انا خلاص بنفجر من هالانسان .. بيجلطني والله
ياربي شو هالبلوة من وين طلعلي هذا ... شو مسوية بدنيتي انا عشان الله يعطيني واحد مثل هذا
استغفر الله ياربي .. والله الواحد لومادينه وعقله والا ولله جان سويت شي بعمري ولا ذبحته هو و افتكيت
انا مو عارفة شو اسوي وياه والا باي طريق اوصله
شو المفروض الحرمة تسوي اكثر عن اللي انا سويته عشان تحافظ على ريلها
يعني مثل ما يقولون رضينا بالهم و الهم مو راضي
تخيلو البارحة الفجر خطر في بالي اقوله نسير العمرة بنية الصلح و تحمست وايد حتى حطيت الموضوع هني قلت عشان تدعولي انه يوافق
https://forum.uaewomen.net/showthread.php?t=673628
ومارقدت البارحة طول الليل و الصبح بعد ماسارت بنتي الروضة بعد مارقدت من كثر ما اني متحمسة للفكرة و احس ان الله الهمني للحل اللي بيردنا و يخلينا نبدا صفحة جديدة
لين الساعة عشر صليت ركعتين الحاجة عقب اتصلت بريلي (الله يعور قلبه شرات ماهو معور قلبي) اتصلت مرتين مارد مع انه طبعا يكون واعي هالوقت ... فطرشتله مسج اقوله الفكرة وباسلوب هادي وترجي و كل شي.. و تميت اتريا طول اليوم .. لا رقدت ولا طلعت و لا سويت اي شي ... طول يومي يالسة بهالحجرة ادعي انه يتصل و يوافق بس بالمرة سوالي طاف
رديت عقب المغرب اتصلت فيه اول مرة مارد اترييت شوي عقب بعد اتصلت جان يصك التلفون
انزين خله حتى يرد يقول لاء ما بسير او ما ابا احاول اي شي بس ما يطنشني جيه
والله من عقب اخر اتصال و انا يالسة في الحمام اصيح عشان بناتي ما يشوفوني حتى ما عشيتهم طرشتهم عند البشكارة تعشيهم و هاي اول مرة اسويها.. اتعشوا وردوا و انا بعدني اصيح في الحمام .. و تموا يدقون علي عشان ارقدهم ما قدرت اطلع دموعي ماتوقف و عيوني ورمت و حاتي حالة ما قدرت اخليهم يشوفوني جي .. لين اخر ما هيت و طلعت لقيتهم رقدوا جدام التلفزيون جان ارد اصيح مرة ثانية عشان تقصيري وياهم ...
شو هالانسان؟؟ والله خلاص انا مع كل موقف يسويه احس عمري خلاص كرهته بس ارد اقول لعمري لاء اصبري عشان البنات .. و هو لاداري فيني و لا في البنات .. خلاص والله يأست منه ماعرف شو اسويله اكثر عن جي و على شو مو من كثر الفرحة اللي كان معيشني فيها
حسبي الله فيه الله ينتقم منه شو هالعذاب اللي معيشني فيه ..خلاص تعبت
رد مع اقتباس
