السلام عيكم ورحمة الله وبركاته........
هذي قصه حلوه وحزينه بنفس الوقت وبصراحه قصه اكثر من روعه.....
بدون مجامله>>>>>لما قريت القصه نزلت دمعتي غصب وجتني(قشعريره)>>>
اخليكم مع القصه............
(ماتت وهي مرتاحه )
**
قصة شقا ماهي سواليف ومزوح .. ليت القدر يومه كتبها محاها ..
هذا النصيب وما كتبلي على اللوح .. قصة عذاب تبكي اللي قراها ..
**
ما أدري من وين أبدا قصتي أو مأساتي أو تجربة حبي الفاشل ، عالعموم أنا بنت عمري الحين 20 سنه ، لي عيال عم واجد ،لما كان عمري 16 كنت أنجذب لواحد منهم وإسمه جراح وكبرت وكبر حبي له ، شخصيته كانت حلوه يمكن ماكان فيه جمال الشكل بس جمال الروح و تكانته وعقله الكبير ، وأهم شي القناعه كان يرضى بأقل شي ، وصلت لصف ثالثه ثانوي وبالعطله سافرنا وكان اهو و عيال عمي معانا ، بصراحه كانت أحلى أيام عمري كنت أنام وأصحى على صوته ، ....
** أقبلت مثل اللي يبشر بمولود ،،، وأقفيت مثل اللي يعزي بغالي ....**
كنت أتمشى وأناظر خياله ، كنت أنطر اليوم اللي أتمشى فيه معاه بوسط هالطبيعه ، كنت أظن إنه لي لأني بنت عمه ومافي شي راح يوقف زواجنا ، وحبي له .....
** من مغيب الشمس لين إرتفع صوت الآذان .. غربتن تطوي ضلوعي وليل يحتدي .. أتنزح عن مكاني وأجي نفس المكان .. كني اللي ضاعت خطاه و يخاف يغدي ..
وإن بكيت وصار للدمع في عيني بيان .. الغلا شي من الله ولا هو في يدي .. **
صار وقت رجعتنا للكويت ، بفقد صوته ، بفقد شوفته ....! بفقدك يا جراح ..
أنا بالكويت ما أشوفه إلا بالأعياد والمناسبات ، و رجعنا للكويت وبالطريق .....؟
** أعترف لك سالت البارح عليك .. دمعتن في مفرق دروب السفر **
مرت شهور ماشفته وصرت برابعه ثانوي وطبعا" برابعه مع الدراسه لهيت عن حبه شوي ، ومره من المرات و انا قاعده مع اخواني جابوا طاريه وليتهم ما إذكروه !
** كنت أتوقع حب الأطفال بيموت .. لين إكتشفت إنه لهالحين ما مات ..
الحب الأول يحيى بوسط تابوت .. يحيى و يبقى حافظ كل مافات .. **
(( ودي ما أكمل بس ودي تعرفون غلطة عمري ))
إمتحانات رابعه ثانوي كانت تبدا بتاريخ 13 / 6 / 2017 والمفروض إني أتجهز لها ..
وبشهر4 وبالتحديد يوم 16 كنت قاعده مع أمي وخالاتي ، آه لو تدري أمي إنها بالخبر اللي قالته إهدمت حياتي وأنهت مستقبلي وضيعت حلمي ،... آه يا يمه ليتج ما تكلمتي ، آه يا يمه ليتج ما قلتي ،.. ليتني مت قبل ما أسمع بزواج حبيبي جراح .....
** جاني الخبر يا صاحبي وأظلم الكون .. قدام عيني ثم نطقت الشهاده ..
عالعموم أقولها ألف مليون .. مبروك من قلبن شكالك بعاده ..
مبروك لا يهمك سواليف وظنون .. من عاشق أهداك فرحة فؤاده .. **
مبروك يا حبيبي .....
مبروك إنتهى حلمي .. مبروك ذبحتوا قلبي ....
مبروك ....
بصراحه بهاليوم إنشل تفكيري ، رحت لتيلفون اخوي الكبير و دورت إسمه وأخذت رقمه ، .... !
(( للعلم أنا بدويه والبدو عيب عندهم بنت العم تكلم ولد عمها ))
دقيت على رقمه من تيلفوني على إني غلطانه وسكرت الخط وبكيت بكيت على حظي ....!!!
و على فكره كان هاليوم السبت تاريخ 19 / 3 / 2017 ،
(( جراح كان شاعر و أنا عندي محاولات شعريه ))
وصارت بينه هالمسجات ..
