السلام عليكم ورحمة الله وبركاته
أبشركم خواتي اني ربيت ويبت أحلا " دانه "
يوم ولادتي: 12/6/2017
وقت ولادتي: 4:20ص
وعقبال اللي ما ربن بعدهن
بداية فلمي كانت من يوم الجمعه 11/6 الفجر, كنت أحس بويع وماي خفيف ينزل علي وأنا أتحسب افرازات عزكن الله
المهم طلعت أمشي فالصاله وأركب الدري وأنزل على وعسى يزيد الطلق, لكن ما ياب نتيجه وتميت على هالحال لين السلعه 3 الظهر صدق يوم يقولون طلق البنت بارد. واميه شريتني زعتر وعقب شربت ماي ورد ويا زعفران والطلق هو هو اللهم ينزل عليه هالماي اللي كنت اتحسبه افرازات واتأكدت انه ماي البيبي لما خذتلي دش حار نزل عليه وايد وكان فيه شعر البيبي سبحان الله, وأبغم على امايه وانا فالحمام أقولها اتزهبي بنسير المستشفى
واني امستشفى دبي, طبعا طول الدرب فيه ويع لكن أتحمله مب هاك الحار, في الطوارئ قالولي ان فاتح عندي 1ونص
.gif)
طبعا صدمه وخفت يولدوني قيصري مثل ما استوالي بولدي في مستشفى الوصل. وسوولي أدمشن وخلوني في غرف ماقبل الولاده وكانت وياي حرمه فيها الطلق عمرها 40 سنه وبتربي ببجرها ماشاءالله عليها, عاد أنا يوم سمعتها برد الطلق عندي >>مووول مب وقته. وكانوا وياي امي واختي ومرت اخوي فقلتلهم سيروا واذا زاد الطلق بتصل وريلي بين فتره وفتره يتصل يتطمن علي
بعدها يتني النيرس وكانت من هذيلا الخوال مال افريقيا اللي دمهم خفيف والله ونستني وايد, وخلتني أمشي في الممرات لين مازاد عندي الطلق عالساعه 12 الفليل, فحطتلي التخطيط مال التقلصات وقالتلي ريحي عشان يكون فيج قوه حق الولاده, وطول الوقت وأنا أشوف اللي اين يربن وأنا بعدني يالسه وأسمع زعيقهن وادعيلهن وادعي لعمري, لين استوت الساعه 2 الفير وبدا الاكشن الصح
يت الدكتوره اتشيك قالتلي 4 ونص
.gif)
وانا خلاص بموت ابا اربي, وحليله قالتلي ما دام انتي مصره عالولاده الطبيعيه باذن الله حنولدك طبيعي, ويلستلي كل ما اييني الويع اتوسعلي من تحت ومن يروح توقف وعطتني ابره تخفف عني الويع ووسعتلي من 4 ونص لين 8 في ربع ساعه, بس اتخيلو الوضع وانا روحي خلاص
.gif)
, وهني اتصلت بريلي ثلث ساعه هو عندي وكانت النفس فاتحه عندي 10 والنيرس اتقول أنا أشوف الراس بس بعيد ما اقدر اسوي شي لازم انتي اتسوين بوش كنج فالحمام, وانا الطمه أقولها ما عرف وديني الحمام بسوي هههه, وسويت بوش لكن أحس مافيني حيل والابره خلتني مثل السكرانه الله يعزكن بس أحس بالالم, واتيني دكتوره كانت مواطنه الله يذكرها بالخير وجان اتقول لريلي اظهر خاري شوي, واستلموني هي نيرستين (يعني 2 نيرس معلوم؟) وحده اتشد عتحت ووحده عاليمين ووحده عاليسار, وأنا وين تلقوني بس خلاص قلت بسلم نفسي لله ويوم قالتلي الدكتوره البيبي وصل فمكان مايقدر يتنفس ولازم تغطين ضغطه وحده عشان ما تخنقينه, ردتلي الروح شوي وضغطت بكل ما اوتييت من قوه خخخخ
.gif)
وهي صرخه وطلعت "دانه" عقب ماشفت الموت والله وحطوها عصدري وهي طالعني وخذوها عشان يغسلونها وكانت الساعه 4 وثلث مع أذان الفير
وهني طلعتلي سالفه ثانيه
قلت للنيرس أحس شي يابس فبطني والم مثل الطلق واتنش وحطت اديها الكف كامل وأنا عاضه الفراش وأناعر وطلعت قطع من المشيمه وحطت يديها مره ثانيه تتأكد اذا في شي وأنا اقول هي خاربه خاربه وعقب خلاص
.gif)
يابوا بنتي وأذن ابوها في اذنيها وقلتله ان يبتلي طاري الحمل مره ثانيه ياويلك وهو يقولي لاخلاص وايد تعبتي ويلس اونه يفتن عبنتي ليش اتعبين ماما هههه وودوني عالغرفه, واتصلت في اميه اتقولي ها زاد الويع خخخخ اقولها امايه انا ربييييت وقامت اتصيح من الفرحه ووعت اللي فالبيت كلهم وكانت الساعه 5 الفير.
والحمدلله عسلامتنا
وعقبالكن بالولاده السهله
رد مع اقتباس
