عنوان الموضوع : طالبتنكم بسافر ايطاليا ساعدوني في الامارات
مقدم من طرف منتديات الضمير العربي
السلام عليكم
خواتي قررت اسافر ايطاليا ميلان فينيسيا بحيرة كومو بحيرة جاردا في 1 نوفمبر
أحب اعرف عن عملتهم كم تساوي بالنسبه لنا وكم لازم الوحده اتحط ميزانيه مكسيمم لعشرة ايام سياحه وشراء هدايا للاهل
وأهم المناطق والفنادق في ه المناطق وهل في احتياطات لازم اسويها وأشياء لازم اخذها
عندي ولد وبنت صغار 3 سنوات ونص وسنة و9 شهور
من ناحية الملابس شو الأنسب في حد اقول الجو بارد ثلج وحد اقول الجو مايل للبروده احترت الصراحه
وشو الجو عندهم وبالنسبه للألعاب الترفيهيه هل تكون مفتوحه في بداية نوفمبر
يمكن أكون ناسي شي ذكروني وساعدوني
وبالنسبه للمواصلات شو احسن شي ااجر سيارة والا تكسي والا قطار
لاني قريت وايد مواضيع واتلخبطت
ابى معلومات دقيقه
وشو سالفه التاكس فري والسيارة الي بناجر ها منو بيسوقها يعني نحن والا واحد اسوقها
انا اسال لاني وايد خايفه على عيالي متعوده اسافر بلدان عربيه وإسلامية ونا منها خوف
واللهجة كيف الوحده تفاهم وياهم
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
وعليكم السلام ورحمه الله
هلا ختيه اولا تروحين وتردين بالسلامه >> افاا جان خبرتيني من قبل جان ايي وياج ههه
حبيبتي والله ماعرف بخصوص باقي الاستفسارات بس ان شالله حد مجرب يفيدج و اذا عرفت شيء برد لج بس بخصوص الملابس
هناك برررررد واضني شيء أمطار لانهم ع البحر المتوسط درجه الحراره 15 الحين
خذيلج لفه فالمولات وشوفي ملابس ثجيله واهم شيء سويتر بالطو جاكيت يحميكم من الأمطار او البرررد ولاتنسين الشمسيات عشان تكوني تحتها اذا شيء مطر
وطبعا لازم يكون وياج بنادول وباكيت نعناع او شيء اللي ف العلب تشربونه يكون دافي لان فرق ف تغيير الجو
بخصوص اللجه خذيلج كتيب صغير تعلم الايطاليه عربي وإيطالي او نزلي برنامج عالفون او ايباد بس مجرد تعرفي كم كلمه اساسيات وتراهم حبوبين
طبعا الحلويات والمخبوزات عندهم طرررررر والمطاعم وجي بس ديررررري بالج من لحم ... والحلويات بجيحطون فيها كحول نبيز عنب او جذي سالي قبل
وحاولي اذا كليتي شيء تذوقي عشان تعرفي كيف تسوين أكلاتهم ههه لانيه صراحه أموت فالاكل الايطالي والفرنسي والسويتز
__________________________________________________ __________
>>>> الرد الثاني :
هلا ختيه
انا كنت في ايطاليا في فييسينا شهر 6
التنقل في الجزيره كله عن طريق القوارب من توصيلين المطار انتي وشنطتج كلها ف القارب ويوصلج للفندق
وايد حلو وفي الجندول لازم تركبينه جوله في الجزيرة
عندهم ساحة سان موركو وايد حلوه كلها مطاعم والحمام في النص ان شالله بيساتسون الياهال والمحلات ع الاطراف
والاكل الايطالي احلى اكل هناك الباستا ما اوصيج لازم تجربينها والبيتزااا بعد
واممم ااذا بغيتي شي اسالي
__________________________________________________ __________
>>>> الرد الثالث :
روعه بس ما احسها تناسب حق الصغاريه لو ميلانو او روما احسن
__________________________________________________ __________
>>>> الرد الرابع :
في البداية انتي عندج عيال صغار
يعني يبون انتباه طول الوقت
ما أحس في هالسن المدن اللي اخترتيهم مناسبة لهم ! يمكن تتعبين شوية !