دزيت لجراح : قلت أنا آمنت بالله خالق كل البرايا .. والبلا إني بنت بدو العشم فيها وفيه ..
جراح : الله يا عالم كل الخفايا .. اعلم ترى النيه عليها هديه ..
نوف : آه يا شعري ويادمعي وياكثر الخطايا .. وآه يا ناس وجودي بينهم لي منقديه ..
جراح : يا رب إنك تغفر لنا كل الخطايا .. وترزقنا الجنه مع الناس البريه ..
نوف : آه من يوم نجي قدام وجه الله عرايا .. مانشيل إلا الذنوب ولا نشيل إلا الخطيه ..
جراح : تصبح على خير يا زين الحلايا .. الله يغفر ذنوبك و يشيل عنك الخطيه ..
نوف : ماني من اللي تنزل راسها من الصبايا .. ولاني من اللي يذلون العمايم في بلاط المكرميه ..
جراح : وراك يا اريش العين تقسي عليه .. حكمن حكمته لاتسنده ليه ..
///////////
وصار يوم الأحد 20 /3 /2017
كان جراح يراسلني من غير مايدري أنا منو ؟!!
جراح : آه ياحلو الخطا من يوم جتني هالرساله .. وأنا ماني من رجالن الخطا يمشي عليه ..
نوف : روح دور غيرنا واحدن مرتاح باله .. وش اللي يجبرك يابن الحلال عليه ..
جراح : جبرني عليك الغلا والعشق لا تقطع وصاله .. والقلب لامنه عشق لاهو بيديك ولا بديه ..
نوف : عزتي والله نهتني عن عشقن هذا حاله .. ماني من اللي تنخدع في كلامن رديا ..
{ وجنب عن دربي أحسن لك }
جراح : بدون تهديد أنا بس ودي أعرف منو إنتي يابنت الحلال أنا قايلج أنا ماني راعي هالسوالف والمصخره والله يشهد علي .
نوف : أنا بنت لو تجيب لي هارون وكل ماله .. ما أرضى إني أسير في دروب كلها خطيه .. بنت شيخ في مكانه ولا مثاله .. اخت رجالن جنبوا عن دروب المنقديه ..
جراح : مات الرشيد ومات قدام ماله .. أصلي (.....) ما امشي بدروب الخطيه ..
نوف : يابن الحلال آسفه أنا بس كنت غلطانه والسموحه .
جراح : ردي على هالبيتين لمحمد الخس و أخلص ،،
(( ذبحتني ياسيد كل الرعابيب .. وفجيت قلبي يا أريش العين فجي .. فج مثل مضراب شلفا تراحيب .. شلفا تخلي الدم الأحمر يكجي .. ))
نوف : ترى وصلني منك حلو المكاتيب .. وعقلي من التفكير قام ينوح ويلجي .. ترى حياتي كلها بيد عالم الغيب .. وترى هوى الهموم بالليل يعجي ..
جراح : والله ما ادري شقول أقسم بالله إنج صج عذبتيني أنا صج يبي يصير فيني شي مدري ضغط سكري والسبه إنتي .
\\\\\\\\\
نطرت أيام و بدون تفكير الساعه 3 الفجر وكان جراح بدوانيتنا يلعب ورقه ..
دزيت له مسج : ممكن أقولك شغله ؟
جراح : ممكن شنو هي ؟
نوف : إنت جراح وأنا أحبك من 4 سنين وأعرف كل شي عنك
(( الظاهر انصدم وظل يدق يدق يدق وأنا ما أرد بس قلبي تقطع شلون أشوف حبيبي يدق وما أرد ؟!! ))
رديت و ليتني ما رديت والله بس اسمع صوته تنزل دموعي وسولفت معاه كانت أحلى لحظات حياتي
وكتبت هالأبيات لك ياجراح
{{ لا تجرح اللي بعمره حبك سنين .. وكافي جروح الناس وسهوم الأيام ..
ولا تكثر بالحكي وتزيد ذاك الحنين .. ترى شوقي على شوفك مخلي حالتي تنضام ..
لا تنشدني عن نفسي أنا داخلي شخصين .. واحد عايش لأجلك والثاني لأجل الأحلام ..
سمعت انك تبي تعرس وصار الحمل داخلي حملين .. عسى ربي يهنيك و يبعد عنك الآلام ..
واتركني أنا اعيش على العسر وإلا اللين .. وذي حالة الدنيا بها حظ وأقسام ..
