عنوان الموضوع : مساعده !!!!
مقدم من طرف منتديات الضمير العربي
مرحبا بنات
أول شي مو يديده في المنتدى لكن حبيت أشتكي لكم من همي و الضيق ألي آنه فيه
اول شي آنه متزوجه تقريبا لي سنتين و نص و الحمدلله الله رزقني بعد هذا الزواج بولد الله يخليه لي و الحمدلله ريلي معاملته زينه معاي و مرتاحه له و الحمدلله
ساكنه في بيت اهل ريلي و لي قسمي الخاص ألي يتكون من غرفتين و صاله و عزكم الله في كل غرفه حمام لكن وين المشكله ما عندي مطبخ
المهم من دخلت بيت أهل ريلي من عقب العرس و بدت المعامله السيئه من أهل ريلي و من أخته الكبيره بحكم أنها إهيه الكبيره و ما تزوجت لين الحين بحكم أنها تبي تقعد عند أمها و أبوها بما انه أبوها مريض بالقلب و اهيه إلي دايما تشوفه و أداريه و دايما معاه و آنه أشوفها أنها زينه و لكن فيهم ميزه أنه لسانهم أهوه ألي مخرب عليهم
و الله حق أنها معاملتها زينه معاي و دايما أذا ما طلعت من قسمي صارلي يومين أتيي و تطل علي و تسأل عن ولدي و كل شي و فيها الخير و البركه
لكن ام ريلي هم أقول مره كبيره و يمكن طبعها جذي وتعودت على هذا الشي يعني تعرفون امهات الريل شلون يكونون متسلطين على كل شي !!
و الله أني فوق كل هذا أبادر بالمعامله الزينه و أقول عيب آنه قاعده في بيتهم و ما يصير أسبب مشاكل و هذا كلام الوالده لي تقول ما عليه أذا قالت لج أي كلمه سوي روحج و لا كأنج تسمعينها و نعم أسوي مثل ما تقول امي الله يخليها لي تقولي لا تخربين بينج عشانهم
و انيي للمشكله إلي هي أكبر مرت أخو ريلي و عندها 2 عيال ماشا الله عليهم و الله يخليهم لأهلهم من الشطانه ما ينطاقون!!!!!
صار موقف امس أني آنه قاعده مع ولدي تحت و يقوم ولدها العود و (( يتفل )) علي و عقبها قعد يرفسني بريوله !!
و آنه بعد سكت و ما قلت شي و من كان قاعد ريلي
المهم آنه ما قلت شي قلت ياهل و ما يفهم و طبعا عمره 8 سنين و يقوم ريلي ألي اهوه عمه و هاوشه و من يدش علينا أخوه ألي يصير أخو ريلي و يقول شفيكم ؟ رد عليه ريلي و قاله والله ولدك مصخها إلا قاعد يفلع و ما قلنا شي و سكتنا و عقبها زودها قاعد يتفل علينا و يرفسنا ؟؟
عاد اهني قامت القيامه من مرت اخو ريلي أنه ليش تقولون حق ولدي شي و ليش تهاوشونه ؟؟ هذا ياهل و ما يفهم !!!
و قمت رحت لها و تكلمت معاها بالكلام الحلو و الحمدلله عمري ما تناجرت مع أي أحد و لا هذا الشي من طبعي و قلت لها يا فلانه أنه ما اعتبر هذا ولدج بالعكس هذا ولدي و حتى لو في يوم ولدي غلط آنه ما أزعل أنج تهاوشين ولدي بالعكس هذا فخر لي أني أحسبج انتي امه سبحان الله صار لي شي في يوم من الايام أنتي بتصيرين امه
و الله العظيم انه حتى ولدي عمره سنه و نص تدرونن شنو يناديها اهيه تصير مرت عمه يناديها(( ماما )) يعني شوفويا حلاتة الياهل ينادي مرت عمه ماما
لكن اهيه خذت الموضوع بحساسيه و قالت هذا الموضوع سوا حاجز بيني و بينج و بالعكس آنه تأسفت لها أكثر من مره و قلت لها حقج علي أذا كنت زعلتج و قالت لي ما أبيج حتى تسلمين علي قالت ما يصير خاطرج إلا طيب و ما بيج تزعلين مني
و قالت رجاء لا تكلميني و لا تسلمين علي من يوم و رايح !!
