رواية / كل مافيني يصرخ أحبك إلا لساني عجز ينطق مخارجها..كامله رواية جميلة

عنوان الموضوع : رواية / كل مافيني يصرخ أحبك إلا لساني عجز ينطق مخارجها..كامله رواية جميلة
مقدم من طرف منتديات الضمير العربي

السلام عليكم ورحمة الله وبركاته

الروايه اعجبتني وحبيت انقلها
للكاتبه : منى شاعره بس ازلزل مشاعره
اتمنى تعجب كل من يقرأها ..

البارت الأول

في ليله بارده من ايام الشتاء كالعاده الناس قاعده ببيوتها وكلن يحاول يتحاشا البرد
في هذيك الليله كان فواز راجع من الرياض الى الدمام بعد مخلص اشغاله في الرياض
وكان الوقت متاخر الساعه 2وهو داخل الدمام وعند وحده من الاشارات
الوضع سكوت على غير عاده الدمام الهدوء يعم المكان والانوار مشغله والبرد شديد برى
وكان يقول في خاطره (الله يزين هدوء الدمام والله يعين اهل الرياض على الزحمه كان ماشي بسيارته ويشوف
سياره موقفه عند بنت وكانت تصيح والشباب اللي في السياره يضحكون حاول واحد يسحب البنت للسياره
بس نزل فواز :هيه انت وش قاعد تسوي طبعا الشباب بس سمعوا فواز خافوا وظنته من الهيئه لان كان
مو محلق كان الشغل مانعه حتى يهتم بنفسه وبسرعه جنونيه راحوا
راح فواز للبنت اللي كانت تبكي بهستيريه وصوتها يقطع القلب سالها بصوت فيه نبره الشفقه على حالها:انتي وش تسوين هنا
ماردت عليه لانها كانت تبكي وترجف من البرد والخوف
ساعدها توقف وقالها: انا عندي شوية شغل بخلصه وانتي اقعدي بالسياره ادفي وخليني اوصلك للبيت هي قامت تبكي بزود وهو استغرب منها
سالها بفضول:وش مطلعك هالحزه من بيتكم ؟
وعرفت بسواله انه شاك فيها ماردت عليه وزدات بكى على حالها وعلى كلامه
ندم انه سالها وهو منكسر خاطره على شكلها وهي ترجف:دقايق بس انتظر هنا.
راح لكوفي قريب وجاب لها كوفي يدفيها وهي اثناء غيابه استندت على جدار وماحست بنفسها من التعب ونامت على الجدار
جاء فواز بالكوفي وقام يطالعها وقلبه يتقطع وفي خاطره الف سوال واستغراب من هالبنت اخذ الجكت اللي بسيارته وحطه عليها
هي فزت بخوف وقالت: الله يخليك
وطالعت في فواز وعدلت جلستها ونزلت راسها
فواز:لاتخافين خوذي الكوفي يدفيك طالعت فيه بخوف
فوازبابتسامه:ليه خايفه اذا من الكوفي خذي كوبي ومد له يده بالكوب اللي معه
كانت يدها ترجف وماهي قادره تمسك الكوب
فواز بكل حنان: لاتخافين ماراح اروح لبيتي الا لمن اطمن انك عند اهلك بس انتي قومي وانا بخلص شغلي على الكومبيوتر لمن ياذن الفجر واذا اذن تكونين هديتي وتدليني بيتك اوصلك
وقام من الارض :انا بروح الكوفي وانتي اجلسي بالسياره
حركت راسها بايجاب
وراح عالكوفي حست بامان ماتدري ليه لذلك فتحت باب السياره و جلست لمن حست انها دفيت وقررت تروح قبل لايجي اخذت قلم من درج السياره
وكتبت على المنديل :شكرا على كل شي انا مدينه لك بحياتي اللي مادري وش كان صار فيها
واسفه اني عطلتك وحطت معها قيمة الكوفي
انزلت من السيارة قبل لايشوفها وهو لمن اذن راح للسياره وفتح الباب بعد ماطق الدريشه عليها واكتشف انها راحت
وطاحت عينه عالمنديل اخذ يقراه وتنهد وانتبه وقتها للفلوس ابتسم من قلب وفي خاطره(وعزيزه نفس الله يحفظها شكل قصتها قصه )واخذ الجكيت يبي يلبسه
لان الجو بدء يبرد زياده واستغرب ان ريحته كانها ريحة الاطفال وابتسم وهو يلبسه وعقله عند هالبنت وش صار فيها ووين بتروح كمل طريقه لبيته وباله مشغول ؟
اعرفكم ببطل روايتي:
(فواز عمره 23سنه درس لمن سنه ثالثه بالجامعه تخصص اداره اعمال بس ماكمل السنه الاخيره له لان ابوه خلى
شركاته في يد فواز وسافر للعلاج مع ولده الكبير عبدالله
عبدالله وهو الاخ الكبير لفواز وعمره26سنه حبوب وخفيف دم بقوه شعاره لازاد فيني الحزن ادق سلف وافل>>خخخخخخخخ
امه طبعا مسافره مع ابوه وهو كان جالس بفلتهم مع عمته دلال وبناتها لانها زعلانه مع زوجها)
دخل البيت بعد ماصلى الفجر بالمسجد على الساعه 5الفجر وكان حيله مهدود من تعب اليومين اللي فاتوا
وطلع غرفته لان الكل كان نايم ونام
يوم جمعه
يوم اجازة فواز قام وقت صلاة الظهر ووضئ وراح للمسجد وهو نازل
كانت عمته وبناتها بالصاله :السلام عليكم
دلال : وعليكم السلام هلا الحمد لله على السلامه متى وصلت .
فواز:عقب الفجر عمتي رايح اصلي ماباقي وقت على الاقامه تامرين شي اجيب معي
دلال:لا مشكور
طلع من البيت وهو مستعجل يبي يلحق الصلاه
فواز ماكان يرتاح مع عمته كثير هي طيبه بس اوقات تقط عليه كلام يرفع ضغطه وهو كل شي ولاأحد يغلط عليه او يتحكم فيه بس كان يسكت احتراما لها ولابوه
دخل المسجد وهو يسبح الله دايم تفكيره لمن يشوف الناس مجتمعه يوم الجمعه بالذات كلن لابس وينتظر الاقامه وناس تقرا قران يحس بروح المسلم يحس المكان روحاني وبقوووه
قطع عليه سلسله افكاره الامام وهو يسلم عليه

