عنوان الموضوع : لماذا تتزوج المرأه ؟؟ لتربية الطفل
مقدم من طرف منتديات الضمير العربي

السلام عليكم ورحمة الله وبركاته


اشحالكن خواتي
عساكن بخير وسعاده يا رب ..


المهم موضوعي اليوم يناقش أزمتنا نحن الحريم وبالأخص المتزوجات ..
وبيكون عبرة لكل العازبات ...

المهم خلوني أدخل في صلب الموضوع ...



لماذا تتزوج المرأه ؟؟؟

تدرون ليش تتزوجون خواتي الحبيبات ؟؟؟



علشان اول شي .. تتعلمن اصول التنظيف والكنس والمسح ... يمكن في المستقبل مع هالأزمه المالية تضظرون تشتغلون نادلات في فنادق وتنظفون الغرف !!

و بعدين ايي دور غسيل الملابس ... ايوه انتي متزوجه حبيبتي علشان تتعلمين كيف تغسلين ملابسج وملابس ريلج و عيالج .. هذي البدايه طبعا .. وتدرون مب كل حد يتقن كيفيه غسيل الملابس مع انه الغسالات اتطورت بس بعد .. لااازم تاخذون خبره .. يمكن مع الازمه المالية تضظرون تشتغلون في مغسلة ملابس ( في الدوبي يعني خخخخ ) ...

ولا تنسن الكوي .. ومااااااا أدراكن ما الكوي .. طبعا يا حبيباتي مقارنه بالكوي يهون الغسيل ....
لانج تقريبا بتقضين نص يومج تكوين كندورة ريلج اللي كل سنه تثجل اكثر من السنه اللي قبلها !!
ما ادري بس احس انهم آخر شي بيفصلون كناديرهم من الاسمنت المقاوم لعوامل الجو !!

واحين طبعا ايي دور الطبخ والنفخ ... ويااااااااااااا ويلج لو كنتي ما تعرفين تفرقين بين الملح والسكر هههه .. ترى قلب الريال في بطنه .. افهميها يا شاطره ..
ولازم كل شهر تزيد كرشة ريلج مترين جدام والا ترى لا تلومينه يوم بيفرج بيت اهلج وبيقولهم بنتكم ترى مب مال عرس ولا تعرف شي بأمور البيت !!!
ولا تتضايجين ترى هذا كله لصالحج .. يمكن باجر يطلبونج شيف في مطعم خمس نجوم !

وشي طبيعي انج بتاخذين درس محترم بغسيل المواعين والجدوووور ...
خاصه مع ازمات احتراق الاكل في الجدر كل مره والتصاق العيش في قاع الجدر هههه
وسبحان الله .. يمكن الايام تدور وتشتغلين نادلة في مطعم وشي طبيعي انج بتستانسين على خبراتج المذهله في الغسيل !!

وبخبركم الحين بالبلوى العوووووده .. غسيل الحمام عزكم الله ... ما يحتاي اقولكم البسوا ماسك و لا تنسوا ترشونه باقوى عطر عندكم أو باختصار تلثمي يا عزيزتي بشيلتج و هجوووووم على الفلاااش والديتول والمبيض وغيره من اخف واقوى المنظفات ..
ما تدرين يمكن مع الازمة المالية ما تحصلين شغل ويشغلونج فراشه في مستشفى !

وطبعا لا تنسين انج بتتعلمين درس الشحاااته .. ولازم تتقنينه لو كنتي تبين تعيشين ولو ما اتقنتيه تراج بتموتين يووووع !! لا تتحريين الريال متعود يصرف على حد ولا يبغي يعور راسه ويفكر في هالسالفه اصلا .. وطبعا مع الازمات النفسية وتوعك مصرانج من اليوع بتضطرين تطلبين منه شغلات بسيطه كبدايه وستزداد او تقل حسب تقبل الزوج !!
وكووووووني حذره .. ترى الحذر واجب وهالشي هو اللي بيثبت لج اذا كنتي تنفعين طراره ( شحاته ) أو لا .. وترى شي طبيعي مع الازمه المالية بتتضطرين توقفين على باب المسايد وتلفين على بيوت الناس .. والله يعطيج من خيره !!

