السلام عليكم ورحمة الله وبركاته ...
حبيت اعرض لكم صور البوفيه اللي سويته في البيت الاسبوع اللي طاف .. كان عندي حريم من الاهل وعيالهم .. طبعا الفكرة يت متاخرة عسب جي الترتيب كان على السريع ... وغير انه الصبح فكان الوقت ضيق للترتيب والطبخ ...
بس اتمنى انه يعجبكم ...
طبعا الريوق تقريبا كان على الساعة 11 ونص الصبح .. عسب جي دخلت اطباق دسمة شوي فيه ..
حتى الخدامة يوم شافت الاطباق قالت مدام تبين اسوي سلطة ؟! قلت لها : ليش ؟؟ تتحرين عزيمة غدا ..خخخخخخخخخخخ
والان مع البوفيه :
قولوا : ما شاء الله
اولا : طاولة البوفيه ...
ثانيا :
طاولة الطعام ..
ثالثا : الصحون ..
رابعا : الاكواب و دلة الكرك والخبز :
الاكواب هده حق العيال ..
خامسا : الاطباق :
1- شوربة الاش ( ضيوفي يحبونها على الريوق وهي عبارة عن خضروات وانواع من العدس )
2- كبة و سمبوسة
( الكبة جاهزة اشتريتها من عند حرمة سورية والسمبوسة بالجبن سويناها في البيت )
3- بلاليط
4- فطاير مشكلة
( جاهزة من الجمعية )
5- ورق عنب
6- الطبق اللي فوق ملفوف وكوسة .. واللي تحت كيكة الجبن بالزعتر وانا خليتها من المقبلات ..
طريقة هالكيكة من النت بس سامحوني ما اعرف من اي منتدى نقلته ما ادري اذا اهني او مكان ثاني
7- لفائف الدجاج
الطريقة :
بصل مفروم اتذوبينه في الزيت ثم دجاج مفور ومفتت ثم جزر مبشور وفلفل اخضر بارد مقطع مربعات صغيرة ومكعب ماجي وكركم وتطبخينه كله على النار لما ينضح .
اتيبين عجينة السمبوسة واتقصينها من النص وتحشين كل نص بهذه الخلطة واتصفينه في البايركس.طبقة وحدة يس .
الخلطة اللي فوق : 4 ملاعق اكل جبن سايل و4 ملاعق اكل مايونيز وواحد قشطة وتخلطينه مع بعض واتصبينه على اللفائف واتنثرين جبن موزاريلا وادخلينه الفرن من فوق وتحت لما يحمر .
8- الاجبان والعسل :
اتمنى انه عجبكم ...
ولا تنسوني من الدعاء ..
وحياكم الله ..
طريقة شوربة الاش :
المقادير : ( هذه المقادير حق عائلة صغيرة .. اذا تبغين لعائلة اكبر ضاعفي المقادير ..
القياس المستخدم للبقوليات ( كلاس الجبن الصغير )
1- عدس اصفر وعدس اخضر ولوبيا ونخي ( بخصوص النخي ممكن استعمال المعلب انا اسوي جذيه )<< مقدار نص كلاس جبن صغير << ينقع في الماي لمدة نص ساعة وبعدين اتفورينه ولما يلين تشخلينه .. واتصفينه .
2- ومقدار نص كلاس جبن عيش ابيض مغسول بس ومش منقوع ( حسب الرغبة انا هالمرة ما حطيت )
3- سبانخ مجمدة ( كيس واحد)
4- وربطة من كل من الكزبرة والبقدونس والشبت .. انا اسويه بدون شبت لاني ما احب طعمه .. الخضرة كلها تفرمينها .. واتخلينها على جنب .
5- معكرونة الطوال ( الاسباجيتي ) ربع الكيس واتكسرينها صغار بس مو صغار وايد .. واتخلينها على جنب
6- كيس واحد من شوربة ماجي ..
7-ملعقتين اكل من حبوب الشوفان ( كويكر ) اتنقعينه في الماي
8- رشة من كل من الكركم والبزار والقرفة والفلفل الاسود والملح والهيل ..
9- 2 بصل متوسطات اتقطعينه طوال ..
10- مكعب ماجي
الطريقة :
1- اتجهزين الجدر اللي بتطبخين فيه واتحمرين فيه البصل ( اذا اتحبين اتحطين قطع دجاج صغار حطي ما في مشكلة بس ما احط ) وبعدين اتحطين مكعب الماجي مع البهارات وتحمسينه واتخلينه شوي ثم اتصبين الماي يكون اقل من نص الجدر وطبعا بعدين بتمين اتصبين شوي شوي من الماي .. وخليه يفور شوي
(((ملحوظة ... اذا ما تبين اتحمرين البصل عسب الدهن او الريجيم ممكن على طول اصبين الماي واتحطين البصل والبهارات بس يذبل حطي باقي المقادير ..))))
وبعدين حطي كل المقادير الموجودة الخضروات والبقوليات والمعكرونه والعيش والشوربة والحبوب .. وتخلطينه مع بعض والحين زيدي ماي شوي لما يغطي كل المقادير وغطي الجدر وخليه يطبخ على نار عالية شوي بس اتشوفين الخضرة ذبلت وطي النار .. ومن فترة لفتره حركيه بالملعقة الخشبية .. وخلي يطبخ على راحته .. تقريبا ياخذ عندي 45 دقيقة .. يعني بعد نص ساعة شوفي الشوربة اذا كانت غليظة وايد صبي عليها اشوية ماي .. وذوقيها اذا كانت تحتاج ملح والا لا .. وبالعافية
رد مع اقتباس