وإن مت بيبقى داخلي حبن دفين .. حب عاش فيني سنين وسامر وحشة الأنغام .. }}
تفاجأت بمسج الساعه 5 الفجر
جراح : تمنيتك البارح على هجعة العربان .. أسهر معك في ضو نور القمر ساعه ..
لعلك ترد الروح للعاشق الولهان .. قليل العزا نفسه مع الهم ملتاعه ..
نوف : عاشت لا تمنى شوفتي ولا عدة ثوان .. والقلب مايقوى على جرحك ولاهو بإستطاعه ..
عيش ياجراح وشيلني من الحسبان .. ولا تفكر في بنت سنين ملتاعه ..
ظليت أسولف معاه كل يوم من غير مايدري أنا منو ؟ وإني بنت عمه وحاول يقنعني أقوله بس ما رضيت كنت أسولف له عن حبه عن كل شي بحياته استغرب إني من وين عرفت عنه كل هذا ..
29 / 4 / 2017
نوف : اليوم فالجلسه انذكر طاريك .. وهلت الدمعه و لا أحدن فهمني ..
ياللي ذكرته قوم ربي يجازيك .. جرحت قلبي وفيه شي طعني ..
محدن درى أني أحبك وأغليك .. ولا احدن عرف وش اللي متعبن جفني ..
ومرت الأيام وطبعا" عاتبني ليش مادقيت قبل لايتزوج
جراح : يازين وين أنت قبل أربع شهوري .. قبل الكتاب اللي ربطني عليه..
نوف : مات الأمل في داخلي وإلا شعوري .. هو هو ما تغير في يديه ..
/////////
يا ناس أحبه أحبه ليش يادنيا .. وينك يا جراح .. إنت اللي كنت مصبرني على الدنيا ..
تخيلوا إني كنت أكلمه يوميا" وأنا بآخر شهرين من رابعه ثانوي ، وماشلت هم الإمتحانات كثر ماشلت هم قلبي بعد حبيبي مو متوقعه جراح يكون لغيري ..
كنت أدرس بداري للإمتحانات و داري كانت تطل عالحوش ، المهم صليت العشا و لما خلصت قمت بروح الصاله وقبل لا أفتح الباب سمعت صوته صوت جراح ،" معقوله جراح موجود " لا ما أظن ، كنت بطلع لكن سمعت ضحكته اهني تأكدت و رحت للدريشه و شفته .
(( اليوم عقب ما أذن العشا وصليت .. كتب لي الله أشوف من يريح البالي ..
سمعت حسه ولا صدقت وأقفيت .. لكن رجعت ومدري وش اللي طرالي ..
شفته ولا صدقت وشلون ياليت .. يدري عن احساسي وجروح الليالي ..
كل شي بحياتي له وحده عطيت .. ليت كل ما أمشي أشوفه قبالي ..))
شفته شفت جراح قاعد بالحوش مع إخواني وركضت للتيلفون وبدون تردد دزيت له مسج وشفته شفت حبيبي يقرا المسج ...
آه يا جراح لو تدري إني نوف بنت عمك "شراح تسوي "
***%%%%%%%%%***
في 18 / 5 / 2017
أصر علي حيل إنه يعرف منو أنا ؟
،
،،
،،،
أنا قررت أقول لجراح الحقيقه !!!
نوف : جراح أنا راح أقولك منو أنا بس بشرط !
جراح : أنفذه بس تقولين الصج .
نوف : راح اسكر الخط وأدز لك مسج بإسمي و منو أنا بس و بعدها ماراح أكلمك بس أبيك تعرف إني أحبك مو بس أحبك إلا أموت بالتراب اللي تمشي عليه .
،
،،
،،،
تتوقعون شنو قال ؟ ! !
جراح : بس أبيج توعديني ماتسوين هالسوالف و ما تدقين على أحد وتبتعدين عن هالطريق .
( آه ياجراح أنا ماعصيت ربي إلا لأني حبيتك ،
شلون اللي أحبه يتوقع إني من هالبنات ،
ياجراح إذا كنت تقرا أنا سويت إللي سويته لأني أحبك .
وأنا ماكلمت أحد غريب كلمت ولد عمي .
ما أظنك تستاهل اللي سويته لك ياجراح .
و قررت إني ما أقوله أنا منو ؟ بعد ظنه فيني
***%%%%%%%%%***
عجزت أستوعب اللي صار لي بحياتي ..
عجز عقلي يفسر ماصار وجنيته ..
عجزت أنسى جروح من عنا ذكرياتي ..
