الاعراض الماحبه للراغبه في الزواج؟؟ حياة اسرية

عنوان الموضوع : الاعراض الماحبه للراغبه في الزواج؟؟ حياة اسرية
مقدم من طرف منتديات الضمير العربي

الإعراض المصاحبة للراغبة في الزواج:
===========================================

أول شيء..كيف نعرف أن البنت..مستوية تبي العرس...

أول أعراض رغبة البنت في الزواج..هو كظمتها. .ولوية بوزها على أخوانها وأهلها.. على الفاضي والمليان .وكثر ماتهاوش أخوها اللي اصغر منها..وتقعدها له...وكثر ماتقول: اوووف..طفش..زهق..ماانتم مثل الناس... ..

ثاني أعراض الرغبة العارمة في الزواج..هو هواش الشغالات ..وإذا شفت البنت..ماغير تقول لامها..لاعبين عليتس شغالاتس..بلاتس ضعيفة شخصيه...ماتعرفين تدبرينهم..واشتغلت عليهم حملات نظافه جائره. .فالبنت ماعد عليها الافوح وتنفجر..لازم ساعتها تتزوج...باللي هي به

اذا اعرس اخوها..وبدت تكوك امها على زوجة اخوها وتنتقدها على اتفه التصرفات..وبدت تحنش على اخوها..فالبنت حالتها صعبه..تبي رجل
اذا تصلحت ولبست وتمكيجت..وطالعت مقفاها بالمرايه ..فهاذي استوت خلااص..تبي العرس فورا وحتما ولزما في التو واللحظه
والعرض الاخطر..اذا تبعت هاللفته الخلفيه ..بدندنه ورقص بينها وبين نفسها ...هاذي عاد معد ينسكت على وضعها..دبروها ياجماعة الخير


اول خطوه..هي الخطبه...
================================

اكيد فيه شاب بيخطبتس...وطبعا الاهل اذا سألو عنه وتأكدو من صلاحيته ومناسبته لك ..واخلاقياته وطباعه ودينه ووضعه المادي والوظيفي..ذيك الساعه ..بتتم الموافقه المبدئيه..وبيدعونه اهلتس ..عشان تشوفون بعض..واللي يسمونها ( النظره الشرعيه)
عاد النظره الشرعيه وانا اختس..يعني كوني كما انتي..بس موب تدخلين عليه وانتي كنتس توتس طالعه من المطبخ...
انما البسي تنوره وتي شيرت ناعمين..وفكي شعرك وصلحيه كأنك بتطلعين لمناسبه..وحطي ماسكرا..وقلوس على الشفايف..وشوي بلاشرعلى خديداتس..وبس...كأنك رايحه الكليه.. يعني اشراقه فقط لاغير..

وبالتس تدخلين بالبخور..مدري بالعصير...بلا خرابيط..انتي ناقصه ربكه
وبعدين عثورة البخور بتغبش عليه وعليتس ..ادخلي بكل ثقه....فارده طولتس...وانتبهي تلفزين روحتس بآخر قرنه من المجلس..بزعمتس حياء..صدقيني..هذا موب حيا..هذا قلة حيا
الا الرجال بيشك ويقول ذي فيها بلا متوزيه عني فيذاك عشان ما اشوف عيبها

الا اجلسي في الكنبه اللي جنبه...وخلي وجهتس مقابل وجهه. .وموب تقعدين ثانيتين وتنقزين..كنتس مقروصه...هذا صار حلم موب شوفه .اقل شيء ربع ساعه...واتكلمي وارفعي وجهتس..شوفيه زين وخليه يشوفتس زين...بادليه الكلام والاسئله..لا تقعدين كنه يمتحنتس شفهي ..مغير تجاوبين وبس...اسئليه عن شغله وطبيعته..كم ساعات دوامه...ووش طموحه...يعني..خللي الكلام بينكم فيه نديه..عشان ياخذ انطباع عن شخصيتس انها قويه..وحركه..وانتس فاهمه وحيويه
بعدها عاد استأذني وقومي وادخلي جوا بيتكم راشده



الخطوبه:
====================
في فترة الخطبه..اتبعي هالنقاط متتاليه:
اولا..اياكي ان تعتبري هالفتره فترة حب وتدخليها اولريدي عاشقه..هذا اكبر خطأ قد ترتكبينه..انماادخليها على اساس اني ابي اعرف هالرجل زين..وعلى أساسه أكمل مشروع زواجي..أو أوقفه..يعني اركني قلبك على جنب..وحكمي عقلك...لا تتصرفين كمراهقة حمقاء ولا كإنسانه ماصدقت على الله لقت رجال

