، لتحن بعدها إلى القارة السمراء، السودان مرة أخرى، وفي هذه الأثناء نادتها ماليزيا، فاستجابت لندائها، وطلبتها القاهرة، فلم تخيب رجاها، واستنجدتها مانيلا، فحققت مناها، وأبت إلا أن يكون لها نصيب في القارة الأوروبية، فكانت بولندا هي صاحبة السبق في ذلك، لتستأذن بعدها من بردها القارص، لتعود إلى القاهرة مرة أخرى. وكانت مملكة الإنسانية في كافة محطاتها، قبل أن تستقر هذه المرة في الدار البيضاء، بعدما أمر الملك عبد الله بن عبد العزيز، بنقل حفصة وإلهام، التوأم السيامي المغربي، إلى الرياض، لإجراء عملية فصل لهما، حيث حطت الطائرة التي كانت تقلهما ووالديهما، على مدرج مطار الملك خالد الدولي صباح أمس، بعد توقف دام سبع ساعات في مطار الملك عبد العزيز الدولي بجدة، غرب البلاد، قبل أن تنقلهما سيارة إسعاف إلى مدينة الملك عبد العزيز الطبية للحرس الوطني، المكان الذي سيشهد عملية الفصل،ويعود تاريخ فصل التوائم السيامية في السعودية، إلى أواخر العام 1990، الذي شهد أول عملية فصل لتوأم سعودي من الإناث، كان ملتصقا بمنطقة البطن، ومشتركا بأغشيته، وجزء من الكبد، حيث استمرت عملية فصل التوأم 4 ساعات. واستمرت السعودية في ريادة هذا المجال من خلال فصل 10 توائم سيامية بداية من العام 1990 حتى العام 2005، الذي شهد عملية فصل للتوأم المصري آلاء وولاء، في عملية استغرقت 18 ساعة.
راكان..عرفتوا من اتمنى اعمل اللقاء معه مع الدكتور عبدالله الربيعه
بدر..فعلا انسان يستحق التصفيق والاحترام والتقدير الاعلامي
ام بدر..الله يسعده ويوفقه وكل الكادر الطبي الي معه ماقصروا يكفي الفرحه الي يرسمونها على وجيه الاهل والشعب
بدر..الله يحفظهم ويطول بعمر ملك الانسانه
ساره ..يارب تنجح عمليتهم هي يوم السبت صح
راكان..صح الله يعين ان شاء الله وربي يرحمهم واهلهم برحمته ويقومهم بالسلامه
الكل ..امين
ساره..المهم بروح انام عندي دوام تصبحون على خير
الكل ..وانتي من اهله
راكان..يمه خالي شخباره
ام بدر..ياجعله يسلم ابو محمد بخير
بدر..ابو محمد الغالي
ام بدر..لازم هو الغالي الي ماقصر معي
راكان ..الله يسعده
الكل..امين
جاء السبت وكان فيه حالة ترقب وخوف لكن ماكانت من ابطال قصتنا كانت من الكل من اب وام الاطفال السياميين المغربيين الي عاشوا 18 ساعه من الخوف والترقب ورحمة ربي شملتهم وخرج رئيس الفريق الطبي الدكتور عبدالله الربيعه وبشرهم بنجاح العمليه وكتبت الصحف هذا الخبر
نجاح عملية فصل جسدي التوأم السيامي المغربي
(حفصة) و(إلهام)
أتم الفريق الطبي السعودي - بتوفيق الله - بقيادة المدير العام التنفيذي للشؤون الصحية بالحرس الوطني الدكتور عبدالله الربيعة عملية فصل جسدي التوأم السيامي المغربي (حفصة) و(إلهام) بشكل كامل عند الساعة السابعة وخمس دقائق من مساء اليوم (السبت).
وأكد الدكتور الربيعة في مداخلة مع الصحفيين من غرفة العمليات عبر دائرة النقل التلفزيونية المغلقة أن مراحل العملية تسير على ما يرام، وأن الوضع الصحي للتوأم مستقر، مبينا أن كمية الدم المفقودة بنحو 50 ملم لكل طفل وهي كمية قليلة.
وأوضح الربيعة أنه تم وضع كل طفل في سرير منفرد، ليتم بعد ذلك البدء في عملية الترميم والتجميل، وقد استغرقت العملية 18 ساعة.
(((فخر جديد وانتماء اعتز به اجبرني ان اقف احتراما لنماذج من البشر تستحق ان نتطرق لها بكتابتنا لانها تستحق التكريم والاشاده فشكرا لكل الفريق الطبي الذي ابكانا فرحا بهذا الانجاز الرائع الذي علمنا ان الانسانيه هي من تعاليم الدين الاسلامي فشكرا من القلب لكم ايها الجنود المجهولين شكرا من قلب الشعب لكم )))
الجزء الثالث ...