الامام:حياك الله يابني كيف الحال؟.
فواز:بخير الله يسلمك كيفك انت ياشيخ؟
الامام:بخير جزاك الله الجنه فقدت اليومين الماضيه عسى المانع خير
فواز:كنت مسافر وتوي رجعت اليوم الفجر
الامام وهو يحط يده على كتف فواز:الله يطرح فيك البركه ويرزقك كل مافيه خير لك والحمد لله على سلامتك يالله يابني صل تحية المسجد والحقني ترتب مع اخوانك بالصفوف
فواز:تامر ياشيخ عن اذنك
الشيخ:ماشاء الله ونعم التربيه الله يجعلك من اهل الجنات وتوجه بعدها الى مكانه المخصص حتى يبدء الصلاه
بعد الصلاه قرأ سورة الكهف ودعى من كل قلبه للبنت اللي شافها بالفجر ولابوه اللي قرب موعد عمليته
رجع فواز للبيت وكانت دلال عازمه صديقاتها وهو محب يضايق عمته وضيوفها فقرر يروح للمزرعه اللي توه شاريها وكانت مفاجاته لاهله لانهم يحبون المزارع كان يفكر يزرعها ويعدل فيها اشياء كثير بشي يتماشى مع ذوقه الحلو والصعب
نبذه عن عايلة فواز:
ابوه مريض بالقلب تعب قبل 3شهور وهو بالشركه
(فواز كان داخل لابوه يوقع له على اوراق وكان يتكلم بعصبيه في التليفون بعد ماقفل
فواز:يالغالي هد روحك لاتنسى انك تعبان وماينفع لك العصبيه
ابوه:وين ارتاح وين ؟
وشوي بدء يفك ازارير ثوبه وباليد الثانيه ماسك قلبه
لانهم خبروا بعمليه اختلاس كبيره فقد منها جزء من اسهمه بالبورصه)
تعب وودوه المستشفى وتقرر له ضروره سفره للعلاج كان منظر مستحيل فواز ينساه او يروح من باله شكل ابوه وهو تعبان
فقرر بعد مرض ابوه ياجل السمستر الاول من السنه الاخيره وينتبه لشغل الشركه في غياب ابوه واخوه
صحيح انه يشتغل من اول بس بشكل جزئ الصباح في الجامعه والعصر بالشركه
طرت على باله فكرة المزرعه حتى تكون فتره نقاهته ابوه فيها بعد مايرجع له بالسلامه)

