عنوان الموضوع : كل يوم اموت 100 مرة ،،، بنات بمووووووووووت خلاص تعبت مرضت نفسيا و جسديا
مقدم من طرف منتديات الضمير العربي


السلام عليكم




عندي مشكلة و تعبانة نفسيا منها
ما عندي حد اشتكي له
وانا من طبعي هادية ما ارد وما احب اغلط ع حد




انا متزوجة
و ساكنة بغرفة و حمام في بيت أهل زوجي
و كان شرطي قبل الزواج سكن بروحي
سواء شقة او بيت او اللي يقدر عليه
و خبرني أن عليه ديون بس ما عرفت المبلغ
لين لما تزوجت عرفت معاناته شخصيا
ريلي دوامه شهر دوام و شهر اجازة
شهر ما اجوفه خير شر





و بالعكس بعد ما عاشرته و كنت وياه ها العمر
قلت يالله هذا دوري
ما قصر وياي أنا ما بقصر
و فعلا حطيت ايدي بإيده عسب نسوي بيت المستقبل و اتفقنا و خلصنا امورنا






الحين شو اقولكم بنات
دخلت بيت عاداتهم غير عني نهائيا
مب اجتماعييين ع عكسي تماما
ما يطلعون ولا مكان لا رحلة لا مكان لا بيت حد
كأنهم ساكنين في جزيرة بروحهم



و ما شاء الله عددهم فوق ال 18 اللي ف البيت



ياخذون من ريلي مبالغ كل فترة للعلم مديون
و ما يتم شي و يسافرون فيها ؟؟؟؟؟؟؟ مع انه يعطيهم كل شهر مبلغ ثابت بس بعدهم يطلبون
و يدرون عليه ديون الدنيا بس ما ادري ليش جي
ايى عندي و يتضارب وياي و يطلع كل اللي في خاطره علي
مو مشكلة عارفة ديونه و مقدرة


ارجع مع ريلي الساعه 12 يوم الجمعة
راجعين من فلم يتحرطمون
اطلع مكان يتحرطمون
اسير عزيمة يتحرطمون
اسير عرس يتحرطمون
تدرون قبل كنت ازعل بس اسمع من هني و اطنش
وما احب ارد ولا اجرح حد ابدا


للعلم اجاملهم و اسير اعراسهم و عزايمهم
فلانه ربت فلانه بتعرس و مع الهدية بالرغم ما يتم لي فلس نهاية الشهر
بالعكس انا احب ازور الناس
و احب اروح لهم مب زعلانه



و يتصلون في ريلي انتوا تطلعون ولا جنكم في البيت



يوم الخميس اسير بيت اهلي
يوم الجمعة مع بو عيالي
يوم السبت ايلس مع اهل ريلي




باجي الايام الصبح دوام انش الفير لين صلاة العصر
من أرجع
والله يا بنات ما يتم لي غداء
يخلصون كل الغداء
أكل خبز و جبن
ما اذكر متى اخر مرة كلت فيها عيش غير ف الويك اند
ولا اطلب لي من مكان




و يوم ريلي موجود نفس الشي
اسير المطبخ اركض بعباتي وانا رادة من دوامي اسوي و اخلص و احط له
و اخذ لي شور سريع و اشيل اكلي ف السيارة لو كان ساندويج
اكل ف السيارة و اسوق
كله عشان خاطره ريلي زين الحمد الله


يجبروني اسوي غداء وانا ما ارجع الا ع صلاة العصر
و عقب اسير الجامعة
مع ان لو سوولي زيادة ما بيصير فيهم شي
،،، العصر دراستي
غسيل و كوي علي
ما تم لي لا ظهر ولا شي في جسمي
ارقد وما اييني رقاد من كثر ما تعبانة جسديا و نفسيا




ريلي يجوف له فلم الساعه 10 المساء
يلقاني اشخر ع طول
من كثر التعب
ما فيني حيل لشي


و الحين يتحكمون ف طلعتي و دخلتي
تميت ساكتة قلت له أول مرة ان شاء الله
من عيوني بخبرهم كلما ما اطلع


و رمست ريلي لاني ما احب اجرحهم
قلت له حميتي ما تزوركم يوميا؟؟؟؟؟؟؟؟؟
انا يوم واحد بس بيت اهلي ليش جي
اختك تزوجت
طلبت عمتي ملحق لها عسب تطلع و تدخل على كيفها!!
و المشكلة تقول يدامي لازم يتضايج بنات
وانا عطوني غرفة صغيرة بالرغم ان عندهم غرف وايييدة
وانا استأذن و جي يصير فيني؟


ليش ترضون ع بنات الناس و ع بناتكم ما ترضون فيهم





ابغي اييب خدامة ع الاقل تغسل لي
و تكوي لين ما اخلص دراستي
تتحرطم عمتي
مع اني بيبها من فلوسي
ريلي يقول لو بنطلع ف بيتنا بييب لج الحين اسكتي
بناتج عندهم خدم و حشم
سكت و بعلت و سكت ما رديت عسب لا اجرحهم


مع ان عندهم خدامتين و فاضيات ما عندهم شغل
حتى والله ارجع اغسل ملابسي بسرعه و اطلب منها تنشرهم
تقول ماما سوي قرقررررررر



خلاص قررت في الشهر اللي يكون اجازة ارقد بيت اهلي
بس ريلي مب راضي ابدا ( لانه اهله ما يعيبهم )
و يوم اسير بيت اهلي


يتصل فيني و هو ف دوامه
ما اكون مكملة ساعه في بيت اهلي
طبعا يوم الخميس اروح لهم ،،،، والله مشتاقة لهم موت
( ارجعي البيت بسرعه)
و اهلي دوم يقولون لي يعاتبوني ما ايى عندهم اقولهم مشغولة
وانا من الصوب الثاني ريلي يمنعني بسبب اهله



