عنوان الموضوع : ما عرف شو الحل ؟؟؟ رايكم في مشكلتي.. المومة و الطفل
مقدم من طرف منتديات الضمير العربي
السلام عليكم و رحمة الله و بركاته ...
شحالكن خواتي عساكن بخير و نعمه ...
عندي مشكله واتمنى القى عندكن الحل ...
أنا متزوجه قبل 7 شهور و حالياً أنا موجوده فبيت أهلي من شهرين "واحتمال كبير أطلق"..
السالفه يا خواتي أن ريلي ضربني " الضرب كان شدي من أكتافي بقوه و شد شعري ودفعي للخلف كذا مره لدرجه أن شعري تقطع وصار ف جسمي علامات و كدمات, وخذت فتره تعبانه و احس جسمي كله مكسر "
المهم ابوي راح بلغ عليه ورحت انا المستشفى وسويت فحص طبي عن الاصابات اللي كانت فيني , المهم أن ريلي مايا يستسمح منى و لا من أهلي و مسوي نفسه أنه ما سوا شي , اخر شي حولونا للاصلاح الاسري بس أبوي يطالب بطلاقي لأن نحن ما شفنا شي من الريال يرد الاعتبار أو الاحترام لي .
الضرابه صارت بسبت التليفون , ريلي من النوع اللي وايد يشك , كان لازم يوميا يجيك على الفون و اخر مره وحده من ربيعاتي عاطتني رقم وحده من ربعنا اللي صارلي فتره ما عرف عنها شي المهم يوم كان يجيك شاف الرقم وقالي انتي ماخذه هالرقم من تليفوني و صارت هالمشاده , وعلى فكره هاي مو أول مره هاي ثاني مره يسوي فيني جي ... ريلي وايد عصبي وأنا أعرف هالشي بس لازم أي شي تافه بيسوي عليه شي كبير ...
أنا أبا أرد له بس هو ما سوالي احترام و لين أحين يقول انا ما بسوي شي إذا أنتي تبين ردي البيت .... أنا اعرف أن ابوي اللي يسويه في مصلحتي و نحن بدو و العرف عندنا يقول البنت خذها حشمه و اذا شفت منها شي روح لاهلها , بس والله ما كنت مقصره معاه ولا شي ... وكنت صابره ... بس خلاص تعبت ... أنا متوكله ع رب العالمين , و أنا أعرف أنه ماراح يسوي شي , عشان يستسمح مني أو يرضيني , فهل الطلاق الحل ؟
اختكن فالله ..
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
__________________________________________________ __________
>>>> الرد الثاني :
لا تطلبين الطلاق ...الي سواه مب شوي يعني حتى الطريقة الي ضربج بها تخوف الصراحة ...هذا و انتوا توكم ما كملتوا السنة متزوجين ...تخيلي لا قدر الله ضربج تسبب لج ف عاهة ...
شوفي شو بيستوي في التوجيه الأسري و شو بيكون كلامه المفروض إذا ما يبا يطلقج و تصالحتوا يمضونه تعهد ...لا تردين له من غير ما يعتذر و يعرف غلطه ..لأنه بيتمادى أكثر و بيضربج أكثر ...نحن مسلمات كرمنا الإسلام فليش نذل اعمارنا ...أنا الي قهرني أنه رافض يعترف بغلطه و رافض يعتذر ...ضربج أوكي غلطة بس أنه يرفض يعترف بغلطه ويعتذر قوية الصراحة....يعني ناوي يتمادى و يسوي أكثر ...ما أحسه عنده حتى وازع ديني و ضمير يأنبه عالي سواه ...وهالنوعية من الرياييل صعب العيشة وياه ...إذا ما تغير حياتج معاه بتكون معاناة...
أنا ما أقول اتركيه و لا أقول لج طلقي منه لا لا بس طالما وصل الموضوع التوجيه الأسري كملي و شوفي شو بيقول وأنتي قولي لهم ما أباه يمد إيده علي مرة ثانية و أباه يعترف أنه غلطان في حقي بالي سواه و يعتذر مني و من والدي عقب برد وياه البيت ...فيه هالرقم لمعالجة العنف الأسري اتصلي عليهم أو خلي والدج يتواصل وياهم 8001111 ...
وطمنينا عليج , الله يفرج همج و يهدي ريلج و يي يبوس راسج و يعتذر منج و تردين بيتج بعزة نفس و كرامة يارب...
__________________________________________________ __________
>>>> الرد الثالث :
حبيبتي في قاعده
البخيل و الشكاك ماينفعون للزواج
الله بيعوضج خير ان شاء الله
__________________________________________________ __________
>>>> الرد الرابع :
ربي يحسن أمورك ان شاء الله
أنصحك تحكمي امام عال بينكما
او حكم من اهله و حكم ن أهلك
آخر الدواء الطلاق لا تستعجلي قبل اتخاذ أسباب صلح و اصلاح الزوج
و تبارك الله الامارات مليانة بالأئمة الصالحين اللي ممكن يتوسطولك معاه و يرققوا قلبه عزيزت
ربي يسخرلك زوجك و يجعلك قرة عينه يا رب
__________________________________________________ __________
>>>> الرد الخامس :
استخيري حبيبتي
يمكن الاصلاح الاسري يصلحون من بينكم
والله ييسر امورج للي فيه خير لج
رد مع اقتباس