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اخذ اللابتوب معه اللي يعتبر مخزن لاعماله الخاصه فيه واخذ ملفات لازم تكون خالصه يوم السبت
ركب سيارته وبعد نص ساعه وصل للمزرعه لبس الجكيت وطلب من العم شريف يسوي له شاهي
(العم شريف يشتغل عند ابو عبدالله من اول مانولد عبدالله يعني عشره وكان يحترمه وفواز ويعتبره ابوه مع انه
دايم يضحكون عليه اصدقاءه انه يسولف لهندي اللي معتبره قريب له اكثر من بعض اهله)
اثناء ماكان مندمج في شغله سمع شريف ينادي رفع راسه :خير شريف وش صاير
شريف:بابا هذا ولد وبنت كتير يبغى شغل مزرعه
فواز بكل استغراب:ولد وبنت خلاص روح انا جاي وراك
راح فواز يشوف اللي صاير انصدم بمجموعه اولاد وبنات يطلبون منه يشتغلون بالمزرعه مقابل
مبلغ بسيط وخلاهم يدخلون مع انه هالشي ممنوع ويحاسب لو اكتشفه احد
وطلب من شريف يعطيهم اعمال بسيطه ومايشغلهم كثير كان حزنان عليهم لمن يعرف وش قصتهم لانها حاجه غريبه جيتهم لهالمكان وطلبهم للشغل
واخذ ولد عمره 11 سنه وساله:انتو ليه جايين هنا احد ارسلكم؟
قال الولد:لا
فواز:ليه تشتغلون هنا ووين اهلكم؟
رد الولد بكل انكسار :ليه ياعم يضايقك وجودنا بنطلع؟
فواز وكان ندمان على سواله:لا حبيبي بس انا استغربت المفروض الحين تدرسون بكره عندكم مدرسه
رد الولد بضحكه:مدرسه..احنا زين ناكل تبينا ندرس
فواز سبحان الله فيه ناس ماتحس بالنعمه اللي حولها ومايقدرون المدارس
قاله:طيب مين اللي يوصلكم؟
الولد:الزعيم يوصلنا ونشتغل او نشحذ نسرق أي شي اهم شي توصله فلوس والباقي يكون لنا
فواز بكل استغراب:الشرطه تدري عنكم؟
الولد خاف وكان حاب يهرب بس فواز امنعه
فواز:الله يصلحك ماراح اخبر الشرطه بس انا ابغى اسال وبس بالعكس انا حاب اساعدكم
الولد:لا ولو مسكونا بنروح فيها (وبفرحه)صدق ياعم بتساعدنا ونزل راسه يبغى يبوس يد فواز وسحب فواز يده وضم الولد بحنان كان يتذكر لمن كان بالهسن وين كان كان بافخر وارقى المدارس واكله يوصله ومصروفه ماضطر يسوي اللي يسوونه علشان يعيش حمد ربه عالنعمه اللي هو فيها
الولد بكل فرحه :شكرا ياعم(وبتردد) بس ماتزعل اني اقولك ياعم لانك صغير ؟
ضحك فواز وقال:لابالعكس استانس
الولد بابتسامه :عن اذنك بروح لشغلي
وراح الولد يركض لاصدقائه يقولهم عن اللي قاله له فواز وانه ماراح يقول للشرطه عنهم
قرر فواز يساعدهم ويخليهم يجون المزرعه كل يوم جمعه يسون اشياء بسيطه علشان يعطيهم راتب
ويخليهم يشتهدون بدراستهم لانهم بيكونون اكيد مهملينها
ومر شهر والاولاد صاروا يجون كل جمعه يزرعون او يسقون مع شريف
كان يجيب شغله معه ويقعد يراجع حسابات الصفقات والمنتجات الوارده للمؤسسه
هو مو شغله بهالاشياء بس ماكان يثق باحد من الموظفين والمؤسسه امانه عنده

ودخل المزرعه وبدء يراجع في الحسابات واثناء ماكان مندمج في شغله سمع شريف يصارخ
وراح له يشوف وش صاير وانصدم ان فيه بنت من الاولاد اللي يشتغلون بالمزرعه طاحت ودخل
شوك النخل بيدها وانصدم انها هي نفسها البنت اللي شافها لمن رجع من الرياض
فواز:انتي؟
رؤى في بالها(انت لا اكيد بيتاكد من ظنه اني من الشارع بس هاذي الحقيقه )
فواز انتبه لسرحانها ويدها اللي تنزف:وشو ذا يدك كلها شوك شريف جيب شنطة الاسعافات
وبدء يطلع الشوك من يدها وهي تتالم
كان مستغرب ليه هالبنت مره ثانيه هل هو صدفه ولا قدر وكان يتمنى يعرف قصتها وزاد فضوله لمن شافها للمره الثانيه



انتهى البارت

__________________________________________________ __________

>>>> الرد الثاني :

