عنوان الموضوع : بس خلاص تعبت لتربية طفلك
مقدم من طرف منتديات الضمير العربي

السلام عليكم والرحمه
اشحالكن حبيباتي ..
مااعرف من وين ابتدي وماعندي حد اشتكيله ابد ..وما أقدر أقول حق أهلي عسب ماتستوي مشاكل وما أقدر أقول حق حد من اربيعاتي لان مااحب أدخلهن بحياتي الخاصة وأعتبركن أنتن أهلي ..

صارلي ألحين متزوجه من 8 شهور ومب قادرة أتأقلم وي أهل ريلي وأنا من النوع الاجتماعية واحب اسولف بس من عرست كرهت حتى السوالف لان السوالف صارت تسويلي مشاكل وي أهل ريلي طبعا جدام أهلي وربعنا وايد أمدح أهل ريلي وخصوصا عمتي أمدحها وااااايد وهي ماتستاهل ..

مره كنت اسولف ويا حماياتي وبالسوالف قلت حق حميتي كلمت سخيفه المهم اتصلت حق ريلي فالدوام وقالتله وطبعا اتصل فيني زوجي العزيز وعطاني محاضره وسرت وتأسفت منها مع ان يوم قلتلها هي بعد قالتلي سخيفه ومرت الايام وتكرر نفس الموضوع بس أنا ماحسيت اني قلتلها شي وكنت كل ماادش عندهم أسلم محد يرد علي السلام واذا كلمت حد منهمن مايردون علي طبعا انا سكت وماقلت شي حق ريلي وعقبها اهو تم يحتشر علي ويقول اني سبيت اخته ورديت مره ثانيه أعتذر على كلمت حيوانه مع اني ماقلتها انا كنت ارمس اربيعتي فالفون.. وسمعت أن حمي طلع له الاسكان فسألت حميتي مجرد سوال عادي المهم اليوم الثاني من صباح الله خير ياني ريلي معصب قالي أمه تقول انا ليش اقول متى افتك من اخوه ويطلع من البيت وماتحملت وتميت اصيح وقلت له انا ماقلت شي ويوم سألت مب قصدي شي وكل مااقول كلمه سويلي ايها سالفه ..
وطبعا عمتي عالم ثاني من النفاق جدامي بويه وجدام ريلي بويه ثاني مع اني واااايد احترمها عدنا فالبيت شغالتين ولا وحده اتسويلي شي مووول انا ابروحي انظف الملحق وأغسل الثياب واكويها مع اني الحين حامل فالشهر السادس واهلي موول مايعرفون شي يتحرون الشغالات يخدموني طبعا عكس مرت حميي هي مول ماتسوي شي لا اتنظف ولا تغسل وأعيالها دووم ويا الشغالات اونها وحده تشتغل بس ماتصرف شي فالبيت لا هي ولا ريلها ويحليله ريلي اهو اللي يصرف ع البيت طبعا ومره قلت جدام ريلي حق الشغاله تغسل الثياب لاني كنت تعبانه وااايد سارت عسب اتقول حق عمتي وعمتي يت وقالت الغسالة خربانه ( مع ان بإمكانه تغسل فغسالتي) ويوم ريلي طلع من البيت بالصدفه جفت الشغاله تغسل اثياب وغساله تشتغل سكت .. وسرت غسلت اثياب ريلي وانا اصيح من التعب والقهر وأنا مااعرف أطبخ إلا أشياء خفيفة ويوم ريلي يسير الدوام أحس أني عايشه ف صحراء طول اليوم يوعانه اذا دشيت المطبخ كل مااسأل الشغاله عن شي ابي أطبخه أتقولي ماشي أو خلص اليوم ولا جني عايشه وياهم ف نفس البيت مايزقروني لا على غدى ولا عشى طبعا مصروفي دووم يخلص ع المطاعم ويوم ريلي موجود يتصلون عليه عسب يتغدى واذا طلعت اتغدى عمتي وحمياتي ومرت حمي أحس أنهن ينقهرون فقمت مووول ماآكل شي من البيت واقول حق ريلي اونه أتوحم ومااحب آكل أكل بيتكم لاني ماابي اتشكى من أهله جدامه واذا أنا طبخت طبعا بس عشى واشتري الاغراض من الدكان عمتي اتقول سويلنا من اللي اتني تسوينه .. ويوم سرت آخر مراجعه الدكتوره قالتلي ان الجنين حجمه صغير وقالت حق ريلي اني ماآكل وهذا مب زين عشان الجنين وطبعا عمتي المصونه درت وتمت تقولي كلام جارح بس اونه جدام ريلي حق مصلحتي ووحده من حمياتي حملت وهي بعدها فالشهر الاول يت سكنت ويانى عسب امها تهتم فيها وموول ماتروح بيتها فأنا طبعا استغليت الموقف ويت بيت اهلي اسبوع مول ماحسيت بيوع والحمد لله الجنين اشوي كبر ( احم احم اخمن لاني احس اني متنت) ويوم رديت البيت عمتي تمت تحتشر علي جدام ريلي اونها دووم تزقرني واتيني الملحق اتجوفني شو ابي وشو ماابي وتيبلي الاكل بس انا ادلع مااكل واعاندها واغسل الثياب تتحراني قلت شي حق ريلي وللعلم دوام ريلي اسبوع باسبوع وتباني فالاسبوع اللي ريلي محد مول ماتحرك من البيت وانا يوم اطلع امر عليها اقولها اني طالعه اتقولي ليش ومرت حمي مول ماتسويلهم سالف.. وانا ميته قهر ليش بنتها عندها وانا مب من حقي اسير بيت اهلي اقعد لين ريلي مايرد من الدوام..

