عنوان الموضوع : !!! انا مصدووووومه !!! عالم الامومة
مقدم من طرف منتديات الضمير العربي
السلام عليكم ورحمة الله
خواتي ... الصراحه انا مصدومه ومب مستوعبه ان فيه ناس ممكن تحترف التمثيل والخداع وتتقنه لهاي الدرجه !!
أعرف وحده معرفه شخصيه لكن عرفت قصه حياتها والتفاصيل من كثر ماتكتب في المنتديات عن مشاكلها واسرار بيتها الخاصه ووين ساكنه بس ناقص تكتب رقم بيتهم لدرجه ان في المنتديات المختلطه الرياييل عرفوا زوجها ومسكين صار لبانه في حلوجهم وسبحان الله هو آخر من يعلم ... يعني بالمختصر كسرت حشمته واحترامه جدام الناس ... اكتشفت ان هاي الانسانه مسيّلمه الكذاب لو عاصرها بيرفع لها الرايه البيضا من كثر ماتجذب وتفتري على الناس وتمثل دور المظلوم وهي الظالم وحسبنا الله على كل ظالم مفتري واللي صادمني اكثر انها تتكلم عن زوجها واهله وحتى اهلها بكل سوء وتدعي عليهم دعاوي تعور القلب وجدامهم انواع النفاق والمراء مع ان زوجها رجل محترم ومب مقصر فيها واهله بعد ناس طيبين ولما نصحتها بيني وبينها تخيلوا !! قامت تسبني انا وتتكلم عليه بالباطل وتطرش رسايل للاعضاء اني انسانه مب زينه ومن الكلام اللي لايودي ولاييب ... انا عرفت لان فيه كم عضو وعضوه حذروني منها وطرشولي رسايلها اللي تحمل تقريبا نفس التشهير ,, طبعا مارديت عليها ولابرد لاني وكلت الله عليها وهو حسبي وبنوقف جدامه في يوم من الايام وكلي يقين ان الله بينصفني ...
ما ادري هذا مرض نفسي والا حب استعطاف وكسب لجرعات اهتمام هي مب محصلتنها في حياتها الواقعيه ؟!
انا كتبت هالموضوع يابنات بمثابه النصيحه الجماعيه والتذكره لكل وحده منا انا مانصدق كل شي ينكتب في النت لانّا لو فعلا سوينا هالشي بنستوي مثل اللي يحكم على الناس من دون مايسمعهم يعني حكم من طرف واحد واللي اكيد بيكون ظالم واي اخت تتشكي من اهلها وزوجها اقولها حاسبي لان فيه ناس ممكن يعرفونج ويفضحونج برع النت وتسببين لنفسج مشاكل انتي في غني عنها ... واتقي الله انج تظلمين حد بس لانج تحكمين عليه من وجهة نظرج اللي يمكن تكون غلط !!!
وسلامتكم
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
مرض نفسي والا حب استعطاف وكسب لجرعات اهتمام هي مب محصلتنها في حياتها الواقعيه ؟!
انا معاج في كل هالاسباب
الله يهديها
ويستر عليها وع يميع المسلمين
__________________________________________________ __________
>>>> الرد الثاني :
المشاركة الأصلية كتبت بواسطة ذكريات امي
مرض نفسي والا حب استعطاف وكسب لجرعات اهتمام هي مب محصلتنها في حياتها الواقعيه ؟!
انا معاج في كل هالاسباب
الله يهديها
ويستر عليها وع يميع المسلمين
مرحبتين الغاليه ..
شرفتيني بمرورج العذب ... ويهدينا جميعا اللهم آمين .
الله يستر علينا فوق الارض وتحت الارض ويوم العرض ... وعلى جميع من يبا الستر .. لكن للأسف بعض الناس الله ساترنهم وهم يصرون الايفضحون عمارهم ...
سعدت باشراقتك عزيزتي ...
__________________________________________________ __________
>>>> الرد الثالث :
يمكن انها ناقصها اهتمام او حنان
بس طريقتها اكبر غلللللط
ويمكن انفصام بالشخصية
مانقول الا الله يشفيها ان شاء الله
__________________________________________________ __________
>>>> الرد الرابع :
الحمدلله .. والله لو مصيبه في بيتي .. لايمكن اقولها ع النت .. لااااااااايمكن اظهر اسرار بيتي برا ..
استغرب من الي يشتكن ويلومن ويظهرن مشاكلهن بشكل دقيق
المنتدى هذا يدشه اغلب حريم الامارات .. ولابد بتنعرف صاحبة الموضوع من موضوعها ..
استغفر الله .. وانا بصراحه ما اصدق اي شي ينكتب ..
__________________________________________________ __________
>>>> الرد الخامس :
يمكن انها ناقصها اهتمام او حنان
بس طريقتها اكبر غلللللط
ويمكن انفصام بالشخصية
مانقول الا الله يشفيها ان شاء الله
مرحبا ملايين الغاليه ..
البعض مايشوف انه غلط ابداً ... وكل انسان تمر عليه لحظات يكون فيها بحاجه لحنان او اهتمام ومب شرط يحصله .. وهذا مب مبرر له كي يجعل من نفسه قصه تلوكها الالسن وندره يتندّر بها في المجالس !!
الله يشفي قلوبنا وقلوب المسلمين والمسلمات ويجعلها عامره بتقوى الله
كل التحايا لمرورك الندّي اختي
رد مع اقتباس
