عنوان الموضوع : ما ابغي اسكن مع اهل ريلي و هم مصرين, ساعدوا رفيجة اناناسة,بارك الله فيكم لتربية الطفل
مقدم من طرف منتديات الضمير العربي

السلام عليكم و رحمة الله و بركاته

اخواتي هذي مشكلة وحدة الله يصبرها و طلبت مني اعرضها عسب تستفيد من ردودكم الذكية و

حلوة مثلكم :22 (12):

ساعدوها بارك الله فيكم بس بالتعقل :1 (69):

و هي صلت صلاة الاستخارة في بيتهم و لين الحين مب مرتاحة ابدأأأأأ



&&&&&&&&&&&&&&&&&&&&&&&&&&&&&&&&&&&&&&&&&&




عندي مشكلة يا خواتي و اتمنى احصل الحلول المناسبة و البعيدة عن المشاكل تماما ... لان رضا ريلي عندي فوق كل شي .... يعني باختصار حلول ذكية :1 (7):

المشكلة يا خواتي
ريلي هالايام وايد يلمح لي نسكن ويا أهله .... و احنا متزوجين من 5 سنين و ساكنين في شقة روحنا .. و دوم يقول لي بنسكن وياهم .... لان اهله الظاهر دوم يقولوله اسكن ويانا ... يعني ياما استوت مشاكل على الموضوع و قلنالهم ما بنسكن وياكم الا انهم مصرين ....
و انا مارتاح بالسكن وياهم لانهم من النوع اللي ماشاء الله وايد يسألون و يتدخلون في كل صغيرة و كبيرة ... حتى ماتصدقين لو كنت يالسة وياهم في غرفة و بغيت اطلع مثلا اسير الحمام او اي شي انتوا بكرامة يسألوني وين سايرة و ليش ؟؟؟؟!!!!!!!!!!!!
يعني اي حركة يسألونج عنها صدق تلوع جبدج ... و انا يوم اسير عندهم اتم ثلاث اربع ايام ابغي ارد بسرعة البيت عشان اقدر اتنفس لاني احس بعمري مقيدة تماما هناك..... و حتى يوم اسير و اتم عندهم ماظهر برا مول لانهم وايد يسألون حتى ظهرة ويا ريلي ماشي لازم ييون وياج ...
هالشي طبع فيهم مب وياي بس ويا كل الناس
و يتدخلون في امور ناس ما لهم خص فيهم و انا ماحب هالشي ابدا ..... و من طبعي ماحب الحش و لا لي خص في الناس و امشي على قول الرسول صلى الله عليه وسلم : (( من حسن اسلام المرء تركه مالا يعنيه ))
و عندهم طبع ثاني انهم يشوفون عيوب غيرهم و ما يشوفون عيوبهم معنها اخس .... و انقهر من هالشي وايد خص انج تشوفين هالشي عادي و هم يشوفونه عيب جدا ....
وعلى طول يوم اكون عندهم اكون تحت المجهر و اخباري اول باول يتناقلونها مب بس داخل البيت اتفاجأ من زيارات اهاليهم اللي ماشاء الله تستغربين منهم جنهم وكالات انباء :1 (6): ..... و انا وحدة احب الخصوصية وايد و احب اكون حرة بتصرفاتي خص اني اشوف هالشي عادي لا عيب و لا حرام ... لاني اعرف حدودي زين و اثق بتربيتي و الحمدلله ...
و مشترياتي في نظرهم دائما غالية .... و يستخسرون عليا ... عنبووووه !! و هم ماشااااء الله يشترون و يجددون ع كيف كيفهم وبالسعر اللي يبونه ... معنه الشي اللي ياخذونه ابد ما يستاهل بس انا اجاملهم و عمري عمري ماذمتهم و امدح اغراضهم باستمرار ..... و انا اي شي اخذه اول سؤال يسألونه بكم !! يووووه و بعدين
و انا من النوع الحساس جدا ماتحمل اي كلمة لاني ماحب اقلل احترامي او ادبي على غيري احب الناس تعاملني مثل ماعاملها ولا اكون وقحة ويا اي حد ... و اذا رديت برد احاول اني ماجرح الطرف الثاني ابد.... عكسهم تماما ..... ردودهم دائما وقحة و في ويهج و نغزاتهم دائما جارحة و مفهومة ....
و المشكلة احاول افهم ريلي لكنه مب طايع يفهم لانه ريال و ما ييلس في البيت و لا يدري باللي يستوي .... و دائما بعيد عن المشاكل لاني ماحاول ادخله فيها ....
و هو من النوع لو يجرحوني جدامه ما بيقول شي بيقولي انا سكتي !!
يعني مول ما يهتم لمشاعري و لا يعرف يتصرف ابدا ..... و لا يهتم لشي يخصني اصلا !!
يعني وايد امور بتتغير علي و انا لازم لازم اكتم في نفسي ... و ماعرف كيف اتصرف وياه و اقنعه ان السكن بروحنا وايد احسن و افضل لنا كلنا مب بس لي ....