الساعه عشر ونص بالليل ام فارس ونوره وريم مجتمعين
ام فارس..نوير اتصلي على فارس ينزل يتعشى معنا
نوره..معصب ماابي اكلمه
ريم ..انا بكلمه
دقايق ودخل فارس ..السلام عليكم
الكل..وعليكم السلام
جلسواعالسفره فارس..شلونك يمه
ام فارس بهدوءها المعتاد..الحمد لله
فارس التفت على ريم ..كيف الكتابه يالريم على قولة احمد
ريم تبتسم..تمام
نوره بنفسها غريب هالانسان مايحكي معه ويجيب سيرته التفتت لريم ..لازم تمام وانتي كل وقتك تكتبين وانا كني خبله لحالي
فارس يلتفت لها ويرفع حاجبه ..مايقصر معك التيلفون
نوره بخجل..شسوي ماعندي شئ اسويه
ام فارس..اقري قرآن
نوره ..طيب اقرأ
فارس..يمه شخبار خالي وخالاتي من زمان عنهم
ام فارس بعتب..انت المقصر لو تبي زرتهم
فارس يبتسم لامه ..ولايهمك قريب
ام فارس ..قريبك بعيد ياولدي
فارس يبتسم لها ..نقربه لخاطرك يالغاليه
ام فارس..الله يهديكم
كملت العائله العشاء بهدوء وطلع فارس مكتبه وظلت ريم ونوره سهرانين بعد مانامت امهم
عالساعه وحده دق التيلفون واستغربوا البنات
ريم ..غريبه من متصل هالوقت
نوره قامت ..بشوف
قامت وشافت الرقم وردت
نوره..الوو
دلال,,يوووووه اشوى خفت فارس يرد علي
نوره..هههههههههه وليه تتصلين عالبيت اذا خايفه
دلال..جوالي مايرسل ودانوه نايمه قلت انا وحظي وين ريم
نوره..معك
ريم وردت عليها ..هلا والله بالقاطعه
دلال..هلا بك كيفك ياعسل
ريم..تمام وانتي شلونك وشلون خالتي
دلال..الحمد لله ماقلتي لي ليه من زمان ماجيتي لنا
ريم..اممممم مشغوله اكتب
دلال..طيب مابيصير شئ تعالي الا اقري لي اخر ماكتبتي اخر شئ كانت مشاعر صح بالملف الاخضر
ريم..صح وانتي الوحيده الي تقرين كتاباتي قبل الكل
دلال..احم لان عندي ذوق
ريم..ههههههههه وين اهلك
دلال..امي نايمه ودانا وجود بعد وفهد على خبري جالسه يتفرج على فلم رعب خفت وتركته لحاله
ريم..رغم انه مع فارس دائما بس عايش اخوك
دلال..ياحظ الي بتتزوج اخوي والله
ريم..ههههههههه فهمت المهم تعالي عندي بكرا
دلال ..اصلن انا متصله لكذا بجيك العصر بدري وكمان بنام عندك
ريم مستغربه..احلفي
دلال ..والله مليت من بيتنا اقنعت امي وهي اقنعت فهد
ريم..والله انك اميرررره ياسلام عليك
دلال..اقول يالله روحي نامي وانا بعد تصبحين على خير وفمان الله وجهزي لي القهوه والحلى بكرا
ريم باابتسامه..الله معك
الصباح بالجامعه يجتمعون البنات قبل اول محاظره
اول من وصل نوره ودانا وانتظروا بنات خالهم هند ومها الي وصلوا وبعدهم بنات خالتهم ديما وغاده واخيرا البرنسيسه مثل مايسمونها ساره
نوره..شرفت اخير البرنسيسه
ساره باابتسامه..صباح الخير
الكل ..صباح النور
ساره ..هند محلوه اليوم
هند بدلع ..انا كل يوم حلوه
ديما..يالله عالثقه
هند..هههههههههه يالله غاده نشوفكم بنهاية الدوام
نوره..اسمعوا اليوم دلال بتجي عندنا تعالوا
ساره..لا بكرا الاربعاء وبنجتمع ببيت خالي
هند مستغربه ..عندنا مااحد قالي لي
مها..هههههه الله يفشلك روحي بس امي قالت لنا امس وانتي نايمه
هند..اها الله يحيكم يالله تأخرنا
دانا..يالله كل وحده على محاظرتها وبينا الو
راحت كل وحده لمحاظرتها وهي بداخلها ابتسامه حلوه تجسد الفرحه بهاللمه الحلوه بين الاهل
بنفس الوقت طلعت ام فارس مع غاليه المكسور خاطرها حتى تحمل فحص الزواج ومعها ورقه صغيره من فارس فيها فيتامين و حتى تطلع النتيجه بيومين بدل اسبوعين عملوا الفحص ورجعوا لشقه وصادفوا احمد عند باب العماره ونزلت امه وسلم عليها
احمد..هلا بنت عمي شلون عمي بشريني عنه
غاليه بخجل ..الحمد لله تفضلوا
