عنوان الموضوع : مخطوووبه ولا معلقــــــــــــــــه .... !!!! عالم الامومة
مقدم من طرف منتديات الضمير العربي



علووومكن حبيباتي بنوتات و حريّم... ولهت عليكن .. صار لين فترة ما كتبت موضوع ... بس قاااعدة اوني مستمعة ...

المهم يا حلوات اليوم انا حادرة بس عسب اكتب موضوع بلسان اربيعتيه .. لانها متابعه جديمه لمنتدانا بس من البعيت و اليوم سجلت عدنا بس ما رامت تكتب الموضوع لان عضويتها ما تفعلتدايركت ما ادري ليش .. وحاولت انا من صوبي ادخل بنكها بعد عطاني نفس المسج ..

((أختي الكريمة : عضويتك بانتظار اعتماد الإدارة ، وسيتم التفعيل قريبا إن شاء الله))

المهم خواتي المشرفات دخيلكن اذا تكرمتن تشوفولنا شو المشكلة ...

زين يالغاليات ما بطول عليكن ادري بعمري هذربان .. و ان تكلمت ما اسكت ..
المشكلة هي كالآتي ..طبعاً هيه كاتبه بس انا لازم ارز بالويه و اضيف لمساتي .. و هيه حليلها ما قالت شي .. اوني ((أم العرّيف)) حاولت اساعدها بس ما لقيت غير اني اقولها اصبري وربج كريم وان شاء الله ربج بيفرجها .. انتن عااده لا تبخلن عليها بردودكن الطيبة... >>>> اف بسج عااد قولي السالفه صدعتينا ..

================================================== =====

السلام عليكم و رحمة الله و بركاته ..
خواتي الغاليات .. رغم ان هاااي اول مشاركة اليه في هالمنتدى بس الشاهد الله .. اني من زمان حابتنه و خاطريه اكون وحده منكن ..

