عنوان الموضوع : تعالن يا أمهات نجتمع في مكان واحد .. في الامارات
مقدم من طرف منتديات الضمير العربي
السلام عليكم والرحمه ..
شحالكن يا أمهات ؟
اليوم يتني فكره قلت ليش ما افتح ميلسنا نحن الامهات اللي عندهم عيال اصغار يعني من 6 شهور وما فوق , يعني كل وحده تساعد الثانية او كل وحده عندها اكله حلوه حق الصغار ..
مثلا ً :-
الصبح شو تعطون عيالكم على الفطور يعني كل يوم تنوعيله ؟ واذا سويتي اكله حق عيالج الصغار تعالي خبيرنا عنها وعن مقاديرها عشان الكل يتساعد ..
الظهر شو الغداء يكون ؟
العصر شو الاكل اللي تسوونه في هالوقت حق الصغار ؟
العشاء شو بيكون العشاء لهم هم الصغار عشان يشبعون وينامون ولا ينشون الليل يصيحون يو عانين ؟
وان شاءالله يكون عيبكم الموضوع .. والكل بيستفيد ان شاءالله
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
وخلوا قووم 4 شهوور وياكم عشان اعرف شو اعطي بنتي ^__^
وثاانكس حبووبه
__________________________________________________ __________
>>>> الرد الثاني :
حبيبتي بالنسبة لي.. انا بنتي ان شاء الله جريب اتكمل ال6 شهور.. الصبح تنش اكثرعن مره يوعانه... اعطيها حليب لأني بعدني مابديت اعطيها ريوق.. الظهر اغديها (اليوم سويت لها جزر وشوفان).. والعصر حليب.. والمغرب فاكهة خفيفه (اكثر شي تفاح).. بس يكون خفيف يعني مجرد سناك مش وجبه كامله.. ومرات اعطيها ماي التمر... كل يومين او ثلاثه. وباجي اليوم حليب..
انا اسبحها يوم ورا يوم.. وادهنها مرتين باليوم.. العصر لوشن الاطفال والبسها واكشخها
بالليل ابدلها والبسها بيجامه وادهنها بزيت زيتون او زيت الاطفال مال قبل النوم.. وعقب ارقدها.. طبعا متى ترقد؟؟ هذا على كيفها الأخت ايام تسهر وايام ترقد.. عالمزاج لووووووول
__________________________________________________ __________
>>>> الرد الثالث :
رحالة العين فالج طيب من عمر 4شهور وما فوق .. لعيونج ^_*
ظبية الامارات الله يحفظها ويخليها ان شاءالله بنتج ..
انا بنتي عمرها سنه و11 شهر يعني الحين بتكمل سنتين اليوم الصبح ريقتها خبز رقاق مع حليب وعطيتها كوب عصير برتقال فرش والظهر بعطيها عيش و ياه سمج والعصر ان شاءالله بسويلها سندويش جبن مع حليب هورليكس والعشاء افكر اني اسويلها معكرونه بسيطه ..
وهذا اكل بنتي اليوم على فكره الحين افكر اني اسويلها جدول اليومي للأكل ..
__________________________________________________ __________
>>>> الرد الرابع :
السلام عليكم
بنتي عمرها 4 شهور و أبا أعرف شو نوع الكريمات و الزيوت لي تستعملونهم حق عيالكم و كم مرة يعني بعد السبوح ولا شو
و يزاكم الله خير
__________________________________________________ __________
>>>> الرد الخامس :
نعنوعة الدلوعة
حياج الله في تجمع " الامهات اللي بدوا يأكلون كتاكيتهم"
ترانا أناقش نفس هذا الموضوع...والامهات أعيالهن في أعمار مختلفة
^___^
رد مع اقتباس
