عنوان الموضوع : الجزء الثالث: معنات حمده وسالم رعاية الاطفال
مقدم من طرف منتديات الضمير العربي

مساكم ورد وانتو الورد
مساكم نور فرح وسرور
مساكم خير يا كل الخير
مشكورات عزيزات ع التواصل والردو الجميله واذا طولت عليكن سمحلي ....

بسم الله:_
اليوم باذن المولى عز وجل بتوصل حمده من مصر ,,وصلوا البيت والفرحه ياالله محلاها ..بعد السلام قعدوا عاد الحين يادور الاخبار والسوالف
حمده:الكم عندي خبر يسوي الدنيا وما فيها
بويه: وانا بعد
حمده : انته قول يابويه
بويه :المعاوضه ظهرت من الحكومه طول عمر شيوخنا وبنطلع من الشعبيه وبنبي فله لنا كلنا وانته معانا يا سالم
سالم: مبروك يا عمي ويعله منزل عامر بهله
بويه : شو الخبر الي عندج ياحمده
حمده : باركولي حامل
بويه :بالبركه ان شاء الله
حمده : ما باركتيلي فطيم شو ما فرحج الخبر ....؟؟
فطيم : بسم الله عليج ما ادري عاد من بتضوين الحاكم والا الوزير
هههههههاي وبعدين قعدنا نخطط لبيتنا اليديد
خططنا وبنينا الفله وربت حمده ويابت الولد وسموه فطيم ههههههههههههاي امزح حمد
مرت الايام وانتقلنا للفله وخواتي الصغار سجلن في الروضه والامور طيبه لين قرر الاخ سالم يسافر

بويه :وليش بعد يسافر تراه راح مصر ودرس ورد البلاد واشتغل عند الحكومه ويستلم معاش شو ناقصنه .......؟؟؟
امي :اسكت يا ريال حمده من امس زعلانه و ماتبا تروح عنده و مضيجه .....
ابويه : انا برمسه اليوم

في غرفه نوم حمده
سالم : انتي ليش اصيحين الحين...؟
حمده : ولاشي..
سالم :عليه هالكلام يله قولي بسمعج.....
حمده : ما تكفيك معاناه مصر؟؟؟؟؟؟؟؟؟
سالم :يابنت الناس هاذي دراسه مهمه وبروح لندن كل العرب الحين هناك احسن مستوى دراسه هناك ومب مطوله الدراسه بس سنتين
حمده :واصبر سنتين ....
سالم : انتي شو رايج اروح قبل اجهز الشقه من مجاميعه وارد واشلج؟؟؟؟ انتي ومحمد حمد؟؟
حمده : الله كريم


كان وقع الخبر كالصاعقه ع بويه
سالم : ها شو رايك عمي ؟؟
بويه :مالي راي دام عزمتوا الله يحفظكم
فطيم : ماشاء الله بكره لندن بعدين وين بتدرس يا دكتور بتروح فينا والا استراليا والا .....
قاطعها بوها : عيب يابنت حفظي لسانج


وسافر سالم

فطيم :ليش اتبعين سالم عيب عليج ياحمده ابويه شوب وتعب و صار ما يتحمل مثل قبل ارحمي حاله تدرين انج انتي الوحيده اللي ماليه عيونه وقلبه وعقله و زاد غلاج يوم شرفو العيال من تروحين يتعب ويهويس
حمده :وسالم محتايني وايد و.........
تقاطعها فطيم :هيه حق الغسيل والتنظيف والطبخ عاد كله ولا كرش سالم من يترسها غيرج
في مصر اكلج كورن فليكس بالشهور عاد لندن الارقي شو بياكلج (((اكيد تبن ياتبن
حمده : حسبي الله والنعم الوكيل ذلفي برع ما منج فايد
فطيم :انزين بذلف برع تحملي يوم من الايام تفكرين تشكيلي همج لاني ذيج الساعه بشمت فيج


ورد سالم ياخذ حمده ويا يوم الوداع
بويه :حمده امنتج محمد وحمد اتحملي عليهم يقولون برد وايد ...وخنقته العبره الشيبه وتمت اتصيح عنده حمده
فطيم :ها سالم عاد ما وصيك بحمده تراني فريتلها المودم وصار غربي ع كيف كيفك

وسالم يطالعها من فوق لتحت
سالم : لاتخافين ع حمده في الحفظ والصون ....
فطيم : انا اخاف ع حمده منك انته والله والله لو كسرت خاطرها بكلمه..........
ويقاطعها سالم :عيب خلاص عاد