عجزت أعيش من دون اللي هويته ..
إن مت يا جراح إقرا وصاتي ..
عساك تهنى في حياتك مع من بغيته ..
ولا تسأل عن قلبي ولا تحاتي ..
قلبي معك من سنين وإنت اللي رميته ..
اتركني أعيش ليوم الوفاتي ..
وبشوف عند الله ماصار وجنيته ..
****%%%%%%%****
قبل امتحانات رابعه ثانوي توفى عمي بوجراح ...
"تخيلوا كنت نايمه والساعه 5 الفجر و قعدت على صوت مسج
جراح : أنا متضايق حدي .
نوف : جراح خير انشالله شفيك ؟
جراح : ابوي مات عزوتي مات .
جراح مايدري إن اللي مات عمي يا ناس أنا أول وحده دريت قعدت وبكيت على عمي وعلى حزن جراح ...
** الموت حق وخل نفسك قويه .. ياما بهالدنيا نشوف النكايد **
قعدت الصبح طبعا امي وابوي دروا عن وفات عمي بس ماقالوا لي شي علشان امتحاني باقي عليه يومين (" مايدرون إني دريت من جراح ")
بعد اسبوع كلمني جراح ...
' على فكره جراح ماعرف للحين منو أنا '
جراح : ممكن سؤال تجاوبين بصراحه ؟
نوف : تفضل
جراح : انتي تقولين انج تحبيني !
نوف بإستغراب : أكيد
جراح : وأنا الحين مو لج أنا ملك لوحده غيرج .
نوف بكل ألم وحسره : أدري
جراح : انتي إذا تقدم لج أحد بتوافقين ؟
نوف : مستحيل أكون لغيرك وبعدك ياجراح مابي أحد .
** اكحيلتك رثما فلا يوم تنساك .. وتحرم على غيرك يلامس بدنها ..
إن جيتها كل المشاعر تمناك .. وإن رحت عنها يافتى الجود صنها ..
تطرب لصوتك وتمنى حلاياك .. إما معك وإلا تولم كفنها ..**
نوف تكون لغير جراح مستحيل ، كان حلمها جراح ، كان أملها بهالدنيا جراح .. لكن خساره يا جراح من لي بهالدنيا غيرك .
** انت وإلا الموت ما تفرق معاي .. يعتمد من يسبق الثاني علي **
مرت الأيام وخلصت امتحاناتي وبصراحه بالي كان عند صوت جراح وعند روح جراح ما كنت مهتمه لإمتحاناتي مع إن درجاتي كل السنين اللي طافت زينه ، وللأسف قرب موعد اعلان النتايج .
جراح : ممكن أنا خلاص عقلي بدا يستخف انتي منو ؟ انتي تعرفين عني اللي أمي ما تعرفه ، تكفين أحلفج بالله انتي منو ؟!
{{ نوف متردده وخايفه }}
جراح : يا بنت الناس أنا مابي شي وصدقيني و رحمة ابوي ودفنته إن كل اللي صار راح يتم بينا .
نوف : بس أنا خايفه أنا اللي سويته غلط
جراح : أقولج ودفنة ابوي راح يكون بينا .
{{ نوف خلاص ما تحملت و هو حلف برحمة ابوه واستسلمت وقررت أنها تقوله}}
نوف: جراح بقولك شي ترى مو من طبعي أني أكلم شباب ولا هو من تربيتي بس إنت قريب مني و هذا اللي خلاني أكلمك و ثاني شي وأهم سبب إنك الانسان اللي حبيته و واثقه إنك ماراح تضرني علشان جذي بقولك أنا منو بس بمسج وتكون هذي آخر مكالمه بينا .
جراح : ليش آخر مكالمه ؟
نوف: جراح انت عرسك قريب وأنا أنتظر اعلان شي يهمني وبعده بسافر وببدا حياة جديده وبنسى الغلطه اللي سويتها .
جراح: أوكي بس بوصيج وصيه .
نوف : تفضل
جراح : أبيج توعديني ماتدقين على أحد غيري يعني لا تعيدين الغلط هذا ...
نوف منصدمه من كلام جراح بعد كل هذا يوصيني على شرفي ...
نوف : جراح كلمتك هذي اجرحتني لكن مو من تربيتي أكلم شباب وأنا عصيت ربي مره معاك ولا أبي أعصيه مع غيرك مع السلامه ياجراح وانتظر مني مسج .
جراح : يابنت لحظه .. لحظه لا تفهميني غلط ......