دخلوا لشقه ودخل احمد وسلم على عمه ولاطول لان عمه شكله كان تعبان
ام فارس ..ماعليه يابنتي الله بيسهل
غاليه ..ماكنت اتمنى هالشئ بس انتي لاتزعلين لان ابوي اخذ حلال عمي
ام فارس تفاجئة ان غاليه تعرف..يابنتي عمك مات وهو يقول الله يسامحه الله يسامحه وانا مسامحته
غاليه..الله يجزاك خير خالتي الا ماقلتي لي انتي عندك بنات يعني بنات عمي
ام فارس تبتسم..عندي ريم عمرها 24 سنه متخرجه وبالبيت حياتها بس تكتب وعندي نوره بالجامعه مااعرف وش اسم قسمها وعندي احمد مهندس ويشتغل بس ساكن بشقه لحاله ومعور قلبي وعندي فارس الكبير ومايحتاج تعرفينه
غاليه..الله يخليهم لك ويخليك لهم
ام فارس ..امين ويخلي لك ابيك ويطول بعمره
غاليه ..امين يارب
ام فارس قامت..يالله انا بروح
غاليه برجاء..اجلسي خالتي تغدي عندنا
ام فارس..لايابنيتي اسمحي لي حبوبي بالبيت ولازم اخذها سكر وضغط والله يعين
غاليه..اجل مابجبرك بس لاتقطعيني خالتي
ام فارس..ان شاء الله واذا احتجتي شئ كلميني عندك رقم بيتنا
غاليه..عندي الرقم الي كلمت فارس عليه
ام فارس..لا هذا رقم فارس جيبي ورقه واكتبي رقم بيتنا ولااحد بيرد عليك الا انا اول البنات بس
اخذت الرقم وطلعت ام فارس بعد ماوسعت صدر غاليه الي دخلت تتطمن على ابوها وكسر خاطرها شكله كيف كان من بعد القوه سبحان الله
وصلت دلال مثل ماوعدت بنت خالتها العصر ولاحصلت احد طلعت لغرفة ريم على طول
دلال ..مساء الورد
ريم باابتسامه تقوم تسلم عليها..هلا وغلا بالغاليه
دلال ..اكيد غاليه المهم وين اهلك بيتكم تقل مهجور
ريم..ههههههه امي بغرفتها ونوره نايمه وفارس ماادري عنه واحمد مكانه فاضي
دلال ..لاتبدين بالدراما روحي جيبي لي قهوه احمد رجال فكينا كل مااحد قال شئ قالوا احمد واحمد خلاص
ريم..هههههههههه طيب كلتني بقشوري خلاص احمد رجال ولافيه قهوه الا اذا قريتي لي الصفحه الثالثه من الملف الاخضر احب اسمعها منك
دلال ..اوكي هاتيه
دلال فتحة الصفحه ..وبدت
لم نجده... وقيل: «هذا الفراق!» **
فاستجارت بدمعها الأحداق
كان ملء العيون فهد... فما
حجة عين دموعها لا تراق؟!
همسه من قلب يبكي فراق ..من قلب يحزن على غياب الاحباب ..من عين تدمع حزن على الغياب..
همسة تعاتب يوم الاثنين بشده وتقول كم انت قاسي ومؤلم..كنت يوم ليس ككل الايام فأنت صدمت قلبي ويتمت قلبي للمرة الثانيه ..مااصعب ان تكون يتيم الاب فهذا احساس الى الان لم استطيه ان اكتبه او اترجمه ففقدان الاب اصعب شئ ولكن ان اكون يتيمه للمره الثانيه فهذا يايوم الاثنين قاسي جدا على قلبي ..
عجب النعش من سكون المسجى
وهو من عاش لم ينله وثاق
عجب القبر... حين ضم الذي
ضاقت بما في إهابه الآفاق
عجب الشوط... والجياد قليل...
كيف يهوي جواده السباق
صرخه ..من اعماق روحي تستنكر هذا الخبر ..تبحث عن التكذيب ..تعشق اسم الاشاعه اليوم تتمنى ان تكون اشاعه روجها مساكين ولكن لا هذه الصرخه تزداد وتقوى وتأبى ان تقتنع بالفقد واي فقد لا ..لا ..لا ..صرختي تدوي بداخلي بلا صوت عيني لم تبكي لم تصدق ..قلبي لم يخفق لم يصدق ..يدي لاترتجف لا تصدق.... كل شئ باخلي يرفض التصديق ..
هدرت حولك الجموع وماجت
مثل بحر... والتفت الأعناق
هو يوم الوفاء... حب بحزن
نتساقاه... والكؤوس دهاق
وقف الموت في الطريق... ولكن
زحفت... لا تخافه... الأشواق
غضب يتفجر بيدي على الشاشه الصغيره وكأن كل مااتمنه انهم لم يخترعوها.. ابدا كنت اتمنى ان ينقطع الارسال او ينطفي التيار ولاارى هذا الخبر ..لم اتخيل ابدا ابدا ابدا وفجعت ..