لكن على العموم هذا ردي على أسئلتج بالتفصيل :
400 ليره = 1 درهم اماراتي تقريبا
ميزانية لعشر أيام سياحة وشراء وهدايا : هذا يعتمد على شو اللي بتشترينه وكمية الهدايا اللي بتاخذينها
الفنادق والأماكن السياحية : ما حددتي الفنادق خمس نجوم والا أربع وإلا أقل !
ميلان : مدينة تعتمد على التسوق عبارة عن سوق مفتوح
وخاصة المنطقة اللي حوالين كنيسة الدومو أشهر كاتدرائية في أوروبا
والكونسيرج في الفندق ممكن يدلج على أقرب الآوتليت لج
(وفي منهم عندهم shuttle) يوديج الاوتليت ويرجعج حسب جدول معين
منهم مجاني ومنهم تشترين تذاكر
فينيسيا : تنتقلين من المطار الى مدينة فينيسيا بالطرادات
(يعني لازم تكونين حذرة وانتي وياج أطفال ريلج بيهتم بالشنط وانتي عينج عليهم)
في المدينة نفسها التنقل يكون مشي ! ماشي سيارات وكلها جسور وسلالم
يعني اذا عندج push chair بتتعبين كل ما وصلتوا جسر)
في فينيسيا اسكنوا في فندق قريب من ساحة سان ماركو أريح لكم !
كومو : مدينة ساحرة ورائعة تكفيها يومين !
اذا سكنتوا فيها ما بتحتاجون تأجرون سيارة
بتاخذون رحلة بالقارب في البحيرة لمدة ساعتين تشوفون المناظر الحلوة
ولا تفوتين عدالها (فوكس آوتليت ) حق المشاري!
بحيرة جاردا :
نفس نظام كومو ..
اذا حابين تأجرون سيارة فممكن في ميلان وطبعا ريلج روحه بيسوقها
لكن للاسف معظم سيارات التأجير في ايطاليا ما فيهم نافيجيشن
يعني لازم تاخذون الجهاز وياكم
الاشياء اللي لازم تشلينها :
أدوية الأطفال مال الزكام والحمى والاسهال والفيكس
وشي غريب بتستغربين له : الأوتي !
ويكون الصغير الخاص بالسفر
لأنه عشان السيفتي فنادق وايد ما ترضى توفر لج الاوتي ! يخافون من الحرائق!
الملابس :
الجو بيكون واااايد بارد ! شلي ملابس شتوية تكون ثقيلة وأهم شي الجاكيتات
المناطق اللي انتي مختارتنهم ما فيهم مناطق ترفيهية للاطفال
بخصوص اللهجة :
هذي المناطق كلها سياحية ومعظمهم يتكلمون انجليزي ويفهمون اللغة
التاكس فري :
اذا اشتريتي من المحل بسعر معين (لنفترض 150 يورو وأكثر)
يعطونج تاكس فري على المشتريات
دايما حطي في شنطتج كوبي من جوازج وجواز ريلج
بيعطونج الفورم تعبينه وتكتبين رقم الجواز
جمعي اوراق التاكس فري من كل المدن
والأغراض اللي بتشترينهم حطيهم في شنطة وحدة (ممكن في المطار يقول لج راوينا الأغراض)
يوم بتوصلين المطار (سيري قبل الـcheck inn بوقت)
اسئلي عن مكتب التاكس فري وعطيهم الأوراق بيختمون لج اياهم
وبيدلونج على مكتب استلام البيزات (عادة يكون بعد منطقة ال check inn والجوازات)
نصيحة ذهبية : اذا كانوا عادة يعطونج باليورو خذي البيزات باليورو
اذا سألتج تبينهم بالدرهم ؟ قولي لا !
لأنها بتحول الى الدرهم وبتاخذ فرق التحويل وبعد بتاخذ عليهم تاكس فبيكون المبلغ أقل)
وأي استفسار ثاني حاضرين
__________________________________________________ __________
>>>> الرد الخامس :
في منطقه قريبه من بحيرة جتردا اسمها سيرموني هيه عباره عن شبه جزيره بس رائعه انصحك تخلين لها يوم كامل
رد مع اقتباس