و اكون عارفة من داخلي انه عمتي او عمي متصلين فيه عسب ارجع



و يوم يرجع ريلي من دوامه اجيك القى اتصال منهم
قبل لا يتصل فيني بدقيقة



كلما يعصب علي نفس الشي اجبك و القى اتصال منهم
وانا متضايجة تعبانة ع الاقل في بيت اهلي
محد يقول لي شي يحبوني
يبغون راحتي


و ابوي كل يوم يتصل بي تعالي باتي عندنا
و متضايج يقول البيت فاضي علينا


قلت بتصل فيه عسب يرمس ريلي
يقوله متضايجين بروحنا خلى تبات عندنا يوم انت مب موجود
و قالي بيسوي لي غرفة حقي و بيجهزها
والله مرة شليت شنطتي قلت له بطلع بطلع ولو طلعت ما برجع



انا انسانة ليش ها المعاملة
باس ريلي و راسي
و تميت




مجاملات اجامل ما عندي اي مشكلة



هدايا اودي
سوالف اسولف
كلما حد دخل بيتهم والله اتعرف عليهم
و خلاص بيني و بينهم اتصالات و مسجات


ذهب اييب لها كل عيد
شرات ما اودي لامي اييب لها بالضبط


حتى يوم عندهم عرس يتصلون فيني من كثر ما يعزوني اهل زوجي اقصد عمومتهم
و اسير
بالعكس ما عندي مشكلة اجامل اهل زوجي


شو اسوي بعمري بموت
متضايجة




شوروا علي ارمس ابوويه يرمسه بشكل غير مباشر
ابوي شاطر و عاقل و متفهم ما بيخبره اني خبرته





بنات حبايبي

حاليا نبني بيتنا انا و بو عيالي
بس عارفين ها الامور اطول يعني يبغي لنا سنة لين ما اطلع
بس والله اني اموت كل دقيقة اصبر عمري
اقول ها السنة ان شاء الله بتمر مرور الكرام
بس تعبت وصلت حدي اخاف اطلع وما ارجع
اخاف انش يوم و احط قشي و اطلع ولو طلعت ما برجع
تعبانة

حتى مانعة الحمل لين ما اخلص و خاطري ف الياهل ما عندي حد يساعدني ؟
انش الفير اهمس له ابغي نونو بس ما اقدر

ولو ريلي ساعدني ف شي بسيط غسل سوي شي
وانا ف الدوام والله البيت فوق تحت علي و تعلق علي و و و و

وانا اطنش بتييني جلطة من كثر ما اطنش
بييني مرض نفسي من كثر ما اطنش وما ارد و اسكت
وكل ها لاني احترمهم وما ابغي ازعلهم
شو اسوي بأكثر

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
لي عــــــــــــودة

__________________________________________________ __________

>>>> الرد الثاني :
واللـــه حبيبتي عورتيــلي قلبي ... ماعرف شقولج .. احس اهله ماسكينه مســكه
بس ان شاء الله ربــي يريحج ويخفف علــــيييج ويجـــــــازييييج الخير ع كل اللي تسوينه
وان شـــــــــــــــاء الله بعد هالتعب راحــــــــــــــــــــــــه .. بـإذن اللـــه

__________________________________________________ __________

>>>> الرد الثالث :
الله يكون في عونج

ماعرف ليش معظم العمّات يعاملون كناتهم هالمعاملة
حق بناتهم يتشرطوون !! بيت بروحهم ولا ملحق روحهم ، بشكارة ، تكمل دراستها ... والمزيد من الطلبات التعجيزية
وبنت الناس محرووومة حتى من الراحه
يحاسبونها حتى في رقادها ما تتهنا
الحمدلله والشكر..


الله يفك كربج عزيزتي .. والله يصبرج
أنا اتوقع لو كنت مكانج ما بتحمل اللي انتي تمرين فيه جان من زماان تطلقت .. أستغفر الله
أنا راحتي أهم من أي شي في الدنياااا
إذا زوجي مب قادر يحصلي حل مع أهله .. فأفضل حل من وجهة نظري الانفصال
ما اقدر أضيع حياتي وأعيش بهم ونكد من عقب ماكنت معززة مكرمة في بيت أهلي

الله المستعان

__________________________________________________ __________

>>>> الرد الرابع :
حبيبتي

افضل حل انج تطلعين من عندهم

لو ريلج ما يقدر عالاجار

واهلج البيت فاضي عليهم

سيري عندهم سوي لج ملحق او لو في جهزيه وايلسي فيه

وادفعوا مصاريف للبيت حتى ما تكونون عاله

صراحه هاي موب عيشه

انتي موب ملزومه تستاذنين منهم وريلج يدري

ولا ملزومه تكسبين ودهم بالهدايا كل ساع

بيزاتج انتي اولى فيها

عنبوه حتى اكل ما تحصلون

شو هالاهل عفانا الله وين بيروحون من ربهم

الظلم ظلمات يوم القيامه

ناس ما تخاف الله

لازم تاخذين موقف صارم لان سكوتج ورضوخج هذا هو الي خلاهم يطغون

__________________________________________________ __________

>>>> الرد الخامس :
الله يعينج حبيبتي
اذا تقولين الوالد بيعرف يتصرف ويقنع ريلج بطريقه غير مباشره خليه يرمسه .. يمكن يتلوم من أبوج ويخليج تباتين ف بيت أهلج وهو مداوم ... ما عليج رياييل يعرفون يتفاهمون
بس انتي ﻻ تبينين ﻷبوج انه أهله محرضينه .. خل يكلمه ع أساس انه هو يباج تباتين عندهم ..

وربي يوفقج ويحنن قلب ريلج وأهله عليج