السلام عليكم والرحمه
شحالكم خواتي
من زمان ما نزلت موضوع فهالقسم
اليوم بحط وصفه للمقلوبه خذتها من شيما سيف
وغيرت فيها شوي
بسم الله
نبدأ بالمقادير:
عيش بحدود ثلاث ارباع الجيله
خضار مشكله ( جزر-بطاط-كوسا-باذنجان) مقطعه شرائح
بصل مقطع شرائح
كزبره مفرومه
طماط مقطع شرائح
فلفل رومي مقطع شرائح
بهارات مشكله (فلفل اسود-ملح-كركم-كمون-كاري-بزار)
صلصة طماط
دياي مقطع شرائح
الطريقة:
أول شي طبخت العيش بس ما طبخته كامل يعني تقريبا ثلاث ارباع طبخه
بعدين قليت الخضار والدياي (الدياي ضفت له شوية كركم)
بعدين قليت البصل (استخدمت نفس الزيت اللي قليت فيه الدياي) لما ذبل حطيت الفلفل الرومي وخليته شوي لين احسه انطبخ شوي
بعدين ضفت الطماط وشويه من البهارات
بعد ما ذبلت الطماطم حطيت الكزبره وشوية صلصه وحطيت بهارات
بعدين ضفت شويه ماي عساس تستوي عندي صلصه
بعد ما يغلي شوي ويقل الماي ضفت الدياي وبعدين حاولت اصف الخضار وخليته شوي
اخر شي ضفت العيش وضغطت عليه شوي
وقصرت ع النار وخليته تقريبا عشر دقايق
بعدين طفيت النار وخليته شوي وعقب جلبته ع صحن التقديم
اتمنى الصوره واضحه
للأسف ما صورت الخطوات ما كنت حاطه فبالي اني بحط الموضوع بالمنتدى
اتمنى تعجبكم الطريقه
رد مع اقتباس