البارت الثاني
(رؤى بنت جميله جدا جمالها بنعومتها ورقتها اللي زايده مره كانت ارق من نسمه الهواء بصوتها وبشكلها وبقلبها وطيبة قلبها محليتها جمالها اللي من داخل لبرى
هي متوسطه الطول بشرتها بيضاء وصافيه مره كانت مورده ودايم البنات يقولون لها عن وش اللي تستخدمه لبشرتها وكانت تقولهم انها طبيعتها بس مايصدقونها شعرها ناعم وبني لتحت كتفها بشوي جسمها روووعه قليله عليه كان خصرها حيل صغير وزايدها حلا تقريبا كانت ايه للجمال
قصتها طويله وبنشوفها لمن ترويها لفواز)
بعد ماحطت المعقم على يدها لانها رفضت ان فواز يحطه كانت كل ماحطته فزت من مكانها وفواز ضحك عليها
قال :خلي العناد ينفعك مو كذا ينحط واخذ القطنه منها وقام يحطه لها بحركه خفيفه
سحبت يدها وقالت :شكرا
وكانت تبي تروح قال فواز:وين؟انا ماصدقت على الله اشوفك اعرف منك وش سالفة ذاك اليوم
عيونها امتلت دموع وحس فواز بالذنب قالت بعيون تلمع من الدموع:لا ولاشي
فواز تركها لانه حس لو انه ييضغط عليها انها بتصيح وزادت حيرته في رؤى
قال فواز:طيب ماقلتي لي اسمك؟
قالت وهي رايحه:رؤى
قال:رؤى انتي شاطره بالرياضيات
لفت عليه بكل استغراب :ليه؟
قال: علشان اذا شاطره تساعديني بشغلي واوعدك براتب نفس راتب الموظف اللي عندي؟
بعد تفكير ردت:طيب وشلون اساعدك؟
قام فواز وفي باله(يسسس ) وصاريشرح لها كيف تتعامل مع الاوراق وعطاها ملف صغير يختبرها اذا كانت تصلح تساعده او لا وبعد وقت قصير جت رؤى لفواز ومن بعيد مدت له بالملف وبصوت اقرب للهمس قالت :هذا الملف خلصته
استغرب فواز واخذه منها وهو ماهو مصدق انها خلصت كل هالحسابات في وقت قليل
بس الصدمه كانت لمن راجع الملف ان حسابها دقيق اكتشفت اشياء ماكان بينتبه لها
فواز بعصبيه مصطنعه:بجد بجد ماينفع كذا وش الخرابيط اللي سويتي خربتي ام السالفه
رؤى باستغراب وبخوف :ليه؟
فواز ياربي على براءتها وبضحكه :لا امزح ماشاء الله عليك بسرعه فهمتي علي الموظف حقنا صار له سنه وماإشتغل شغلك إنتي بأي صف ؟
رؤى :المفروض ثاني جامعه هالسنه بس تركت الدراسه لاني ماقدرت اكمل.
فواز:ليه بالعكس الدراسه شي حلو وانتي ذكيه غريبه تركتيها؟
رؤى:تركتها وخلاص
جوا بنت وولد صغار ونطوا على رؤى وضمتهم رؤى
قال فواز وهو رافع حاجب :اكشخ طلع لك معجبين؟!.
رؤى :هاذولا إخواني
استغرب فواز :شلون اخوانك؟(لان رؤى بيضاء مرره وإخوانها بشرتهم سمراء)
رؤى:علشان مافيه شبهه هم مو إخواني جد بس من وهم صغار وانا معهم وبمثاية اختهم
فواز سند نفسه عالطاوله حط يده على خده وباهتمام :كيف؟
رؤى(ياربي ساعدني):سالفه طويله وتاخرنا الزعيم بيعصب علينا
فوازباستهزاء:من هذا بعد الزعيم ليكون جدك؟
رؤى(والله كلامه يضحكني )وبضحكه قالت:لا هذا المسوؤل عنا هو اللي يدبر لنا الشغل وتاخرت كثير مع السلامه
فواز:طيب مع السلامه بس الجمعه الجايه احسبي حسابك عندنا شغل كثير
رؤى:ان شاء الله
راحت وفي رأس فواز الف علامة استفهام عن رؤى (رؤى آآه وش هالصدفه بعد تحملين حلى اسم للبنات عندي وراك قصه واشتغل فضولي اعرفها ضحك على نفسه ماخبرت نفسي ملقوف )
ورجع فواز للبيت عالساعه 11ونص
دخل وسلم على عمته دلال
فواز:السلام عليكم
دلال :هلا عليكم السلام وينك ليه متاخر عن البيت مو من عوايدك
فواز(عوايدي او لا اتوقع انه من حريتي الشخصيه ): ليه بغيتي شي؟
دلال:ايه بغيتك بكره تمشيني انا والبنات في الخبر زهقنا
فواز:ماشاء الله ياعمتي كل يوم عند فلانه وبالليل عشاء عند فلانه ويوم بالمطعم الفلاني
قاطعتها دلال:ليكون حاسدني انا وبناتي
فواز(والله وهقه):لا والله ياعمه بس الشغل كله فوق راسي وماعندي وقت امشي نفسي
دلال:ايه مبين ماعندك وقت ..ايه على فكره دقت امك وتقول العمليه الثانيه لابوك يوم الجمعه
فواز:وشو الجمعه طيب ليه مادقت علي
دلال:ماهي فاضيه بتدخل مع ابوك مرافق وبتقفل جوالها اذا بغيت دق على عبدالله
فواز:الله يقومه لي بالسلامه
دلال:تعشيت ولا روح للمطبخ وقل للخدامه تحط لك عشاء
فواز:لا مابي بروح غرفتي
فواز وهو في طريقه لغرفته تذكر صديقه عمر انه لقاله 5مكالمات وكان يبي ياخذ تليفون البيت
سمع بنت عمته ساره تكلم

__________________________________________________ __________

>>>> الرد الثالث :

