عنوان الموضوع : يا امهات ساعدوني بتجاربكن سياحة الامارات
مقدم من طرف منتديات الضمير العربي

السلام عليكم خواتي عساكم بخير
سالفتي سالفة ويا بنتي خبلتني

بنتي عمرها الحين اربع شهور ربي يحفظها يا رب مشكلتي وياها انها وايد صياحة واااااااااايد راضعة و شبعانة الحمدلله و نظيفة و راقدة و امورها طيبة فجاة تبدا الدراما العبها و اشغلها اضوية و الوان عسب تلفت نظرها و تستانس اتم بو عشر دقايق هادية عقب تصيح و تصيح و تصيح ما في فايدة اشلها شوي تسكت ارد العب وياها شوي و ترد تصيح

اماالفلم الثاني هو النوم
يوم تبى ترقد يعني حالة طوارىء فالبيت اتم تصيح و تتضارب وياي و هي فحضني و الحالة حالة لين عشرين دقيقة ظهري يتكسر من الهز و الشيل و احاول اهديها بالاخر تنام عقب عشرين دقيقة

يعني ما ادري شسوي ساعدوني فهالحالة شسوي شورن علي باي شي يمكن يكون حل لمشكلتي صدق تعبت واااايد تعبت

لا تقولولي غازات لاني مهتمة وايد فهالسالفة و دوم اسويلها ينسون و مساج خفيف على بطنها و الحمدلله ما فيها وايد

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
أرد واقولج غازات مايلعوز الياهل غير هالشي ..عيل انا كنت أشد عنج لا ليلي ليل ولانهاري نهار ..عيني ماتغفي فاليل كل البيت سهران ع صياحها ..بسبة الغازات ..ولاينفع شي لاينسون ولانعناع ..حتي الخيل والنيلة فركتها فيه ومانفع ..لين كبرت شوي وخفت

__________________________________________________ __________

>>>> الرد الثاني :
ما احس انها غازات لان ما اشوف عليها اعراض مغص

__________________________________________________ __________

>>>> الرد الثالث :
شغليلها سورة البقره يمكن تهدا
انشاء الله انها طبيعيه لان ولد اختي نفس السالفه مايبا صوت لما يرقد ملعوز امه مسكينه وحتى لما يشتروله لعبه يديده يلعب شوي عقب يصيج ويعصب على اللعبه
حالات يهال عادي بتكبر وبيختفي هذا كله

__________________________________________________ __________

>>>> الرد الرابع :
اولادي الاثنين كانو درااااااااما في نومة الليل , مأساااااااه , قمت اكره الليل هههههههههههه
تصدقين ابني صار ينام مثل الخلق بعد ما تمم السنة كان ينام ويصحى يصيح وينام ويصحى يصيح وعلى هالحاله لين الفجر!!! مع انه نظيف وراضع واشربه ينسون ومساج وكلللل شي جربته ما نفع
لكن الله المستعاااان يا اختي ومأجوره ان شا الله
من تجربتي افتحي سوره البقرة بتهدي وتنام ان شا الله
او حاولي تتمين تقولين ششششششششششششش ششششششششش , او تشغلين جنب راسها صوت مثل السشوار , من جد ينفع وشايفته في برنامج للعناية بالطفل

__________________________________________________ __________

>>>> الرد الخامس :
مالج غير الصبر... في أطفال عصبيين وما تعرفينهم شو يبون.... كلنا مرينا بهاي الظروف والحمدلله بعد 6 شهور تخف نسبيا وعقب بعد السنه بتخف اكثر... هاي الام لازم تصبر...

أهم شي إنج تحطين في بالج إن ها الشي اللي في بنتج طبيعي جدا وماله داعي تتضايقين وتتوترين خليج هاديه عشان البنت تهدا وياج .... حاولي تلعبين في شعرها وفليل خليها راقده عدالج خليها تحس بالأمان وتشم ريحتج وتسمع دقات قلبج مثل ما كانت في بطنج.... لا اتقولين بتتعود... هي لما خلاص ترتاح نفسيا وتحس بالأمان عاد بترقد في سريرها عقب لما يصير عمرها سنه.... إذا شفتيها يتها حالة الصياح ييبيلها قصة للأطفال وتمي كلميها صدقيني تراها تفهم وبتلفتين انتباهها على الصور الحلوة وهي بتستمتع وهي يالسه على ريولج وتسمع صوتج وكلامج.....

حاولي تعطينها مصاصه (اللاهايه) يمكن البنت عند رغبة مستمرة في المص... أنا اصراحه المصاصه هي الشي الوحيد اللي نفعت مه ولدي وسكتته وخلته يهدأ.... وإذا كانت المصاصه مضرة جان ما باعوها في الصيدليات... في أطفال لازم يمصون عشان تهدأ أعصابهم.... هاي فطرة فيهم....


والجنة تحت أقدام الأمهات لأنها تتعب وتشقى وربي يأجرج إن شاءالله...