يا أبا فيصل! عليك سلام الله...
ما خالج القلوب اشتياق!
خادم الحرمين الشريفين فهد بن عبدالعزيز في ذمة الله ..بكت عيني وخفق قلبي ورجفت يدي وجلست امام الشاشه ابكي ..
ابكي القائد والاب والملك وخادم البيتين لااعلم وقتها احسست انني فقدت شئ كبير جدا رمز اعتز وافتخر انني ابنة بلده افتخر انه حاكم ارض الحرمين..مااصعب البكاء عندما يتضاءل امام المصاب ..ومااصعب الالم عندما نرى الحقيقه غاب فهد ..عاش ملك وسيموت ملك كلمات لابو متعب قالها بمرض ابو فيصل وعاش فهد ملك ومات ملك وبايعنا على الوفاء خادم الحرمين الشريفين عبدالله بن عبدالعزيز
تذبحني العبرات ..الصدمة على وجهي ..والخوف يعتريني ..والالم يحملني لابكي قائدنا بحجرتي
وداعا يافهد العروبه وداعا يااب الجميع فهد بن عبدالعزيز فقددك ليس بشئ سهل علي ابدا فاانت رمز غالي جدا على قلبي اراك فاابتسم فطيبة قلبك تظهر من عينيك لتصل لقلوبناا فهد بن عبدالعزيز كنت قائدا جريئ محب ومعطاء ولن ينساك التاريخ فالحب لك والوفاء لك وسيكون للوفاء كلمة بعد هذه الصفحه
اللهم أغفر لعبدك فهد بن عبدالعزيز آل سعود وارحمه ..
وعافه وأعف عنه ..
وأكرم نزله .. ووسع مدخله .. وأغسله بالماء والثلج والبرد ..
ونقه من الذنوب والخطايا كما ينقى الثوب الأبيض من الدنس ..
اللهم جازه بالحسنات إحسانا .. وبالسيئات عفوا وصفحا وغفرانا ..
اللهم أنقله من ضيق اللحود ومراتع الدود إلى جنات الخلود .. في سدر مخضود، وطلح منضود، وظل ممدود، وماء مسكوب، وفاكهة كثيرة لا مقطوعة ولا ممنوعة، وفرش مرفوعة ..
ريم ودلال ..امين
ريم ..شرأيك
دلال..حلو كتبتي احساسك وهذا احلى شئ الي من القلب يدخل القلب آه فقد فهد بن عبدالعزيز كان صدمه لنا خصوصا احنا لاننا عشنا معه كل المراحل الله يرحمه يارب بعد هالصفحه وش بتكتبين
ريم..كلمة الوفاء وبعدين تقرينها المهم تعالي ننزل تحت
دلال تأخذ شالها ومازال الحزن مسيطر عليها ..يالله
السلام نزلت لكم 3 اجزاء إذا كان هناك تجاوب نزلت الباقي
__________________________________________________ __________
>>>> الرد الثاني :
مشكوره عالقصة
ويعطيك العافيه
واتمنى ترجعين القوانين وتتقيدين فيها عزيزتي
وتكملين الروايه بسرعه الله يسعدك
__________________________________________________ __________
>>>> الرد الثالث :
مشكوره حبيبتي
و لا تتأخرين في إكمال الروايه
__________________________________________________ __________
>>>> الرد الرابع :
مشكوره اختي على التفاعل وعلى شانك انزل الباقي
بمكان ثاني كان في مكالمه بين شخصين بدت عاديه وانتهت بعصبيه بين بدر وعبدالله
بدر..خلاص يااخي وسع صدرك
عبدالله..المهم انا بروح انام
بدر مستغرب..والدوام
عبدالله يتنهد..بطنش مابحضر
بدر بعصبيه..هذا ثالث يوم تغيب شسالفتك
عبدالله..شرايك اوقع حضور عندك
بدر وعصب..تستخف دمك والله انك ماتستهل من يخاف عليك وخل الي تضيع وقتك معهم ينفعونك
عبدالله ..بدر ماني رايق فيني النوم
بدر..سلام ياولد خالي
قفل بدر وهو بحاله عصبيه من ولد خاله الي تغير مابين يوم وليله اما عبدالله دخل غرفته وحط راسه ونام ..