(عمته دلال عندها 3بنات ضي 4سنوات وفي9سنين وساره18سنه)
وتقول بس والله احبه واموت عليه زاد الفضول عنده ليعرف عن من تتكلم
وقاطعه صوتها وهي تقول:طيب وش اسوي صار لي يومين ماشفته مايجي للبيت مشغول بالشركه
انصدم باللي سمع هاذي ساره اللي مايعتبرها الا اخته
وبدت عنده مشكله جديده شلون ينسيها لانه كان متاكد انه حب مراهقه وانها صغيره على هالكلام
راح غرفته والتفكير شالغه
واخذ جواله ودق على صديقه ( لو اني من اول دقيت من جوالي كان ابرك)
رد عمر:اهلين زين طرينا على بالك
فواز:طيب سلام اول
عمر:السلام عليكم وينك وش تسوي وتعشيت؟
فواز:الله يعيني كل هذا تبي اجوبه طيب عندك اسئله ثانيه من مره علشان اكتب تقرير يرضيك طال عمرك؟
عمر : أي والله ياليت يكون احسن اقول بلاثقالة دم ميت من الجوع والوالده مسويه طبخه يجبها قلبك وتقول اعزم فوازوه هاه تجي تتعشى معي؟
فواز:الله يخلي لي خالتي يالله دقايق واكون عندك
عمر:الله ماعندك وقت طيب ارفض خلني احلف عليك
فواز:اقول افتح الباب جايك وبلاكثرة كلام
عمر:انتظرك لاتاخر علي
راح فواز لعمر
(عمر صديق فواز من ثالث ثانوي صحيح بعرفه من كم سنه بس كانه يعرفه من اول ماإنخلق
درس هو وفواز بنفس الجامعه وبنفس القسم
بس فواز اجل دراسته لمن يرجع ابوه بالسلامه وعمر كمل عمر انسان طيب جدا حنون
ابوه مات من 4سنوات وعند اخ اكبر منه متزوج وعنده عيال وهو ساكن مع امه ببيت رغم صغره الا انه فخم بكل ماتعنيه الكلمه
مع العلم بانهم بنفس مستوى فواز المادي ويمكن احسن بس اخذ هالبيت بالذات مايبي يتعب امه )
ام عمر كانت تعد فواز توأم لولدها عمر
فواز دق الجرس
ام عمر رفعت السماعه :مين؟
فواز:انا فواز
ام عمر: هلا يمه فواز ادخل المجلس عمر ينتظرك هناك
راح فواز المجلس ولقى عمر متمدد
فواز:اخس على الرجال اللي يستقبلون ضيوفهم كذا
عمر وهو منتبه مع المباره بالتلفزيون:اقول اجلس اخلص شكلها قول هالمره
بعدين عدل جلسته ولف على فواز :
بعدين اللي يسمعك يقول ضيف ماكنك مطيح عندي ليل نهار
فواز:والله اللي يسمعك انت يقول انك صادق..ايه صح جبت معي التمر اللي تحبه خالتي واستحيت اعطيها تشيله
وعندها هنا حمار
عمر:لا يافواز مايصير تقول عن نفسك حمار عزيز وغالي وانا اخوك
فواز بانفعال مصطنع:صدق انك ماتستحي اقول انقلع جب العشاء ميت من الجوع ..بزران ماتستحي على وجهها
واخذ الريموت وقام يدور قنوات للشعر
فواز:عمر وين قنوات الشعر اشوفك ماشاء الله فاتح التلفيزيون استريو كله اغاني
عمر وهو يقوم يبي يجيب العشاء:يوه ياخي يانك قديم وتصلح شايب قال شعر قال
يمكن تلاقيها ورى القناه 370
وبالصدفه حط قناه وجت قصيدة ابن فطيس ياقو قلبك ..