وسافرو في داعت الله
تصدقون مادري ليش افطيم كارهه سالم اظني ليش ما ركبها في الكلوزر
ههههههههههههههههههههههههههههاي

فطيم كانت الوحيده منا اللي تحب تقرا المجلات والجرايد واتابع الاخبار وذكيه وطموحه صراحه لو لها اصلا ما كملنا تعليمنا بويه مب مهم عنده الدر اسه وامي همها الوحيد انها اتيوزنا بسرعه شعارها ((البنت مالها اللي بيت ريلها))))

في الطياره......
حمده : سالم ماشوف شي من لندن ضباب ...؟؟
سالم :طبيعي الغاليه تراها مدينه الضباب...
حمده : ما شاء الله عليك اخاف احسدك وانته كل بلاد بتسافر الها اسمين؟؟
سالم :امممممم !!!!!!!!!!!!!!!!!!!
سالم : اسمعي يا الغاليه هذا بلاد وايد مطوره وعصريه وفاشن ع اصوله الحرمه هني الها حقوق وواجبات وانا اباج اتصيرين مثلهن فهمتي قصدي ...؟؟
حمده :اكيد يا الغالي انته بس امرني ((وهي ابدا ما عندها خلفيه عن الموضوع!!!!!!!!!!!


وصلو ا الشقه..........
حمده : الله يا سالم شو هالشقه الانيقه روعه احلي من مالت مصر بوايد ...
سالم : ماشفتي شي بعدج في الويك اند بوديج احوطج وشوفي لندن وقوليلي رايج

وطلعو في الويك اند

سالم :تاكسي .... تاكسي .... بوديج منتزه اسمه هايد بارك كبير طبيعي وجميل ووسيع العيال بياخذون راحتهم في اللعب...


وصلو المنتزه....
حمده : الله يا سالم والله صدقت ما شاء الله لندن غير ببناياتها وشوارعها وحدايقها نفسي اروح السوق بتوديني ؟؟؟
سالم : انتي طلبي بس وفالج طيب..

بعد شوي...
حمده : الحق الحق يا بو محمد شو شفت شفت ريال وحرمه يتوايهون جدامي رحت ايب العيال من هناك وشفتهم يالله بسترك يالله بسترك علينا
سالم : شوي شوي وطي صوتج ماصار شي هذا طبعهم عادي الريال يبوس الحرمه كل يوم واي وقت واي وحده مب شرط حرمته..
حمده : يالله بسترك يارب استر عليا وع خواتي دنيا وواخره..
سالم : هذا تطور الحياه هذي حريه شخصيه عادي شو يعني بالعكس انا شخصينا يعجبني
حمده : استغفر يا ريال مب زين عليك هالكلام
سالم : شو هالعقليه!!!!!!!!!!!


وردو البيت...
سالم : بكره بوديج مطعم فايف ستار واكلج اكله في بيت ابوج ما كلتيها...
شوفوا الوقاحه والنذاله بعد ما كان اعز ولد عند بويه الحين صار يتكبر علينا حتى مب عايبنه اكلنا

سالم وحمده في المطعم الفايف ستار...
سالم :حمده شو هذا راصه الشيله رص شوي فيجيها طلعي طرف قصتج
حمده :لا لا لا مااقدر حرام يطلع شعريه كل شعره بجمره
سالم :اشفيج محد بيطالعج يعني ضاقتبهم الدنيا بيخلون حريمهم ويطالعونج
يلا خلج عصريه وفتحي الشيله
حمده : اسمحلي بو محمد بيني يوم وبيحاسبني ربي عالشعره واذا عصيتك وما طلعت شعري ما عليا ذنب.... ما على عاصي ذنب لمعصيه
سالم تلعثم وقام يخربط شوي بعدين سكت

حمده : سالم شوا هذا اللي اتعشاه..؟؟
سالم : هذا سلمون وعليه كافيار ..
حمده : وهذا حلال ولا حرام؟؟
سالم يرد بلا ننفس : حلال كلي عاد مصختيها والا لازم عيش ولحم هذي لندن ترقي شوي
حمده المسكينه والدمعه ع طرف عينها : وليش تكلمني جي شوصار سالتك بس((قالت من كثر ما عيني متروسه دموع ماشفته عدل
سالم :بس مسحي دموعج .....و الا الناس بينتبهون لنا
حمده : هالكثر دمعتيا رخيصه عندك...؟؟
سالم ومعصب بعد :يلا نروح الشقه سديتي نفسي عن الاكل..
وطول درب رجعتهم وهي ا تصيح بصوت واطي عسب لا تغثه و كان وايد مغيظ عليها لدرجه شل فراشه وبات في الصاله ومسكينه طول الليل مانامت تفكر كيف تراضيه