عالمغرب نزلت نوره وجلست مع امها ودلال وريم..حيا الله العاطلات
دلال..لاتفرحين بتلحقينا قريب
نوره..لا انا بحمل مواد مابتخرج بدري
ريم..شخبار البنات
نوره..الا صح بكرا الجمعه ببيت خالي
دلال..ملينا من البيوت خالتي
ام فارس..اطلعوا للمزرعه
نوره..لا المزرعه لازم احمد معنا
ام فارس ومستغربه ..طيب يجي احمد
نوره بحزن ..وفارس
ريم..عادي فارس يسأل عنه ويجيب سيرته
نوره..مابيجي احمد وفارس هناك
ام فارس..يجي ماعليك انتي
نوره بفرح ..اجل بكلم خالي واقول لهم نطلع هناك احسن
دلال..حلو ونطلع احنا الصبح انا وريم وخالتي
ام فارس تغير وجهها..لا انا مابطلع الصبح عندي مشوار ضروري
ريم بااستغراب..وين يمه
ام فارس..بروح لحرمه تعبانه خذوا الخدامات انتم ورواحوا وانا بجي مع فارس
نوره..يمه وشفيك فارس مايطلع الا بعد صلاة العشاء
ام فارس وترمي المخده على نوره ..لا حول ولاقوة الا بالله وشفيكم اليوم خلاص بيجيبني
نوره وتضحك ..طيب يمه لاتعصبين
ام فارس ...اشوف اتصلي على بيت خالك وعلميني عشان اقول لفارس هالعومه بعد
ضحكوا البنات وراحت ام فارس لغرفتها
نوره ..هههههههههه والله امي الحين ليه تعصب
دلال ..منك احد يشوف وجهك ولايعصب
نوره بدلع..من القهر لاني طالبه لي هدف بالحياة
دلال ..مالت عليك انتي وهدفك هدك كان هدفي
ريم..نوير خلاص كفايه تحطيم
نوره تبتسم..دلال ليه ماجبتي جود
ريم ..ههههههههههه حرام اتركي البنت بحالها
دلال..مااقدر تستفزني جود تجلس مستمعه وبعدين تروح تقول كل شئ لفهد
ريم..ههههههههههه تستاهلين
نوره..يالله بروح اعمل اتصالاتي تبون شئ يااخواتي العزيزات
دلال..قولي لخالتي الجوهره تسوي لنا بكرا حلى طبخها حلو
ريم ..هههه والله انك ماتستحين خالتك وتطلبين منها
دلال وتبتسم..خالتي الجوهره عادي حبيبه
نوره..وهي بتطلع ..اطبخي انتي يالعاطله هي عندها بيت ومسؤليه
انحاشت نوره لان دلال قامت لها ..
الجزء الرابع
اتصلت نوره على بيت خالها وفعلا اتفقوا انههم يطلعون للمزرعه بدل بيت خالها ..ورجعت للبنات تقول لهم ..
نوره..خلاص وافقوا انا بطلع انام تصبحون على خير يالعاطلات
دلال..اقول مع السلامه لاتجيك المخده
فارس وتوه راجع للبيت ..احم
دلال حطت رجلها وطلعت فوق مع نوره
ريم..ادخل فارس مافيه احد
فارس..السلام عليكم
ريم..وعليكم السلام
فارس مستغرب ..كان عندك احد..؟؟
ريم باابتسامه ..نوره ودلال وطلعوا فوق
فارس.. زين اجل وين امي
ريم..بغرفتها
فارس..خليني امر اشوفها
راح فارس لامه ودخل عندها وحب راسها
فارس..مساء الخير ام فارس
ام فارس باابتسامه..الله يمسيك بالنور والسرور
فارس يبتسم..شكلك مبسوطه
ام فارس..وليه مستكثرها علي
فارس..افا لو بيدي اهديك سعادتي
ام فارس..الله يخليك لي ترى اهلي بيجتمعون بالاستراحه بكرا وبيطلعون البنات الصبح مع الخدامات وانت بتوديني الظهر
فارس بعد تفكير..لا يمه انا بكرا بمشي العصر لشرقيه
ام فارس مستغربه..وش عندك
فارس..ابد ودي اغير جو وبيروح معي فهد
ام فارس..فهد يدري عن بنت عمك
فارس..ايه بيكون شاهد
ام فارس وفجأه تذكرت من طرى فارس الشهود ..طلبتك ولاتردني
فارس..ابشري يمه
ام فارس..الشاهد الثاني ابيه احمد اخوك
وقف فارس ..ماراح اكلمه يمه
ام فارس..انا بكلمه
فارس سكت شوي ..كيفك انا كنت ناوي اجيب واحد من العيال بس خلاص اذا بيجي احمد ماعندي مشكله
ام فارس ..وخواتك
فارس وعصب..يمه احنا اتفقنا مااحد يعرف عن الموضوع وبتظل عند ابوها
ام فارس..الله يهديك
فارس..تصبحين على خير بكرا الساعه 11 بنكون عندهم
ام فارس..ان شاء الله
بغرفة البنات طلعت ريم..بسم الله شفيكم انحشتوا
دلال..تعرفيني مااحب اسلم