عمر وهو ينزل العشاء عالسفره:يوه جد دخل جو مع الشعر قم تعش
فواز:هاه ..ايه عشاء تصدق احسها قالها من جرح
عمر:لافواز مو طبيعي فيك شي ؟
فواز :تصدق مااحب اكل اكلات شعبيه الا عندكم فديت اهل نجد كلهم مادام خالتي ام عمر منهم
عمر وهو كاتم الضحكه:اقول لاتقعد تغزل في امي احترم نفسك
اما فواز قام يضحك وماقدر يوقف ضحك ومن كثر الضحك دمعت عيونه
عمر:انا ماقلت نكته وبعد ماشاف فواز ماقدر يقاوم وصار يضحك معه
فواز:الله يرج بليسك ياعمير خلني اتعشى لازم ارجع البيت وراي شغل بكره لمن قمة راسي
عمر:الانسان بيموت والشغل وراه ليه ماتاخذ يوم اجازه نطلع نتمشى تغير جو الاوراق والملفات ارحم روحك
حتى يوم الجمعه تشتغل مسوي فيها لازم يتاكد من كل حرف الحين انت ليه موظف الاوادم مايحتاج انت سو شغلهم
فواز:والله ياعمر المسوؤليه صعبه تعرف الحلال مو حلالي يعني امانه
عمر:فواز من جدك انت حتى راتب ماتاخذ يالله تاخذ حق البنزين واغراض البيت ماتدلع روحك شوي
فواز:اه ياعمر همي كبير شيبت في عقول العرب
عمر:بدء حامد زيد اقول مالك نيه تروح بيتكم ياخي ابي انام
فواز:عمير ووجع تطردني ..خلاص ابشر بكنسل العزيمه
عمر:أي عزيمه لا فواز انت حبيبي لو تبي اجيب لك فراش اهم شي رضاك طال عمرك
فواز:انا لو جلست بيصير لي شي يالله حبيبي تصبح على خير وسلم على خالتي وتشكرها عالطبخه
عمر:وانت من اهله
طلع فواز من عند عمر وهو كان يتمنى حياته نفس حياة عمر انسان مرح وماخذ الحياه بمرح
وقام يفكر برؤى استغرب من نفسه ليه طرت على باله معقوله لان اللي شافه بحياته مايعتبر عند اللي شافته شي
او لانه متعاطف معها
جاء صباح اليوم الثاني صحى فواز على صوت الجوال ..المتصل عبود(اخوه الكبير)
اخذ فواز الجوال بسرعه:الو
عبدالله:صباح الخير على فواز
فواز:اهلين صباح النور شخباركم وشخبار ابوي
عبدالله :لا ابشرك الامور تمام وبدء مفعول الدواء واحتمال نقدم موعد العمليه
فواز:الف حمد وشكر لك يارب وامي شخبارها؟ولهان عليها موت
عبدالله :والله بخير مغطيه على بنات لندن
فواز ضحك:الله يرج بليسك وينقال الكبير تصدق اني اعقل منك في بعض الاحيان
عبدالله:اقول احترم نفسك ياولد وانا دقيت اطمنك علينا لاني بدخل المستشفى وبقفل جوالي
فواز:اوكيه سلم على ابوي وبوس راسه وامي بعد وحاول تطلعها معك برء المستشفى وكلموني
عبدالله:ان شاء الله يالله انتبه على نفسك
فواز:عبدالله
عبدالله:نعم
فواز بلهجه مصريه:لااله الا الله
عبدالله مات من الضحك:محمد رسول الله
قام فواز بابتسامه وبدل ملابسه وهو متأمل من رجعه اهله قريب
دلال كانت تكلم بالتليفون وشافت فواز وهو نازل من الدرج

