عنوان الموضوع : الدوام والجامعه وبيتي عالم الامومة
مقدم من طرف منتديات الضمير العربي

انا اخت صاحبه الاكاونت

دشيت اكتب معاناتي من بدت الدراسه

انا متزوجه وموظفه وادرس بعد وعندي طفلين واحد فالكيجي وواحد فالحضانه طبعا تعرفون ان من اسبوعين بدت الدراسه ،، ولدي راح الكيجي والحمدلله اموره تمام .. اما ولدي اللي فالحضانه الله يعينه

انا ادرس فالجامعه وعندي دوام الصبح اطلع من الساعه 7 الصبح وارجع 8 المسا يوميا ،، عيالي اشوفهم مره او ان كثرت مرتين لان مافي وقت اني اطلع من الدوام واروح البيت ،، الحمدلله ريلي دوامه يخلص من وقت ويرجع يجابل العيال ،، والسبب ان خدامتي مابغت تيلس وفالاخير شردت لاني رفضت اعطيها معاش 1500 واوافق على شروطها بعد

عمتي اقترحت بانها تعطيني الخدامه وتيلس مع العيال الين ايي ريلي ،، بصراحه انا ما ارتاح لخدامتها وثبتت شكوكي يوم الاربعا اللي طاف شفتها تصارخ فويه ولدي وتقرصه ،، طبعا بتقولون كيف عرفتي ؟ انا مركبه كميرات فبيتي فكل الزوايا .. طبعا من يومها وانا ماسمحتلها ادش البيت خير شر ونبهت عمتي ان تخلي العيال عندها بس للاسف هي حرمه كبيره وماتقدر فاضطريت كل يوم ارجع البيت واخذ ولدي واييبه معاي الدوام بعدين ابوه ايي يشله .. طبعا المسؤول ماعجبه الموضوع وقالي حلي هالاشكاليه خلال هالاسبوع

ربيعتي يزاها الله خير ماخذه اجازتها السنويه واقترحت تخلي ولدي عندها الين ما ادبر اموري .. اهلي منطقتهم بعيده بعدين الكل يشتغل ومايردون الا قريب العصر ، رحت لحضانه ولدي الصغير وقلتلهم بخلي ولدي اللي فالكيجي عندكم كل يوم ساعه ونص الين ما يخلص ابوه من الدوام ويشلهم ،، فقالت لي المديره نحن موافقين بس دفعي 1500 فالشهر من دون فلوس الاكل والمكان اللي بينام فيه .. طبعا انا رفضت

لان الحضانه سالفتها سالفه غيرو الاداره اللي فيها ويابو حريم مالهم دخل فشي اسمه حضانه ،، وساخه لابعد الحدود اول ما افتح باب الحضانه ريحه اكل ووسخ وغيره .. اليهال كلهم ياكلون من صحن واحد ومن نفس الملعقه ؟؟ وغبار ،، والزباله ما يطلعونها وغير هذا اكتشفت انهم ياخذون من الحليب اللي احطه لولدي ،، وغير اللبس اللي يختفي ويقولون لا نحن ماخذنا شي ؟ هذا غير نظافه الطفل نفسه لبسه من الصبح لحوالي الساعه 2 ما تبدل له ،، البامبرز ممزور ومب مغير له ،، ويهه اكل ووسخ ومش مغسل ،، ايام احصل فراس ولدي لصق ولميع و حلاوه ؟ حتى انا اليوم شاكه ان فولدي قمل من هالحضانه

كلمت حضانه ثانيه قالولي مافي شاغر والمشكله مافي الا حضانتين فنفس منطقتنا والباقيات بعيد عنا

ريلي قام يشتكي انه مايشوفني وعيالي بعد لاني لما ارجع القاهم نايمين

والويكند اخصصه للدراسه والبروجكتات وغير شغل الدوام .. بصراحه حاسه ان زوجي ماقام يتحملني .، كله يقولي انتي هالفتره مهملتنا انا وعيالج ومب مخصصه وقت لنا ،، المشكله ان كل يوم لازم اراجع وعقب ما اراجع اخلص شغل الدوام وما اخلص الا الساعه 1 وانش الساعه 5


بليز بنات ابا نصايحكم .. لاتقولون استقيلي لان اصلا ريلي هو اللي شجعني عالدوام وقال ها حق من حقوقج باجر لو صار شي بتكون عندج وظيفه تسندج .. ولا تقولون لاتدرسين لان هذا اخر كورس حقي

بليز ابا اعرف كيف اشتكي ع الحضانه يمكن يتعدل وضعهم شوي

وابا اعرف اللي يشتغلن وعندهن عيال فالكيجي او المدرسه وين يحطونهم لين يردون من الدوام؟

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
حبيبتي ممكن تواصلين وياي عالخاص ممكن اقدر اساعدج

__________________________________________________ __________

>>>> الرد الثاني :
انتي كإنسانه متزوجه عليج حقوق و واجبات وربي بيحاسبج عليهم
فما اعرف كيف تلبن تدرسين وتشتغلين و تهتمين في عيالج في وقت واحد
انتي مب سوبر ومن !!!
الحل يا تتنازلين عن دراستج او وظيفتج في الوقت الحالي
وصدقيني بتخسرين ريلج اذا تميتي جي ..
الله يوفقج ..

__________________________________________________ __________

>>>> الرد الثالث :
حرام كورس وبتخلصين حاولي تضغطين على عمرج بعد شوي

جربي مع الدوام خذي اجازه حتى لو بدون راتب بس هالفتره لين ماتخلص الدراسه

وصدقيني الشهاده مهمه فهالحياه مب بس لج حتى لعيالج وان شاء الله ايام وبتعدي وانتي بهدوء يلسي مع ريلج وحاولي تصبرينه .. صبرتو وايد والحين مابقى شي

والحضانه اشتكي عليهم لان حرام فالنهايه تدفعون فلوس عشان النظافه والاهتمام وتكونين مطمنه ان ولدج في ايد امينه

والله يسر امرج

__________________________________________________ __________

>>>> الرد الرابع :
هلا ،، ما شاء الله عليج وايد ضغوطات ، بصراحة اعرف اللي تتوظف بدون ما تدرس صراحة تحطي العيال عند البشكارة لين ما ترجع ونفس حالتج ابوهم يردو وجي ، وحد فالحضانة وحضانات لين العصر بعد ، وطبعا تفاهمو للدراسة لانه اخر كورس حلو الله يوفقج ،

__________________________________________________ __________

>>>> الرد الخامس :
بالتوفيق اختي