عنوان الموضوع : ""قصتي مع الحمل"" كاملة بأجزاء متتالية لسلامتك
مقدم من طرف منتديات الضمير العربي

السلام عليكم ورحمه الله وبركاته،،
أنا كتبت نص القصة في موضوع ثاني، بس بعد تفكير حسيت أنه القصة تفقد حويتها مع تراكم الصفحات، ولما تتخلل الأجزاء ردود هالشي يخلي المتابع يضيع الأجزاء، والخلاصة، بصف الأجزاء ورا بعض واتمنى محد يرد لين ما يشوف كلمة "النهاية"،، عقبها لا تحرموني من ردودكم الطيبة ودعواتكم.
وهذي كانت مقدمتي في الموضوع القبلي:
" السلام عليكم ..
هلا خواتي،، بتستغربون من مشاركتي لأني نادرا ونادرا جدا ما اشارك في المنتدى الأغلب أني بس اتابع من بعيد لبعيد،، المهم اليوم حبيت احكيلكم قصتي مع الحمل، للعبرة والعظة لا لشي آخر..
واتمنى أن كل وحدة خاطرها تحمل، أو, حملت وطيحت، أو عندها عيال ،،، تقرى قصتي وتحمد ربها على النعمة إللي هي فيها..
صح أنه همي كان نقطة عند هموم الصابرات لعشرات السنين، والمجاهدات من مستشفى لثاني لعشان تشوف ضناها.. بس الكل يعيش تجربه وقصه غير عن الباقي وفي النهاية علينا الحمد والشكر..

ما بطول عليكم،، بنزل القصة على اجزاء،، كل يوم بنزل جزء،، وإن شاء الله ما بأخر عليكم، في نفس هالوقت بكون الجزء نازل.. بإذن المولى عز وجل.. وسامحوني إذا شفت همي كبير لأني اعرف أنه همي صغير صغير وايد جدام هموم الكثير من النساء..."
وألحين خلنا نبدأ...

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
الجزء الأول..
بسم الله الرحمن الرحيم
ما اعرف كيف ابدا احكي اللي صاري لي، سبحان الله حياة الإنسان إلا ما تهب بها عواصف، فإذا كان بنيانه قوي بيواجه العاصفة الين ما تنتهي بثبات، بس إذا كان بنيانه ضعيف بينهار ببساطة جدام اضعف عاصفة..
مرت على تجربتي تقريبا فترة طويلة، وبصراحة هالفترة كانت كافيه تخليني اتجرأ واكتب القصة بحيث أنا من المتابعين لهذا القسم واحب اقرا فيه حتى من قبل ما أعرس ..
المهم أنا مثل أي وحدة تعرس أو بالأحرى أنا مثل اي حرمة في هالدنيا ودها تمسك ضناها بين يديها، أيام العزوبية كنت اربي عيال خواتي يوم يكونن في الدوامات، والله قدر لي ما احصل وظيفة، ف قعدت في البيت وشي طبيعي أني امسك عيال خواتي ع الرغم أني كنت امسكهم ايام الدراسة،
المهم بعد ما تخرجت تقريبا بنص سنه ملجت وعرست، والشي الطبيعي أنه تراودني أحلام أني أكون "أم"، بصراحة شعور حلو وممتع أنك تشوف حلمك شوي شوي يتحقق لاسيما أني مثل ما ذكرت من قبل (أحب اليهال بجنون)..
كتب لي ربي الخير وعرست، خذت ريال طيب كريم حنون تتمناه كل بنت، عشت وياه ومازلت أعيش أجمل أيام عمري "ما شاء الله تبارك الرحمن"،، بس ع قولتهم لكل فردوس شيطان، سبحان الله الشيطان على قولتهم شاطر، تدرون ليش؟؟؟
لأنه ببساطة يدخل على الإنسان من زاوية الضعف (يعني بالبلدي يعرف نقاط الضعف عند الإنسان ويركز عليها) المهم أنا كنت افكر وايد بسالفة اليهال وهالشي كان مسبب لي أزمة كبيرة.. ومعكر علي حياتي اللي بحكم الكل حلوة بكل المقاييس والمعاير..
بصراحة ما قدرت اتحمل الأفكار اللي تراودني فضطريت وخبرت ريلي، وكان رده منطقي جدا لأنه قالي بدري وتونا معرسين وإللي الله كاتبنه بيصير..
أنا مؤمنه بالكلام إللي قاله بس (والمصيبة ف هال بس) ببس كنت بعدني افكر بالسالفة اليهال ... وسبحان الله ربكم عندك حكمة عظيمة لأنه التجربة إللي مريت فيها صدق علمتني كيف الإنسان يتوكل على الله وما يستعجل الرزق..
وهذي نقطة مهمة خوات ادخيلكم لا تسون نفسي لا تستعيلون الرزق، ادعوا وطلبوا رب العالمين وكرروا الدعاء بس لا تمون تقولون ليش ما استجاب دعائي..
تابع...