اليوم الثاني......
حمده :صباح الخير بومحمد
سالم : ...ساكت مارد عليها
حمده : (وهي مضيقه غصه بصوتها ) اسفه يا عيوني انته روحي وقلبي ((وهي تتبعه في المطبخ الاخ يسوي نسكافيه مصدع يعله الصدعه دوم)) تزقره بومحمد وتشهق بحزن ضايقتبها الدنيا هي بروحها وبعيده عن هلها ونفسها مكسوره والمصيبه انها ما غلطت في حقه
شو هالزمن الخايس بعد ما كان يركض وراها صار العكس

حمده : اعذرني وسامحني الله يخليك رد عليه ...انا ما اقدر اصبر عنك لا تسويبي جي الله يخليك رد عليه فدا عيونك ترد عليا وغلاة عيالنا
(( وهو مستمتهع بهالمذله ))
سالم : ازعجتيني شو هالصباح اف اف ...
حمده : سامحني بس زعلك غالي عليه وما اقهر فيك شي ابدا
(تصيح مادري ع شو)
سالم :تبيني اسامحج تسيرين ع كلامي بالضبط ولا تراديني
حمده وبسرعه : ان شاء الله ان شاء الله امر ادلل
سالم : اول شئ قوليلي شو وجهه الشبه بينج وبين الاجنبيات ....؟
حمده : كلنا نسوان....
سالم معصب بصوت عالي خوفها :لا لا بعدج مب فاهمه شي اف اف
حمده : ليش ماتفهمني يا غناتي
سالم : الاجنبيه انسانه فاهمه ذكيه لاماحه تفهم الفكره وهي طايره انيقه بلبسها جذابه في مشيتها تتحيس يمين ويسار وتتبخر براحه ودايما نيو لوك مره سمراء ومره شقراء ومره حمراء واتيكيت في الكلام والاسلوب تعرف متي ترمس وشو تقول غامضه ساحره بحركاتها دلوعه
عنده خلفيه عن كل شي في الحياه حتى الحياه الزوجيه الخاصه تعرف كيف دوم تجددها
ها فهمتي الحين شو ابا ..........؟؟؟؟؟؟؟؟؟؟؟؟؟؟!!!!!!!!!!!!!!!!!!!
حمده : فهمت.....
سالم : اول خطوه العصر بوديج السوق وبنبدا بلبس الاناقه اتفقنا
حمده : اللي يرضيك الغالي



..

عطوني رايكم صراحه في سالم
وللبقيه تأتي......

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
يا ويلي أنا أول وحده ..

تسلميييييييييين حبوبتيه ... بس هالجزء وايد بسييييييييييييط

وابويه على سالم شياه تمنكر !! عنبو هب لندن هاي جي خلته يبغض حرمته ويباها تغدي بنت حمرا وتفر البداوه ورا ظهرها

ونتريا الجزء الرابع ..

__________________________________________________ __________

>>>> الرد الثاني :
طبيعي سالم يتغير لانه بدى يشوف ويقارن بين حرمته وبينهن بس الي ما عيبني فيه انه يبى حرمته اطلع شعرها ونسى انه دينا غير عن ديانتهم ومالوم حمده لانها ما تعرف العالم الخارجي

ويالله نتريا التكمله

__________________________________________________ __________

>>>> الرد الثالث :
اهئ اهئ اهئ


ما يســــــــــــــدني هالجزء صغيــــــــــــــــــــــــــــــر >.<


لانج نزلتي الجزء ال3 طشونه نطااااااااااااااااااالب بالجزء ال4 الليله >>> عقااااااااااااااااب ^^

__________________________________________________ __________

>>>> الرد الرابع :
فظييع صراحه

حشا الواحد من يسافر يتغير وينسى عاداته وتقاليده !!


في انتظار التكمله

__________________________________________________ __________

>>>> الرد الخامس :
حسبي الله ونعم الوكييييييييييييييييل
ليش جذي ظهر سالم والله ماتوقعته جي >>>> الي يسمع اعرفه ههههه
لا بس صدق ليش جذيه اتغير
حبيبتي لا اطولين الله يخلييج انتظرج