نوره..اقول ودي اطنش الجامعه واروح معكم الصبح وناسه
ريم..اذا عندك رصيد بمحاضرات بكرا غيبي
نوره..لابروح اكلم البنات اذا بيغيبون اوكي
ريم..بيذبحك فارس اذا شافك تكلمين هالوقت
نوره..اف بكلم من جوالي بيخسرني
دلال..جوالي تحت امرك بس الله يسعدك اشحنيه
نوره..هههههه مالت عليك وانتي دايما يستقبل مايرسل
دلال..ماعندي فلوس
ريم..هههههههه الله من الكذب بعد
نوره..باي
دلال..وين بتروحين
نوره..اف ماتفهمين شفيك اليوم مخك قافل
دلال ..ههههههههههه والمفتاح ضايع على قولة فهد
طلعت نوره وتركت البنات
في بيت ابو محمد كان ابو محمد وام محمد ولدهم محمد وهند جالسين يسولفون
ابومحمد..والله اشتقت لام بدر من زمان ماشفتها
محمد..والله خالتي مافيه مثلها انسانه مميزه بكل شئ
هند..خالتي الجوهره لانها تعبت بحياتها تلاقيها تثمن أي شئ حتى الكلام دائما تقول الاستماع فن ولازم تتعلمونه
محمد..وهي صادقه يابخت الي يعرف لهالفن لانه فن رائع
ام محمد..الجوهره ماقصرت بعيالها الله يخليها لهم
هند وتبتسم ..الا يمه من اطيب عماتي وعادي لاتنحرجين من ابوي قولي هههههه
ام محمد وتناظر رجلها ..هو خواتي قبل مايكونون خواته اطيبهم ام فارس واقواهم ام بدر
محمد..صح عمتي ام فارس طيبه حييييييل
هند بعفويه ..ماتشوف فارس ممشي كلمته
ابو محمد والتفت لها ..افا ماهقيتها منك ياهند
هند خافت..ليه يبه قلت شئ غلط
ابو محمد بهدوء ..فارس ماهو مشي كلمته على امه لا امه الي عطته ثقتها ورمت الحمل عليه وهو رجال وقدها
هند حست انها زعلت ابوها حبت راسه..اسفه يبه مو قصدي
محمد..الا يبه خالتي حصه من زمان ماجت عندنا
ام محمد وتذكرت ..الحين وراء ماتخلينا نخطب لك دلال
محمد..يمه دلال ماتبيني
ابو محمد..وانت وش عرفك
محمد..هي مره قالت ماتبي اقارب
هند..دلال خبله ترمي كلام وبس
محمد مبتسم..وبتزوجوني خبله
ام محمد تناظر هند..هالخبله ذا جاء وقت الجد شالت البيت على راسها تقول بالعزايم لحالها
محمد..بس يمه وقتنا تغير مو بس بيت وطبخ
ام محمد ..اف منكم
ابو محمد..خلو الولد على راحته بس انت يامحمد تبيها
محمد.. دلال احسن من أي وحده مااعرفها بصراحه افضلها عن غيرها المهم يالله تصبحون على خير بجيكم للمزرعه بعد المغرب
هند..لاتتأخر
محمد..ان شاء الله
الكل نام هالليله ومن بكرا الصباح الي راح لشغله والى راح لجامعته وريم ودلال راحوا للمزرعه وام فارس تنتظر فارس عشان يروحون يملكون له على بنت عمه الي كانت عند ابوها ودموعها على خدها
ابو غاليه بحزن ..سامحيني ياغاليه
غاليه وتمسح دموعها ..مسامحتك يبه
ابو غاليه..الله يوفقك فارس رجال وبيحافظ عليك
غاليه بنفسها تقول ..انت ماتعرفه انسان قلبه حجر كيف يحافظ علي تنهدت وراحت تفتح الباب وحصلته فارس ودخلت ودخل هو ومعه امه الي سلمت عليها
فارس من غير نفس ..عمي صاحي
غاليه..ايه بغرفتها
رن الجرس وراح فارس يشوف وفتح الباب ووقف ثواني عينه على الي واقف مانزلها.. اما احمد حس انه مشتاق لاخوه وده يحضنه وده يتأسف له بس نظرة فارس منعته نظرة العصبيه والزعل خوفته من أي مبادره كان وده يقول له ان الكلام طلع غصب عنه ..كان وده يعتذر منه كان وده يقول له انت اخوي ولااقدر على زعلك تنمى يشوف ابتسامة فارس النادرره بس المليانه حب للاهله تمنى يضحك بس قوة فارس وجموده خوفت احمد خاف يصده خاف يجرحه او حتى مايرد عليها ماقد الا يمد يده وصافحه
احمد..السلام عليكم
فارس ..وعليكم السلام وصل فهد والشيخ وقطع كلامهم دخلوا كلهم وتم الموضوع وباركوا لفارس ولما بارك له احمد حظنه ماقدر يمنع نفسه من اشتياقه لاخوه ..سامحني يااخوي انت كبير والكبير يظل دايم كبير
