عنوان الموضوع : انا وااايد تغيرت..!!! المومة و الطفل
مقدم من طرف منتديات الضمير العربي

السلام عليكن خواتي.....

انا متزوجة من ثلاث سنين ونص.. الله رزقني ببنت ولله الحمد..

طبيعتي بشكل عام الهدوء والاتزان.. وتحمل المسؤولية.. ومحاولة بذل كل ما يسعد بنتي وزوجي...

بس اللي صاير ها الشهرين اني اتنرفز من اي شي لو كان تافه!!

قبل كنت اتحرى هذا الشي طبيعي في فترة قبل الدورة.. بس ها الفترة قبل واثناء وبعد الدورة!! اشوف نفسي مش مثل اول!! اتنرفز ع بنتي.. واعصب.. وانقهر من بعض تصرفات زوجي.. مثل اللامبالاة في بعض الامور.....! وللعلم بأن ريلي يمر في مشاكل في الشغل والتجارة من سنتين تقريبا.. ومبتعد عنا " معنويا " فقط ....

انا مش راضية عن نفسي... حاولت اهدا مثل اول واتصبر ع كل شي.. اشوفني زينه في بعض الايام.. وارجع لعادتي الكريهة واتنرفز.....!!!

بس احاول دايما اني ما اقول شي مب زين لريلي... حتى لو عصبت.. بس من داخلي بركان يثور من الغضب بدون سبب يرزى!!!!!

شوروا علي وادعولي بان الله يصلح حالي واحوال من مثلي..!!

الله يسعد الجميع ويوفقه لما فيه مرضاته...

وسامحوني..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
شغلي في بيت قناة المجد وبتهدي الامور بإذن الله
ويقري القرآن الكريم يمكن تهديين أشوي
الله يسر أمورج ويهديج

__________________________________________________ __________

>>>> الرد الثاني :
اكثري من الاستغفار..

وان شاء الله يروح عنج هذا كله..

__________________________________________________ __________

>>>> الرد الثالث :
اذكري الله واستعيذي من الابليس
اول ما تحسين انج اتنرفزتي استعيذي من الابليس
لانه هو موقعد العصبية واتذكري وصية النبي لاتغضب
والله ييسر عليج يارب

__________________________________________________ __________

>>>> الرد الرابع :
عزيزتي العصبيه والتوتر لها اسباب كثيره قد تكون هالاسباب خارجيه أو داخليه خارجيه يعني ممكن من الاهل المسؤوليات الزوج أسباب داخليه يمكن الهرمونات سوء التغذيه فديتج أنا انصحج بزيارة طبيب نفساني عشان يعلمج بعض الطرق كيف تهدين وتسترخين وإذا واجهتج مشكله كيف تتصرفين وهم بعد أفهم منا في ها الامور وبعد يالغاليه سوي فحوصات بين فتره وفتره واطمني على صحتج أنا قبل فتره كنت موووووووول ما اهتم بصحتي حسيت عمري خلاص وايد تعبت نفسيتي بس الحين احاول آكل عدل والحمدلله احس عمري احسن شوي ما يقولون العقل السليم في الجسم السليم واكثري من الاستغفار من لزم الاستغفار جعل الله له من كل ضيق مخرجا ومن كل هم فرجا ورزقه من حيث لا يحتسب ومن يتوكل على الله فهو حسبه وإن شاء الله بتتيسر أمورج كلها بس انت سوي اللي قلتلج عليه إن الله لا يغير ما بقوم حتى يغيروا ما بأنفسهم

__________________________________________________ __________

>>>> الرد الخامس :
مابزيد على البنات مثل ما قالولج اذكري الله

وحاولي تكسرين روتينج بشي يهديج مثل جلسة مساج

ودلعي نفسج شوي يمكن من الضغوط الي عليج صرتي جذه

حاولي تنفسين عن نفسج بطريقه ثانيه غير العصبيه

وربي يهدي بالج ان شاء الله