عنوان الموضوع : أبغي نصيحه أنا أم فاشله .. لتربية الطفل
مقدم من طرف منتديات الضمير العربي

مسا الخير خواتي

قبل ما اكتب اقول للمشرفات الله يخليكم قبل لا تحذفون المواضيع اللي انزلها خبروني عالاقل بالسبب أنا مكتأبه و عايفه الدنيا و اللي فيها
و لا عندي حد لا أشكي و لا اسولف معاه ،، كل وقت شغل في شغل و محد حاس بالجهد و التعب اللي اعطيه و الله

أنا زوجه و أم و موظفه و طالبه و المصيبه الكبيره أن خدامتي طفشت و اللا بالاصح ما تبا تشتغل عندي ،،

أنا ما عندي بيت بروحي و لا حياة خاصه و لا شي ،، كل شي شراكة مع بيت اهل زوجي اللي ماشاء الله كله يهال و صغاريه باعمار متقاربه و كلهم اولاد و شطانتهم تدمر بلد ،، غير هذا عندهم خدامه مسويه عمرها راعية البيت و كأنها الكل فالكل تطول لسانها علي و غير جي تدخل فعيالي تقولي انتي سيري جهنم ماتعرفين لهم ووقت كلمت عمتي تقولي شو اسوي فيها ماعندي حد يشتغل غيرها ووقت كلمت زوجي قالي انا كاتب تعهد ما اقولها شي و عندي عيال اخاف عليهم ...

انا أحسني صرت مهمله عيالي و كارهه العيشه و الله صرت ماحب ارجع للبيت و لا احب اجابل ريلي و لا أيلس معاه هو الثاني اتكالي درجة اولى مخلني انا الحرمه و الريال و كل شي علي أبدا ما يراعيني و لا يرضى أقول شي و لا يسمح لي اناقش بموضوع الانتقال للسكن بروحنا

الحين المصيبه اني اداوم 8 ساعات ارد البيت انظف أغسل أكوي و عيالي يتراكضون وراي عندي بنت وولد ،، و عمارهم سنتين
و ما أطعهم و لا شي غير الحلويات و الشبس و العصير و بعد ماخلص شغل اعشيهم كورنفلكس او عيش و روب و اسبحهم و ارقدهم بضرابه و عصبيه و دايما يصيحون لين يقولون بس و يملون
أحس أني فاشله درجهه أولى أنا أدرس ماجستير و المفروض أدرس و لكن أبدا ما عندي وقت... موديري و زميلي مستنحسين و كارفيني كراف اليهود و يجذبون علي و يقولون لي انتي اللي اخترتي تدرسي ..

اقترحت على ريلي افنش و اوقف دراسه ،، مقابل انه يسكني فبيت مع عيالي لكن مارضى و قالي انه مايقدر على مصاريفنا بروحه


و الله اوقات ادعي انام و ماصحى و ان الله ياخذ امانته و افتك من العيشه اللي انا فيها ،، لكن ما همني غير هالمساكين اللي عندي لولا رحمة الله و ثم انا جان هم من زمان بالشارع ... اليوم اول مارجعت من الدوام يلست معاهم شوي و بعدين خليتهم عند العمه و اخوان ريلي عشان رحت اغسل الملابس و قلت لهم امانه مايطلعون و الله ارجع الصاله و ما الاقيهم و وقت سألت قالو لي روحي بتلاقينهم بالشارع و فعلا طلعت و لقيتهم بالشارع بنصه واقفين و يضحكون عبالهم سوو شي زين الله ستر و سلم و الله المره الاولى بتعدي و الثانيه بتعدي لكن لا صارت المصيبه انا منو بينفعني برودهم غير و اهمالهم غير و لامبالاتهم غير و الله مليت و تعبت و فكرت مليون مره اتطلق و ارجع لبيت اهلي و اللا اروح افتح لي شقه اسكن فيها انا و عيالي و اسجلهم بحضانه و افتك من الارف اللي انا فيه لكن هم اقول ابوهم و مابيصبرون عنه ..


بنات انا محتاجه حد يفهم وضعي و يساعدني لو بكلمة تصبرني و اللا تشجعني اني اخطو خطوة صح .. انا كلمت زوجي و قلت له بدل الخدامه عندكم ثنتين و طول الوقت راقدات و اللا يسولفن مع بشاكير الشعبيه شو بيصير لو كلمتهم العمه و خلتهن عالاقل يشيلن الغسيل و الكواي قال مالج دخل فيهم :S يعني على فوق ما انا كنت اكرف و اساعد وقت ماكان عندهم خدامه و على كثر ما كنت اطبخ و اغسل و انظف بايام كنت عروس على كثر ما ذليتوني و حسستوني اني رخيصه و انا صابره و ساكته و الحين تقولون مالي دخل ؟؟

انا افكر ارجع لبيت اهلي و اخلي زوجي مع اهله هم بينفعونه و بيقومون فيه انا مالي مكان بينهم .. يبوني بنك يلبي طلباتهم بس



و السموحه طولت عليكم ...