ربت فارس على كتف احمد وابتسم وطلع احمد مرتاح وراح للبيت ينتظر امه حتى يروحون للمزرعه اما فارس وقف قبال عمه الي انصدم من كلام فارس
فارس بقوه ..خلاص ياعمي ملكه وملكنا لكن ماابي احد يعرف عن الموضوع غير الي كانوا حاظرين والكلام لك يابنت العم
غاليه وهي ميته قهر ..لاتخاف مابشوه سمعتك واقول اني صرت زوجتك
فارس والتفت عليها وحصلها نفس ماهي مازالت متغطيه..حلو الكلام يالله فمان الله
طلع فارس وطلعت معه امه ودخلت غاليه غرفتها وغرقت بدموعها والمها ونهاية احلامها دخلت الغرفه وظلت تصيح بشكل متعب اخر شئ كانت تتخيله ان ولد عمها يستحي منها اخر شئ توقته ان احلامها ببساطه تنتهي تخيلت كل شئ الا هالحلم الانسان الي يترتببط فيه كل عمره عمرها ماتوقت قلبه حجر مثل فارس لايمكن يتأثر بأي شئ انسان انمسحت الرحمه من قلبه لكنها بالاخير استسلمت للامر الواقع ورضت بقدرهاا وهذا طبع غاليه ترضى بأي شئ وتكمل حياتها
الظهر الكل اجتمع بالمزرعه وهالمزرعه هي ثنتين مفتوحه على بعض والي يدقق فيها يحصل جزء منها يأخذ الشكل التراثي القديم وهو ملك الخال ابو محمد والجزء الثاني المميز بكل ديكوراته وكأنه قصر هو ملك لفارس لكن فضلوا يفتحونها على بعض وتكون مزرعه للعايله كلها وكان اقتراح من احمد والكل شجعه عليه..وحاليا مزرعة فهد مازالت تبى وبتنضم لهم قريب
عالغداء ..
دانا..يمه وانتم ياخالتي اسمعوا كل اسبوعين بنجي هنا ملينا من البيوت
ديما..صادقه دانا
ام بدر..لا والله عالاقل كل شهر
غاده..الجوهره ياخالتي خليك معنا مو ضدنا
الجوهره..ههههههه انا مااقدر عيالي مابيجون كل اسبوعين
ساره..يمه عيالك رجال خلاص
ام بدر..حتى لو رجال مااخليهم لحالهم
ام فارس..الا ياالجوهره وين راكان من زمان عنه
ام بدر..ابد فيه ياعند بندر يالبيت مجتمعين
ام سامي ..قاطعين عيالنا كلها اذا ماجمعنهم مايجون ويسلمون نسينا ملامحهم
ام فهد..بذي صدقتي واولهم ولدي
غاده..يممممممه
ام سامي..مصمه وشتبين
غاده..ابي اسافر
ام سامي ..كان رحتي مع عيال خالتك
كل البنات ..مين
ضحكوا عليهم لانهم فعلا كانوا متفاجئين
ام فارس..فارس وفهد راحوا لشرقيه
نوره..اشو هذول مستحيل اسافر معهم ليه رايحه عزاء
ام فهد..والله مافيه مثلهم رجال
دانا..من يشهد للعروسه
استمرت السوالف والضحك الى العصر بين البنات وامهاتهم
حول المغرب ..
عند الخيول ماكان فيه الا جود مع الخدامه الي من شافت العيال قربوا رجعت للفله
احمد..حيا الله جود وشلونك
جود..الحمد لله
سامي..جود ليه زعلانه
جود..ماعندي احد يلعب معي
احمد..افا واحنا وين رحنا
جود..تضحك علي
احمد ويلتفت ويصوت لراكان وبندر الي جوا عندهم
بندر..خير وشفيكم
سامي ..بنلعب مع جود
راكان..وش تلعبون معها
وصل بدر وعبدالله
عبدالله..سلام وش عندكم مجتمعين
راكان..نفكر بلعبه نلعبها مع جود
بندر..اسمعي بلعبك الي تبين بس بشرط
جود بحماس..وشو
بندر ويضحك..ابيك تدخلين خمس ارانب عالبنات وتنحاشين ..
الكل ضحك
راكان..حلو بس بتعصب علينا امي
سامي..صح خالتي اخر مره لما عملتها يابندر عصبت
بندر..ماعليكم اراضيها
جود..ههههههه طيب يالله خلوني انتقم
احمد من مين..
جود..منهم بس يتكلون كلام ماافهمه ولااحبه
راكان بحماس..وش يقولون
ضربه سامي..عيب عليك
راكان..يااخي انا مشروع مذيع لازم اصير ملقوف
محمد ..خير وش هالاجتماع
راكان..ارجوك محمد لاتخرب علينا
محمد..بسم الله وش اخرب
وعلموه السالفه وسكت ماعلق وتركهم ينفذون المقلب بالبنات وفعلا اخذت جود كرتون فيه خمس ارانب وراحت للبنات وفتحت الباب ورمتهم وسكرت الباب ومسكته بقوه بس بالاخير ضعفت وتركته ..
