السلام عليكم ورحمة الله وبركاته
مرحبااا بناات
اليوم بخبركم عن تجاربي البسيطة قبل وبعد الزواج لأني اتوقع في مفاهيم كثيره خاطئه او مشوشه تكون عند البنت قبل الزواج وبعد الزواج تكتشف انها كانت غلطانه
فمن خلال هالموضوع حبيت افتح مجال انه نعطي انفسنا ولغيرنا فرصه لسرد تجاربنا الزوجيه وكيف كانت الفكره وكيف اصبحت بعد الزواج
1)
قبل الزواج كنت وايد حساسه وابالغ فالمواضيع احيانا بسبب واحيانا بدون سبب
كنت شايله هموم الدنيا ع راسي من تجهيزات وترتيبات وكيف بتصرف وكيف بتعامل ،، الخ
احيانا كنت اتخيل المشكله قبل وقوعها واعيش فيها مثلا لو خاني ريلي شو بسوي ؟ لو ماصار يحبني شو بسوي؟
لو ماقدرت اتخطى خوف ليله الدخله شو بسوي ؟
بس عقب الزواج اكتشفت ان هالسوالف كلها ماكان لها داعي لان التيسير بيد رب العالمين
والمفروض اتوكل على الله فيها وماحاتي ابدا
<< الحينه اتم اضحك على الأيام الي صحت فيها او خربت فيها فرحتي بسبب مشاكل عششت فراسي وفالنهايه طلعت كلها اوهام فقط
2)
كان عندي هاجس ان ريلي يتغير علي من الناحية العاطفيه او الماديه وكنت اعيش بهالدوامه بين فتره وفتره
واحاول اقرى مواضيع او تجارب لناس مرت بهالتجربه عشان اعرف كيف اتعامل معاها مستقبلا
بس الحمدلله ريلي ماتغير وظل مثل ماهو والأوهام الي فراسي كانت نتيجة اني اسمع لتجارب غيري وهاي هي المشكله
اني حكمت على تجربتي من خلال تجارب غيري وهنيه الغلط الأكبر !
كل علاقه تختلف عن الثانيه وكل زوجين تختلف حياتهم وظروفهم وشخصياتهم فالمفروض مانعمم ابدا ونتعامل مع مشاكلنا بشكل منفصل
هالشي مايعني مانستشير او ناخذ خبره من هم اكبر وافهم منا بس لازم مانعمم ابدا ونزرع هالشي فعقولنا
3)
قبل الزواج كنت خايفه كيف بتعامل مع اهل ريلي وكنت متحسسه من مسألة التعامل معاهم بوجود زوجي
اقصد الكلام الرومانسي والطلعات .. الخ
الي اكتشفته بعد الزواج ان التعامل معاهم طبيعي جدا مثل التعامل مع اهلج بالضبط
الي ماترضينه ع اهلج لاترضينه عليهم وحبيهم مثل حبج لأهلج وخافي ع مصلحتهم مثل ماتخافين ع مصلحة اهلج وخواتج
والكلام الرومانسي والحركات وحضن وبوس خطططط احمر >> لاتحاولين تجرحين شعورهم بإبراز هالشي جدام اهله ابدا
اوكي حلو نظرة حنونه او كلمه حلوه لكن اكثر عن هالشي يعتبر وقاحة وعدم احترام لمشاعر اهله
لانج لو كنتي عند اهلج اكيد ماراح تاخذين راحتج معاه بهالطريقه صح ؟ بتحترمين وجودهم عندج طبعا
فنفس الشي جدام اهل ريلج لاتقولين والله تزوجت وكيفي بسوي الي اباه لااا بينج وبينه سوي الي تبينه لكن جدامهم المفروض يكون هناك احترام لهم وايضا عدم تحسس من المزح والمواقف المحرجه لانهم فالنهايه اهلج الي بتعيشين معاهم طول عمرج إن شاءالله
4)
قبل الزواج ماكنت استشعر المسؤوليات الي علي لاني فبيت اهلي مدلعه لاشغل ولامشغله
وبعد الزواج صرت مسؤوليه عن زوج وبيت مستقل >> حتى لو كان عندج بيت او ملحق خاص فيج
الإستقلاليه والمسؤوليه الي اطريها بتكون موجوده سواء بالترتيب او التنظيف او حتى الأكل
لاتقولين والله شي خدامات عندهم وانا ماسوي شي بالعكس كوني خفيفه عليهم وشخص مفيد
يعني نظفي صحونج انتي وريلج عقب ماتاكلين ونظفي ملابسج الخاصه والمكان الي انتي يالسه فيه
ساعدي عمتج فالمطبخ وكوني معاهم فالحلوه والمره لاتقولين انا عروس او مرت ولدهم مايخصني فيهم
بالعكس حببيهم فيج وخليج انسانه مسؤوله ويعتمد عليها فالبيت
في امور غيرها بالزواج لكن هذا الي اذكره بس والي عندها تجارب شخصيه بعد تكتبها لنا للأستفادة