ثانيا: الوضوح والصراحة..والكلمة اللي تستحين منها بديها..اخبريه بكل عيوبك..حتى لو فيك عيب جسماني..مثلا فلقه صغنونه في جبهتس ..ولا شامه كبيره داخل جسمتس..ولا ثعلبه في شعرتس من وراء ولاهي باينه.. ولا اية شيء ما شافه...خلي يحس بصدقك ووضوحك لان الصدق والوضوح يخلق الاحترام.بين الطرفين ..
واخبريه بعيوبك الانسانيه..وطبعا قولي له اني بحاول اتلافى هالعيوب..بس لو ماقدرت ذنبك على جنبك..وهذانا تونا على البر
واطلبي منه يخبرك بكل عيوبه..بدون وجل او حياء..لانك ماراح تعذرينه لو خبا عليك شيء واكتشفتيه بعدين
اما مزاياكم الاثنين..فاتركوها لبعض تكتشفونها تلقائيا..واظن شيء بايخ ان الانسان يقعد يثني على روحه

ثالثا: لا تميليحين..او تدلعين اوفر...او تزينين صوتس ..على بالتس تغرينه. .بالعكس..خليه يسمع صوتس بكل حالاتس..وانتي تضحكين وانتي زعلانه وانتي جاده..وانتي بعد تتدلعين على خفيف ...
ولا تدعين الطعامه وخفة الروح والوداعه ..اذا مودك هذاك اليوم مو مضبوط...يعني تلاقيك متخانقه مع اخوانتس وبس دق عليتس..فكيتي لوية البوز وقعدتي تكركرين وتلاقيتس مالتس خلق..بس عشان ودتس يشوفتس بأحسن حالاتس..هذا غلط ..لو مزاجك متعكر ودق عليك..بعد ما تكلمينه شوي اعتذري منه وقولي مزاجي اليوم مهوب زين ولابي اخرب جوك..ولالي رغبه في السواليف...عشان يعرف انك بشر..يوم حلو ويوم مر..وما يقعد بعد الزواج يعايرك ويقول: وش فيك تغيرتي ولعاد تضحكين وتدلعين علي زي اول ولاعاد تسولفين..الله يالدنيا..ومغير يجمع عليتس شرهات واغلاط....
حلو انه يعيش معك شخصيتك الحقيقيه من البدايه بدون زخرفه ولا زباريق.ولا اقنعه غبيه .ولا ادعاء وتجمل كاذب



الملكه:
====================
الحين صرتي مرته على سنة الله ورسوله..وفعلا هذي هي أصعب مرحله..ولا عاد فيه فكه..ألا أذا صار شيء كايد لاسمح الله

لكن تبين نصيحتي من مشاهداتي ومسموعاتي ...اياني وياك تطلعين معاه عمال على بطال بزعم انتس حرمتي حلالي...ولا يلعب عليتس بقولة نختار الأثاث ...الله واكبر الحين وشذا الأثاث؟ ..الحين اللي يسمعه يقول بيأثث قصر اليمامة
. رأس مالها شقه منتكه..وكنبتين وطاولتين..وكم مسنده على كم ستاره...على غرفة نوم...
أنا أنصحك تقولين له..أنا أبيك تأثث بيتنا على ذوقك واعتبرها هديه منك لي...لان الشقه مرحله اولى بحياتكم..وخلي ذوقتس للبيت الحقيقي وبيت عمركم الملك...او شقه اكبر او فيللا.في المستقبل...انما هذي خليها عليه..وعساتس تلحقين على جهازتس...وملابستس..واغراضتس..اللي لها اول مالها تالي..وحورفتس في خشتس...اللي يبي لها راسن صحيح
وان لزم روحي معه لاختيار غرفة النوم بس..ولازم معاتس اخوتس الصغير..او ولد اختس او ولد اخوتس..المهم لاتروحين لحالكم..ادري بيتقولين هماه رجلي. .بس صدقيني..لا تعرضين نفسك لتجربه قد تندمين عليها
لانك ماتضمنينه..لاني اعرف بنات تساهلو بطلعات الملكه..وخربو فرحة اللقاء الاول يوم الزواج ( وشفقة) الرجال عليهم..وصار يوم الزواج عادي..مافيه فرحة اللقاء وشوقه..اضافه الى ان فيه بنات اعرسو وحملو واعرسو وهم يتنسون ..وتجيك الوحده في زفتها صفراء...وعيونها تغرب... صدقوني..قاومي كل الحاحاته..بالرفض التام..وقولي : المفروض تعذرني لاني اول مره اطلع مع واحد غير ابوي واخواني...ولاني جاسره عند اهلي اطلع معاك بروحنا مهما صار