عند البنات كانوا منسجمين بالسوالف وفجأه انفتح الباب التفتوا يشوفون الا جود وعلى طول رمت الارانب عليهم وصرخوا كلهم بوقت واحد
ديما وتطمر على هند..ابعديه عني بسرعه
هند...هههههههههه شلون اقوم
ريم جلسه فوق الكنب ..يمممممممممممممممممه الحقيني يمه بموووت
نوره بمكانها ماقامت..هههههههههههههههههه اشكالكم تضحك بطني يعورني ماتخوف ارانب يالمهبل
دانا وتطمر الارنب ةتفتح الباب وتطلع الارانب وتلحق اختها وتطلع برا عند العيال ولاحسوا الا بالشبشب وراء جود اما دانا وقفت لان العيال برا راكان من الضحك جلس عاارض
راكان..ههههههههههه جود هذا اول شبشب
جود..ههههههههه لو تشوفهم يضحكون هههههههههه
سامي..ياويلك ياجود
طلعت ام بدر..ياعيباه عليكم هذا كبركم تسووت كذا
راكان ومازال يضحك لحد ماضحكت امه على ضحكه ..اضحك غرفت عقولهم حسبي الله على عدوك
بندر..ياعمتي خلينا نضحك من زمان ماضحكنا
ام بدر..حرام مايجوز كذا اولا هذي حيوانات ليه ترمونها باهلشكل بعدين انتم قدوه كبار
احمد. سامحينا ياخاله بس .بشري ياخاله كم الاصابات
ام بدر وتضحك..مافيه اصابات بس خوفتوهم
دق جوال احمد ورد
احمد..ههههههههههههه
ريم..اضحك حرام احمد
احمد..هذي فكرة راكان وبندر
راكان ويضحك..هذا اول شئ انتظروا المزيد
ريم..قوله بدل مايكون مذيع يكون معد لبرنامج الكميرا الخفيه
وقال احمد لراكان الي ضحك من الخاطر
ريم..قبل مااسكر بقول لك شئ اسمه نوره وديما ودانا وساره ومها يخططون عليكم
احمد..والباقي
ريم..الباقي استسخفوا الحركه منكم
احمد تضايق..صدق
ريم بتقهره..بصراحه هند تقول هذي حركات بزران
احمد..اوكي خلاص انا بقفل
ريم..هههههههههه خذيت حقي اكذب عليك اولنا هند تخطط عليكم
احمد..طيب ياريموه تشوفين
ريم..وحده بوحده
احمد..مقبوله منك
ريم..فمان الله
احمد الله معك
قفل منها والتفتت عالشباب ..استعدوا فيه مقلب يخطط ضدكم
راكان..وش بيسون بيرمون علينا شبشب
بندر..هههههههههه حلوه لا يمكن علبة مناديل اذا ارانب خافوا منها وش بيسوون
محمد ..لاتحقرهم
سامي ..لاتخوفنا منهم
احمد..توقعوا أي شئ بس البنات ناعمات ان شاء الله ماتشوف شئ كايد
عبدالله ..الله يستر
على طريق الدمام كان فارس وفهد يسولفون
فهد..وبعدين وش بتسوي بالشيك
فارس..بصرفه واعطيه لبنته
فهد..بتأخذ الخمسين
فارس معقد حواجبه..مجنون اخذ خمسين الف منه وش ابي فيها
فهد..ماانت مزعجه تبي فلوسه
فارس..كنت احاول اشفي غليلي منه
فهد..وبنت عمك
فارس..عادي مابيتغير شئ
فهد..يعني مااحد بيعرف بالزواج
فارس..لا خليها عند ابوها
فهد..طيب عمليته متى
فارس..بنهاية الاسبوع
فهد..الله يشفيه
فهد التفت لفارس ولاسمعه قال امين ..قل امين
فارس يبتسم..قلتها بنفسي
فهد..اشك
فارس..ليه يااخوي مافي قلبي رحمه الله يشفيه ويخليه لبنته ويفكني منها
فهد..هههههههههه ماني متخيل انك تزوجت
فارس وعصب..قفل الموضوع
فهد..ابشر يالمعرس
طنشه فارس ولارد عليه
فهد ..فارس ماشفت بنت عمك
فارس بلا اهتمام..لا
فهد..يمكن تعجبك
فارس ..انا ماراح اتزوج
فهد وانقهر..يعني ماتبي عيال
فارس..لا
فهد..استغفر ربك يااخي المال والبنون زينة الحياة الدنيا وانت عندك المال وناقص البنين
فارس....علم نفسك
__________________________________________________ __________
>>>> الرد الخامس :
مشكوره الروايه
ننتظر اكتمالها
