من ساعة ما عملت مدونتى وقلت لازم اعبر عن حب امي مع أن أى كلام مش هيوفيها حقها ابدا بس هحاول أطلع اللى جوايا ومع أنى عارفة أنك مش هتشوفى الموضوع ده بس أكيد فى يوم من الأيام هوريه ليكى أو أى حد غيرى هيعرفك بالموضوع
ميلاد أمى يوم 28 /12
وبجد بتمنى لك دوام الصحة يا أحسن أم فى الدنيا كلها مش عارفة بجد أكتب أيه الكلام ضاع منى
بس عايزاكى تعرفى أنى بحبك قوى قوى فوق ما أنتى متخيلة وأنك أهم أنسانة فى حياتى
وجودك مهم جدا وأثر فيا بشكل كبير
كل سنه وإنتى طيبة وعقبال مليون سنه وإنتى بكل خير وصحة
صدقينى مفيش كلام هيقدر يوصف شعورى بيكى
ياريت تسامحينى على اي حاجة عملتها ضايقتك بس بجد أى حاجة بعملها تضايقك بيكون غصب عنى ياريت تسامحينى يا أحسن وأحن أم شفتها فى حياتى
أمى اللى علمتنى كل حاجة كويسة وخلتنى كويسة كده قدام الناس بسبب الصفات اللى زرعتيها فيا
عرفت منك معنى صلة الرحم بجد
عرفت منك أزاى أكون كويسة مع الناس
عرفت منك أزاى أعمل صداقات ويمكن الحكاية دى بقت بضايقك بسبب صداقاتى الكتيرة وكمية الأصدقاء اللى عندى
بس صدقينى أحسن حاجة الصداقة الحقيقية اللى بجد
عرفت منك أزاى أقف مع الناس فى كل أزماتهم وفرحهم ومرضهم وحزنهم
عرفت منك أزاى أحب قرايبى وأحب أخواتى وكل الناس
عرفت منك حاجات كتير لو فضلت أقولها مش هيكفينى مليون موضوع
عرفت منك معنى الحنان
يارب تبقي معايا أمى وحبيبتى اللى بدأت تفهمنى بجد
عارفة أنك نفسك تحصلى حاجة واحدة وهتكونى أسعد واحدة فى الدنيا
بس معلش أعذرينى اذا كنت أنا مأجلة الحاجة دى شوية مش بمزاجى غصب عنى صدقينى أنا نفسى بجد أفرحك وأخليكى أسعد أنسانة فى الدنيا
وإن شاء الله قريب هفرحك بأخبار كويسة عن شغلى وهتفتخرى بيا قوى
بس برضة الحاجة اللى أنتى لسة عايزاها منى علشان تكون الفرحة الكبيرة لسة ماجاتش نفسى بجد تيجى الحاجة المناسبة علشان أفرحك والله
يا أغلى أم
أتعلمت منك معنى التضحية اللى بجد واللى بشوفها فى كل تصرفاتك
أتعلمت منك أزاى أكون ست بيت وطباخة ماهرة وأن أهم حاجة للبنت أنها تكون أولا ست بيت ماهرة
لأن نجاحى فى شغلى مهما كبر مش هيعوض انى أكون ست بيت كويسة
لازم الأتنين مع بعض
بشكرك جدا على كل حاجة علمتيها ليا
أمى مش عارفة أقول أيه ولا أيه بس أنا بحبك قوى قوى
بشكرك على كل حاجة علمتيها ليا وعلى كل حاجة أكتسبتها منك
علمتينى أكون صاحبة صاحبى
علمتينى أكون جدعة ووفيه مع كل الناس
علمتينى أزاى اكون أجتماعية بس من غير ما أكون منفتحة زيادة عن اللزوم
علمتينى بجد حاجات كتير مش هقدر أقولها كلها
أكتسبت منك الطيبة والحنية والتضحية وحاجات كتير قوى خدتها منك
أنا عارفة أن كلامى ممكن يضايق ناس أمهاتهم مش موجودة بس برضة مش قادرة ما أعبرش عن اللى جوايا تجاه أمى
تعرفى بحب قوى نقاشاتنا اللى كل واحدة مننا بتكون على رأى ونفضل نحاول نقنع بعض وفى الآخر ينتهى النقاش وكل واحدة مصممة على رأيها ومقتنعة بيه
تعرفى حسيت بمشاعر حلوة قوى لما حصلت ليا مشكلة مع شخصية ما فى شغلى كانت متطلفة جدا عليا وبتدخل فى كل حاجة فى حياتى وبتقولى كلام جارح قوى كنت بفرح لما أرجع البيت وأقول لك على اللى حصل بينا وتقولى ليا جدعة فى ردك عليها وكمان تحاولى تهدينى من اللى أنا فيه لأنك عارفة أنى مضايقة من كلامها اللى جرحنى قوى وضايقنى بطريقة مش بطيعية ولأنها مش عايزة تسيبنى فى حالى ومش أنا لوحدى اللى زعلت منها لأ دول كمان زمايلى فى الشغل زعلوا من كلامها وحاولوا يبعدوها عنى
تعرفى أنا بحبك قوى
تكون يارب تحصل الحاجة اللى إنتى مستنياها علشان تفرحك
رد مع اقتباس