الحين شو الحل ؟؟ كيف اتصرف؟؟ ارضخ له و اسكن ويا اهله ؟؟ او ارفض تماما ؟؟؟ شو اقوله كيف اقنعه ؟؟؟ و شو اقول لاهله اذا قالولي او سألوني هالسؤال ...؟؟؟ شو ارد عليهم ؟؟ اقولهم مابنسكن وياكم او اقول الشور عند ريلي ... شو اسوي بالظبط ؟؟؟ المشكلة هم ضاغطين عليه و هو ضاغط عليا ؟؟ و انا مابا ؟؟


اترياكم و لا تتأخرون عليه تراني :1 (36):



&&&&&&&&&&&&&&&&&&&&&&&&&&&&&&&&&&&&&&&&&&


و انا قلتلها

حاولي تكونين صريحة مع ريلج من دون ما تزعله

تسويله ليلي حمراء و تلفلف عليه كل دقيقة و تبين له ان ساروا عند اهله

ما يقدرون يأخذون راحتهم مع بعض مثل الحين

تلبس له و ووووووووووووو

و تكون صريحة مع اهل ريلها

اسفة ما اقدر اودر بيتي و هي تضحك

و في الاخير ما تستسلم حتى لو تقلل المصاريف

ان كانت حجة زوجها المصاريف

و لانني ما اشوف خيرة في هالعملية و الله اعلم

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
والله غمضتني ربيعتج احسن لها تقول لريلها نستخير والي فيه الخير الله بيقدمه لهم وتفهمه اناهم جذيه احسن ع راحتهم والسكن عن اهلهم بيكون متعب ومشاكل والتزامات وهي جذيه مرتاحه وماتبا تغير سكنها ..؟؟؟

__________________________________________________ __________

>>>> الرد الثاني :
أنا من رايي لا تروح .. دام كل هالأشياء فيهم كيف بترتاح؟؟ وبنفس الوقت هيه ادور رضا زوجها وما تبي يزعل منها لكن دام ان الريال ما ييلس في البيت ولا يعرف باللي يصير... لازم يراعي زوجته ويحس بشعورها.. اذا هيه مجرد زيارة تكون مخنوقة فمابالج بالعشرة.. لازم تقنع زوجها وتبين له انه اذا سكنت معاهم ما بترتاح وهيه لها خصوصيتها .. وكل حد يرتاح في بيته ... وان شاء الله يقتنع زوجها مثل ما هيه ادور راحته لازم هو بعد يدور راحتها...والله يوفقها ..

__________________________________________________ __________

>>>> الرد الثالث :
من حق الزوجه الشرعي بيت مستقل بها هذا ما عليه غبار
خليها تقوله هذا حقي وهو أبسط شي ممكن تسويلي إياه وبيتي مملكتي وأنا الأميره فيه وإنت الأمير يا أميري
ولو سكنت ببيت هلك بتحرمني من هذا الإحساس وإنظر بأمري ورغبتي بنظرت الحب وأتمنى إنك ما تكسر بخاطري لأني أعلم إني غاليه عندك مثل ما إنت غالي عندي وتاج رأسي يا أميري


إن شا الله تنفع عصرت مخي وطلعتلها بها الكلمتين
والعناد ما ينفع المسايسه والإقناع تمشي الحال

__________________________________________________ __________

>>>> الرد الرابع :

المشاركة الأصلية كتبت بواسطة طي السنيين
من حق الزوجه الشرعي بيت مستقل بها هذا ما عليه غبار
خليها تقوله هذا حقي وهو أبسط شي ممكن تسويلي إياه وبيتي مملكتي وأنا الأميره فيه وإنت الأمير يا أميري
ولو سكنت ببيت هلك بتحرمني من هذا الإحساس وإنظر بأمري ورغبتي بنظرت الحب وأتمنى إنك ما تكسر بخاطري لأني أعلم إني غاليه عندك مثل ما إنت غالي عندي وتاج رأسي يا أميري


إن شا الله تنفع عصرت مخي وطلعتلها بها الكلمتين
والعناد ما ينفع المسايسه والإقناع تمشي الحال



يسلم مخج ياطي السنين انا معاج
وكرري كلمة اميري واااايد..

__________________________________________________ __________

>>>> الرد الخامس :
بارك الله فيكم حبايبي