عنوان الموضوع : كيف بشّرت ريلي بحملي(تقرير مصوّر)
مقدم من طرف منتديات الضمير العربي

كنت في بيت ماماتي ومن قبل لا اسير عندها حاسه شاكه اني حامل قلت باجر من صباح الله خير اول شي بسويه الفحص

ثاني يوم اول ماوعيت سويت الفحص و طلع (+) ايجابي ومن الصدمه ماعرفت شسوي كنت اضحك واصيح وتوضيت وصليت شكر لله ، وظهرت وبشرت ماماتي قالت : قمي بنسير العياده

سرنا وخذوا عني فحص الدم وفحص ثاني وقالوا اصبري
ريلي يتصل يتصل يتصل مسكين ومارديت عليه عشان ماتخترب المفاجئه طرشلي مسج
(صبااحج .. اكيد نايمه يالله رقاد العافيه ومن تنشين اتصلي)

ماهان عليه بس دست ع قلبي المهم طلعت نتيجة الفحص (حامل) وماماتي فرحت وايد وايد وايد وايد وعلى طول زخت تلفونها
قلتلها : لااتخبرين حد عشان مايعرف فلااان
قالت : بس يدتج افا حتى يدوه ماتبينها تعرف وهي مربتنج
قلتلها : لا يدوه عادي ويدوه من الفرحه قالت : احينه اتيون عنديه

وخطفنا عليها في بيتها وكانت فرحاااانه حليلها واخيرا اقتنعت انيه كبرت لنها ايام عرسي احتشرت عليهم وقالت صغيره كيف تيوزونها
المهم تريقنا وعييننا من الله خير خلاف ردينا البيت وربطت نتيجة التحليل بشريطه وكنت مزهبه cd من قبل العرس ومخلتنه امانه عند ماماتي



ومزهبه شموع وتحف ع شكل اطفل ولبس مال بيبي وعلبه (فالبيت)








والظهر خلص دوام ريلي وياني العين عسب يشلني خذت الاغراض اللي عند ماماه وياي
وسلمت عليهم وظهرت وبالصدفه يوم ييت بركب السياره لمحته واقف ويا خويه ويالس يلاعب ولد اخويه

وفالطريج سبحان الله كأنه قلبه حاس بشي قالي : مايخصني ابا داداه
قلت له :بعدنا معاريس ولاحقين ع الداداه>> اطالعه شوه بيقول
قال : لا الله هب لاحقين.. قالي والله لو حملتي لج هدايا م العيار الثقيل واذا ما عطيتج قولي انت مب ريال
قلت : انت شيخ الرياييل

وصلنا البيت والعصر طلبوه في الدوام ساعه بس يبونه ، دخل ياخذ شااور
وقلت له : اشغلك السياره؟ضحك وقالي : سيري شغليها
سألته اي سياره يبا وخبرني وسرت وانا ماكنت ابا اشغل السياره كنت ابا احط له رساله ، ولزقت له ورقه صغيرووونه وكتبت عليها :



(م ... عنديه لك مفاجئه حلللوه ومب مسموح لك تتأخر اكثر عن ساعه)

واتصلبي اول ماركب السياره تم يحن وماخبرته ووعدني كلها ساعه وبيرد
استغليت غيابه في تنفيذ الخطه ويبت علبه حطيت فيها الCD وورقة التحليل مربوطه بشريط وفوقهم اللبس وعدالهم تحفتين صغار



وسكرت العلبه وحطيت الهديه ع طاوله في نص الغرفه و على اليمين شمعه ورديه وتحفه ع شكل بنت وعلى اليسار شمعه زرقا وتحفه ع شكل ولد ومقص



رجع البيت مستعيل ع رزقه خخخ قالي : يالله وين وين وين وين ..!
اشرت له ع العلبه وكنت مزهبه كيمرته واصوره فيديو ،<< وفتح العلبه

حصل ثياب البيبي وضحك وقال : تراني هب فاهم شي وحصل الCD و ورقه مربوطه (ورقة التحليل) و كرت صغير مكتوب فيه اسمع الCD بعدين قص الشريطه بالمقص واقرا الورقه الملفوفه )وشغل الريال الCD كان متوقع قصيده بس تفاجئ بصوت طفله تقول :

(هذي اول رساله توصلك بعد الزواج بس الرساله صوتيه مب مكتوبه رسالتي لك لانك أول انسان لازم تحبني