__________________________________________________ __________

>>>> الرد الثاني :
الجزء الثاني

المهم مر الشهر الأول ويتني الدورة ، بصراحة كنت متوقعه هالشي، لأنه ما مر على زواجي إلا فتره قصيرة واااايد..
وبعدين مر الشهر الثاني ويتني الدورة، هنيه كانت الصدمة لأني كنت متوقعة أني احمل وزوجي بالمثل، وبصراحة "حسيت" أنه زوجي كان يحسب لي متى تيني الدورة، حتى في نفس اليوم سألني" صليتي الظهر؟" عاد هنيه تورطت واعترفت أنه الدورة يتني، سكت وما قال أي كلمه .. ولا حتى بين أنه زعلان أو شي من هذا القبيل.
ومن ناحيه ثانية، كانن خواتي يحنن ويزنن علي حملتي؟؟ شو تحسين؟؟ بتحملين هالشهر؟؟ متى موعد الدورة؟؟ حسبي ايام التبويض بتساعدج وايد..
هنيه بصراحة ما قدرت اتحمل وقلت الشهر الياي لازم احمل...
وفي نفس الليله إللي نزلت على الدورة قبل ما نرقد سألت ريلي :
- كان ف خاطرك أكون حامل هالشهر؟؟
رد علي بعفويه:
- محد ما يكون في خاطره ياهل..
هنيه انجلبت الصوب الثاني ونزلت دمعه من عيني ..
مرت الأيام وكان شهر رمضان على الأبواب، عاد قبل رمضان رحنا دبي وبتنا هناك ليله بصراحة كان موعد الدورة للمرة الثالثة،، بس بصراحة بديت احس أنه في شي يتغير بجسمي مثلا احس بثقل في صدري، واسير الحمام عزكم الله وايد، واشتهي على اشياء معينة... يعني الأعراض الأعتيادية للحمل..

اتذكر كنت اطلب من ريلي جبس عمان ما أدري ليش بالذات هالجبس وكنت اقوله لبي نداء الطبيعة،
كنت اقصد الوحام،، بس ما كنت متأكدة أني حامل ..

خفت أكون غلطانة أو اتوهم فسكت وما خبرت حد بشكوكي عن الحمل حتى ريلي، وقلت بصبر ومرت 3 ايام على موعد الدورة، هنيه يتني بارقه أمل وقلت يمكن حامل ورحت معا ريلي الجمعية ولما كان يحاسب على الأغراض قلت له بروح الصيدلية بخذ لي غرض خاص، قال لي اوكية، ومن طيب أصله ما سألني شو بخذ أو شو خذيت...
المهم قلت بتريا الفير أحسن علشان يطلع الاختبار أكيد (ما أدري ليش في ذيج اللحظة كنت متأكدة أني حامل)،،

__________________________________________________ __________

>>>> الرد الثالث :
الجزء الثالث
المهم ما رمت ارقد ذيج الليلة، قلت حق ريلي اسبقني وأنا بصلي شفع ووتر وبيي ارقد، صلت بس ما لحقت ريلي، مسكت أرشادات الجهاز وقعد اقرا واعيد وازيد، ماريد الخبط وتطلع النتيجة غلط، قريت الأرشادات مرة واثنين وثلاث لين تقريبا ما حفظتها، كنت متوترة وايد،
بصراحة أول مرة اجرب هالجهاز، وعلى فكره كانوا مسوين عرض على جهازين وقلت بخذه احتياط..
المهم أول ما اذن قمت، بالرغم من اني رقدت رقاد متقطع وكله تجليبات ودنيا وحوسه، وكوابيس، اتذكرت ايام الدراسة كيف كنت اتوتر أيام النتائج والامتحانات، وبصراحة اكتشفت أنه معاناة الدراسة ولاشي جدام الحياة العملية، قمت من الرقاد وجني اتريا هاللحظة اللي قول فيها الله أكبر، وطيران ع الحمام عزكم الله وسويت الفحص واتريت ما طلع شي قلت بروح اصلي واوعي ريلي وبرجع اجيك على الجهاز،،
صليت ودعيت ربي يفرجها عني،، وسبحان الله لكل شي حكمة لأني عقب
انصدمت بالخط ...

