عنوان الموضوع : ,,, ساعدونــي .. أول مره .. وفيكن الخير ’’’ تغذية صحية
مقدم من طرف منتديات الضمير العربي

السلام عليكم جميعا

أنا أختكن حامل في الشهر السادس وبكر .. من دبي .. وساكنه مع ريلي ف بوظبي
وايد أفكر في الولاده .. وخايفه .. وما عرف وين أربي .. فاتحه ملف ف مستشفى الوصل
بس محد مدح حقي موليه .. وأنا ألحين أستشيركن ياخواتي .. بغيت منكن المساعده
شو رايكن ف مستشفى النور وخدماته إلي ف شارع المطار .. وانا ناويه بإذن الله آخذ ابرة الظهر
بس ماعرف إذا زينه وإلا لا .. وشرايكن ومنو مجربه هالأبره وهي كانت بكر شراتي
وبعدين إذا اعتمدت ف مستشفى النور .. يعني محد بيكون ويايه غير ريلي ..
الله يخليكن طمنني وشورايكن .. بأمانه إلي مجربات .. وشو تنصحني ..
والله يعطيكن العافيه ...

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
الله يسهل عليج .. انا بعد فالسادس .. وظهري متعبني ... قلت باخذ ابرة الظهر هالشهر ... ان شالله الاخوات بيفيدونج ...

__________________________________________________ __________

>>>> الرد الثاني :
مستشفى الكورنيش طبعا ومليون طبعا مادام انتي في بوظبي ... يالله افتحي ملف فيه .. مستشفى امان ويحافظ عليج وعلى الجنين ... انا من بوظبي واربع ولادات لي في مستشفى الكورنيش .. هو الافضل لج طبعا ِ.. لا تروحين الخاص وشو تبين الخاص الله يهديج عندنا في بوظبي مستشفى الكورنيش لكل الحوامل بس تخصصه ولاده

__________________________________________________ __________

>>>> الرد الثالث :
مستشفى الكورنيش امان ويتحمل المسؤوليه وفيه عنبر خاص للاطفال لو لا سمح الله فيهم شي .. ويعطونج دروس عشان الرضاعه ويعلمونج كيف ترضعين .. هو مستشفى حكومي ومعتمد عليه وكل المواطنات والمربيات في بوظبي يعتمدن عليه محد يعق عمره في الخاص . وابرة الظهر ممكن تتفاهمين مع الدكتوره .

__________________________________________________ __________

>>>> الرد الرابع :
عشان تفتحين ملف خذي وياج الجواز وخلاصة القيد وصورة عقد الزواج على ما اظن .. صوريهم وخذيهم وياج وجربي وبتشوفين الحوامل هناك وعيشي التجربه وياهم ..

__________________________________________________ __________

>>>> الرد الخامس :
الكورنيش زين من حيث الخبره بس خدماتهم زفته وعندهم زحمه