نوف سكرت الخط و دزت هالمسج ..
((أبكيتني وأنا أحسبك تكره بكاي .. أثرك تلذذ في دموعي وأنا أبكي .. ))
حسافه على كل شي سويته لك أقولك منو أنا ...؟
أنا نوف بنت عمك .
ودزيت له مسج ثاني
(( إعترفت لك بحبي و ليتني مافعلت .. اعترفت و ليت ربي ياخذ الروح و يفكني ..
اعترفت وقسى قلبك و قلت .. اوعديني ماتفعلين الخطا واتهمني ..
شلون تقوى تشكك في سواتي جهلت .. إني ما امشي فالدروب اللي تذمني ..))
رد جراح دزلي ...
(( لو ماأحبك ما فعلت اللي فعلت .. وادمح الغلطه يا زين و رد و حبني ))
جراح بعد ما انصدم بشخصيتي .. دزلي مسج يطلب فيه إني أرد عليه ، وفعلا إتصل وكان ودي اسمع ردة فعله و رديت عليه .
جراح : نوف حرام عليج كنتي تضيعين وقتج كله معاي وانتي بثانويه عامه .
نوف : ماهمتني الثانويه ولا مستقبلي اللي يهمني انت .
جراح : نوف انتي من صجج تحبيني أنا عمري ماتخيلت هالشي .
نوف : جراح أنا ما أحبك و ربي إني أموت فيك .
جراح : سامحيني عالكلام اللي قبل شوي بس أنا خايف عليج .
نوف : جراح أنا عقلي براسي صدقني ما عندي هالسوالف بس لأني أحبك سويت هالشي .
جراح : اليوم بالليل راح تطلع النتايج انشالله مقدمه عدل .
نوف : وين عدل وعمي توفى بموعد الامتحانات .
جراح : لا انشالله النتيجه خير .
نوف : اوكي تبي شي أنا خلاص باجر مسافره .
جراح : وين ؟
نوف : مصر
جراح : وأنا ؟!
نوف : إنت تزوجت والله يوفقك .
جراح : يعني ماراح تكلميني حتى إن رديتي .
نوف : لا ياجراح خلاص أنا حتى خطي هذا بكسره وأقولهم ضاع بالسفر .
انتهت آخر مكالمه بينهم و بنفس اليوم اطلعت نتايج الثانويه العامه وكانت نسبتي موزينه ماتدخلني أي قسم بالجامعه كل اللي فالبيت انصدموا مومعقوله نوف هذي نسبتها أكيدفي شي .
نوف كانت أكثر وحده منصدمه هي توقعت إن نسبتها نازله بس مولهالدرجه ...
باجر الساعه 7 الصبح طيارتهم
جهزت نوف أغراضها وهي يائسه والحزن مالي وجهها ودزت آخر مسج لجراح .،،،
" جراح اقرا نسبتي باجر بالجرايد وأكون أنا بالمطار وشوف اللي صار و ضياع مستقبلي كان كله علشانك .. مع السلامه ياجراح "
وبعدها اكسرت خطها و ودعت الماضي اللي سوته وحطت راسها عالمخده هلت دموعها متحسفه على جراح اللي راح منها وعلى مستقبلها اللي ضاع .
** اليوم ماتنفع دموعه و رجواي ..
اليوم تفصل عن حياتي حياته ..
اليوم يعطيني بقايا بقاياي ..
وأعطيه أنا ماشلت من ذكرياته ..
اليوم بابدل مشاعر حناياي ..
يصبح من اخواني وأنا من خواته ..
**
///////////
نوف قضت شهر و نص بمصر والسفره هذي غيرت نفسيتها وجددت شعورها بالأمل وبدت تفكر بعقل يعني كافي ضيعت رابعه ثانوي من ايدها وفكرت تدرس دبلوم بعدين تكمل البكالوريوس ..
** لو ضاع مستقبلي ماني بسامح لك .. يكفيني الماضي اللي ضاع بأسبابك .. **
نوف ارجعت للكويت وكلها أمل وتفاؤل ومرت الشهور وداومت بالكليه و نست ماضيها لكن مانست حبها الأبدي لجراح .
الشهور مرت و نوف كل ماطروا لها جراح وموعد عرسه تموت ألف مره ومحد حاس فيها وكانت تشوفه بالأعياد وبالمزرعه اللي يقضون فيها عطلة الربيع لكن ماينفع الغرقان مد الأيادي ، وجراح كانت نظراته لها غير <بدري ياجراح توك تحس بحب نوف لك >
وبعطلت الربيع قضت نوف وأهلها العطله بالمزرعه وعمامها كانوا هناك بس ماتوقعت جراح راح يكون هناك .