__________________________________________________ __________

>>>> الرد الرابع :

فواز:صباح الخير
دلال:هلا يمه صباح النور
فواز:انا طالع تاخرت تبين شي ؟
دلال:ايه ياليت توصل البنات بدربك السواق راح المطار يستقبل صديقتي
فواز:عمتي بس انا تاخرت
دلال:من بيوصلهم الله يرضى عنك وصلهم
فواز بينه وبين نفسه اللهم طولك ياروح:خلاص عمتي قولي لهم يجون بسرعه ماابغى اتاخر زياده
دلال :روح وبيلحقونك
فواز طلع وراح لسيارته وجت ساره وفيء
ساره+فيء:صباح الخير
فواز:اهلين صباح النور
ومشى فواز وكان طول الطريق ساكت
فيء:وصلني مدرستي اول مااحب اتاخر وبعدين وصل ساره
فواز:لا مدرسه ساره اقرب لي (وكانت العكس مدرسة فيء اقرب)
ساره كانت مقهوره منه وصلها على مدرستها وهي نازله :مشكور فواز عالتوصيله
فواز:لا شكر ولاشي بالتوفيق لك ان شاء الله
انزلت وهي طايره من الفرحه وفي بالها(واي ناسه يتمنى لي التوفيق فديته بس)
فيء:فواز انت ليه كذبت مدرستي اقرب
فواز استغرب من ذكاءها:قال بس اذا وصلتك بعدين هي بيبعد طريق شغلي فهمتي
في:ايه علشان كذا تصدق وحد من صديقاتي شافتك لمن وصلتني اخر مره وقالت ولد خالك يهبل
فواز وعلى وجهه ابتسامه:الله يرحم بنات اول بس
فيء:يوه فواز كنك شايب خلك كول
فواز ضحك:اقول انزلي يام الكول وصلنا
فيء:شكرا
فواز:العفو ياكوول
كان مستغرب هذا وعمرهم 9سنوات تفكيرهم كذا وصل الشركه وكان في انتظاره شغل يطول فيه التعب
ومر الاسبوع من غير مايحس فواز فيه كان يومه نفس الامس شغل في شغل
وجاء يوم الجمعه موعد العمليه اللي تاكدت ان ابوه بيسويها في ذاك اليوم
وراح للمسجد وقام يدعي لابوه ان العمليه تنجح وربي يقومه له بالسلامه ولمن صارت الساعه3ونص
راح المزرعه ومعه ملفات وصل الساعه4العصر
وكان عند كل حوض ولد اوبنيه يزرعون ورد ونعناع والاشياء الصغار والسهله
كان مبسوط من مساعدته لهم
وجاء شريف:اهلين فواز
فواز:اهلين شريف كيفك؟
شريف :الحمد لله
فواز:شوف شريف لمن يجون الاولاد المره الجايه قلهم يجيبون كتبهم ويذاكرون معد ابيهم يشتغلون اوكيه
شريف:حاضر يبغى شي تاني
فواز:لا
شريف :بابا فيه بنت يعطي انا ملف يقول انت انسى هو جمعه راح
فواز:يوه قلبت عليه المكتب الحمد لله ماهو ضروري بس وينها؟
شريف :شغل سوي ورد هذا بنت كتير كويس يعرف كل شي
فواز :وينها الحين؟
شريف :غرب مزرعه
فواز :خلاص روح كمل شغلك وانا بروح هناك اشوف وش يسون
راح فواز لغرب المزعه كانت جهه للبنات علشان يزرعونها
وجاء ورؤى مدنقه وتسقي بذور توها زارعتها
وقرب منها قال:وش تسوين؟
رؤى كانت تسقي ومن الخرعه طش المويه بوجه فواز
رؤى بربكه:اسفه والله اسفه بس خفت
فواز وهو يضحك:الدنيا برد وانتي ماقصرتي
رؤى وهي شوي وتبكي من الفشله :اسفه والله ماقصدت
فواز:بعد يمكن تكونين قاصده ترى جبت اليوم ملفات ياليت تساعديني فيهم وهم بالصاله اللي راجعنا
فيها الملفات الاسبوع اللي طاف
رؤى:اوكيه ببدء لمن تجي
فواز راح يبدل ملابسه لانها تغرقت بالمويه
وكان ينشف شعره وهو داخل رؤى انعجبت في شكله مره بس نزلت عيونها على طول
فواز:بديتي بالصعب
رؤى:احسن لاني نشيطه الحين وبنتبه اكثر
فواز:انتي قد اشغلتي بشركه
رؤى:لا ليه؟
فواز:ماشاء الله اجل شلون تعرفين كل هذا
رؤى اعرف وبس
فواز:كلك اسرار ..طالع بساعته ودق على جوال عبدالله بدون رد
كان خايف على ابوه وبعد ربع ساعه من الصمت
كانت رؤى تشتغل بالملف واخوانه جنبها ولاحظت القلق على فواز
رؤى بصوت شبه مسموع:عمي
فواز ضحك:من وين جبتي عمي بعد اسمي فواز
رؤى :ليه قلقان ؟
فواز:شلون عرفتي اني قلقان
رؤى:كل شوي تطالع بالساعه
فواز:ابوي تعبان بالقلب وبلندن والحين بالعمليات وخايف عليه مره
رؤى:مايفيد القلق ادع له ربي يقومه بالسلامة الله يعافيه ويشفيه
فواز:الله يسمع منك
وبعد ساعتين من الحسابات خلصت رؤى الملف وفواز باقي ماخلص الا كم صفحه
مع ان ملف رؤى اعقد واصعب
رؤى:خلصت ..
فواز:ماشاء الله بالهسرعه الملف يبي له يوم
رؤى :انتو تتبعون طريقه مطوله وصعبه يعني مثلا الفاتوره الاولى تضربون عدد الاكياس بحجمه
وبعدين تقسمون المبلغ الى عدد الاكياس وتسون لويه من ولاشي
عدد الاكياس اضربها بسعرها في السوق وقارن بين السعر الموجود بالملف وبس
فواز :والله انك صادقه ماشاء الله اشك انك متخرجه من جامعه
رؤى :ياليت
وقطعهم صوت جوال فواز المتصل عبود
رد فواز:هاه بشر ياعبدالله؟
عبدالله:فواز الحمد لله نجحت العمليه واذا ماصار شي ل24 ساعه بينزلونه الجناح
فواز:الله يبشرك بالجنه طمني اول باول
فواز سكر من عبدالله وسجد سجود الشكر
رؤى:الحمد الله على سلامته وانا ستاذن بيجي الزعيم الحين
فواز:وين تروحون عشاكم كلكم اليوم علي
رؤى :مادري الزعيم بيوافق
ماعليك انتي روحي لللباقين وقولي لهم يجون هنا علشان نتعشى وزعيمكم خليه علي
وراحوا اخوان رؤى يقولون للباقين عن عزيمة فواز لهم
الكل انبسط بس كانوا ينتظرون الزعيم لانه هو اللي بيقرر
دق فواز على المطعم وطلب اللي بيعشي قبيله كان طاير من الفرحه
لان عملية ابوه نجحت كانوا جالسين برى على طاوله وكانوا كل الاولاد موجودين كلن لاهي مع الثاني

__________________________________________________ __________

>>>> الرد الخامس :