قالت والله أنتو حطيتو عقلكم من عقل ياهل قلت حشى أني ما تكلمت و قلت هذا ياهل و ما يفهم والله العظيم لأني اعرف الياهل أذا احد تكلم معاه زادت شطانته
و يمكندار ببيني و بينها حوار أكثر من نص ساعه و الحمدلله و أقسم بربي أني ما احب أزعل من احد و لا احب ازعل أحد مني و قلت لها حقج علي أذا ريلي غلط و لا بدرت منه كلمه امسحيها بويهي و آنه أسفه و قالت لي رجاء طلعي من قسمي و تدشين مره ثانيه و لا تسلمين و لا تكلميني و قلت لها حاظر و ما يصير خاطرج إلا طيب
مادري يا بنات شنو تشورون علي ؟؟؟
والله أني شنو مضايقه و صاكه فيني الدنيا ما بي يصير مشاكل بينا و أحنا ساكنين في بيت واحد !!!
شنو اسوي !!
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
الغالية انتي سويتي اللي عليج واسلوب كان جد راقي وخليها للايام عسى ربي يهديها وترد مثل اول واحسن
__________________________________________________ __________
>>>> الرد الثاني :
الله المستعاان00حبوبة انتي معطيه الموضوع اكبر من حجمه
الولد عمره8سنوات يعني يعرف الصح من الغلط 00والمفروض امه وابوه يعاقبونه
مب تزعل وتكبر الموضوع!!
لكنهاا مااا تنلاام لان زوجهااا ساكت وشخصيته ضعيفه يدامهاااا
طنشيهاا يتزعل فترة وبترضى روحهاااا وبتعرف ان الولد بهالسن يباله تربيه وأهتماام
وللدلع حدود 0
ومثل ماا قالت الوالدة الله يحفظهااا ولا كأنج تسمعين الكلمه الشينه وردي السيئه
بالحسنه والله يأجرج على صبرج فديتج0
الله ايسر امورج ويسعدج حبوبة
__________________________________________________ __________
>>>> الرد الثالث :
في الدنيا ناس تحشمها وناس تحشم نفسك عنها
والمفروض أنها بدل لا تقول هذا صغير ( رغم انه 8 سنوات يعني مب صغير) تاخذ ولدها وتربيه
لأن لو ما ربته عدل بيربونه الناس وبتربيه الدنيا ,, أنتي عزي نفسج وأحفظيها ولا تنزلين نفسج
لهم أكثر ,, لأن لو أستمريني في هالأسلوب من المعامله أنتي إللي بتخسرين نفسيتج في الأخير.
__________________________________________________ __________
>>>> الرد الرابع :
اصلا اهي اللي مصختها وكبرت الموضوع ما تستاهل المعاملة الزينة والله
انتي عملتي باصلج وما عليه اجرج عند الله الغلا
انتي اكثري الاستغفار وامشي واثقة من عمرج لانج ع صواب
واهي اذا ما تلومت من اللي صار صدق انها ما تستحي وما تستاهل همج وحزنج والله يصبر قلبج الغالية ..
والله يهدي الجميع
__________________________________________________ __________
>>>> الرد الخامس :
أشكر كل من رد علي
الحمدلله رب العالمين من ردودكم تاكدت اني ما سويت إلا الواجب بماانه احنا أهل
و خلاص سويت إلي علي و الباقي على الله و مثل ما قالو الاخوات ما أنزل نفسي أكثر من جذي
و الله المستعان لكن هم طبعهمجذي ما يحبون أنه احد يقول شي حق عيالهم !!!
حتى لو عمته هزبته زعلو عليها شهر ما يكلمونها !!
لكن الله كريم و رمضان على الابواب و ما أريد يصير زعل و احنا اهل و ساكنين في بيت واحد و عقبها ياي العيد لزم القلوب تتصافى و هذا و أحنا مسلمين .
لكن شقول !!
رد مع اقتباس