مااعرف شو اسوي .. شو تنصحوني

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
الله يعينج يا اختي ..

خبري ريلج الحقيقة .. خبريه بكل شيء ..

ولو تظهرين بيت بروحكم احسن من هذا التعب والقهر ..

حتى السلام حشا مايسلمون.. خيركم من بدأ بسلام .. معنج موووب غلطانة مووول ... وقووولي لريلج مايهووشج من دون مايعرف الحقيقة ..

والله يعينج عليهم صراحة ...

^.^ وخلي ريلج يسوووي لج مطبخ تحضيري خاص فيج وايب لج خدامه دامنه حتى الخدامه تسير وتخبر عمتج .. حشا !!!

اذا ريلج عند ميزانية خبرية تبين مطبخ تحضيري وشغاله خاصة فيج ..

وفي الاخير سمووحة بس قلت اللي بخاطري ..

سبحانك اللهم وبحمدك لا اله الا انت استغفرك واتوب اليك ..

__________________________________________________ __________

>>>> الرد الثاني :
تسلمين حبيبتي وفكرتج وايد حلوه ع المطبخ التحضيري بس طلعه من البيت مااعتقد
احسها شوي صعبه .. ابي اقوله عن خواته بس ماابي ياخذ عني فكره ويقول اني وايد اتشكى بس عن مرت حمي امبلا يعرف لان كل شي يبين

__________________________________________________ __________

>>>> الرد الثالث :
صارحي ريلج بالموضوع وقوليله الحقيقه هالحل بس بأسلوب حلو واختاري الوقت المناسب للكلام وقوليله انت لريلي واباك في موضوع جاد واتمنى تفهمني وما تعصب او تتحراني اجذب...وخبريه بالموضوع...والافضل انج تطلعين من البيت واسكني روحج

__________________________________________________ __________

>>>> الرد الرابع :
والله انج نفس معاني بالضبط .. نفس الاسلوب .. نفس المعاناه والقهر .

احسج تتكلمين عن مشكلتي بالضبط


الله يصبرنا بس

__________________________________________________ __________

>>>> الرد الخامس :
كلهم جي أتحمليهم وأتجنبي الأشياء اللي تسوي مشاكل مثلا إذا هم ينقلون الرمسه خلاص لا ترمسين عندهم بس سلمي ويلسي وسولفي بشكل عام