فواز:رؤى
رؤى ناظرت في فواز لاول مره تحط عينها بعينه فواز اندهش من عيونها كانت مرسومه ولونها رمادي
تنح ورؤى نزلت راسها :ناديتني
فواز:هاه ايه اخوك شكله نايم في سابع نومه حطيه بالصاله ادفى له
رؤى:لا عادي متعود ينام وهو جنبي مابغى اخرب عليه نومته
فواز:رؤى ممكن اسال سوال؟
رؤى:تفضل عمي
فواز:يوه مره ثانيه عمي المهم ماابغى اسمعها مره ثانيه اتخيل نفسي شايب
رؤى:خلاص ابشر عمي
انتبهت انها قالت عمي وضحكت
فواز:انتي وراك قصه ممكن اعرفها؟
رؤى:يوه قصتي طويله
فواز :انا احب الروايات
رؤىبعد ماتنهدت: لمن كان عمري 4سنوات او5سنوات لقوني مضروبه ضرب مبرح ومرميه على طريق صحراوي
واخذوني للمستشفى بقريه متواضعه ودخلت بغيبوه لمده سنه ونص
لمن صحيت ماكنت اعرف ولاشي حتى اني ماتكلمت الا بعد ماصحيت بشهرين
كنت ناسيه تماما من انا؟ وللحين مو قادره اتذكر و ام فجر وخالد اخواني كانت ممرضه في هذاك المستشفى
طبعا من زمان مو مثل الحين يعني كنت نفس الابره بكومه قش وللاسف انا مساعدتهم
لان فاقده ذاكرتي تماما اخذتني عندها وربيتي لانها هذاك الوقت ماكان عندها عيال وكانت تتمنى الضني
وبعد سنتين حملت بفجر وبعدها بسنه حملت بخالد وكانت دايم تقول اني وجه خير عليها وان ظروفهم
تحسنت من اخذتني ومرت السنين وكنت عايشه مبسوطه مااحس نفسي الا مع امي وابوي واخواني
ماكان عمي بو خالد مقصر علينا بشي نروح لاحسن المدارس وناكل وكنا مثال للعائله المثاليه
بس كل شي انقلب قبل سنه
هنا دمعت عيون رؤى
فواز:اسف اذا تبين لاتكملين
رؤى لاعادي بس تذكرت امي ام خالد الله يرحمها
اكتشفوا عندها السرطان وكانت امكانيات عمي بوخالد متواضعه وكان بمنطقة الدماغ
يعني منطقه حساسه ولازم تسافر برى باسرع وقت بس للاسف ماقدر عمي يتدارك الوضع
لمن جت الدوله بتسفرها لقت ان المرض انتشر بكل جسمها وان العلاج بحالتها مستحيله اكتشفوهه وهو خلاص بمراحل متقدمه مايقدرون يسيطرون عليه
وبعدها باسبوعين ماتت وانقلب حال البيت
فواز:وابو خالد وينه الحين؟
رؤى بكل اسى وبصوت مبحوح :من يومها وهو سكران 24ساعه مافيه اطيب من قلبه بس من ماتت ام خالد وحالته مقلوبه
صاير يسكر ويضرب وانقلب علي وعلى عياله بشكل ماتتوقعه
وانا الحين اشتغل واحاول اصرف على عيال الحرمه اللي ربتني ابي ارد لها ربع الجميل
فواز سرح (كل هذا صاير لك ياه يالزمن)
فواز:الحمد لله على كل حال طيب وش سالفه ذاك اليوم اللي قابلتك فيه لاول مره وليه كنتي هناك بذاك الوقت؟
رؤى :كنت نايمه وسمعت ضجه طلع ابو خالد وصديقه كان عمي نايم وصديقه قام يطالعني
بنظرات تخرع حاول يدخل علي انا واخواني الغرفه بس سكرت عليهم وهربت
فواز:ليه مادخلتي معهم وقفلتي
رؤى: الباب بسهوله بنكسر ولاني خايفه عليهم مرره اما انا بالطقاق مايهم اهم شي مايخافون وانا امشي جت السياره وكملت الخوف اللي فيني
بعدين جيت انت صدقني ماراح انسى فضلك علي لو اموت لولا ستر ربي ولولاك مادري
الحين انا وين وكيف حالي
فواز:مو مبين عليك كل هالهم طيب ماتعرفين شي عن اهلك
رؤى:ماتذكر ولاشي واحتمال ماسترجع ذاكرتي الا بسن الاربعين يعني بعد مايفوت الاوان
فواز بكل اسى على رؤى اللي انصدم ان ورى هالبنت الرقيقه والناعمه كل هالاحزان:
طيب بسال سوال اخير واسف اذا ضايقتك
رؤى:اسال؟
في هاذي اللحظات جاء ولدين(فيصل+سعود) ينادون رؤى
فيصل+سعود:رؤى بسرعه الزعيم معصب منك بسرعه تعالي
فواز:لا قولوا له يتفضل يتعشى معنا
سعود:قلنا له بس هو عصب لمن درى ان رؤى قاعده معك
رؤى:ياويلي فجر بسرعه اسبقيني بشيل خالد واجي وانت يا سعود خذ فيصل وفجر واركضوا قبلي
لايعصب عليكم
راحت رؤى وهي تركض والخوف سكنها ولحقها فواز
وصلوا لعند الباب وكان الزعيم ينتظر رؤى عند الباب



انتهى البارت