وتتعرف عليه لان انا اعني لك كل شي بحياتك ،ولأنك انته بتكون كل شي بحياتي

ماظن عرفتني بس اذا عرفتني بتحبني حبيت أقولك شي اسمعني وركز وياي ..أنا اعرفك صبور صبرت 4

شهور لين تم الزواج والمطلوب منك احينه بعد تصبر كم شهرواللي يبا الحلو يصبر

اباك : تترياني 9شهور وتتابع تطوراتي اول بأول ولاتنسى تخلي بالك ع ماماتي لاني أنا داخل بطنها واخذ

راحتك وكفايتك من النوم باجر انا بيي ولااابخليك ترقد واباك تعد الدقايق عشاني وتزهب لي بامبرز وحليب

ماقلتليه باباتي ؟تباولد حلو يشبهك ؟ ولا بنوته حلوه تشبه ماماتي؟؟

إذا فخاطرك ولد لازم تشعل الشمعه الزرقا وإذا بنت لازم تشعل الشمعه الورديه

باباتي .. احبك ومشتاق حضنك

وحضن ماماتي والله احبك ..

المرسل : نونوتك ..

يتبــــع<<<

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

نيي لردة فعله :

من اول ماشغل الCD كان يسمع بإهتمام وتركييز ويقول : كيف جي ياخي ؟ خخخ

وعلى كل كلمه يرفع حوايبه

بأستغرااب ويبتسم وكلما اندمج ويا الكلام اكثر كلما حضن الثياب ع صدره اكثر ويوم

قالت البنت :

(اباك تترياني 9شهور وتتابع تطوراتي وتخلي بالك ع ماماتي لاني داخل بطنها)

صررررررخ وقال : لاااااااااا هذا وايد عليه وضحك .. فديته

عقب سكت وتم يسمع وعينه ممزوره دمووع ويوم قالت بنت اختي :

(اباك تزهب لي بامبرز وحليب) قال : حاضر .. << كانت طالعه م الخااطر

وكانت ايده ترجف مصدوووم واول ماخلص الCD غمض عينه ونزلن دموووعه بدون

شعور طبعآ ف استحى وقال : حبيبي .. خلاص لاتصورين و نزل راسه ومسح

دموعه بيده توهق ويدور الكلنكس هني قلبي عورني وأشر لي ايي وايلس حذاله وكان

مب قادر يرمس ويبت الكلنكس بغى ياخذ حبه قلتله : خوز ايدك وانا مسحت دموعه قالي : نشفتي دمي ..!

وتميت اصوره وعقب قص الشريط وفتح نتيجة التحليل وقالي : قولي والله حاامل عيل ليش كاتبنج شما؟قلتله : والله حامل وهم غلطوا في اسميه بس اسم ابويه والقبيله صح..عقب قالي : اذا ابا ولد اختار الشمعه الزرقاء واذا بنت الورديه صح؟قلت له : صح

خلاف نش و ولّع كل الشموع قصده ماتفرق وحبني ع راسي

شفتوا الريال يوم تقدرينه بيقدرج ، وقلت له : يالله سير صل ركعتين وأشكر الله اللي عطانا ، وتوضأ وصلى ركعتين شكر وصورت كل شي حتى الصلاه ، وعقب مااصلى ارتااح سألته عن رايه في المفاجئه

مسك ايدي وحطها ع قلبه وقال : شوفي كيف ايدق ؟! لانج صدتينيه ولعوزتينيه ، وانا قلبي كان حاس بس استبعدت انج حامل لاننا رمسنا في الموضوع وقلتيليه لاحقين كيف فجأه تبينيه اصدق انج حامل وياراسج..!وقال : المفاجئه رووعه بمعنى الكلمه والفكره تجنن وعيشتينيه لحظه بتم طووول عمريه اذكرها وانا بهديج وبفاجئج بهديه كبيره تدوم وتستفيدين منها شرى ماوعدتج ولج هدايا غير حاليا .ويوم تربين لكم بأثنينكم مفاجئه ،

انا ياخواتي ماهمني الهدايا قد ماتهمني فرحته شفتن كيف الريال مثل البيبي بالاسلوب
الحلو بحنانج ممكن تملكينه وتسعدينه والله اول مره اشوف ريلي يصيح ومن يوم مافاجئته مايبانيه اتحرك ولا يبانيه اشل شي ، ولو بيده حتى المشي مابيخلينيه امشي يقول : انتي ايلسي وعندج بدال البشكاره 2واذا تبين الثالثه حاضر واطلبي مني اي شي تبين وقد ماتبين

