عنوان الموضوع : معلومات عن الهند (بومبي) في الامارات
مقدم من طرف منتديات الضمير العربي

السلام عليكم ورحمه الله وبركاته خواتي ممكن معلومات عن الجو الاكل الفنادق الاشيا الحلوه اللي تستاهل الواحد ياخذها الاحتياطات المهمه وكيذا يعني اتمنى انكم تخدموني ويزاكم الله خير الغوالي

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
مرمر
شحالج
شوفي موضوع الدماني عن مومباي

__________________________________________________ __________

>>>> الرد الثاني :
هلا حبيبتي شحالج انتي والعيال عساكم بخير شفت تقاريرها فديتها بس مافيه المعلومات اللي ادورها تسلمين عالرد

__________________________________________________ __________

>>>> الرد الثالث :



حد قال بمبي ؟




عيل : "سيبك منهم ده ما فيش غيري"



كنت بأقول لج شوفي مواضيعي عن بمبي لك للاسف اختفت معظم الصور



النصيحة الذهبية : اصرفي مبلغ بسيط في البلاد والباقي شلي دولارات أو دراهم
واصرفيهم عند أجمل ..سعر الصرف عنده زين



أولا : الجو .....

الهند طقسها موسمي يعني حارة ممطرة صيفا ...
معتدلة جافة شتاء


الملابس المقترحة : قطنية خفيفة



ثانيا : الأكل والفنادق (بأتكلم عنهم مع بعض) ....
الفنادق الخمس نجوم المقترحة :


Trident
https://www.tridenthotels.com/hotels-...-nariman-point

أحب أسكنه دايما .. يطل على الكورنيش (اطلبي ocean view)

فيه مطعم
Frangipani's : ايطالي لا تفوتج البيتزا ! وايد لذيذة
في اللوبي عندهم كافيه روعه للريوق

عندهم سبا وااايد زين

الفندق فيه مركز تجاري صغير بتلقين أشيا حلوة
وصيدلية : فيها منتجات هندية طبيعية للجسم والشعر والبشرة وأدوية طبيعية بعد !


ملاصق Trident بتلقين فندق The Oberoi
https://www.oberoihotels.com/hotels-in-mumbai/

فندق رائع وهادي

فيه عدد من المطاعم مثل :

مطعم Ziya

لازم الحجز المسبق ..

والمطعم له DRESS CODE ما يدَخــْــلون الرياييل اللي لابسين شورت وصندل مفتوح
ممنوع دخول الأطفال تحت سن 12 سنة ...

يقدم الأطباق الهندية التقليدية بشكل غير تقليدي ... يعتمد على اللون والشكل والديزاين

يعني باختصار كل صحن عبارة عن قطعة فنية ...
حتى الصحون ... كل طبق يوصلج في صحن شكله غير عن اللي قبله

اذا محتاره شو تطلبين جربي ال SET MENU
بتجربين من كل طبق شوية

يعني الـ SET MENU للشخص الواحد بسعر : 350 درهم تقريبا .


أما اذا طلبتوا من المنيو مثلا : 3 مقبلات وثلاث مين كورس
ممكن توصل الفاتورة 850 درهم ..



في اللوبي يوجد مطعم اسمه FENIX

يقدم أطباق هندية وكونتيننتال وسوشي تقدم بطريقة فيها فن


فندق مومباي انتركونتيننتال
https://www.ihg.com/intercontinental/...hb/hoteldetail

يعتبر بوتيك هوتيل
صغير وهادي وراقي

يطل على كورنيش مارين درايف

فيه مطعم كباب كورنر Kebab Korner
وايد حلو

في واحد من مطاعم هالفندق يقدمون جيزكيك بالناريل !