وفعلا" راحت نوف وقعدت يومين وكان ودها تشوف جراح لأن السنه هذي آخر سنه راح يقضيها جراح بدون زوجته ،،،،
الساعه 4 العصر نوف أخذت اختها و استأذنت من ابوها تتمشى بالسياره ، كانت نوف مشغله أغنية بونوره ......
(( كل شي حولي يذكرني بشي ..
حتى صوتي و ضحكتي لك فيها شي ..
لو تغيب الدنيا عمرك ماتغيب ..
شوف حالي آه من تطري علي ..
الأماكن كلها مشتاقه لك ..))
نوف تناظر المزرعه من بعيد وتتذكر كل خطوه مشى فيها جراح ، ومع هالذكريات ذرفت نوف دموعها ، منال اختها اندهشت من دموع نوف !!!
منال : نوف لهالدرجه الاغنيه مأثره عليج ؟
نوف : اي والله ذكرتني بمواقف واجد مرت علي .
" على فكره منال اصغر من نوف بسنتين وقريبه منها حيل "
منال : نوف شوفي من جا ؟!
نوف بدون اهتمام : منو ؟ منال : سيارة جراح هذا جيبه الجديد حمود اخوي قالي عنه ، يبي يكشخ الحبيب عند زوجته .
{{ نوف انزلت دمعتها اجرحتها كلمة منال بدون ماتقصد }}
نوف : خلاص منال أنا تعبت شرايج نرجع المزرعه .
منال : اوكي أحسن بعد خلينا نلحق نسلم على عمتي ام جراح .
وفعلا" وإحنا رادين بنصفط و إلا هذا جراح طالع من الدوانيه حسيت ان نظرات جراح تغيرت صوبي لكن بعد شنو ؟ !
<< منال كانت شخصيته شوي غير عن نوف ، كانت جريئه وملقوفه >>
منال أشرت لجراح وقرب صوبنا .
منال : جراح شلونك الحمدلله عالسلامه .
جراح : الله يسلمج
منال : جراح مبروك عالسياره كل هذا للعروس
جراح ابتسم ابتسامة ألم وهو يشوف تأثير كلام منال على نوف ،
جراح : منال ماتجوزين عن هالسوالف
منال : هاهاها بروح اسلم على عمتي .
الساعه 8 الصبح قعدت نوف من النوم و هي طالعه من الغرفه شافت جراح ، أشرلها على ورقه حطها وراح . ، نوف ترددت قبل ماتاخذ الورقه لكنها أخذتها وكان مكتوب
" نوف أنا ولد عمج قبل ما اكون حبيبج ، وعندي طلب اليوم أهلنا معزومين على عشا ، لا تروحين وأنا بروح و أرجع مبجر ، بشوفج بكلم الانسانه اللي حبتني من دون ما ادري ، امنيتي اسمع كلامج منج بدون هالرسايل "
فكرت نوف وقررت تقعد معاها اختها منال واخوانها الصغار واهلها راحوا العشا بعد نص ساعه رجع جراح ودخل عليهم بالمجلس
جراح : السلام عليكم
منال و نوف : وعليكم السلام
جراح : منالوا غريبه مو رايحه للعشا !
منال : والله ودي بس نوف تعبانه قلت اقعد معاها
جراح : منال شريت أشرطه كاسيت تعجبج انقلعي اخذيهم من سيارتي
منال : جراحوا صج
جراح : صجين بس شوي شوي على سيارتي
( منال كانت ماخذه على جراح حيل عادته نفس اخوها ماتستحي منه )
منال راحت للسياره و هني جراح قرب من نوف ورفع راسها بيده
نوف منصدمه من حركة جراح
جراح : نوف شوفيني أنا حبيبج قدامج منتي قايله شي ؟
نوف بإبتسامة ألم : قلت لحبيبي إن كل شي انتهى خلاص
جراح : نوف انا دايم كنت أشوفج بس شعوري هالمره غير عن كل مره شفتج فيها
نوف : هذي الدنيا !
جراح : نوف ماودج تقولين شي ؟
نوف : الله يوفقك
جراح : بتحضرين عرسي ؟
نوف : إن ماحضرت عرسك ياجراح و رقصت فيه أحضر عرس منو اجل ،
جراح : نوف صج والله
نوف : اي والله وبفصل احلى بدله
جراح يطالع نوف باستغراب ، أما نوف انزلت دموعها غصبن عليها و ادخلت دارها و ارتمت عالسرير وظلت تبكي على حبها لين غفت عينها و نامت .