و الحين يينا لدورج الثاني كأم .. نعم انتي متزوجه مب بس علشان تكونين زوجه وبس ...
لا يا حبيبتي لازم تتقـنين دور الأمومه عدل ... خذي لج كم كتاب ولو حصلتي وقت آخر الليل قبل لا ترقدين اقريلج صفحة والا صفحتين .. وهذا ويهي لو ما غطيتي بسابع نومه من اول سطر تقرينه هههه

المهم عزيزتي الحين ايي دورج بالحمل ... وتحمليهم هم الا 9 شهور .. واحمدي الله في أول مولود لانه مسؤولياتج اقل في الحمل وطبعا مع ازدياد العدد سيزداد الحمل ! وع الاقل بتقدرين ترقدين بأوقات متقطعه مع تقطع انفاسج في شغل البيت هههههههه

وبعد الولاده ... حاولي يا عزيزتي ترتبين أمورج عدل عدل عدل ... نشي قبل لا ينش البيبي .. هذا لو رقدتي اصلا من صياحه طول الليل .... و مشي حالج وسوي اللي بتقدرين عليه ..
وترى لو نش البيبي قبلج بتضطرين تشتغلين بايد وحده بس وتشلينه طبعا بالايد الثانيه !!
ومسكين الله يعينه على حر المطبخ .. بس يستاااهل حد قاله ينش ...!!!
ترى هذا كله بدون شهادة خبره .. لانه الشهادة ما بتييج الا بعد عشر سنوات .. وطبعا بتشوفينها بالدسه في جيب ريلج .. اقصد ورقة زواجه من الثانيه

وطبعا كل ما يكبر الطفل تكبر المسؤوليات ... اذا حسيتي انج خلاااص مب قادره تتنفسين من المسؤوليات اللي على راسج .. عندج الطوفه دقي راسج فيها لين ما تقولين بس ..

علشان تعرفين شو النعمه اللي كنتي عايشه فيها وانتي عزوبيه ...
أكله ومرعى وقلة صنعى ... يا الله عاد اتكرمي على أمج وساعديها بشغل البيت اشوي ..

وربي يرزقكم بالزوج الصالح التقي المحب واللي يحب ويتقن شغل البيت

ودمتم في حفظ الله ورعايته


جميع الحقوق محفوظة لأختكم
كيـــــــــميائية

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
هههههههههههههههه

الله يعين كل متزوجه
والله ان العزوبيه راحه ولا هم ولا مشاكل

بس الله يرزق كل بنت بزوج صالح

مشكوره فديتج

__________________________________________________ __________

>>>> الرد الثاني :

المشاركة الأصلية كتبت بواسطة الأصالة
هههههههههههههههه

الله يعين كل متزوجه
والله ان العزوبيه راحه ولا هم ولا مشاكل

بس الله يرزق كل بنت بزوج صالح

مشكوره فديتج




هههههههههههههه

هي والله ربي يعين الكل ..

وشاكره لج مرورج العطر حبوبه ..

وعسى الله يرزقج بالزوج الصالح التقي المحب المتعاون ...

__________________________________________________ __________

>>>> الرد الثالث :
وصف ولا اروع ..
كل مقبله على الزواج من تقرا موضوعج بتهون عن الزواج خخخخ
بالنسبه لشغل البيت من كوي وغسيل وتنظيف .. الله يخلي الشغالات ..
بس الي قلتيه عن الحمل والربى صحيح 100 %

__________________________________________________ __________

>>>> الرد الرابع :

المشاركة الأصلية كتبت بواسطة الرحيق
وصف ولا اروع ..
كل مقبله على الزواج من تقرا موضوعج بتهون عن الزواج خخخخ
بالنسبه لشغل البيت من كوي وغسيل وتنظيف .. الله يخلي الشغالات ..
بس الي قلتيه عن الحمل والربى صحيح 100 %




الخدامات بروحهم بلاااااوي وخاصه اذا الله بلاج بخدامه ما تعرف تغسل والملابس كل يوم ريحتها معفنه .. و عن الكوي الله يعيينج على الملابس اللي كل يوم درزن ثياب محروقه !!
و التنظيف .. طبعا ما شي عندهم ضمير من فوق الله الله ومن تحت يعلم الله !!!
بتتضظرين في هالحالة تشتغلين مفتشه ومدققه في البلديه ... قصدي في البيت ههههه

و تسلم لي هالطله الحلوه الغاليه ..

__________________________________________________ __________

>>>> الرد الخامس :
يا قلبي ع العزووووبية

وماماتي بعد تسالني ليش ما تتزوجين يمكن لو خليتها تقرىء الموضوع بتعرف السبب