في منطقة مارين درايف بتلقين محل راميش للجلابيات


فندق تاج محل
https://www.tajhotels.com/Luxury/Gran.../Overview.html


طبعا غني عن التعريف

ينقسم الى قسمين :
التاج الجديد
والتاج القديم (اللي هو الفندق الأصلي )
القديم تحسين به تاريخ أكثر


الفندق فيه عدد من المطاعم :

sea Lounge كافيه يقدم أكلات خفيفة حلو للريوق

Masala Kraft أكل هندي بصورة عصرية (غدا وعشا)

Shamiana زين للريوق ويقدم غدا وعشا بعد

Souk يقدم أكل عربي ومتوسطي (لبناني مغربي سوري الخ)

و Starbucks Cafe


بالإضافة الى محلات الماركات العالمية مثل غوتشي وبربيري الخ



ميزة التاج ..انه وراه سوق كولابا تقدرين تسيرين له مشي



كولابا سوق شعبي عبارة عن جانبين من الشارع بمحلات وأكشاك متنوعة
تلقين فيها كللل البضائع

ومن بينهم أكثر من فرع لمحل أجمل للعطور والعود والجلابيات في هذا السوق
(بالإضافة الى فرع في trident)

ومحل هريس



من الفنادق اللي أنصحج ما تسكنين فيهم رغم انهم 5 نجوم هم :

فندق حياة ريجنسي
لأنه عند المطار يعني بعيد عن المدينة وفي منطقة باااائسة كلها فقر وطلاليب !


فندق الفورسيزنز
والسبب انه في منطقة ما فيها شي ..يعني اذا بغيتي تسيرين السوق بتكون المسافة طويلة !



أهم المراكز التجارية :

• R-Mall, Mulund (West)

• Phoenix Mall, Lower Parel
مول راقي ضخم فيه معظم الماركات العالمية

• Atria Mall, Worli
مركز أتريا للاسف أثناء الأزمة الاقتصادية خسر وقامت المحلات تسكر
الحين نص المحلات بس مفتوحة (هو على طريج المطار وما يستاهل العنوه)

• Crossroads mall, Worli
هذا لا تسيرين له ما فيه شي عدل


Central
عبارة عن Department Store تصميمه حديث
بتلقون فيه ملابس ، لعب أطفال ، اكسسوارات ، ملابس تقليدية ، كوفي شوب ، منطقة صغيرة للعب الأطفال ، الخ


• City Mall, Andheri (West)
• Sunrays Shopping Center, Borivali
• Inorbit Shopping Mall, Malad (West)
• Hypercity Mall, Malad (West)
• Center One, Navi Mumbai
• Infinity Mall, Andheri (West)

هاذيل ما سرتلهم بس حبيت أخبرج عنهم .


الأسواق الشعبية :

كروفورد ماركت ..لمحلات التوابل والبزار والبضائع الاستهلاكية
السوق زحمة ويبا حد يدل عدل

بالقرب منه سوق
موتي ماركت لبيع الجملة : اكسسوارات وقطع ومطرزات وأحذية



ومحلSheetal
للقمصان والجلابيات والمطرزات


الاحتياطات :

1 لا تاكلين في أي مكان
2 الشحاتين في كل مكان ..اتجاهلي الموضوع بتكون رحلتج سعيدة
3 شيلي وياج ديتول وايبز ومعقم للايد
4 رغم سهولة الحصول على التكاسي أنصحج بتأجير سيارة مع سائق
(اذا حبيتي أعطيج رقم سواق ثقة خبريني)
5 يوم بتشترين شي من الشارع
لا تطلعين البوك في ايدج ..دايما اسحبي البيزات من الشنطة
6 شوارع مومباي زحمة ! اذا بتسافرون على الإمارات
أفضل حل انكم تحجزون الرحلة الصباحية يوم الأحد
بتوصلون العصر بتوقيت مومباي وبيكون يوم عطلة وما شي زحمة !
7 شلي أدوية خفيفة احتياط بندول ودوا الإسهال الخ
8 في الطيارة املي استمارة الدخول زين واذا ما عرفتي شي اسئلي المضيفة
عشان ما يأخرونج عند كاونتر الجوازات .


هذا كل اللي قدرت أتذكره واذا في أي أسئلة ثانية حاضرين

__________________________________________________ __________

>>>> الرد الرابع :

عزيزتي الدماني من القلب شكرا
ولج من صوبي أحلى ختم

__________________________________________________ __________

>>>> الرد الخامس :
يزاج الله خير اختي الدماني ع المعلومات الطيبه لوبغيت شي بخبرج تسلمين الغاليه