المهم ما بطول عليكن فالرمسه .. و بقولكن سالفتيه .. و عسى القى عندكن حل للي انا فيه ولا على الاقل رد يبرد قلبي ..
السالفة و ما فيها .. اني من فترة .. عرفت ريال كل اللي عرفته عنه انه متدين و خلوق .. قال انه يباني عسنة الله و رسوله .. لا انا ولا هو كان قصدنا لعب و خرابيط ولا سوالف مراهقين (للعلم .. انا عمري 28 وهو أكبر عني بـ 5 سنوات ) المهم فالبداية واجهتنا مشكلة كيف يخبر هو هله عني و انا كيف اخبر هليه .. خاصة هليه لاني كنت خايفة يرفضونه لسببين .. الاول: فرق العمر رغم اني اشوفه عاادي ..بس ابويه مره رد واحد عسب عمره مع ان كان في نفس عمر هالريال ..
الثاني: انه مطلق و عنده عيال و عياله عنده مش عند امهم .. ولده عمره 3 سنوات و البنت سنه
المهم هو خبر اخته و اخته رتبت مع امهم وقالتلها السالفه .. طبعا من دون ما تنهز صورتي جدام امه او خواته كون اني كلمته قبل .. ونفس السالفه انا قلتها لامايه ... فالبدايه امي ترددت لانها ما تباااني اتوهق و اربي عيال او اشيل مسوؤليتهم خافت اني ما اكون قد المسؤولية لاني بكون توني عروس يديده .. المهم فالاخير امايه قالت اذا الريال زين ما يخالف طبعا صليت استخارة كم مرة ولين الحينه مرتاحه .. عقبها بكم من يوم امه اتصلة فاماية اتصال عادي ما طولت يمكن اقل عن (5 دقايق) وما طرت شي ابداً .. المهم مرت عالسالفة يمكن شهر او 3 اسابيع .. و انا اتريا تتصل امه تحدد يوم .. عقبها .. اتصلت امه .. امايه ما كانت عند التليفون .. ما ردت ... ردت تتصل امايه فالحرمه وهيه ما اترد .. تمينا ع هاالحال يمكن شهر غيره .. و سافرنا نحن .. بريطانيا ففرق التوقيت يفرق .. مرات كانت تتصل الفير .. يوم تنش امايه تشوفها دااقه ... اخر شاي قالت امايه من انرد البلاد بتتصل لها .. اكيد هيه بتعرف انا نحن مب فالدوله .. المهم الله يسلمكن (ادري طولت عليكن وقصتي والله جنها فيلم بعد فيلم هندي هههه ) المهم نرد لمحور حديثنا ردينا البلاد و امايه ردت تتصل لها مرتين ما ردت قالت اماايه عيب هم اللي ياين يخطبون بنتنا دقينالهم مرتين وحلفت امايه ما اترد تتصل (مش حلوه في حقي ولا في حق هليه) الحرمه اكيد شافت الرقم بس مطنشه (حسب ما قالت ماماتي) .. من عقبها ع غفله كنت انا فالصالون الصبح اتزهب حق ملجة ولد عميه ..جان تتصل امايه اتقول لي الحرمة اتصلت وقالت نباكم تحددون لنا يوم انيي عدكم نخطب بنتكم (فلانه) يعني يابتني بالاسم .. صح نسيت اقول على فكرة ابويه و اخويه سالوا عن الريال .. ومحد قال عنه شي غلط.. بس ما زال البحث جاري
االمهم سلمكن الله اامايه قالت نحن مرتبشن بالملجه و من نفضى بقولها حياكم الله .. .. اتصلت امايه فيها مره ومرتين .. ما ردت .. واخرتها اتطرش لامايه مسج تقول فيه .. بما معناه (اسمحيلي كانت عندنا ظروف وبرد ارمسج) وطاااااف لين يومكم .. وهو الريال ما قصّر كم مرة يقولها ابى اعرس و توسطن خواته يكلمنها و يدته .. والقهر انها اتقول ان شاء الله بتصل .. ولا تتتصل .. ليييييين مليت ويأست وهو يقول لي لا تيأسين خلي ايمانج بالله قوي .. بس انا تعبت والله كل يوم ادعي انا الله يحنن قلبها و تتصل .. مرات هو يقول بقولها اني كلمتج وعرفتج وخلاص اباج .. قلت له (لا ما ابى اطيح من عينها .. هيه ما تتدري اني كلمته و كارهتني باجر لو درت بطييح من عينها) .. والله يا بنات اني مب عارفه شو اسوي صدق احترت يعني لاني فالارض ولا ني فالسما .. معلقة .. و اامايه اخر مرة قالت ان كلمتني بقول خلاص ربي يرزق ولدج ويوفقه مع وحده غير بنتي .. و بنتي ياها نصيبها .. لان فالفترة اللي اترياه .. يوني خطاطيب اثنينه .. بس امايه قالت حرام واحد يخطب ع خطبة اخوه وما ردت عليهم ..
هوه يقول انها قالت له :ما يندرى يمكن تاخذ وحده تظلم عيالك .. لان حاليا هو ساكن مع امه و عياله ..وانا الشاهد الله اني احب اليهال و اموت فيهم .. رغم اني بيني و بين عمري اقول اخاف اظلمهم .. حرمة الابو فالاغلب اتكون شينه و يمكن يكرهوني رغم انهم صغار .. بس قالت انا بحاول اكسبهم ...