و مشرفات لا تحذفون موضوعي و الله ماعرفت وين انزل الموضوع صدق صدق مكتأبه و تعبت من الصياح ومن النفسيه اللي انا فيها

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
اول شي تعوذي من الشيطان أختي
بما انج تشتغلين اشتري راحتج مشكلتج غسيل وكواي ايبيلج خدامه ... قلتي انج بتاخذين شقه وبتروحين فيها انتي وعيالج .. اذا الله فاتحنها عليج انتقلي انتي وريلج
مع اني ما اشوف انه مشكلتج السكن في بيت اهل ريلج ولا عيالج ولا ريلج ولا الخدامه
انتي مضغوطه بسبت الشغل والدراسه ومب عارفه كيف اتنظمين وقتج فهال الشي عاكس على حياتج
اختي الانسان اللزم ما عليه صحته اذا انتي مب قادره على الدراسه بهال الوقت وبهال الضروف انصحج اتوقفينها الحين لين ما تعدتل ظروفج تنتقلين لبيتج وتستقرين عدل عيالج يكبرون واضبطين امور شغلج

والله يسهل ويسر امورج ان شاء الله

__________________________________________________ __________

>>>> الرد الثاني :
حبيبتي الله يعينك، لكن لازم تعرفي إنه الشغل يلي بتشتغليه بعد ما ترجعي من الدوام رح تشتغلي أكتر منه لونك قاعده بالبيت من دون شغل، يعني لو ما بتشتغلي من لما تفتحي عيونك لحد ما تنامي رح تضلي تشتغلي و تركضي مع الأولاد، فبالعكس إستغلي ساعات دوامك بإنك ترتاحي من جو البيت و التعب و تعرفي على زميلاتك بالعمل و إحكي معهم و إضحكي و إستمتعي بوقتك، بكفي إنك بتصحي بتغيري ملابس النوم و بتطلعي بتغيري جو البيت، و وجودك عند أهل زوجك مفيد لإنك بتلاقي مكان لأولادك و إنتي بالشغل أو بالجامعه - خدي الموضوع من الجانب الإيجابي و إنسي السلبيات. أنا قعدت بالبيت 3 شهور و كنت من لما أصحا لحد ما أنام و أنا ركض و تنضيف و شغل و طبخ، على الأقل هيك بطلع بغير جو.

__________________________________________________ __________

>>>> الرد الثالث :
الله يعيينك اختي ويرزقك الصبر وانتى مشكلتك الوحيدة تنظيم وقتك فلو رتبتي اولوياتك وامورك المهمة بحياتك راح تتغير حياتك وانت مسؤولة عن تربية اولادك فاهمالك لهم واهتمامك بالدراسة ظلم لهم ولزوجك فالاولى انك تاجل الدراسة بعض الوقت حتى يقدروا يعتمدوا على انفسهم لان هم في مرحلة النمووبحاجة لحنانك واهتمامك فالحل بايدك والحمد لله هم فقط ولدين يعني تقدري عليهم وحاولي تنظمي شغل البيت بليل وتحضري لهم اكلهم بليل ولما ترجعي من الدوام ترتاحي وتقابلينهم حبيبتي اولاادك اهم من كل شيء لا تهمليهم هم امانة عندك ولا تفكري بهدم بيتك او مجرد التفكير في استقلالك بعيد عن زوجك فاول من يتضرر هم الاطفال فاصبري اختي وحاولي اقناع زوجك بالسكن بعيد عن اهله لكي تنظمي حياتك ويشعر هو بالمسؤولية تجاهكم واستعملي طرق دكية لضغط عليه فاكييد سيختاركم انتم ويغير نظرته
واخيرا اتمنى لكي السعادة والهناء بحيااتك
اكثري من الاستغفار والصلاة فهي ملاااذ المؤمن

__________________________________________________ __________

>>>> الرد الرابع :
ينقل للقسم المناسب

__________________________________________________ __________

>>>> الرد الخامس :
خيتي انتي مب فاشلة بس انتي تبين تسوين كل شي بوقت واحد وهذا الشي مستحيل قعدي مع نفسج ورتبي اولوياتج الاكثر اهمية ثم الاهم ثم الاقل اهمية

وبعدين الطلاق مب حل بزيد على راسج المسؤلية