.يوم الزواج:
===================
نامي زين....واكلي زين..موب عشانتس شايله هم الليله..تنسد نفستس عن الاكل..وموب شرط تاكلين وجبات كامله..المهم كل شوي كلي شي..عشان ماتجوعين..وتتوترين اكثر..وعشان تبانين في ليلة عمرك بكامل نضارتك واشراقك وهدوءك النفسي
طبعا الزفه هي اهم شيء في الزواج..ونصيحتي اذا زوجك وده ينزف عليك..فبها ونعم..اما اذا كان رافض فلا تحاولين تجبرينه...ولا تحاولين تتذاكين وتقولين بيوم الزواج بأحطه قدام الامر الواقع وتخلين ابوتس واخوانتس يهضلون عليه ويجبرونه غصب ...لانه ماراح ينسى لك ولاهلك مسألة اجبارهم له..هذا من جهه...وكمان دخوله وهو ما استعد نفسيا ولا اتهيأ..ممكن يسبب احراج له في بعض حركاته وتصرفاته..وهو معاك على الكوشه..وبيبان شكله متنشن اوي اوي. ..وانا بصراحه اعرف المغصوب على الزفه من كثر قولبة راسه وتمسيس رقبته..وتنفيضه لمشلحه .وبحلته بايدينه .فاتفقي معاه على هالوضع من بدري وحددي موقفه..وعليه رتبي حالك..



الليله الاولى:
====================
بعد ماتروحون الاوتيل..وتبدلين ملابسك..أنصحك بلبس قميص محتشم..طويل...وبصراحة انصح كل عروسه يكون اسبوعها الاول بقمصان نوم تميل للاحتشام..ترى الرجل يظل يحترم في المرأه حياؤها..ومهما بلغ الرجل من تحضر او تفتح ذهن...يرضي غروره الذكوري ان المرأه تستحي منه...أضافه إلى انه يحس بالاطمئنان لزوجته..اذا شافها على الشكل...وحلو الشيء يجي بالتدريج..يصير اطعم وأذوق ..ولاحقه على الشخلعه..والبيبي دول واللزي منووو

وعموما..الليلة الأولى تكون كلها تعب وإرهاق..فالأفضل أنها تمر ( بسلام) وينام كل من الطرفين عشان يرتاحون..ولاحقين خير..
طبعا موب قاعدة..أن كل كبل..يسوون التصرف ذاته...لأنه يعتمد على الطرفين..واستعدادهم النفسي والجسدي ورغبتهم...ومدى انسجامهم...





شهر العسل
========================
اجمل فترة في الزواج هي شهر العسل..فاجمل شيء تتفقون وترتبون انكم تقضون شهر عسلكم ببلد تحبونه او ودك تروحين له..بس هو لازم يكون راح له قبل...وعارفه..يكون طبعا افضل واريح له ولك.ولتلافي بعض الاحراجات اللي ممكن تحدث.

في هالشهر..عيشي قصة حب جميله..وجربي المشاعر لأول مره وتلذذي بالاحساس بها لاول مره..واطلبي منه اية شيء بخاطرك..لان الرجل في شهر العسل يكون في احسن حالاته وحبوب ويعاملك بحنيه مالها مثيل..فعاد استغلي الفرصه ودلعي روحك وطربي عمرك ..ومارسي اشياء حاطتها في بالك..ووثقيها بالصور و بكميرا الفيديو..عشان تبقى ذكرى حلوه لك ولعيالك بعدين..

.وانتبهي من الغيره الغبيه...وكأنك تختبرين زوجك...وحاطه عينك وحواسك عليه ...لا يلتفت ولا يطالع ..بالعكس..الين شفتيه يطالع..خليه..الا اذا شفتي وحده حلوه..قولي له: شف هذي وش حلوها؟ ولا وش رايك موب حلوه؟ خليه يحس بثقتك بروحك...وانك منتي معقده ولا تحسين بنقص... ..خليه يحس انك صديقه له موب زوجه غيوره تقليديه ...