المهم زعلت شوي، وريلي لاحظ هالشي، بس تم ساكت يترياني ابدأ واتكلم عسب ما يكون ضاغط علي..
المهم مر اليوم على خير حاولت اتناسى الموضوع بس تم في بالي ما قدرت يمكن لأنه هذا طبعي ما اقدر احمل الهم بروحي لازم افضفض عند حد..
وبصراحة يوت الجهاز في الحمام (داخل كرتونة الكلينكس) علشان ما يشوفها ريلي، وتميت كل ربع ساعة اجيك لعل وعسى تتغير النتيجة، ما اعرف ليش؟؟
بتقولون شو هالهبلى؟؟ خلاص النتيجة نتيجة سالب وإلا موجب، بغض النظر، ذيج اللحظة المفروض أني اشكر ربي واقول فرصة علشان ارتب اموري وهذي حكمة من رب العالمين..

سبحان الله ما فكرت باللي سوت هالأختبار فوق الميت مره وطلعت مب حامل، منوه أكبر همه؟؟ّ!! ذيج اللحظة ما فكرت بهالطريقة.. الله يهديني بس
المهم...
في الليل قبل ما نرقد قعدت اسولف ويا ريلي، وفي لحظتها بصراحة ما قدرت اتحمل قلت لازم اخبره، قلت أنا آسفه أني سويت شي ما خبرتك به، (لأني متعوده أخبر ريلي بكل شي) وقلت له عن سالفة الجهاز وأني طلعت مب حامل... هو قالي وكلي امرج لله وحطي الرحمن في صدرج،، والتفكير هو اللي متعبنج يوم الله يكتب لنا عيال بتحملين ..
عاد أنا تلومت وايد وفتحتها مناحة وقعدت اصيح من الخاطر حتى خيست فانيله ريلي دموع ..
بصراحة حسيته ارتاح لأني فضفضت اللي في قلبي، لأنه شايفني حزينة وكاتمة، ولما كلمت بهمي ارتحت وايد..
المهم حاولت أنسى الموضوع،، بس فيه شي غريب أنه ما صار،،( الدورة ما نزلت!!! ) سألني ريلي قلت له ما أعرف السبب؟؟؟ قلت له بتريا شوي يمكن متأخرة مر أسبوع ....
عشرة أيام....

__________________________________________________ __________

>>>> الرد الرابع :
الجزء الرابع
كنت مستغربه ليش تأخرت علي الدورة كل هالمدة ، بعدها،، قلت بروح العيادة اجيك وايدني ريلي، وبالفعل رحنا كانت أول مرة ادش فيها عيادة النساء والحوامل ، وتريت وايد لين ما يت الدكتورة ونفسيتي تعبت وايد حتى ريلي حاول يرفه عني بعد ما طلعنا، لأني كنت مضايقة يمكن لأنها أول مرة اروح هالعيادة وأكون بروحي في التجربة، عقب وداني المطعم وتغدينا بس بعدني كنت خايفة من هالتجربة..
سويت فحوصات وطلعت النتائج سلبية وما فيه حمل، عطتني الدكتورة حبوب تنزل الدورة وقالت لي إذا ما فيه حمل بعد 5 أيام بتنزل الدورة ..
لما عرفت أني مب حامل عشت حياتي طبيعي وتقبلت الموضوع بروح رياضية، يعني مب روح رياضية 100% أول شي انصدمت لدرجة أني اتصلت حق العيادة مرتين علشان اتأكد من الفحوصات، وفي كل مرة تقول الممرضة أنتي مب حامل، عقب سلمت أمري لله، وحاولت اتناسى سالفة الحمال حتى أني كنت عادي اركض على الدري، واشتغل في البيت، وامارس حياتي طبيعي، بس بعده كان في نفسي خوف اكون حامل واظلم البيبي بهالتصرفات لأنه الدورة ما نزلت..
عقب بدأ رمضان " ابصراحة كان بخاطري اصوم رمضان كامل لو مرة وحدة في حياتي" وهالشي ما بيصير إلا إذا كنت حامل..
مرت 5 ايام وما نزلت الدورة هنيه استغربت وايد، فاتصلت على الدكتورة وقالت لي اتريا 7 أيام وإذا ما نزلت الدورة تعالي وبعيد لج التحاليل..المهم قلت حق ريلي وقال خير إن شاء الله ،
ومر 11 يوم ،، بعدها قمت ادور في النت، عن أسباب تأخر الدورة، واكتشفت أنه فيه احتمال أنه يكون حمل متأخر، علشان جيه قلت بجرب الجهاز الثاني وسبحان الله طلع خط خفيف خلاني اشك أني يمكن أكون حامل..
فرحت فرحة كبيررررررررررررررة، بالله عليكم كيف ما افرح والأمل بدأ يتجدد، شعور بأنه في داخلج روح بصراحة شعور خياااالي، لما تحطين أيدج على بطنج وتتحسسين مكان البيبي يتولد في نفسج شعور بالبهجة، وخاصة للي حياتها روتينيه، يعني توعي تآكل تنظف تزور أهل ريلها وأهلها وبس، يعني حياه نطاقها ضيق، فالبيبي يولد فيها بهجة وتجديد عجييييب..
لحظتها فرحت وايد ومن الفرحة نزلت دموعي وأنا اخبر ريلي، بس من الخوف كان قلبي ينتفض، خفت أنه يكون وهم، أو خطأ بالجهاز
ولما خبرت ريل قالي لازم ترجعين العيادة، قلت له خلاص بخذ موعد باجر الصبح..
وسبحان الله في اليوم اللي بعد ...

