جيت أقتل الفرقا من بلاد لــ بلاد
........مل الطريق يشيلني فوق كتفه
وأنا بعد مليت من كثر ما أرتاد
........هالشارع اللي كان لك فيه شرفه
تظمأ عيوني شوفك , وتشبع سهاد
........عيا الزمن يقطع ظماها بــ رشفه
لاوجهك أسقاها , ولا ذاقت رقاد
......ماغير طيفك , طيفك اللي أعرفه
كنه ظبي , وعيوني ظلال صيـاد
........يجفل قبل يرتد للجفن طرفه
مشكلته أنه كل ما أشتقت يزداد
.......حتى ملا جدران وقتي وسقفه
وأصبحت أشوفه فـ أول آلغيم لاجاد
....وفـ أقصى الشفق لاطاحت آلشمس خلفه
وفـي الأرض لانامت عقب صوت رعاد
.........وفي كل شباك صحت منه درفه
أتعبت طيفك لوم , واللوم مافاد
........ويوم الأمل في شوفتك مات نصفه
نويت أسافر عنك بجروح جداد
........وعمر من أوراق الزمن حان قطفه
نويت , لكن جابني آلشوق منقاد
......وجابك حنينك , والزمن سال عطفه
شفتك تبـسـم لي خجل مدري عناد
.......وفي نظرتك شوق من آلظلم وصفه
حسيت كني طفل , وعيونك أعياد
........ياعيدي اللي له ورى الصدر رجفه
(( سـم اللقا صدفة , وأسـميه ميعاد
.........أنا أنتظرتك , وأنت مريت صدفه ))
مماأعجبني رشه عطر تحييكم
$$ لحظه شموخ $$
رد مع اقتباس