صح ما بطول عليكم .. خلال هالفترة فترة الانتظار اول ما سأل ابويه عنه ... اكتشف انه حرمه سارت تسأل عنه فالدوام .. عند مسؤوله وهو ما كان مداوم حزتها .. عقب خبروه الشباب انها بغت رقمه و عطوها .. المهم اتصلت به من تليفون شارع .. وقالت له: ابعد عن الشر و غنيله !!! يوم خبرني ينيت .. بصراحه كنت شاكة في حرمة ابويه لانها ما تتمنى لنا الخير .. بس امايه سالت ابويه بطريقة غير مباشرة قال ما خبر اي حد الا الرياييل اللي سالهم عنه .. عقب شكيت اتكون وحده من طرف طليقته .. المهم عقب يومين اتصل له ريال و قال له ابى اشوفك فالمكان الفلاني .. ويوم سار ... لقى 7 يتريونه وهو روحه حاولوا يجبرونه ان يبعد عني و اونه هم من هليه يبوني لواحد منهم ... لو من هليه ويينهم عني كل هالفترة !!! انا استبعدت يكونون من هليه .. المهم طلبوا منه يبتعد عني ولا يدفعلهم عسب يبعدون عن دربنا ومايقوفون في طريجنا.. بس هو قص عليهم وماطل وما عطاهم شي وفالمقابله الثانية معاهم اتفق هو وربعه انه يصورهم ...

مشكلتي الحينة مستغربة .. ليش امه مب طايعه تتصل رغم انا كل حد كلمها و اتقول ان شاء الله خير .. ويوعدني انها يمكن تتصل و اتريا عالفاضي .. احس انها احرجتني جداام هليه .. خاصة انا السالفه يت من صوبي يعني انا قايله لامي انه ربيع ريل اربيعتي ..وامايه تسالني سالي اربيعتج شو سالفتهم ... وابويه يسال امي ردوا عليج العرب ...
احس عمري تعبت نفسيا ولا اليه خاطر في شي ... كم مرة قلت له اسالها هيه خاطرها تيوزك ولا لا ؟؟ تباني ولا مش مقتنعه فييه ؟؟ رغم اني الحمد الله ما عليه قاصر الحمد الله حسب ونسب و تعليم ومنصب .. بس مستغربـــــه ليش ؟؟ عالاقل اتقول ما اباك تاخذها وخلاص .. لا هيه مصرة اتقول بتتصل ولا تتصل ..

اسمحولي غثيتكن وادري رمستيه مخربطة والله من حر ما فييه ..

اتريا ردودكن لو بكلمه طيبه ولا دعوة حلوة ..
محتارة_AD
==============================================

وبس يا حلووات هاي السالفه و ما فيها ... ما اباااكن عاااد اتفشلووني جدامها تراها يديدة في منتدانا .. و المشرافات مثل ما قلت لكن لو سمحتن اتشوفللي شو سالفة نكها ..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
الله يسرلج امرج وانشالله خير
بس شكلها الام مش موافقه عشان جيه اتماطل

__________________________________________________ __________

>>>> الرد الثاني :

المشاركة الأصلية كتبت بواسطة bint_alzaabi
الله يسرلج امرج وانشالله خير
بس شكلها الام مش موافقه عشان جيه اتماطل



انا مع الاخت..

و يمكن الناس اللي تحاول تبعد الريال عن ربيعتج هم يوصلون رمسه غلط لامه عنها عسب جي ماردت..

الله يوفقهم ان شاء الله و الله يكتب اللي فيه الخير..

__________________________________________________ __________

>>>> الرد الثالث :
تبين الصرااحه هم مطولين السالفه وهي قصيرة

امه ماا تباه يعرس وشكلهم اهل طليقته او يتقصوون اخبااره وومسوين شوشره

نصيحه حبوبة لاتااخذينه 00لانه هذا اولهاا ينعااف تاليهاااا

وامج مب مطلوب انهاا تتصل وتنزل من قدرهاا وقدرج 000يبونج

عندهم الرقم وبيتصلوون وشكلهم يماطلون عسب تتفركش الساالفه

ادعي يكون من نصيبج اذا فيه خير لج ويبعده عنج اذا كان شر لج

الله ايسر امورج وينولج الخير ويسعدج ياارب

__________________________________________________ __________

>>>> الرد الرابع :
الغاليه نصيحه مني شوفي نصيبج ولا توقفينه عند ناس مب مقتنعين فيج

الله يوفقج يا رب

__________________________________________________ __________

>>>> الرد الخامس :
ربي ايسر امورها