__________________________________________________ __________

>>>> الرد الخامس :
الجزء الخامس

وسبحان الله في اليوم اللي بعده ...
وكان في رمضان لاحظت نقطة بنيه في ملابسي، شكيت أن هذي بداية الدورة، تريت لين الصبح ونزلت نقطة ثانية لونها قريب من الدم فتأكدت أنها الدورة بالرغم أنها ما تنزل لي بهالصورة في البداية تنزل بغزارة بس قلت في نفسي يمكن هذا استثناء ..
اتصل لي ريلي من الدوام في نفس اليوم يبا يذكرني اخذ موعد، وقلت له خلاص نزلت الدورة، ..
قال خير إن شاء الله، وما زاد في الكلام علشان ما يجرحني أو يزعلني..
المهم عاد أنا مسويه فيها خبيرة أعشاب رحت وغليت لي دلة قرفة وقعدت اشرب منها، لاحظت أنه ما نزل دم غير قطرة الصبح، عاد انا قلت لازمني شويه حركة، ورحت اتفلسف وكنست ونظفت البيت كاااامل، صدق ارهقت نفسي، بس بعده ما نزل دم...
هنيه خفت وايد وقل أكيد أنا حامل ومن غبائي قاعدة اشرب قرفة، وقعدت اقرى في النت، اكتشفت أنه فيه نقطة دم تنزل بشكل طبيعي لما تنغرز البويضة في الرحم، وهالشيء يصير عادي لكل الحريم...
المهم قلت حق ريلي ضروري اروح العيادة، ورحت عيادة ثانية غير الأولية، تبهدلت من الزحمة بس سويت فحوصات ورجعت البيت قالت لي اتصلي في الليل بنقولج النتيجة..
المهم تميت خايفة ومتوترة وادعي ربي أكون حامل..
كنت مسويه فحص دم المغرب بعد الفطور، ولما رجعت البيت قعدت ويا أهل ريلي في الحوي، كنت وياهم جسد بس روحي ظلت في العيادة تتريا النتيجة، وقلت إذا كنت حامل بيكون هالجنين متعلق بالحياة لأنه إللي كنت اسويه كله خطر على البيبي، وقلت إذا طلعت حامل بحافظ عليه بحياتي، تعلقت عيوني بالسماء ودعيت من الخاطر أني أكون حامل..
اتصلت لهم قبل ما تسكر العيادة بعشر دقايق، قالت لي اسكر وبترد تتصل بي، المهم اتصلت لي بعد عشر دقايق،، وقالت لي بتوتر:
أنتي حامل مدام بس بكره لازم يجي مستشفى........
قالت كلام وايد بس ما سمعت إلا انتي حامل بس، فهمت من كلمها هرمونات حمل، مشكلة بس ما فهمت زين، لأني كنت فرحانه وايد...

تريت ريلي بفارغ الصبر وخبرته أني حامل استانس وايد، وقلت له :
- ما بتقولي مبروك ؟؟
- قالي أنا المفروض إللي يباركولي..
حسيت بريلي فرح وااايد، أكثر من فرحتي أنا..
المهم تغاضيت عن كلام الممرضة لين اليوم الثاني، رحت العيادة في اليوم الثاني، كنت أطول وايد في العيادة من كثر الزحمة وكنت اروح بروحي بالرغم من انه ريلي اقترح علي اشل حد وياي، بس أنا رفضت بحجة أنه أنا اتعب وما اريد حد يتعب وياي بس علشان يكون مرافق..
صح كان الانتظار متعب بس في نفس الوقت كنت فرحانه أني حامل وهالتعب بنساه مع مرور الأيام ويوم أشوف ضناي بين يديني..