وبالغصب يداوم ويرد البيت طاير وبالغصب يوديني عند هليه يقول مايبا يفارقنا انا والنونوه مع انه بعده في بطني وماخذلي كتب عن الحمل والامومه وكتب عن الاهتمام بالمولود الجديد

يتبعــــع<<


__________________________________________________ __________

>>>> الرد الثاني :
نيي لردّه على المفاجئه :

ثاني يوم الصبح نش قبلي ، ماحسيت به متى نش ومتى لبس ومتى طلع م البيت ، ولا اعرف وين ساير أول مره يشرد خخخخ

اللهم نشيت فجأه وبطلت عيوني مالقيته بس حصلت رساله ع مخدته يقول فيها :

(صباح الخير شرايج أعزمج ونتغدى في أي مطعم تختارينه عشان نتغدا وتشوفين هديتج ؟!)

نقزت من فراشي مسكت تلفوني وطرشت له مسج :

(مـ... لا والله يلي عالي في سماه اني مابا شي فرحتك امس تسوى كل شي)

بعد ماطرشت الرساله انصدمت كتب لي التيلفون تم تسليمه (بو.....) تحريت انيه مغلطه
جيكت ع الرقم حصلته مغير أسمه في تلفونيه وكاتب (بو....)

وعقب ما استلم رسالتي اتصل وقالي : يالله عاد بلا دلع البنات الماصخ لاتزعليني قومي

مابغيت أخرب الطلعه وقمت ولبست وخطف عليه وسرنا المطعم اخترت هالمطعم لانه كله فاضي

نزلنا قالي اوووه نسيت هديتج بسير اييبها لين ايي صورت لكم خخخ




سار ياب ظرف م السياره وقالي فتحيه وفتحته واشوف اجراءات تسجيل العقارات واوراقه واوراقي عقب فهمني انه سجل الارض يلي ماخذنها قريب ومن حسابه بأسمي

قال : هاي هديتج وبتنفعج وهي منحه مني لج

قلتله : ليش وكيف ماشاورتني

قال : مايبالها مشوره هاي انا اصلا شارنها لج .والخير وايد .! ولاتنسين بتكونين ام عيالي وسمحيلي اذا كنت مقصر




طول الوقت انا في صدمه ، بس عيبتني الهديه من ناحية المبدأ اكثر من المضمون شكرته بطريقتيه ، والظرف موجود ع الطاوله لازدت ولا

نقصت في اللي صار

وطبعآ تغدينا والغداء كان بوفيه ، وفي الصوره كان يخبرني عن المفاجئه وانه مابينساها طول عمره والفيديو كل يوم يشوفه ويضحك على

عمره يوم مصورتنه ..



فاجئني بمفاجئتين ثانيات ترقبوهن بموضوعين منفصلين بالصور ..

الCD وين حاليآ :

والCD موجود عنده في السياره ويسمعه دوووم وتقريبآ كل يوم ويقول :

مره كنت مسرع سرعتيه قريب ال200 وطاحت عيني ع الCD جان اخف السرعه وقبضت
السيد اللي في النص وتميت اسوق ع راحتيه لين ماوصلت البيت


اختبرته قتله : شوه اللي خلاك تخف مافهمت؟! خخخ

ضحك وقالي : تراه النونوه قالي اترياني وانا وعدته

طبعآ وايد فرحت لن الهديه يابت اثر طيب في نفسه وكسبت انه ماقام يسرع نفس قبل

طبعآ لان هذا اول مولود او مولوده مابغيت اقوله انا حامل والسلام لاء بغيت شي يتم

ويتذكره ، وأنا الكسبانه والله

واسمحوليه مارمت احطي لكم صوت بنت ختيه خفت عليها لانها ماشاء الله ملسونه وضبطت الفكره ،

ونحن معرسين تقريبآ من 6شهور فاللي حبت الفكره خصوصآ اللي توها معرسه تاخذها وحلال عليها بس لاتنساني من صادق دعائها


THE END

اختكم :
شمسه بنت المرر

__________________________________________________ __________

>>>> الرد الثالث :
واااااااااااااايه وجان اصييييييييييييييييييح

كملي كملي

فديتج المكان اللي حطيتي فيه بكمل حطي تعديل وكتبي التكمله

__________________________________________________ __________

>>>> الرد الرابع :
روعة مبروك والله يتمم حملج على خير ان شاء الله

__________________________________________________ __________

>>>> الرد الخامس :
وين التكملـة ؟!!!!!!!!!!!!!!!!!!!!!!!