عنوان الموضوع : الحضانه وبنتي كله تمرض ساعدوني سياحة الامارات
مقدم من طرف منتديات الضمير العربي

السلام عليكم امهات شخباركم
اتمنى تساعدوني وترشدوني بحكم ماعندي خبره الصراحه
بنتي عمرها سنتين ونص سجلتها ف حضانه سمعتها طيبه ووايد اوكيه واللي هي حضانة الابداع بين الشارجه وعيمان .. المهم من وديتها وهي كله تمرض وتمرض كل ويكند لازم حما وزجام وكحههه قسم بالله تعبتتت منهااا ومن هالبلاوي اللي اتيهااا وفوق ها كله وزنها ينقص وتغذيتها ابد مول ميحححححح مااتاكل بس تلعب بالاكل وتعفص الفواكه واي شي يعطونها اناف البيت اتلعوززز واتنرفزز كيف هم مساكين متحملين تصرفاتها ومايابها الضرب والطيب ولاالتخويف ولاا شي مول وكل شي وصخ تحطه ف حلجها وتيلف ورق الجدران والقراطيس والاستكرات كله بالاسنانها ساعدوني بليز بناتت كيف اتصرف وو بلاهم جي اسنانها ولا هاي حاله نفسيه وعن حضانه شو اسوي بسبة الامراض مع انه الحضانه نظيفهه ومرتبه وحلوه وايد

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
حبيبتي بالراضه على الصغيرونه

في هالسن عادي حبيبتي انها ما تشتهي الأكل عشان المرض ..

ممكن تحببّينها في الأكل بالصبر :

تسوين لها الأكل على هيئة أشكال جذاّبة

يعني تسوين لها البرتقال على شكل ورد بالقطاعة
البيض على شكل بومه بقالب يبيعونه في محلات الوعيان
أو مثلا التوست تقصينة بشكل دائري على الأطراف
وتدهنينه بلبنة وتسوينه ويه له عيون من حبتين زيتون أسود وحلج من خيار
أشياء جذيه يعني !

ووديها محل تشتري لها طقم للاكل من الشخصيات اللي تحبهن : يكون صحن وملة وكوب وكاس

وبخصوص الأشيا اللي تحطها في حلجها احتمال كبير يكون حالة نفسية !
أو لفت للنظر !!
انتي تابعيها في الروضه يمكن البنت متضايقة من شي واستشيري اخصائية نفسية .

وبخصوص مرضها أنا بأعطيج خلاصة تجربتي :

أنا لاحظت انه في المستشفيات الحكومية يكتبون لج الدوا الموجود عندهم بس
لكن ما يقترحون عليج أدوية ممكن تلقينها في الصيدليات ممكن تكون مناسبة ومكملة للحالة المرضية .

يوم كان حد من عيالي يمرض وهم صغار
أو نكون على سفر وهم مناعتهم منخفضة ويمرضون وايد
شارت عليّه الدكتورة بدواء مصنوع من أعشاب طبيعية يرفع مناعة الياهل

وفعلا استعملته ولا زلت أستعمله وهو مفيد بعد حق البنت أول ما تيها الدورة يخفف من الآلام

هو من شركة Himalaya

لكني نسيت اسمه أعتقد Bonnisan

اذا خليتيها كل يوم تاخذ جرعه منه (على حسب وزنها) وتخلص غرشة أو اثنين ان شا الله مناعتها بترتفع وما بتمرض وايد

وطبعا لازم تستشيرين الدكتورة اذا تعطينها هالدوا والا سنها بعده صغير !

وممكن تسئلينهم في الصيدلية عنه لأنه عندهم سلسلة من هالادوية الطبيعية المخصصة للاطفال
والله يخلي لج البنوتة

__________________________________________________ __________

>>>> الرد الثاني :
وعليكم السلام ورحمة الله وبركاته


طبيعي من يحتكون اليهال ببعض بيتناقلون الأمراض و بيمرضون بشكل مستمر لين يتعود جسمهم وتقوى مناعته بشكل طبيعي

بس ممكن تسوين أشياء تخفف عليهم مثل اضافة ذرة كركم للحليب الصبح
اضافة الهيل والمسمار وذرة كركم بشكل بسيط جداً للعيش الأبيض أثناء الطبخ وتودينه معاها الحضانة للغدا

قلة شهيتها للأكل ممكن بسبب قلة شربها للماي ونقص فيتامينات
نبهي عليهم في الحضانة يعطونها ماي، بعض الحضانات مايحبون يعطون اليهال ماي عشان مايخيسونهم بول
وانتي بعد كثري لها شرب ماي في البيت وعطيها عصير برتقال طازج بدون سكر

اصبري وبتتقوى مناعتها ان شاء الله

__________________________________________________ __________

>>>> الرد الثالث :
أستغفر الله العظيم الذي لا إله إلا هو الحي القيوم وأتوب إليه

__________________________________________________ __________

>>>> الرد الرابع :
يمكن ضروسها تطلع

__________________________________________________ __________

>>>> الرد الخامس :
عيالي هالفتره يمرضوا مع انهم ما يسيرون حضانه لكن اطلعهم ويحتكوا باليهال
لكن وزنها ينقص يبالج توديها المستشفى على الاقل تشوفين شو بلاها ويعطونها فاتج شهيه
اذا تاكل رمل تاكدي من نسبه الحديد لانه فقر الدم يسوي جيه
اما تعضض الغنفات او الدباديب يمكن اسنان
الحالة النفسيه تأثر لانه الياهل يبدي يفهم