اسلوب الحياة كيف يكون ؟
======================================
عموما...اهم شيء العفويه..خلوكم على طبيعتكم.خاصه في علاقتكم الحميميه .واتصرفو بتلقائيه في هالامور..لان هالامور بالذات اذا رتب لها واتعمدت ترسم لها سيناريو معين..تصير ثقيلة دم وماصخه..وفاشله بعد...
لان وحده تقول لي عن خالها متزوج له سنين..تقول انه يقول الين سريت يوم الخميس ولقيت الغرفه مبخره والحرمه كاشخه ..ياني انتك ويصكني راسي.. لانه عارف هالمراسيم وش تعني؟؟ ..يعني كأنه داخل امتحان

فاصحي تكون حياتك كذا...خليك كل يوم مرتبه بدون تكلف وريحتك حلوه ..والبيت المفروض دايما ريحته حلوه ومبخر...ومافيه شيء روتيني...ولا تحددين ايام بالذات..كنه هوم وورك.. ..خلي الحياة بينكم تكون طبيعيه ومافيها تحدي او انتظار مبادره من الطرف الاخر...او امتحانات...او تخطيط مسبق ..روتيني..ممل..ومنفر مع مرور الوقت.. ..يعني موب يمر كل الاسبوع وانتي مشهبه..وحالتك حاله..واذا جا يوم الخميس..لبستي قميص اسود ولا احمر( مافيه غير هاللونين لو يموت ) وحطيتي روج وبخرتي الغرفه...والله شينه ..يعني..اذا في امك خير نم

ولا تظنين ان الرجل تكسبينه بالجنس فقط..وتحطين حيلك في القمصان..والعطور والكريمات..صدقيني..كل شيء بعدين بيصير عادي وغير مبهر ..مع الاعتياد والتكرار



طوري من ملكاتك ومواهبك..لاتقولين مثلا : ماعرف ارقص..اتعلمي واكسري اية حواجز بداخلك...ترى الرجل اية شيء يملا عينه من انسانه يحبها اذا هي تعطيه بحب واحساس صادق...واقتناع...بس ترقصين مثلا وانتي مستحيه ولانتي مقتنعه..اكيد بيحس فيتس خجلانه .. ولاهو حاس انتس حلوه ابدن البته الا بيرحمتس ويمكن تطيحين من عينه ..ثقي بروحك وبنفسك واتصرفي على هالاساس بتصير كل حركاتك وسكناتك حلوه...وبتعجبه حتما .وعلى هذا قيسي كل شيء بيصير بينكم






وفي النهاية بقي اقولتس:

شوي بشوي.. مع مرور الأيام والعشرة والالفه والحب بتكسبي قلب زوجك..وحبه الحقيقي...وانشاء الله يعمر بيتكم بالاولاد والمحبه والموده...
وانشاء الله كلنا نتوفق ونعيش في سبات ونبات ونخلف صبيان وبنات


منقووووووووووول


مين صار معاها كذا ولما تزوجت هديت وارتاحت
أنا لسه ماصار معاي كذا يمكن في المستقبل والله يعين

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

مشكوووووووووره اختي عالنقل الرائع ويعطيج العافيه
اختج لؤلؤه قطر

__________________________________________________ __________

>>>> الرد الثاني :

مشكورة أختى جدا جدا جدا

أختك الشارقة

__________________________________________________ __________

>>>> الرد الثالث :

يعطيج العافيه على الموضوع الجميل

تحياتي

__________________________________________________ __________

>>>> الرد الرابع :

الله يعين اللي عنده بناااااااااات وايد ألف شكر على الموضوع

__________________________________________________ __________

>>>> الرد الخامس :

شوي بشوي.. مع مرور الأيام والعشرة والالفه والحب بتكسبي قلب زوجك..وحبه الحقيقي...وانشاء الله يعمر بيتكم بالاولاد والمحبه والموده...
وانشاء الله كلنا نتوفق ونعيش في سبات ونبات ونخلف صبيان وبنات









.,’ مشكوووووووووره اختي .,’لمسة جمال .,’

والله انك صادقه في كل كلمه قلتيها .,’

اختك .,’ نور .,’