**
دخيلك تخلي ضايق الصدر في حاله ..
تراني على حد البكى لا تبكيني..
**
مرت أيام العطله بالمزرعه قاسيه على نوف لأنها كل ماشافت جراح يزيد الجرح بقلبها و كان عرس جراح حديث الأهل والحريم بالمزرعه ،
ارجعوا نوف وأهلها للكويت وقرب عرس جراح
تتوقعون نوف شنو فصلت ؟
نوف كانت تتخيل انه يوم عرسها للحين مو مقتنعه أو مو مستوعبه ان جراح بيتزوج غيرها ، فصلت بدله لونها أبيض كانت البدله روعه كانت تتخيل انها هي اللي بتقعد عالكوشه مع جراح موغيرها .
** أنا أول العالم على العرس يلفون ..
وأول معازيم الفرح والحداده ..
أبشر أنا برقص على العرس بلهون ..
كلن يعبر فرحته بإجتهاده ..
لو البلا رقصن يقولون مزيون ..
المشكله القلب يفضح وداده ..
يوم العذارى في دخولك يغنون ..
وعروستك بأحلى ثواني السعاده ..
وشلون أبكتم صرختي يوم تمشون ..
تكفون اخذوني للعروسه قلاده ..
كنت أتمنى بدالها ولله الكون ..
وأحط ايدي تحت راسك وساده ..
وصيتي لوجاتك بنت وأنا أمون ..
سميتها لك 'نوف' قبل الولاده .. **
العرس قرب وأبيكم تدعون لي يارب ما أبي أفضح نفسي قدام الناس ، إن ماحضرته بيحطون ألف سبب علشان جذي لازم احضر والله يستر ،
معقوله بشوف جراح ماسك يد عروسته و يزفونه للبيت
معقوله جراح تزوج غيري
يارب صبرني والله صعبه شوفة حبيبي مع الغير
**
بحضر زفافك مثل باقي المعازيم....
لوكان في ليلة زفافك وفاتي....
بحضر نهاية قصة الحب والضيم....
واكتب على جرح الهواء ذكرياتي....
**
بكل أسى أنا "منال" بكمل لكم اللي صار والله يصبرني ...
قبل عرس جراح بإسبوعين نوف راحت الخياط وقبل ماتروح كانت مستانسه وصار بينا هالحوار
نوف : منال أنا طالعه توصيني على شي ؟
منال : غريبه ليش كل هالوناسه شنو الظاهر بدلتج ضبطت
نوف : ما أدري بس يمكن لأن العرس قرب ومن زمان ماصار عندنا عرس
منال : مابي إلا سلامتج بس ترى زحمه وانتي سياقتج الله بالخير
نوف : اوكي اي صج مفتاح كبتي نسيته عالسرير خشيه عندج لين أجي .
(( هالكبت لنوف وكل أسرارها فيه ))
منال : لا تخافين محد بيفتح كاتم أسرارج هاهاها
نوف بضحكه : باي
وطلعت نوف وبدلتها كانت عند مشغل بحولي ، وصلت المشغل و لبست البدله كانت فضيعه
(( نوف كان جسمها حلو طويله و مليانه وشعرها الأسود واصل لنص ظهرها ))
لبست البدله وكانت قمه عليها ، أخذتها وطلعت من المشغل و هي راده البيت تذكرت جراح و ناظرت البدله على يمينها
**
الثوب جهزته والقلب ضايق و مجروح ..
بلبسه في ليلة زفافك حبيبي ..
مسموح لو تطعن القلب مسموح ..
بعدك جروحي ما أظنها
تطيبي ..
**
ذرفت دموع نوف حزن على فراق جراح
زادت سرعة السياره
اصطدمت بحاجز الإسمنت و من زيادة السرعه انقلبت السياره مرتين ، انقلوا نوف المستشفى حالتها كانت خطيره بالعنايه المركزه ، وأول وثاني يوم ماتقدر تكلم أما ثالث يوم الساعه 1 الظهر قالت لأمي ناديلي منال أبيها ضروري ، أمي نادتني و أول مادخلت عليها غرقت عيوني بالدموع على حالها .
نوف : منال امسحي دموعج أنا بخير انشالله .
منال وهي تبكي : نوف والله نحبج الله يقومج لنا بالسلامه .
