السلام عليكم و رحمة الله و بركاته
شحالكن خواتي ان شاء الله الجميع بخير ,, ابصراحه في موضوع وايد افكر فيه من اتعينت !!!!
و هو : هل البنات يفهمن علي لما اشرح ؟ هل طريقة تعاملي مع البنات تناسب سنهن ؟ هل يعتبرني مثل اختهن الكبيره مثل انا ما اعتبرهن خواتي الاصغر ؟
بنقولن لي عطي درسج و انتي مرتاحه الضمير و ما يهمج البنات ! بصراحه انا واااااااايد يهمني البنات و اعيد و ازيد عشان الكل يفهم و الحمدالله ما عندي رسوب فوق المعدل الطبيعي ,, بس بعدني اتلوم ف البنات يوم اعاقبهن و الله ساعات ما ارقد من اللوم مع اني ما اجرحن ف الكلام ..
انا حبيت اطرح هذا الموضوع عشان بناتنا الطالبات و عشان خواتنا الامهات و عشانا نحن المعلمات , نريد نعرف شو في خواطر بناتنا ؟ شو يتوقعن منا ؟ و نحن بنرد عليهن ؟و بنكون ان شاء الله عند حسن ثقة الاهل فينا ..
حطي عزيزتي الطالبه مواقفج مع معلمتج , و ليش تتعاملين معاها بطريقة معينه , و شو الاسلوب اللي تحسين بينفع معاج عشان تتفوقين دراسيا ؟
.
و انتي اختي الله يعينج ع البنات اللي يفورن الدم ( طبعا لا يخلو صف منهن) بس اكيد انهن بنات محتاجات عطف و حطي ف بالج انه ممكن تكون بنتج او حق غالي عليج في نفس الموقف و عامليهن بطريقه زينه , و انتي اختي الام ممكن تساعدينا لانه اكيد بنتج بتخبرج عن مثلا المعلمة الفلانيه اللي عاقبتها اليوم او مدحتها و انتي قوليلنا كيف كانت ردة فعل بنتج ..
ادري طولت عليكن بس عشان مصلحة بناتنا ,, و الله يوفق الجميع ,,
رد مع اقتباس
