السلام عليكم ورحمة الله وبركاته
قررت الليله اكتب قصة ولادتيه لطلب العضوات ومن قبل واعدتنهن فديتكن يارب
موعد الولاده على حساب المستشفيات:26-1-2017
موعد ولادتيه:21-1-2017
المكان :الواحه
الخميس الفير عقب الاذان مباااااشره حسيت بمنان وكل يوم طبيعي ايينيه بس رحت الحمام عزكن الله وبطنيه مشاني فا توقعت انه يمكن اربي لانه بولديه كان جيه المهم عقبها بفتره قصيره ياني المنان وتم جيه تميت احسب له كان كل 10 دقايق فا عرفت انها ولاده وكل ساعه اتجلب وريلي يقولي شوفيج وانا ياحليلي اتحيس من الويع اقووله ولاشي
المهم لين الساعه 7 ماقدرت ارقد نشيت جيكت على كل شي وتسبحت ورتبت اموري والساعه 8 طلعت برا اتمشى بالحوي وسويت اليه زعتر اول مانش ريلي ربعت اقووووووووووله بربي وطالعني جيه
قالي شدراج(هو اروحه كان حاس لانه كل مره قبل اقوووله يقولي مطووله)
المهم كان كل ماياني اذ واقفه بيلس واذ يالسه بتجلب ومن يروح ارد طبيعيه ولاتقول فيه شي وارد واقووول يمكن اتوهم هب ويع طلق
عقبها رحت بيت اهليه وهناك الكل عرفنيه مبين على ويهي واتصلت بريلي وقالي بيمشيني شوي ورحنا نمشي الظهر مشينا مسافه بعيييد وعقب هو عيز قالي بمشي بالسياره وانتي مشي قلت له اوكي فاتخيلن خلاص تعبت واقووله وقف وهو يظحك لايسمعني اونه امشي اكثر وتخيلن اربع وراه وهو يسرع عن الحقه عقب شافني خلاص منتهيه وكان شكليه صدق يظحك وعقب وقف رأف بحاليه رديت وتميت اشرب زعتر وحريروه وتم الويع على 7 دقايق ومانزل لين هاييج الساعه ولاشي عاقرايب العصر تم الويع قوووووي وعلى كل 7 او 5 دقايق وكنت بموت منه واقووولهم بسير المستشفى ولاطايعيييين يقولن اليه خواتيه صبري
الساعه 4 ماتحملت اتصلت بريلي وقلت له تعال ويا وسرنا انا وامايه وكل ماتييني الطلقه كنت اسب واهازبه واقوله سرع وياحليله هو يسرع عقب اقووله خف بس من قو العوار توقعت اربي بالسياره وصلت اول ماكشفن عليه كنت اتوقعها 6 ساننتي بس طلعت 4
وتميت اصيييييييييح واصييييييييييييح والنيرس تهدي فيييه وتقولي ليش هبيبتي سييييييح<<عاد اونه ليش حبيبتي تصيحين
قلت لها كييف 4 من وين ايبيهن ال6 لانيه كنت صدق خلاص تعبانه
يلست على هالويع ساعه وماتحملت حسيت ابا ابول عزكن الله قلت لها ابا اسير الحمام بس ماقدرت اوقف قالت اليه يمكن لانه الراس وايد نازل جيكت كان فاتح 6 ونص قالت بفج الماي ودخلت شي طويل بغيت اموووت منه وانفج الماي عقبها ب 5 دقايق ماتحملت الويع وحسيت البيبي يبا ينزل واصرخ علييييييييهن اقوللهن البيبي يبا ينزل جان بسرعه جيكت ولقت فاتح 10 يعني الغبيه لو فجته من قبل كان احسن اليه
وبسرعه تجهز العده وانا ماقدرت تميت اسوي بوش لانه خلاص البيبي يبا يطلع تقريبا ربع ساعه والحمد لله طلع الببيبي بس مازادتنيه فاستون تمزقات 3 اماكن وكل مكان مادري كم غرزه سوتليه وهيست المووووووووووت وكنت احط الاكسجين بس مايساعد والحمد لله يبت احلى ميروووووه بس صدق صدق هيست الموووت
وصراحه عنايتهم اوكي بس الخياطه وااااااااااااايد ملعوزتنيه ومن تميت اتغسل بماي دافي والحين احسن
والله ايسر على كل مربيه
رد مع اقتباس