نوف : منال أبي اطلب منج طلب بس يكون بيني وبينج
منال : آمريني
نوف : إن صار فيني شي افتحي الكبت تلقين دفتر مذكراتي اقريه وشوفي الاسم الموجود فيه و عطيه دفتر الشعر وبلغيه إن كل حرف بالشعر كتبته له
منال بإستغراب : منو هالشخص بس انشالله انتي اللي بترجعين وتفتحين الكبت مره ثانيه و ...
تقاطعها نوف : منال سوي هالشي بس لحد يدري
منال اطلعت من غرفة العناية المركزه و هي حاسه إنها بتفقد عزها فالدنيا إختها الكبيره نوف
نوف بعد طول الساعات وفي يوم 14 / 8 / 2017 الساعه 8 بالليل وافتها المنيه وإرحلت نوف إرحلت وجرحها بقلبها بعده مابرى ، إرحلت وإسم جراح بقلبها ، وينج يا نوف والله البيت ما يسوى بدونج ، والدنيا كلها ماتسوى ،،،
**
نوف ماتت وجرحها بعده ما برى ..
يوم راحت تستلم ثوب عرسك ياجراح ..
محدن عرف في سرها غيري ولا أحدن درى ..
والهم في وسط قلبي من فراقها ذباح ..
راحت و وصيتها أشوف وش اللي فيها جرى ..
راحت و هي تدعي عساك اليوم مرتاح ..
**
وينك ياجراح روح للتراب اللي ضم جسد نوف علها تسامحك ، روح ضم كل ذرة تراب فوقها عساها تسامحك نوف ماتت و هي رايحه تجيب بدلة عرسك يا جراح ....
بعد وفاة نوف الغاليه بأسبوع من غلاتها رحت يم الكبت ترددت قبل ما افتحه و خفت و ذكرت نوف و هلت دموع عيني .
**
هذي دموع العين تذرف على نوف ..
وهذي زوايا البيت تشكي غيابها ..
من رحلتي والهموم تحوفنا حوف ..
من رحلتي والعين تشكي فراق أحبابها ..
هذي أمي من غيابج منهو في همها يروف ..
هذي أمي عافت الناس من ماصابها ..
شوفي إخوانج يبونج ينطقون اسمج بخوف ..
البيت كلها اشكتى من سبة غيابها ..
**
فتحت الكبت و قريت مذكرات نوف و قريت كل شي كتبه لكم وعرفت سبة رحيلها و هي زعلانه ، عرفت سبب الحزن اللي بعيونها الفتره اللي راحت ، عرفت ليش اختارت اللون الأبيض لعرسك ياجراح .
**
اشهد إني فتحته و انتحبت وبكيت ..
وقمت أمسح دموعي من يسار ويمين ..
لا طرتلي نوف بصوت واطي حكيت ..
إنالله و إنا للولي راجعين ..
**
الله يرحمج يا نوف آه يانوف كان ودي تصارحيني بحزنج و همومج ، كان ودي أشاركج همومج نفس ما تشاركينا همومنا ، فقدج فقدت الإخت الكبيره فقدت سندي فالدنيا فقدت روحي يا نوف ... ، أمي افقدتج افقدت سوالفج ، افقدت ضحكتج ، إخواني الصغار افقدوج أحمد فقد لعبج معاه و مساعد فقد خوفج عليه ومحمد فاقد نصايحج له ودارج والبيت و عطرج و ملابسج والدنيا كلها فاقدتج ، بس السؤال ياترى جراح افقدج ؟!!
هذي قصة اختي نوف اقروها وادعوا لها تسكن الجنه يا رب لأن مافي نفسها عمرها غلطت على أحد و لا ذلت أحد كانت تحب الناس ، كانت تحب ترسم البسمه على وجيهم ، الله يعطيج على قد نيتج يا نوف الله يرحمج ..
**
حيل الله اقوى يالعيون الشقيه *** وش في يدي غير السهر والقصايد
اشوف حبي ميت في يديه *** واصوغ له بأبيات شعري قلايد
قالوا توفت وافقتها المنيه *** واصحى ترى اللي مات ماهو بعايد
الموت حق وخل نفسك قويه *** يامها بهالدنيا تشوف النكايد
قلت العنا شي مااقدر عليه *** والحزن عندي صار سلم وعوايد
ماتت وذكراها على البال حيه *** ودموع عيني لاطرتلي شدايد
وافراقها للقلب من غير نيه *** وانا اشهد ان فراق الاحباب كايد
/////////
منقولة بس مجنونه..
